ಬುಧಾನಂದ ಶಿವಳ್ಳಿ

"ತುಳು ಪಾತೆರೊ" ಬುಧಾನಂದ ಶಿವಳ್ಳ ಅರೆನ ಪುಸ್ತಕ ಅರಪುನ ಕೊಂಡಿ

ಬುಧಾನಂದ ಶಿವಳ್ಳಿ ಇನ್ಪಿನ ಕಾವ್ಯನಾಮೊಡು "ತುಳು ಪಾತೆರೊ  : ತುಳು ಭಾಷೆದ ಒಂಜಿ ಭಾಷಾಶಾಸ್ತ್ರ ಬೊಕ ವ್ಯಾಕರಣ" ಇನ್ಪಿನ ಪುಸ್ತಕ ರಚನೆ ಮಲ್ತ್ ದಿನ ಲೇಖಕೆರೆನ ಮೂಲ ಪುದರ್ ಸರಕಾರೀ ದಾಖಲೆಲೆಡ್ ಕೆ.ಬೂದಾ ಇಂದ್ ದ್. ಸ್ನೇಹಿತೆರೆನ ಅಂಚನೆ ಕುಟುಮ ವರ್ಗೊಡು ಬುಧಾನಂದೆರ್ ಇಂದ್ ದ್ ಪಣೊಂದಿತ್ತೆರ್. ಆರ್ ಪುಟುದಿನ ಊರು ಉಡುಪಿದ ಶಿವಳ್ಳಿ ಗ್ರಾಮ. ಅಂಚಾದ್ ಕಾವ್ಯನಾಮ ಬುಧಾನಂದ ಶಿವಳ್ಳಿ ಇಂದ್ ಆಯ್ಕೆ ಆಂಡ್.ತುಳು ಪಾತೆರೊ (ಪುಸ್ತಕ) ಲೇಖನ ಪುಟೊನು ತೂಲೆ.

ಬುಧಾನಂದ ಶಿವಳ್ಳಿ (೧೯೨೩ - ೧೯೮೨)

ಬುಧಾನಂದೆರ್ ದಿನಾಂಕ ೧೬-೨-೧೯೨೩ ದಾನಿ ಉಡುಪಿ ಶಿವಳ್ಳಿದ ಕಲ್ಸಂಕದ ಕೈತಲ್ ಶ್ರೀಕೃಷ್ಣ ಮಠತ್ತಾ ವಠಾರದ ಪರಿಸರೊಡು ಜೀವನ ಮಲ್ತೊಂದು ಇತ್ತಿನ ಒಂಜಿ ಸಾಮಾನ್ಯ ಮರಕಲ ಕುಟುಮೊಡು ಪುಟುದಿನಾರ್.ಕಡಿಯಾಳಿದ ಕ್ರಿಶ್ಚಿಯನ್ ಹೈಸ್ಕೂಲುಡು ಓದುದು ಮೆಟ್ರಿಕ್ ಪರೀಕ್ಷೆ ಪಾಸು ಮಲ್ತೆರ್. ಶಾಲೆಡ್ ಓದುನಗ ದಿ. ಡಾ.ಕು.ಶಿ.ಹರಿದಾಸ ಭಟ್ರು ಅರೆನ ಸಹಪಾಠಿ ಆದಿತ್ತೆರ್.ಮೆಟ್ರಿಕ್ ಆಯಿನೆಡ್ದ್ ಬೊಕ ವಂತೆ ಸಮಯ ಖಾಸಗಿ ಉದ್ಯೋಗ ಮಲ್ತ್ ದ್ ಬೊಕ ಮದ್ರಾಸ್ ರಾಜ್ಯದ ಕೃಷಿ ಇಲಾಖೆಡ್ ಕೊಯಮುತ್ತೂರುಡು ಗುಮಾಸ್ತೆಯಾದ್ ಕೆಲಸೊಗು ಸೇರಿಯೆರ್. ಕೊಯಮುತ್ತೂರುದ ಸೇವೆ ಅರೆಗ್ ತಮಿಳು ಭಾಷೆ ಕಲ್ಪರೆ, ತಮಿಳುದ್ ಸಂಸ್ಕೃತಿ ಅಂಚನೆ ಪರ ಗ್ರಂಥೊಲೆನ ಪರಿಚಯ ಮಲ್ತೊಣರೆ ಅಂಚನೆ ತಮಿಳು ತುಳು ದ್ರಾವಿಡ ಭಾಷಾ ಸಂಬಂಧಲೆನ್ ತೆರಿಯೊಣರೆ ಅವಕಾಶ ಮಲ್ತ್ ಕೊರುಂಡು.

ಅದಗ, ಭಾಷಾವಾರು ಪ್ರಾಂತ್ಯೊಲು ರಚನೆ ಆಪಿನೆಡ್ದ್ ದುಂಬು, ಇತ್ತೆದ ಕರಾವಳಿ ಕರ್ನಾಟಕದ ದಕ್ಷಿಣ ಕನ್ನಡ ಭಾಗೋಲು ಮದ್ರಾಸ್ ಪ್ರಾಂತ್ಯೊಗು ಸೇರ್ದಿತ್ತಾ. ಕ್ರಮೇಣ, ೧೯೫೭ಡು ಭಾಷಾವಾರು ಪ್ರಾಂತ್ಯೊಲು ರಚನೆಯಾಯ. ಕನ್ನಡ ಪಾತೆರುನಕಲೆನ್ ಒಟ್ಟು ಮಲ್ತ್ ದ್ ಮೈಸೂರು ರಾಜ್ಯ ಅಸ್ಠಿತ್ವೊಗು ಬತ್ತ್ಂಡ್, ತುಳು ಪಾತೆರುನಕುಲು (ಅಂಚನೆ ಕೊಂಕಣಿ ಕೊಡವ ಬ್ಯಾರಿ ಪಾತೆರುನಕುಲು)ಮೈಸೂರು ರಾಜ್ಯದುಲಾಯಿ ಸೇರಿಯೆರ್. ಅದಗ ದುಂಬುದ ಮದ್ರಾಸ್ ಪ್ರಾಂತ್ಯದ ಸೇವೆಡ್ ಇತ್ತಿನಕಲೆನ್ ವರ್ಗಾವಣೆ ಮಲ್ಪುನ ಸಮಯೊಡು ಬೂದೆರೆಗ್ ಕುಡ್ಲದ ಕೃಷಿ ಇಲಾಖೆದ ಕಚೇರಿಗ್ ವರ್ಗ ಮಲ್ತೆರ್. ಮೈಸೂರು ರಾಜ್ಯದ್ ಕೃಷಿ ಇಲಾಖೆಡ್ ಮೆರೆಗ್ ಕ್ರಮೇಣ ವರ್ಗೊಲು ಆನಗ ಮಡಿಕೇರಿ, ನುಗು,ಮೈಸೂರು, ಚಿತ್ರದುರ್ಗ ಇಂಚ ಮಾತಾ ಕನ್ನಡದ್ ಊರುಲೆಡ್ ಆಯಾ ಊರುದ ಭಾಷೆ ಸಂಸ್ಕೃತಿ ಪರಂಪರೆಲೆನ ಪರಿಚಯ ಮಲ್ತೊಣುನ ಅವಕಾಶ ತಿಕ್ಕ್ಂಡ್.

ಮೈಸೂರುದ ಸೇವಾಕಾಲೊಡು ಆರ್ ಪದೋನ್ನತಿಯಾದ್ ಸಹಾಯಕ ಲೆಕ್ಕಾಧಿಕಾರಿಯಾಯೆರ್. ಅಂಚನೆ ೧೯೭೭ ಡು ಮೈಸೂರುಡು ಸರಕಾರಿ ಸೇವೆಡ್ದ್ ನಿವೃತ್ತಿಯಾಯೆರ್. ಮೈಸೂರುದ್ ವಿದ್ಯಾಪರಿಸರ, ವಿಶ್ವವಿದ್ಯಾನಿಲಯ, ಅಪೂರ್ವ ಗ್ರಂಥಾಲಯೊಲು ಅರೆನ ಕವಿ ಮನಸಿನ್ ಜಾಗ್ರತ ಮಲ್ತ್ ದ್ ಅರಳಾದಿತ್ತಾ.

ನಿವೃತ್ತರಾಯಿನ್ ಬೊಕ್ಕ ಆರ್ ಮೈಸೂರು ವಿಶ್ವವಿದ್ಯಾನಿಲಯದ ತೆರೆಯಿನ ವಿಶ್ವವಿದ್ಯಾನಿಲಯ ಯೋಜನೆದ ಅಡಿಟ್ ಕಲ್ತ್ ದ್ ಎಂ.ಎ (ಇಂಗ್ಲೀಷ್ ಸಾಹಿತ್ಯ) ದ ಸ್ನಾತಕೋತ್ತರ ಪದವಿನ್ ಪಡೆವೊಂಡೆರ್. ಇಂಗ್ಲೀಷ್ ಸಾಹಿತ್ಯ ಓದುನಗ ಅರೆಗ್ ತುಳು ಸಾಹಿತ್ಯ ಭಾಷೆ ಸಂಸ್ಕೃತಿ ಪರಂಪರೆಲೆನ ವಿಷಯೊಡು ಆಸಕ್ತಿ ಎಚ್ಚಾಂಡ್. ಮೈಸೂರುದ ಮಹಾರಾಜಾ ಕಾಲೇಜಿದ ಅಂಚನೆ ವಿಶ್ವವಿದ್ಯಾನಿಲಯದ ಗ್ರಂಥಾಲಯೊಲೆನ ವಿಪುಲ ಪುಸ್ತಕ ಸಂಪತ್ತುಲೆನ ಸದುಪಯೋಗ ಪಡೆವೊಂಡೆರ್. ತುಳು ಸಂಸ್ಕೃತಿ ಸಂಶೋಧನೆಲೆಗ್ ಮಾರ್ಗದರ್ಶಿಯಾದಿಪ್ಪುನ ಡಾ. ಗುರುರಾಜ ಭಟ್ಟರೆನ, ಅಂಚನೆ ಡಾ ಕೆ.ವಿ .ರಮೇಶೆರ್ ಪಣಿಯಾಡಿ ಇಂಚಿನಕುಲೆನ ಕೃತಿಕುಲೆನ ಪ್ರಭಾವೊಗು ತಿಕಿಯೆರ್. ಲಭ್ಯ ಮಾಹಿತಿಲೆನ್ ಸಂಗ್ರಹ ಮಲ್ತೊಂದು ಅವೆನ್ ಸೂಕ್ತವಾದ್ ಮನನ, ಪರಾಮರ್ಶೆ ಮಲ್ತೊಂದು ತುಳುಟೆ ಬರೆವೊಡು ಇಂದ್ ನಿರ್ಧಾರೊಡು ತುಳು ಪಾತೆರೊ ಇನ್ಪಿನ ಭಾಷಾ ಶಾಸ್ತ್ರ ಬೊಕ ವ್ಯಾಕರಣ ದ್ ಕೃತಿನ್ ೧೯೭೯-೮೦ ದ್ ಕಾಲಾವಧಿಡ್ ರಚನೆ ಮಲ್ತೆರ್.