ತೋಕೂರು
ತೋಕೂರು[ಸಂಪೊಲಿಪುಲೆ]
ತುಳುನಾಡ್‍ಡ್ ಉಪ್ಪುನಂಚಿನ ಊರುಲೆಡ್ ಬಾರೀ ಪಿರಾಕ್ ಡ್ ದಾಖಲೆಡ್ ಒರಿದ್ ಬೈದಿನಂಚಿನ ಪುದರ್‍ದ ಊರು ತೋಕೂರು. ಕೂಲೂರ ಸುದೆತ್ತ ಕೈ ಈ ಮೈಟ್ ಇತ್ತ್ಂಡ್. ಅಂಚಾದ್ ದುಂಬುದ ಕಾಲೊಡು ಬೋಡಾಯಿನಡೆ ಓಡೊಡು ಪೋಪಿನವು ಮಾಮೂಲಿಯಾದಿತ್ತ್ಂಡ್.
ಒನ್ನೊದ ಕಾಲೊಡು[ಸಂಪೊಲಿಪುಲೆ]
ಚರಿತ್ರೆದ ದೃಷ್ಟಿಡ್ ತೂನಗ ತೋಕೂರು ಜಾರಂದಾಯ ಸಾನೊಡು ತಿಕಿನ ಏಳನೇ ಶತಮಾನದ ದಾನ ಶಾಸನೊಡು ಈ ಊರು ತೋಕೂರುಂದೇ ಉಂಡು. ಐಡ್ದ್ ಬೊಕ್ಕದ ದಿನೊಕ್ಲೆಗ್ ಬನ್ನಗ ಶಾಲಿವಾಹನ ಶಕ ೧೩೧೨ಟ್ಟ್ ಕರಿಯಂಗಳ ಗ್ರಾಮದ ಪಲ್ಲಿಪಾಡಿಡ್ ಪಾಡ್ದಿ ಶಾಸನೊಡು ತೋಕೂರು ಗುತ್ತುದ ಕಿಟ್ಟುಸೆಟ್ರೆನ (ಪೇಜಾರ ಶೀಮೆಯ ತೊಕುರಗುತ್ತಿನಲು ಬಾಳಿಹ ಮಾರಂಸೇಖನ ಸಂತತಿಯಲು ಮಾಸಾದಿಕ ಜಯಿನ ಕಿಟ್ಟುಸೆಟ್ಟಿಯನ್ನು ಸಹವಾಗಿ) ಪುದರ್ ಬರ್ಪುಂಡು. ಐಡ್ದ್ ಬೊಕ್ಕದ ನಂದೊಲ್ಗೆ ಚೊಂಬುದ ಪಾಲೆಡ್ ಬರೆಯಿನ(ತಾಮ್ರ) ಶಾಸನೊಡುಲಾ ಈ ಊರುದ ಪುದರ್ ಉಂಡು. ಬೆದ್ರದ ಎರಮನೆತ ರಿಕಾರ್ಡ್ ಲೆಡ್ ಲಾ ತೋಕೂರ ಗುತ್ತುದ ಯಜಮಾಂಟ್ರ್ ಬೆದ್ರ ಚೌಟೆರೆ ಸೀಮೆದ ಜಬಾದಾರಿದ ನಾಲ್ ಇಲ್ಲಲೆಡ್ ಒಂಜಿಂದ್ ಲಾ, ಅವೆತ್ತ ಜಬಾದಾರಿ ಬೊಕ್ಕ ಅವೆಕ್ಕುಪ್ಪುನ ರಾಜಮರ್ಯಾದಿದ ಮಲ್ಲ ಮಟ್ಟ್ ಲೆನ ವಿವರೊಲು ಉಲ್ಲ.
ತುಳು ಜನಪದ ಸಾಹಿತ್ಯೊಡು[ಸಂಪೊಲಿಪುಲೆ]
ಜಾರಂದಾಯ ಪಾಡ್ದನ, ಜುಮಾದಿ ಪಾಡ್ದನೊಲೆಡ್ ತೋಕೂರುಗು ಎಂಚ ಬೈದಿನಿ ಪನ್ಪಿನ ವಿವರೊಲು ತಿಕ್ಕುವ. ‘ಜೋಕಟ್ಟೆ’ ಪುದರ್ ಎಂಚ ಬೈದ್ಂಡ್ಂದ್ ಕೋಡ್ದಬ್ಬುನ ನುಡಿಗಟ್ಟ್ ತೆರಿಪಾವುಂಡು. ‘ತೋಕೂರ ಬದನೆಗ್ ತೊಟ್ಟಿಜ್ಜಿ’ ಪನ್ಪಿನ ಎದುರುಕತೆಲಾ ತೋಕೂರುದ ಪುದರ್ ಪನ್ಪುಂಡು. ಇಂಚ ಅನೇಕವು ತಿಕ್ಕುವ.
ಇನಿತ್ತ ದಿನೊಟ್ಟು[ಸಂಪೊಲಿಪುಲೆ]
ಇತ್ತೆದ ಮಟ್ಟ್ ಡ್ ತೂನಗ ದಕ್ಷಿಣ ಕನ್ನಡ ಜಿಲ್ಲೆದ ಮಂಗಳೂರು ತಾಲೂಕುಡು ಉಂಡು. ಈ ಗ್ರಾಮೊನು ೬೨ನೇ ತೋಕೂರುಂದು ಗುರ್ತ ಮಲ್ಪುವೆರ್. ಜೋಗಟ್ಟೆ ಈ ಊರುದ ಒಂಜಿ ಭಾಗ. ಈ ಊರುಡುಂತುಂಡ ಪಡ್ಡಾಯಿಡ್ ಪನಂಬೂರ ಬಂದರ್ ಡ್ ಕಪ್ಪಲ್, ಮೂಡಾಯಿಡ್ ಏರ್ ಪೋರ್ಟ್ ತೋಜುವ. ಕೊಂಕಣ ರೈಲ್ವೆದ ತೆನ್ಕಾಯಿದ ಕಡೆತ್ತ ಸ್ಟೇಶನ್ ತೋಕೂರುಡುಂಡು. ಊರ ನಡುಟು, ಬರಿಟ್ ಮಾರ್ಗೊಡು ಇತರ ವಾಹನೊಲು ಪೋಪ. ಊರುದ ಮಲ್ಲ ತೋಕೆ ಎಂ ಆರ್ ಪಿ ಎಲ್, ಎಚ್ ಪಿ ಸಿ ಎಲ್ ದಂಚಿನ ಕೈಗಾರಿಕೆಲೆದಡಿಟ್ ಉಂಡು. ಒರಿನ ಜಾಗೆಡ್ (ಜಾಗೆ ಪೋಯಿನಕ್ಲೆಗ್ ಜಾಗೆ ತಿಕ್ ದ್ ಕಟಿನ) ಇಲ್ಲುಲು ಉಲ್ಲ. ಇತ್ತೆಲಾ ಉಪ್ಪುನ ಜಾರಂದಾಯ ಸಾನ, ಕೋಡ್ದಬ್ಬು ಸಾನ, ಮದ್ಯ ಚಾವಡಿ, ಶತಮಾನ ಕರಿನ ಪಲ್ಲಿ, ತೋಕೂರು ಚರ್ಚ್, ತೋಕೂರು ಗುತ್ತುಲು ಪರಂಪರೆದ ಪಜ್ಜೆಲೆನ್ ತೆರಿಪಾವೊಂದುಲ್ಲ. ಈ ಊರುಡು ಇತ್ತೆ ಬಾರ್‌ದ ಬೆನ್ನಿ ನಡತೊಂದಿಜ್ಜಿ. ಪರವೂರುದಕುಲು ಮಸ್ತ್ ಜನ ಈ ಊರುಗು ಬತ್ತ್ದ್ ತೋಕೂರುದಕುಲೃ ಆದುಲ್ಲೆರ್.