ಅಂಡಮಾನ್ ಬೊಕ್ಕ ನಿಕೋಬಾರ್ ದ್ವೀಪೊಲು

ಅಂಡಮಾನ್ ಬೊಕ್ಕ ನಿಕೋಬಾರ್ ದ್ವೀಪೊಲು ನಮ ದೇಸೊದ ಕೇಂದ್ರಾಡಳಿತ ಪ್ರದೇಸೊಲೆಡ್ ಒಂಜಿ. ನೆಟ್ಟ್ ಒಟ್ಟು 836 ದ್ವೀಪೊಲು ಉಲ್ಲ. ಅವೆಟ್ 31 ದ್ವೀಪೊಲೆಡ್ ಮಾತ್ರ ಜನಕುಲು ವಾಸ ಮಲ್ತೊಂದುಲ್ಲೆರ್. ಅಂಡಮಾನ್ ಬುಕ್ಕ ನಿಕೋಬಾರ್‌ನ್ ರಡ್ಡ್ ಗುಂಪುಲಾದ್ ವಿಂಗಡಿಸದೆರ್. ಅವು- ಬಡಕಾಯಿದ ಅಂಡಮಾನ್ ದ್ವೀಪೊಲು ಬೊಕ್ಕ ತೆನ್ಕಾಯಿದ ನಿಕೋಬಾರ್ ದ್ವೀಪೊಲು. ಈ ರಡ್ಡ್ ದ್ವೀಪೊಲ್ನ ನಡುಟು 150 ಕಿ.ಮೀ ಅಗೆಲದ 'ಟೆನ್ ಡಿಗ್ರಿ ಚಾನೆಲ್' ಉಂಡು. ಅಂಡಮಾನ್ ನಿಕೋಬಾರ್‌ದ ರಾಜಧಾನಿ ಶ್ರೀ ವಿಜಯ ಪುರಂ (ಪರ ಪುದರ್ ಪೋರ್ಟ್ ಬ್ಲೇರ್). ಉಂದು ಈ ದ್ವೀಪೊದ ಮಾಮಲ್ಲ ಪೇಂಟೆಲಾ ಅಂದ್. ಶ್ರೀ ವಿಜಯಪುರಮ್ ಭಾರತದ ಚೆನ್ನೈಡ್ದ್ ಸುಮಾರು 1,190 ಕಿ.ಮೀ ಬೊಕ್ಕ ಕೋಲ್ಕತ್ತಾಡ್ದ್ 1,255 ಕಿ.ಮೀ ದೂರೊಡು ಉಂಡು. ಈ ದ್ವೀಪೊಲು ಪಡ್ಡಾಯಿಡ್ ಬಂಗಾಳ ಕೊಲ್ಲಿ ಬೊಕ್ಕ ಮೂಡಾಯಿಡ್ ಅಂಡಮಾನ್ ಸಮುದ್ರದ ನಡುಟು ಉಂಡು. ಗ್ರೇಟ್ ನಿಕೋಬಾರ್‌ದ ತೆನ್ಕಾಯಿ ಕೊಡಿಟ್ ಉಪ್ಪುನ ಇಂದಿರಾ ಪಾಯಿಂಟ್, ಭಾರತದ ಅತ್ಯಂತ ತೆನ್ಕಾಯಿದ ಕೊಡಿಯಾದುಂಡು.

ಅಂಡಮಾನ್ ಬೊಕ್ಕ ನಿಕೋಬಾರ್‌ದ ಒಟ್ಟು ಇಸ್ತೀರ್ನೊ ೮೨೪೯ ಚದರ ಕಿಲೋಮೀಟರ್ ಉಂಡು. ಅಂಚನೆ ಮುಲ್ಪದ ಒಟ್ಟು ಜನಸಂಕ್ಯೆ ೨೦೧೧ನೇ ಇಸವಿದ ಕಾನೇಸ್ಮಾರಿದ ಪ್ರಕಾರ ೩,೮೦,೫೮೧ ಉಂಡು. ಅಂಡಮಾನ್ ನಿಕೋಬಾರ್‌ಡ್ದ್ ೧೮೫ ಕಿಲೋಮೀಟರ್ ದೂರೊಡು ಇಂಡೋನೇಷ್ಯಾ, ೨೮೦ ಕಿಲೋಮೀಟರ್ ದೂರೊಡು ಮಯನ್ಮಾರ್, ೬೫೦ ಕಿಲೋಮೀಟರ್ ದೂರೊಡು ಥಾಯ್ಲ್ಯಾಂಡ್ ದೇಸೊಲು ಉಲ್ಲ. ಅತ್ತಂದೆ ಈ ದೇಸೊಲೊಟ್ಟುಗು ಸಮುದ್ರಗಡಿನ್ ಪಟ್ಟೋಂದುಂಡು. ಆಡಳಿತಾತ್ಮಕವಾದ್ ಅಂಡಮಾನ್ ನಿಕೋಬಾರ್ ದ್ವೀಪೊಲೆನ್ ೩ ವಿಬಾಗ ಮಲ್ತ್‌ದೆರ್. ಅವು ಪನ್ನಗ- ನಿಕೋಬಾರ್ ಜಿಲ್ಲೆ, ಬಡಕಾಯಿ ಅಂಡಮಾನ್ ಜಿಲ್ಲೆ ಬುಕ್ಕ ತೆಂಕಾಯಿ-ಮದ್ಯೊದ ಅಂಡಮಾನ್ ಜಿಲ್ಲೆ.

ಮುಲ್ಪದ ಮೂಲ ಅಂಡಮಾನಿ ಜನಕುಲು 30,000 ವರ್ಸೊಗ್ ದುಂಬು, ಮಧ್ಯ ಶಿಲಾಯುಗದ ಪೊರ್ತುಡ್ದೇ ಮುಲ್ಪ ಇತ್ತೆರ್ ಪಂಡ್‍ದ್ ಐತಿಹಾಸಿಕ ಅಧ್ಯಯನೊಡು ತೆರಿದ್ ಬರ್ಪುಂಡು. ಮುಲ್ಪದ ಇತಿಹಾಸ 2,200 ವರ್ಸೊ ಮುಟ್ಟ ಪಿರ ಪೋಪುಂಡು. 11ನೇ ಶತಮಾನೊಡು, ತಮಿಳು ಅರಸೆರ್ ಆಯಿನ ಚೋಳೆರ್, ಆಗ್ನೇಯ ಏಷ್ಯಾಡ್ ದಂಡಯಾತ್ರೆ ಮಲ್ಪರೆಗಾತ್ರ ಈ ದ್ವೀಪೊಲೆನ್ ಒಂಜಿ ನೌಕಾನೆಲೆತ ಲೆಕ ಗಳಸೊಂದಿತ್ತೆರ್. 1755ಡ್ ಈ ದ್ವೀಪೊಗು ಬತ್ತಿನ ಸುರುತ ಯುರೋಪಿಯನ್ನೆರ್ ಪಂಡ ಡ್ಯಾನಿಶ್ ಈಸ್ಟ್ ಇಂಡಿಯಾ ಕಂಪೆನಿ. 1868ದ ಪೊರ್ತುಡು ಈ ದ್ವೀಪೊಲು ಬ್ರಿಟಿಷ್ ಆಡಳಿತದ ಒಂಜಿ ಭಾಗ ಆಂಡ್. ರಡ್ಡನೇ ಮಹಾಯುದ್ಧದ ಪೊರ್ತುಡು, ಜಪಾನ್ ಈ ದ್ವೀಪೊಲೆನ ಮಿತ್ತ್ ದಾಳಿ ಮಲ್ತ್‌ದ್ ವಶಮಲ್ತೊಂಡ್. 1947ಡ್ ಭಾರತೊಗು ಸ್ವಾತಂತ್ರ್ಯ ತಿಕ್ಕಿಬೊಕ್ಕ, ಈ ಪ್ರದೇಶ ಭಾರತದ ಒಂಜಿ ಪ್ರಾಂತ್ಯ ಆಂಡ್. ಐಡ್ದ್ ಬೊಕ್ಕ 1950ಡ್ ಭಾರತದ ಸಂವಿಧಾನ ಜಾರಿಗ್ ಬತ್ತಿಬೊಕ್ಕ ಇಂದೆನ್ ಕೇಂದ್ರಾಡಳಿತ ಪ್ರದೇಶವಾದ್ ಗುರ್ತಿಸಯೆರ್.