ಅಝರ್‌ಬೈಜಾನ್
ಅಝರ್‌ಬೈಜಾನ್ ಅಧಿಕೃತವಾದ್ ಅಝರ್‌ಬೈಜಾನ್ ಗಣರಾಜ್ಯೊ ಪೂರ್ವ ಯುರೋಪ್ ಬುಕ್ಕ ಪಶ್ಚಿಮ ಏಷ್ಯಾದ ಗಡಿಟ್ ಇಪ್ಪುನ ಒಂಜಿ ದೇಸೊ. ಉಂದು ದಕ್ಷಿಣ ಕಾಕಸಸ್ ಪ್ರದೇಸೊದ ಒಂಜಿ ಬಾಗವಾದ್ ಉಂಡು. ಅಝರ್‌ಬೈಜಾನ್‌ದ ಮೂಡಾಯಿಡ್ ಕ್ಯಾಸ್ಪಿಯನ್ ಸಮುದ್ರ, ಬಡಕಾಯಿಡ್ ರಷ್ಯಾದ ಗಣರಾಜ್ಯ ಆಯಿನ ಡಾಗೆಸ್ತಾನ್, ವಾಯುವ್ಯೊಡು ಜಾರ್ಜಿಯಾ, ಪಡ್ಡಾಯಿಡ್ ಅರ್ಮೇನಿಯಾ ಮತ್ತು ಟರ್ಕಿ, ತೆಂಕಾಯಿಡ್ ಇರಾನ್ ದೇಸೊಲು ಉಲ್ಲ. ಈ ದೇಸೊದ ರಾಜಧಾನಿ ಬಾಕು ಮತ್ತು ಮಲ್ಲ ಪಟ್ಟಣಲಾ ಅಂದ್‌. ಈ ದೇಸೊದ ಜನಸಂಖ್ಯೆ 10,353,296, ದೇಸದ ಒಟ್ಟು ಇಸ್ತೀರ್ನ ೮೬,೬೦೦ ಚದರ ಕಿಮೀ. ಇಸ್ತೀರ್ನೊದ ಲೆಕ್ಕೊಡು ಅಝರ್‌ಬೈಜಾನ್ ಜಗತ್‌ಡ್ 112ನೇ ಸ್ತಾನೊಡು ಉಂಡು. ಜನಸಂಖ್ಯೆದ ಲೆಕ್ಕೊಡು ೯೦ನೇ ಸ್ತಾನೊಡು ಉಂಡು.
ಇತ್ತೆದ ಅಜೆರ್ಬೈಜಾನ್ ಪ್ರದೇಸೊಗು ದುಂಬು ಕಕೇಶಿಯನ್ ಅಲ್ಬೇನಿಯಾ ಪಂದ್ ಪುದರ್ ಇತ್ಂಡ್. ಅಪಗ ಈ ಪ್ರದೇಸೊ ಬೇತೆ ಬೇತೆ ಪರ್ಷಿಯನ್ ಸಾಮ್ರಾಜ್ಯೊಲೆನ ಆಳ್ವಿಕೆದ ಅಡಿಟ್ ಇತ್ಂಡ್. 19 ನೇ ಶತಮಾನ ಮುಟ್ಟ, ಈ ಪ್ರದೇಸೊ ಕಜರ್ ಇರಾನ್‌ನ ಭಾಗವಾದ್ ಇತ್ಂಡ್.[1][2] ಆಂಡ 1804-1813 ಬುಕ್ಕ 1826-1828 ಇಸವಿದ ಪೊರ್ತುಡು ನಡತಿನ ರುಸ್ಸೋ-ಪರ್ಷಿಯನ್ ಯುದ್ಧೊಡ್ದಾವರ ಕಜರ್ ಸಾಮ್ರಾಜ್ಯ ಕಕೇಶಿಯನ್ ಪ್ರದೇಸೊಲೆನ್ ಅಪಗದ ಸೋವಿಯತ್ ರಷ್ಯೊಗು ಬುಡ್ದುಕೊರಿಂಡ್. 1991ನೆ ಇಸವಿಡ್ ಸೋವಿಯತ್ ಒಕ್ಕೂಟ ಬೂರಿ ಬೊಕ್ಕ ೧೮ನೇ ಅಕ್ಟೋಬರ್ ೧೯೯೧ಗ್ ತನನ್ ಸ್ವತಂತ್ರ ದೇಸೊ ಪಂದ್ ಘೋಷಿಸಾಂಡ್.[3][4]
ಅಜೆರ್ಬೈಜಾನ್ ಒಂಜಿ ಏಕೀಕೃತ ಅರೆ-ಅಧ್ಯಕ್ಷೀಯ ಗಣರಾಜ್ಯ. ಉಂದು ಆಜಿ ಸ್ವತಂತ್ರ ತುರ್ಕಿಕ್ ರಾಜ್ಯೊಲೆಡ್ ಒಂಜಿ ಬೊಕ್ಕ ತುರ್ಕಿಕ್ ರಾಜ್ಯೊಲೆನ ಸಂಘಟನೆ ಬೊಕ್ಕ ತುರ್ಕೆಸೊಯ್ ಸಮುದಾಯೊದ ಒಂಜಿ ಸಕ್ರಿಯ ಸದಸ್ಯ ದೇಸೊ ಆದುಂಡು. ದೇಸೊದ ಜನಸಂಖ್ಯೆಡ್ ೯೭%ದಾತ್ ಮುಸಲ್ಮಾನೆರ್ ಉಲ್ಲೆರ್. ಬಾಕಿದ ೩%ದಾತ್ ಕ್ರಿಸ್ತಾನೆರ್ ಉಲ್ಲೆರ್. ಆಂಡ ಅಜೆರ್ಬೈಜಾನ್ ದೇಶದ ಸಂವಿಧಾನೊಡು ಅಧಿಕೃತ ಧರ್ಮ ಪಂದ್ ಒವ್ವುಲಾ ಇಜ್ಜಿ.ದೇಶೊದ ಮಾತಾ ಪ್ರಮುಖ ರಾಜಕೀಯ ಪಕ್ಸೊಲು ಜಾತ್ಯತೀತತೆಗ್ ಎಚ್ಚ ಒಪ್ಪುವ ಪನೊಲಿ. ಅಜೆರ್ಬೈಜಾನ್ ಒಂಜಿ ಅಭಿವೃದ್ಧಿ ಪಡೆಯೊಂದುಪ್ಪುನ ದೇಶ ಆದುಂಡು. ಮಾನವ ಅಭಿವೃದ್ಧಿ ಸೂಚ್ಯಂಕೊದ ಲೆಕ್ಕೊಡು 89ನೇ ಸ್ಥಾನೊಡು ಅಝರ್ ಬೈಜಾನ್ ಉಂಡು.
ಉಲ್ಲೇಕೊಲು
[ಸಂಪೊಲಿಪುಲೆ]- ↑ Swietochowski, Tadeusz (1995). Russia and Azerbaijan: A Borderland in Transition. Columbia University Press. pp. 69, 133. ISBN 978-0-231-07068-3.
- ↑ L. Batalden, Sandra (1997). The newly independent states of Eurasia: handbook of former Soviet republics. Greenwood Publishing Group. p. 98. ISBN 978-0-89774-940-4.
- ↑ Harcave, Sidney (1968). Russia: A History (6th ed.). Lippincott. p. 267.
- ↑ Mojtahed-Zadeh, Pirouz (2007). Boundary Politics and International Boundaries of Iran: A Study of the Origin, Evolution, and Implications of the Boundaries of Modern Iran with Its 15 Neighbors in the Middle East by a Number of Renowned Experts in the Field. Universal. p. 372. ISBN 978-1-58112-933-5.