ಅಮರಾವತಿ

ಅಮರಾವತಿ ಭಾರತದ ಆಂಧ್ರ ಪ್ರದೇಶ ರಾಜ್ಯದ ರಾಜಧಾನಿ. ಉಂದು ವಿಜಯವಾಡಡ್ದ್ ೧೫ ಕಿಲೋಮೀಟರ್ ನೈಋತ್ಯಗ್, ಗುಂಟೂರು ಜಿಲ್ಲೆಡ್ ಕೃಷ್ಣಾ ಸುದೆತ ಬಲ ಬರಿಟ್ ಉಂಡು. ರಡ್ಡ್ ಸಾರ ವರ್ಸೊಗು ದುಂಬು ಶಾತವಾಹನ ರಾಜವಂಸೊದ ರಾಜಧಾನಿ ಆಯಿನ ಅಮರಾವತಿದ ಪುದರ್‌ನ್ ಈ ಪೊಸ ರಾಜಧಾನಿಗ್ ದೀತೆರ್. ಶಾತವಾಹನೆರ್ನ ರಾಜಧಾನಿ ಅಮರಾವತಿ ಪಾಲ್ನಾಡು ಜಿಲ್ಲೆಡ್ ಕೃಷ್ಣಾ ಸುದೆತ್ತ ಬರಿಟೆ ಉಂಡು. ಪರ ಅಮರಾವತಿ ಬುಕ್ಕ ಪೊಸ ಅಮರಾವತಿ ಅಂದಾಜಿ ೩೦ ಕಿಲೋಮೀಟರ್ ದೂರೊಡು ಉಲ್ಲ. ಈ ಪೇಂಟೆ ೨೧೭.೨೩ ಚದರ ಕಿ.ಮೀ. ವಿಸ್ತೀರ್ಣಡ್ ಪರಡ್‌ದ್ಂಡ್, ಬೊಕ್ಕ ಉಂದೆಟ್ ಮಂಗಳಗಿರಿ, ತುಳ್ಳೂರು ಬೊಕ್ಕ ತಾಡೆಪಲ್ಲಿ ಪನ್ಪಿ ಮೂಜಿ ಮಂಡಲದ ಹಳ್ಳಿಲು ಸೇರ್ದ್ಂಡ್. ಮುಕ್ಯ ರಾಜಧಾನಿ ಪ್ರದೇಶ ೧೬.೯೪ ಚದರ ಕಿ.ಮೀ. ವಿಸ್ತೀರ್ಣಡ್ ಉಂಡು.

೨೦೧೪ಡ್ ಆಂಧ್ರ ಪ್ರದೇಶದ ವಿಭಜನೆ ಆಯಿನೆಡ್ದ್ ಬೊಕ್ಕ ಒರಿದಿನ ರಾಜ್ಯಗ್ ರಾಜಧಾನಿ ಇಜ್ಜಾಂಡ್. ಪೊಸ ತೆಲಂಗಾಣ ರಾಜ್ಯಡ್ ಹೈದರಾಬಾದ್ ಇತ್ತ್ಂಡಲಾ, ಉಂದುವೇ ಆಂಧ್ರಪ್ರದೇಶ ರಾಜ್ಯದ ತಾತ್ಕಾಲಿಕ ರಾಜಧಾನಿಯಾದಿತ್ತ್ಂಡ್. ಆ ಪೊರ್ತುಡೇ ಆಂಧ್ರಗ್ ಒಂಜಿ ಪೊಸ ರಾಜಧಾನಿ ಉಂಡುಮಲ್ಪುನ್ ಬಗ್ಗೆ ಸರ್ಕಾರ ಘೋಷಿಸಾಂಡ್. ಐಕ್ ಬೋಡಾಪಿನ ಬೇಲೆಲು ಮಾತ ೨೦೧೪ನೇ ಇಸವಿಡೇ ಸುರು ಆದಿತ್ತ್ಂಡ್.

ಗುಂಟೂರು ಜಿಲ್ಲೆದ ಕೃಷಿಕೆರ್ ಮಾತ ಒಂಜಿ ಪೊಸ ಲ್ಯಾಂಡ್ ಪೂಲಿಂಗ್ ಸ್ಕೀಮ್‌(ಬೂಮಿ ಒಟ್ಟಾಯಿಸಾವುನ)ದ ಮುಖಾಂತರ ೩೩,೦೦೦ ಎಕ್ರೆ ಜಾಗೆನ್ ಆಂಧ್ರ ಪ್ರದೇಶ ಸರಕಾರಗ್ ಕೊರಿಯೆರ್. ನೆಕ್ಕ್ ಬದಲ್‌ಗ್ ಅಕ್ಲೆಗ್ ಪ್ಲಾಟ್‌ಲೆನ್ ಕಟ್ಟಾದ್ ಕೊರಿಯೆರ್ ಅಂಚನೆ ಅಕ್ಲು ಕೊರ್ನ ಕೃಷಿ ಬೂಮಿಗ್ ೧೦ ವರ್ಷದ ಗುತ್ತಿಗೆಡ್ ಬರ್ಪುನ ಸಮಾನವಾಯಿನ ಕಾಸ್‌ನ್ ಆಂಧ್ರ ಸರ್ಕಾರ ಕೊರುಂಡು. ಭಾರತದ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮೇರ್ ಅಕ್ಟೋಬರ್ ೨೨, ೨೦೧೫ಗ್ ಉದ್ದಂಡರಾಯುನಿಪಾಲೆಂ ಹಳ್ಳಿಡ್ ನೆಕ್ಕ್ ಶಿಲಾನ್ಯಾಸ ದೀಯೆರ್. ತಾತ್ಕಾಲಿಕ ಕಟ್ಟೊಣಲೆನ್ ಬೇಗನೆ ಕಟ್ಟಿನೆಡ್ದ್ ಬೊಕ್ಕ, ಮಾರ್ಚ್ ೨೦೧೭ಡ್ದ್ ಸರಕಾರದ ಶಾಸಕಾಂಗ ಬೊಕ್ಕ ಸಚಿವಾಲಯ ವೆಲಗಪುಡಿಡ್ ಬೇಲೆ ಸುರು ಮಲ್ತ್ಂಡ್.

೨೦೨೧೬ನೇ ಏಪ್ರಿಲ್ ೨ನೇ ತಾರೀಕ್‌ದಾನಿ ಎನ್. ಚಂದ್ರಬಾಬು ನಾಯ್ಡು ಮೇರೆನ ನಾಯಕತ್ವದ ಸರಕಾರ ಆಂಧ್ರದ ಪೊಸ ರಾಜಧಾನಿ ಅಮರಾವತಿ ಪಂದ್ ಘೋಷಣೆ ಮಲ್ತ್ಂಡ್.

ಇತಿಯಾಸೊ

೨೦೧೪ದ ಆಂಧ್ರ ಪ್ರದೇಶ ಪುನರ್ವಿಂಗಡಣೆ ಕಾಯ್ದೆದ ಪ್ರಕಾರ, ಆಂಧ್ರ ಪ್ರದೇಶದ ವಿಭಜನೆಡ್ದ್ ಬೊಕ್ಕ ತೆಲಂಗಾಣ ರಾಜ್ಯ ಉಂಡಾಂಡ್. ಪೊಸ ರಾಜ್ಯೊಡೆನೆ ಹೈದರಾಬಾದ್ ಇತ್ತಿನೆಡ್ದಾವರ ಉಂದುವೇ ತೆಲಂಗಾಣ ರಾಜ್ಯೊದ ರಾಜಧಾನಿ ಆಂಡ್. ಆಂಧ್ರ ಪ್ರದೇಶಗ್ ಪೊಸ ರಾಜಧಾನಿ ಕಟ್ಟಾವರ ಬೇತೆ ಜಾಗೆಲೆನ್ ನಾಡಿಯೆರೆ ಕೇಂದ್ರ ಸರಕಾರ ಒಂಜಿ ತಜ್ಞೆರೆನ ಸಮಿತಿನ್ ರಚನೆ ಮಲ್ತ್ಂಡ್. ಜಾಗೆಗ್ ಭೇಟಿ ಕೊರ್ಪುನೆ ಬೊಕ್ಕ ಪಾಲುದಾರೆರೆನೊಟ್ಟುಗು ಪಾತೆರ್‌ಕತೆ ಮಲ್ಪುನೆ, ಬೇತೆ ಬೇತೆ ಜಾಗೆಲು ಎಂಚ ಉಂಡು ಪಂದ್ ತೂಪುನ ಜವಾಬ್ದಾರಿನ್ ಈ ಸಮಿತಿಗ್ ಕೊರಿಯೆರ್. ಪರಿಸರ ಸುಸ್ಥಿರತೆ ಬೊಕ್ಕ ದುಂಬಗ್ ನಗರದ ಅಬಿವೃದ್ಧಿ, ಜಾಗೆ, ನೀರ್ ಬೊಕ್ಕ ನೈಸರ್ಗಿಕ ಸಂಪನ್ಮೂಲೊಲೆನ ಲಭ್ಯತೆ, ಬೇತೆ ಮಲ್ಲ ಪೇಂಟೆಲೆನ ನಡುಟು ರೈಲು, ರಸ್ತೆ ಬೊಕ್ಕ ವಿಮಾನಯಾನದ ಸಂಪರ್ಕದ ಬಗ್ಗೆಲಾ ಉಂದು ಪರೀಕ್ಷೆ- ಇಂಚ ಮಾತ ಇಸಯೊದ ಬಗ್ಗೆ ಈ ಸಮಿತಿ ಗಮನ ಕೊರಿಂಡ್.

ರಾಜ್ಯದ ಪೊಸ ರಾಜಧಾನಿ ವಿಜಯವಾಡದ ಸುತ್ತಮುತ್ತ ಆಪುಂಡು ಬುಕ್ಕ ಪೊಸ ರಾಜಧಾನಿಗ್ ದುಂಬುದ ಶಾತವಾಹನೆರ್ನ ರಾಜಧಾನಿ ಆಯಿನ ಅಮರಾವತಿದ ಪುದರ್ ದೀಪ ಪಂದ್ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಮೇರ್ ಘೋಷಣೆ ಮಲ್ತೆರ್. ಪಾತೆರ್‌ಕತೆಡ್ದ್ ಬೊಕ್ಕ ಸೆಪ್ಟೆಂಬರ್ ೧, ೨೦೧೪ಗ್ ರಾಜ್ಯ ಸಚಿವ ಸಂಪುಟ ಈ ನಿರ್ಧಾರಗ್ ಒಪ್ಪಿಗೆ ಕೊರ್ಂಡ್. ಶಿವರಾಮಕೃಷ್ಣನ್ ಸಮಿತಿಗ್ ಬತ್ತಿನ ಸುಮಾರ್ ೫೦% ಅರ್ಜಿಲು ವಿಜಯವಾಡ-ಗುಂಟೂರು ಪ್ರಾಂತ್ಯೊಗು ಬೆಂಬಲ ಕೊರ್ತ್ಂಡ್, ಅಂಚಾದ್ ಈ ನಿರ್ಧಾರ ಜನಕುಲೆನ ಭಾವನೆಗ್ ಸರಿ ಉಂಡು ಪಂದ್ ಮುಖ್ಯಮಂತ್ರಿ ನಾಯ್ಡು ಮೇರ್ ಒತ್ತ್‌ದ್ ಪಂಡೆರ್.

ಅಮರಾವತಿನ್ ಸ್ಥಾಪನೆ ಮಲ್ಪರ ಸುರುಟು ಬೂಮಿ ಒಟ್ಟು ಮಲ್ಪೊಡಿತ್ತ್ಂಡ್. ಅಂಚಾದ್ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಮೇರೆನ ಆಡಳಿತ ೨೦೧೪ಡ್ ಆಂಧ್ರ ಪ್ರದೇಶ ಕ್ಯಾಪಿಟಲ್ ರೀಜನ್ ಡೆವಲಪ್‌ಮೆಂಟ್ ಅಥಾರಿಟಿ (APCRDA) ಕಾಯ್ದೆನ್ ಜಾರಿಗ್ ಕೊನತ್ಂಡ್, ಉಂದು ಪೊಸ ರಾಜಧಾನಿಗ್ 'ಲ್ಯಾಂಡ್ ಬ್ಯಾಂಕ್' ಮಲ್ಪೆರೆ ಸಾಯ ಮಲ್ತ್ಂಡ್. ಈ ಕಾಯ್ದೆ ಸ್ವಯಂಪ್ರೇರಿತ ಲ್ಯಾಂಡ್ ಪೂಲಿಂಗ್‌-ಪಂಡ ಬೂಮಿ ಇತ್ತಿನಕ್ಲು ಅಕುಲಾದೆ ತನ್ಕುಲೆ ಬೂಮಿನ್ ಸರ್ಕಾರೊಗು ಕೊರ್ಪುನ - ಅವಕಾಶ ಕೊರ್ಂಡ್. ಒಟ್ಟು ೨೭ ಹಳ್ಳಿದ ಸುಮಾರ್ ೫೩,೭೪೮ ಎಕ್ರೆ ಜಾಗೆನ್ ಪಡೆಪುನ ಗುರಿ ಸರಕಾರಗ್ ಇತ್ತ್ಂಡ್. ಈ ಯೋಜನೆದ ಮುಖಾಂತರ ಸುಮಾರ್ ೩೩,೭೩೩ ಎಕ್ರೆ ಜಾಗೆನ್ ಒಟ್ಟು ಮಲ್ತೆರ್. ಮಸ್ತ್ ಕೃಷಿಕೆರ್ ನೆಟ್ಟ್ ಪಾಲ್ ಪಡೆಂಡಲಾ, ಕೆಲವೆರ್, ಅಯಿಟ್ಟ್‌ಲಾ ಪೆನುಮಾಕ ಬೊಕ್ಕ ಉಂಡವಲ್ಲಿ ಪ್ರಾಂತ್ಯದಕುಲು ಪರಿಹಾರದ ಕಾಸ್‌ ಕಡಮೆ ಆಂಡ್ ಪಂಡೆರ್. ಪೂಲಿಂಗ್ ಪ್ರಕ್ರಿಯೆ ಎಲ್ಯ ಎಲ್ಯ ಜಾಗೆಲೆನ್ ಒಟ್ಟು ಮಲ್ತ್ಂಡ್, ಅವೆನ್ ಅಭಿವೃದ್ಧಿ ಮಲ್ತ್‌ದ್ ಒಂಜಿ ಭಾಗನ್ ಮೂಲ ಯಜಮಾನೆರೆಗ್ ಪಿರ ಕೊರಿಯೆರ್. ಜಾಗೆನ್ ಕೊರ್ನಕ್ಲೆಗ್ ಆರ್ಥಿಕ ಸಾಯ ಕೊರಿಯೆರೆ ೧೦ ವರ್ಷ ಮುಟ್ಟ ವರ್ಷದ ಕಾಸ್ ಕೊರ್ಪುನವುಲಾ ಈ ಯೋಜನೆಡ್ ಸೇರ್ದಿತ್ತ್ಂಡ್.

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಈ ಮಾಮಲ್ಲ ಬೇಲೆಗ್ ಕೆಸರ್ ಕಲ್ಲ್ ಪಾಡಿಯೆರ್. ಮಾಸ್ಟರ್ ಪ್ಲಾನ್‌ದ ಸುರುತ ಹಂತನ್ ಮೇ ೧೫, ೨೦೧೬ಗ್ ಮುಗಿಪುನ ಗುರಿ ದೀಯೆರ್, ಬೊಕ್ಕ ಅಮರಾವತಿನ್ ವಿಜಯವಾಡ ಬೊಕ್ಕ ಗುಂಟೂರುಗು ಸಂಪರ್ಕ ಮಲ್ಪುನ ೨೦೦-ಕಿ.ಮೀ. ರಿಂಗ್ ರೋಡ್‌ದ ಯೋಜನೆನ್ ದುಂಬು ದೀಯೆರ್.