ಇಂಡೋನೇಷ್ಯಾ

ಇಂಡೋನೇಷ್ಯಾ ಅಧಿಕೃತವಾದ್ ಇಂಡೋನೇಷ್ಯಾ ಗಣರಾಜ್ಯ- ಆಗ್ನೇಯ ಏಷ್ಯಾ ಬೊಕ್ಕ ಓಷಿಯಾನಿಯಾಡ್ ಉಪ್ಪುನ ಭಾರತ ಬೊಕ್ಕ ಪೆಸಿಫಿಕ್ ಸಾಗರೊಲೆನ ನಡುಟು ಉಪ್ಪುನ ಒಂಜಿ ದೇಶ. ಸುಮಾತ್ರಾ, ಜಾವಾ, ಸುಲಾವೇಸಿ, ಬೊಕ್ಕ ಬೊರ್ನಿಯೊ ಬೊಕ್ಕ ನ್ಯೂಗಿನಿದ ಕೆಲವು ಬಾಗೊಲು ಸೇರ್‌ದ್ 17,000ಡ್ದ್ ಎಚ್ಚ ದ್ವೀಪೊಲು ಉಂದೆಟ್ ಉಲ್ಲ. ಇಂಡೋನೇಷ್ಯಾ ಜಗತ್‌ದ ಮಾಮಲ್ಲ ದ್ವೀಪಸಮೂಹ ದೇಸೊ. ಇಂದೆತ ಇಸ್ತೀರ್ನೊ 1,904,569 ಚದರ ಕಿಲೋಮೀಟರ್. ವಿಸ್ತೀರ್ಣೊಡು 14ನೇ ಮಲ್ಲ ದೇಶ. ೨೮೦ ಮಿಲಿಯನ್ ಡ್ದ್ ಜಾಸ್ತಿ ಜನಸಂಖ್ಯೆ ಇಪ್ಪುನ ಇಂಡೋನೇಷ್ಯಾ ಜಗತ್‌ಡ್ ಎಚ್ಚ ಜನಸಂಖ್ಯೆಡ್ ನಾಲನೇ ಜಾಗೆಡ್ ಉಂಡು. ಜಕಾರ್ತಾ ಇಂಡೋನೇಷ್ಯಾದ ರಾಜಧಾನಿ, ಜಗತ್ತ್‌ಡ್ ಎಚ್ಚ ಜನಸಂಖ್ಯೆ ಇಪ್ಪುನ ರಡ್ಡನೆ ನಗರ ಪ್ರದೇಶ. ಇಂಡೋನೇಷ್ಯನ್ ಬಾಸೆ ಈ ದೇಸೊದ ಅಧೀಕೃತ ಬಾಸೆ. ಆಂಡ ಅಂದಾಜಿ ೭೦೦ಡ್ದು ಎಚ್ಚ ಬಾಸೆಲು ಇಂಡೋನೇಷ್ಯಡ್ ಉಲ್ಲ.

ಇಂಡೋನೇಷ್ಯಾದ ದ್ವೀಪಸಮೂಹಡ್ ಪ್ರಾಗೈತಿಹಾಸಿಕ ಕಾಲೊಡ್ದಿಂಚಿ ಜನಕುಲು ನೆಲೆ ಆದಿತ್ತೆರ್. ಮೂಲು ತಿಕ್ಕಿನ 'ಹೋಮೋ ಎರೆಕ್ಟಸ್' ಬೊಕ್ಕ 'ಹೋಮೋ ಸೇಪಿಯನ್ಸ್' ಪಳೆಯುಳಿಕೆ ಬೊಕ್ಕ ಮುಲ್ಪ ಇಪ್ಪುನ ಕಲ್ಲ್‌ದ ಮಲ್ಲ ಪಾದೆಲು, ಮುಲ್ಪ ಮಾನವೆರ್ ಇತ್ತೆರ್ ಪನ್ಪಿನೆಕ್ ಸಾಕ್ಷಿ. ರಡ್ಡನೆ ಶತಮಾನದ ಸುರುಟು ಮೂಡಾಯಿ ಬೊಕ್ಕ ತೆಂಕಾಯಿ ಏಷ್ಯನ್ ಸಂಪರ್ಕ ಮಲ್ಪುನ ಅಂತರರಾಷ್ಟ್ರೀಯ ಬ್ಯಾರದ ಸಾದಿಯಾದ್ ಉಂದು ಬುಳೆತ್ಂಡ್.

ಪಿದಾಯಿಡ್ದ್ ಬತ್ತಿನ ಹಿಂದೂ, ಬೌದ್ಧ ಬೊಕ್ಕ ಬೊಕ್ಕ ಇಸ್ಲಾಂ ಧರ್ಮೊ ಮುಲ್ಪದ ಜನೊಕ್ಲೆಡ ಸೇರ್ದ್ ಪೋಯ. ಯುರೋಪುದಕ್ಲು 'ಏಜ್ ಆಫ್ ಡಿಸ್ಕವರಿ'ನ್ನ್ ಜಾಗೆಡ್ ಮಲುಕು ದ್ವೀಪೊದ ಸಾಂಬಾರ್ ಮಸಾಲೆ ಸೊತ್ತುದ ಮಿತ್ತ್ ನಿಯಂತ್ರಣ ದೆತೊನೆರೆ ಪೈಪೋಟಿ ಮಲ್ತೆರ್. ನೆರ್ದ್ ಬೊಕ್ಕ ಮೂಜಿ ಬೊಕ್ಕ ಅರ್ಧ ಶತಮಾನ ಮುಟ್ಟ ಡಚ್ಚೆರ್ ಆಡಳಿತ ಮಲ್ತೆರ್. ರಡ್ಡನೆ ಮಹಾಯುದ್ಧ ಆಯಿ ಬೊಕ್ಕ ೧೯೪೯ನೇ ಇಸವಿಡ್ ಇಂಡೋನೇಷ್ಯಾ ತನ್ನ ಸ್ವಾತಂತ್ರ್ಯೊನು ಘೋಷಣೆ ಮಲ್ತ್‌ಂಡ್.

ಇಂಡೋನೇಷ್ಯಾ ಒಂಜಿ ಅಧ್ಯಕ್ಷೀಯ ಗಣರಾಜ್ಯ. ನಮ ದೇಸೊ‌ಡು ಇಪ್ಪಿಲೆಕ, ದ್ವಿಸದನ ವ್ಯವಸ್ತೆ ಇಪ್ಪುನ ದೇಸೊ. ಇಂದೆಟ್ ೩೮ ಪ್ರಾಂತ್ಯೊಲು ಉಲ್ಲ, ಅಯಿಟ್ ೯ ಪ್ರಾಂತ್ಯೊಲೆಗ್ ವಿಶೇಷ ಸ್ವಾಯತ್ತ ಸ್ಥಾನಮಾನ ಕೊರ್ತೆರ್. ಇಂಡೋನೇಷ್ಯಾ ಪಪುವಾ ನ್ಯೂ ಗಿನಿ, ಪೂರ್ವ ಟಿಮೊರ್, ಬೊಕ್ಕ ಮಲೇಷ್ಯಾದ ಮೂಡಾಯಿದ ಜಾಗೆಡ್ ಗಡಿನ್ ಪಟ್ಟೊಂದುಂಡು, ಅಂಚನೆ ಸಿಂಗಾಪುರ್, ಪರ್ಯಾಯ ದ್ವೀಪ ಮಲೇಷ್ಯಾ, ವಿಯೆಟ್ನಾಂ, ಥೈಲ್ಯಾಂಡ್, ಫಿಲಿಪೈನ್ಸ್, ಆಸ್ಟ್ರೇಲಿಯಾ, ಪಲಾವು ಬೊಕ್ಕ ಭಾರತೊದೊಟ್ಟುಗು ಕಡಲ್‌ನ್ ಪಟ್ಟೊಂದುಂಡು. ಮಲ್ಲ ಜನಸಂಖ್ಯೆ ಬೊಕ್ಕ ದಟ್ಟವಾದ್ ಜನಸಂಖ್ಯೆ ಇಪ್ಪುನ ಪ್ರದೇಶೊಲೆನ್ ತೂಂಡಲಾ, ಇಂಡೋನೇಷ್ಯಾಡ್ ಜಗತ್ತ್ ದ ಎಚ್ಚಿನ ಮಟ್ಟೊದ ಜೀವವೈವಿಧ್ಯತೆಲು ಉಪ್ಪುನ ಅರಣ್ಯ ಪ್ರದೇಶೊಲು ಉಂಡು.

ಈ ದೇಶ ವಿಶ್ವಸಂಸ್ಥೆ, ವಿಶ್ವ ವ್ಯಾಪಾರ ಒಕ್ಕೂಟ, ಜಿ20 ಅತ್ತಂದೆ ಬೇತೆ ಬಹುಪಕ್ಷೀಯ ಸಂಸ್ಥೆಲೆನ ಸದಸ್ಯ ರಾಷ್ಟ್ರ ಆದುಂಡು, ಬೊಕ್ಕ ನಾನ್-ಅಲೈನ್ಡ್ ಮೂವ್ಮೆಂಟ್, ಅಸೋಸಿಯೇಷನ್ ​​ಆಫ್ ಆಗ್ನೇಯ ಏಷ್ಯಾದ ರಾಷ್ಟ್ರೊಲೆನ ಸಂಘ, ಈಸ್ಟ್ ಏಷ್ಯಾ ಸಮ್ಮಿಟ್, ಡಿ-8, ಎಪಿಇಸಿ, ಬೊಕ್ಕ ಇಸ್ಲಾಮಿಕ್ ಸಹಕಾರದ ಸಂಘಟನೆಲೆಡ್‌ಲಾ ಇಂಡೋನೇಷ್ಯಾ ಸೇರ್ದ್ಂಡ್.