ಐಡಿಬಿಐ ಬ್ಯಾಂಕ್

ಐಡಿಬಿಐ ಬ್ಯಾಂಕ್ (ಭಾರತೀಯ ಕೈಗಾರಿಕಾ ಅಭಿವೃದ್ಧಿ ಬ್ಯಾಂಕ್) ಭಾರತೀಯ ಜೀವ ವಿಮಾ ನಿಗಮ ಬೊಕ್ಕ ಭಾರತ ಸರ್ಕಾರದ ಗುರ್ಕಾರ್ತೆದ ಅಡಿಟ್ ಇಪ್ಪುನ ಖಾಸಗಿ ವಲಯದ ಒಂಜಿ ಅನುಸೂಚಿತ ವಾಣಿಜ್ಯ ಬ್ಯಾಂಕ್ ಆದುಂಡು. 1964ಡ್ ಭಾರತ ಸರ್ಕಾರ ಭಾರತೀಯ ರಿಸರ್ವ್ ಬ್ಯಾಂಕ್‌ ಅಡಿತ ಅಂಗಸಂಸ್ಥೆಯಾದ್ ಐಡಿಬಿಐನ್ ಸ್ಥಾಪನೆ ಮಲ್ತ್ಂಡ್. ಸುರುಟ್ಟು ಉಂದು ಅಭಿವೃದ್ಧಿ ಹಣಕಾಸು ಸಂಸ್ಥೆದ ರೂಪೊಡು ಕೆಲಸ ಮಲ್ತೊಂದು, ಕೈಗಾರಿಕಾ ವಲಯಗ್ ದುಡ್ಡುದ ವ್ಯವಹಾರೊಗು ಸಂಬಂಧ ಪಟ್ಟಿನ ಬೇತೆ ಬೇತೆ ಸೇವೆಲೆನ್ ಕೊರೊಂದಿತ್ತ್ಂಡ್.

2005ಡ್ ಈ ಸಂಸ್ಥೆನ್ ಅಯಿತ್ತ ಅಂಗಸಂಸ್ಥೆಯಾಯಿನ ಐಡಿಬಿಐ ಬ್ಯಾಂಕ್ ಒಟ್ಟುಗು ವಿಲೀನ ಮಲ್ತೆರ್. ಬೊಕ್ಕ ಅಯಿನ್ “ಇತರ ಸಾರ್ವಜನಿಕ ವಲಯದ ಬ್ಯಾಂಕ್” ವರ್ಗೊಗು ಸೇರ್ಸಾಯೆರ್.

ಬ್ಯಾಂಕ್‌ದ ಅನುತ್ಪಾದಕ ಆಸ್ತಿಲು ಜಾಸ್ತಿಯಾಯಿನೆಡ್ದಾತ್ರ ಬೊಕ್ಕ ಬಂಡವಾಳ ನಿರ್ವಹಣೆದ ಸಮಸ್ಯೆಲೆಡ್ದ್ ಆಯಿನ ತೊಂದರೆದ ಕಾರಣೊಡ್ದು, 2019ರ ಮಾರ್ಚ್‌ಡ್ ಭಾರತ ಸರ್ಕಾರ ಎಲ್‌ಐಸಿಗ್, ಬ್ಯಾಂಕ್‌ಡ್ ಬಂಡವಾಳ ಹೂಡಿಕೆ ಮಲ್ತ್‌ದ್ ಬ್ಯಾಂಕ್‌ದ ನಿರ್ವಹಣೆನ್ ದೆತೊನಿಯೆರೆ ಸೂಚನೆ ಕೊರ್ತ್ಂಡ್. ಎಲ್‌ಐಸಿ, ಬ್ಯಾಂಕ್‌ದ ಒಟ್ಟು ಪಾವತಿ ಮಲ್ತಿನ ಷೇರು ಬಂಡವಾಳದ 51% ಪಾಲನ್ ತನ್ನ ವಶಕ್ ದೆತೊಂಡು. ಅತ್ತಂದೆ ಭಾರತೀಯ ರಿಸರ್ವ್ ಬ್ಯಾಂಕ್ 2019ನೇ ಇಸವಿದ ಜನವರಿ 21ಡ್ದ್ ಜಾರಿಗ್ ಬರ್ಪುನಂಚ ಐಡಿಬಿಐ ಬ್ಯಾಂಕ್‌ನ್ ನಿಯಂತ್ರಣಾತ್ಮಕ ಉದ್ದೇಶೊಗಾದ್ “ಖಾಸಗಿ ವಲಯದ ಬ್ಯಾಂಕ್" ಪಂದ್ ವರ್ಗೀಕರಣ ಮಲ್ತ್ಂಡ್.

ಪ್ರಸ್ತುತ, ಐಡಿಬಿಐ ಬ್ಯಾಂಕ್‌ಡ್ ಭಾರತ ಸರ್ಕಾರದ ನೇರ ಬೊಕ್ಕ ಪರೋಕ್ಷ ಷೇರುಹಂಚಿಕೆ ಸುಮಾರು 95%ದಾತ್ ಉಂಡು. ಭಾರತ ಸರ್ಕಾರ ತನ್ನ ದಿನಾಂಕ 17 ಡಿಸೆಂಬರ್ 2019ದ ಪತ್ರದ ಮೂಲಕ ಕೇಂದ್ರ ಬೊಕ್ಕ ರಾಜ್ಯ ಸರ್ಕಾರದ ಮಾತಾ ಇಲಾಖೆಲು ಹಣಕಾಸುದ ವ್ಯವಹಾರೊಲೆನ್ ಐಡಿಬಿಐ ಬ್ಯಾಂಕ್ ಮೂಲಕನೇ ಮಲ್ಪೊಡು ಪಂದ್ ನಿರ್ದೇಶನ ಕೊರ್ತುಂಡು.

ಸಣ್ಣ ಕೈಗಾರಿಕಾ ಅಭಿವೃದ್ಧಿ ಬ್ಯಾಂಕ್ ಆಫ್ ಇಂಡಿಯಾ (SIDBI), ರಫ್ತು-ಆಮದು ಬ್ಯಾಂಕ್ ಆಫ್ ಇಂಡಿಯಾ (EXIM Bank), ರಾಷ್ಟ್ರೀಯ ಷೇರು ವಿನಿಮಯ ಕೇಂದ್ರ (NSE), ಭಾರತೀಯ ಷೇರು ಬೊಕ್ಕ ವಿನಿಮಯ ಮಂಡಳಿ (SEBI) ಬೊಕ್ಕ ರಾಷ್ಟ್ರೀಯ ಷೇರುಪತ್ರ ಠೇವಣಿ ನಿಯಮಿತ (NSDL) ಇಂಚಿನ ಪ್ರಮುಖ ರಾಷ್ಟ್ರೀಯ ಸಂಸ್ಥೆಲು ತನ್ಕುಲೆನ ಮೂಲೊನ್ ಐಡಿಬಿಐಡೇ ಹೊಂದುದಿತ್ತ್ಂಡ್. ಪ್ರಸ್ತುತ, ಐಡಿಬಿಐ ಬ್ಯಾಂಕ್ ಭಾರತದ ಮಲ್ಲ ವಾಣಿಜ್ಯ ಬ್ಯಾಂಕ್‌ಲೆಡ್ ಒಂಜಿ ಆದುಂಡು.

ಇತಿಹಾಸ

ಐಡಿಬಿಐನ್ 1964ಡ್ ಸಂಸತ್ತ್‌ದ ಕಾಯ್ದೆದ ಮೂಲಕ, ಭಾರತೀಯ ರಿಸರ್ವ್ ಬ್ಯಾಂಕ್‌ದ ಸ್ವಾಮ್ಯದ ಅಂಗಸಂಸ್ಥೆಯಾದ್ ಉಂಡುಮಲ್ತೆರ್. ಉಂದು ಭಾರತದ ಮಲ್ಲ ಕೈಗಾರಿಕೆಲೆಗ್ ದುಡ್ಡುದ ಸಹಾಯ ಕೊರ್ಪುನ, ಅಯಿತ್ತ ಅಭಿವೃದ್ಧಿ ಬೊಕ್ಕ ಉತ್ತೇಜನೊಗು ಸಂಬಂಧ ಪಟ್ಟಿನ ಕೆಲಸೊಲೆನ್ ಮಲ್ಪುನ ಪ್ರಮುಖ ಹಣಕಾಸು ಸಂಸ್ಥೆಯಾದ್ ಬುಳೆತ್ಂಡ್.

ಐಡಿಬಿಐ ಪೊಸ ಕೈಗಾರಿಕಾ ಯೋಜನೆಲೆಗ್, ಕೈಗಾರಿಕೆಲೆನ ವಿಸ್ತರಣೆ, ಆಧುನೀಕರಣ ಉದ್ದೇಶೊಗಾದ್ ಪಣವುದ ಬೆರಿಸಾಯ ಕೊರೊಂದಿತ್ತ್ಂಡ್.

1995ರ ಜುಲೈಡ್ ಐಡಿಬಿಐ ತನ್ನ ಸಾರ್ವಜನಿಕ ಷೇರು ಬಿಡುಗಡೆ ಮಲ್ತಿನ ಬೊಕ್ಕ, ಭಾರತ ಸರ್ಕಾರದ ಪಾಲ್ ಶೇ.100ಡ್ದ್ ಶೇ.75ದಾತ್ ಕಡಮೆ ಆಂಡ್.

ಆರ್ಥಿಕ ಸುಧಾರಣೆಲೆಗ್ ದುಂಬುದ ಅವಧಿಡ್ (1964–1991), ಸರ್ಕಾರ ನಿಗದಿ ಮಲ್ತಿನ ‘ಅಭಿವೃದ್ಧಿ ಬ್ಯಾಂಕಿಂಗ್’ ಧ್ಯೇಯದ ಪ್ರಕಾರ ಭಾರತೊಡು ಮಲ್ಲ ಮಟ್ಟದ ಕೈಗಾರಿಕಾ ಅಭಿವೃದ್ಧಿಗ್ ಉತ್ತೇಜನ ಕೊರ್ಪುನೆಡ್ ಐಡಿಬಿಐ ಮಲ್ಲ ಬೇಲೆ ಮಲ್ತ್ಂಡ್. ದೇಶದ ಕೈಗಾರಿಕಾ ವಲಯದ ಬುಳೆಚ್ಚಿಲ್ಗ್ ಬೋಡಾಯಿನ ದೀರ್ಘಕಾಲದ ಪಣವುದ ಬೆರಿಸಾಯ, ಸಂಸ್ಥಾಪನಾ ಬೆಂಬಲ ಬೊಕ್ಕ ಅಭಿವೃದ್ಧಿ ಆಧಾರಿತ ಬ್ಯಾಂಕಿಂಗ್ ಸೇವೆಲೆನ್ ಕೊರ್ಪುನ ಮೂಲಕ ಉಂದು ಭಾರತದ ಕೈಗಾರಿಕೀಕರಣದ ಪ್ರಕ್ರಿಯೆಡ್ ಮಲ್ಲ ಕೊಡುಗೆ ಕೊರ್ತುಂಡು.

ಐಡಿಬಿಐ ಬೆಂಬಲದೊಟ್ಟುಗು ಸ್ಥಾಪನೆಯಾಯಿನ ಅತ್ತಂಡ ಅಭಿವೃದ್ಧಿ ಆಯಿನ ಪ್ರಮುಖ ಸಂಸ್ಥೆಲೆಡ್ ಭಾರತೀಯ ಷೇರು ಬೊಕ್ಕ ವಿನಿಮಯ ಮಂಡಳಿ (ಸೆಬಿ), ರಾಷ್ಟ್ರೀಯ ಷೇರು ವಿನಿಮಯ ಕೇಂದ್ರ (ಎನ್‌ಎಸ್‌ಇ), ರಾಷ್ಟ್ರೀಯ ಷೇರುಪತ್ರ ಠೇವಣಿ ನಿಯಮಿತ (ಎನ್‌ಎಸ್‌ಡಿಎಲ್), ಸ್ಟಾಕ್ ಹೋಲ್ಡಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್, ಕ್ರೆಡಿಟ್ ಅನಾಲಿಸಿಸ್ ಅಂಡ್ ರಿಸರ್ಚ್ ಲಿಮಿಟೆಡ್, ರಫ್ತು-ಆಮದು ಬ್ಯಾಂಕ್ ಆಫ್ ಇಂಡಿಯಾ (ಎಕ್ಸಿಮ್ ಬ್ಯಾಂಕ್), ಭಾರತೀಯ ಸಣ್ಣ ಕೈಗಾರಿಕಾ ಅಭಿವೃದ್ಧಿ ಬ್ಯಾಂಕ್ (ಸಿಡ್ಬಿ) ಬೊಕ್ಕ ಉದ್ಯಮಶೀಲತೆ ಅಭಿವೃದ್ಧಿ ಸಂಸ್ಥೆಲು ಸೇರ್ದುಂಡು.

ಸ್ವಾಧೀನ

2006ಡ್ ಐಡಿಬಿಐ ಬ್ಯಾಂಕ್, ಮಹಾರಾಷ್ಟ್ರದ ಸತಾರಡ್ ಪ್ರಧಾನ ಕಚೇರಿನ್ ಹೊಂದ್ ದಿತ್ತಿನ ಯುನೈಟೆಡ್ ವೆಸ್ಟರ್ನ್ ಬ್ಯಾಂಕ್‌ನ್ ಸ್ವಾಧೀನ ಮಲ್ತೊಂಡ್. ಈ ಸ್ವಾಧೀನಡ್ದಾತ್ರ ಐಡಿಬಿಐ ಬ್ಯಾಂಕ್‌ದ ಶಾಖೆಲೆನ ಸಂಖ್ಯೆ ಮಸ್ತ್ ಜಾಸ್ತಿ ಆಂಡ್. ಸ್ವಾಧೀನಗ್ ದುಂಬು 195 ಶಾಖೆಲೆನ್ ಇತ್ತಿನ, ಯುನೈಟೆಡ್ ವೆಸ್ಟರ್ನ್ ಬ್ಯಾಂಕ್‌ದ ವಿಲೀನದ ಬೊಕ್ಕ ತನ್ನ ಶಾಖಾ ಜಾಲನ್ 425 ಶಾಖೆಲೆನ ಮುಟ್ಟ ವಿಸ್ತರಣೆ ಮಲ್ತ್ಂಡ್. ಈ ವಿಲೀನ ಐಡಿಬಿಐ ಬ್ಯಾಂಕ್‌ದ ಭೌಗೋಳಿಕ ವ್ಯಾಪ್ತಿನ್ ಮಲ್ಲ ಮಲ್ಪುನ ಒಟ್ಟುಗೇ ಅಯಿತ್ತ ಚಿಲ್ಲರೆ ಬ್ಯಾಂಕಿಂಗ್ ಕೆಲಸೊಲೆನ್ ಗಟ್ಟಿ ಮಲ್ಪೆರೆಲಾ ಸಹಾಯ ಆಂಡ್.