ಒಮಾನ್
ಒಮಾನ್-ಅಧಿಕೃತವಾದ್ ಒಮಾನ್ ಸುಲ್ತಾನಶಾಹಿ- ಪಶ್ಚಿಮ ಏಷ್ಯಾದ ಆಗ್ನೇಯ ಅರೇಬಿಯನ್ ಪರ್ಯಾಯ ದ್ವೀಪೊಡು ಉಪ್ಪುನ ಒಂಜಿ ದೇಶ. ಇಂದೆತ ರಾಜದಾನಿ ಮಸ್ಕತ್. ಉಂದು ಸೌದಿ ಅರೇಬಿಯಾ, ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ), ಬೊಕ್ಕ ಯೆಮೆನ್ ದೇಶೊಲೆ ಒಟ್ಟುಗು ಭೂ ಗಡಿನ್, ಅಂಚನೆ ಇರಾನ್‌ದ ಒಟ್ಟುಗು ಕಡಲ್ದ ಗಡಿನ್ ಪಟ್ಟೊಂದುಂಡು. ನೆತ್ತ ಕಡಲಬರಿ ಆಗ್ನೇಯೊಡು ಅರಬ್ಬೀ ಸಮುದ್ರ ಮುಟ್ಟ ಬೊಕ್ಕ ಈಶಾನ್ಯೊಡು ಒಮಾನ್ ಕೊಲ್ಲಿ ಮುಟ್ಟ ವಿಸ್ತಾರ ಆತ್ಂಡ್. ಒಮಾನ್‌ದ ವಾಯುವ್ಯೊಡು ಯುಎಇ, ಪಡ್ಡಾಯಿಡ್ ಸೌದಿ ಅರೇಬಿಯಾ, ಬೊಕ್ಕ ನೈರುತ್ಯೊಗು ಯೆಮನ್ ದೇಸೊಲು ಉಲ್ಲ. ಒಮನ್ ದೇಸೊದ ಇಸ್ತೀರ್ನೊ 3,15,331 ಚದರ ಕಿ.ಮೀ ಉಂಡು, ಬೊಕ್ಕ ಸುಮಾರ್ ೫೩ ಲಕ್ಷದಾತ್ ಜನಸಂಖ್ಯೆ ಉಂಡು. ಒಮಾನ್, ಅರೇಬಿಯನ್ ಪರ್ಯಾಯ ದ್ವೀಪೊಡು ಮೂಜಿನೆ ಮಲ್ಲ ದೇಶ. ಇಸ್ಲಾಂ ಒಮಾನ್‌ದ ರಾಜ್ಯ ಧರ್ಮ, ಬೊಕ್ಕ ಅರೇಬಿಕ್ ಅಧಿಕೃತ ಭಾಷೆ ಆದುಂಡು.[೧]
ಒಮಾನ್‌ದ ತೈಲ ನಿಕ್ಷೇಪೊಲು ಪ್ರಪಂಚೊಡು 22ನೇ ಮಲ್ಲ ಸಾನೊಡು ಉಂಡು. 2010ನೇ ಇಸವಿಡ್, ವಿಶ್ವಸಂಸ್ಥೆ, ಕರಿನ 40 ವರ್ಷೊಲೆಡ್ ಒಮಾನ್ ಪ್ರಪಂಚೊಡೆ ಬಾರಿ ಎಡ್ಡೆ ಅಭಿವೃದ್ಧಿ ಆಯಿನ ದೇಶ ಪಂದ್ ಗುರುತಿಸ್‌ದ್ಂಡ್. ಒಮಾನ್‌ದ ಆರ್ಥಿಕತೆಗ್ ಪ್ರವಾಸೋದ್ಯಮ, ಅಂಚನೆ ಮೀನುಗಾರಿಕೆ, ಖರ್ಜೂರ, ಬ್ಯಾರ ಬಲ ಕೊರ್ಪ. ವಿಶ್ವ ಬ್ಯಾಂಕ್ ಒಮಾನ್‌ನ್ ಜಾಸ್ತಿ ಆದಾಯ ಇಪ್ಪುನ ಆರ್ಥಿಕತೆ ಪಂದ್ ವರ್ಗೀಕರಣ ಮಲ್ತ್ಂಡ್. 2024ದ ಲೆಕ್ಕಾಚಾರದ ಪ್ರಕಾರ, ವಿಶ್ವ ಶಾಂತಿ ಸೂಚ್ಯಂಕೊಡು ಒಮಾನ್ ಪ್ರಪಂಚದ 42ನೇ ಅತಿ ಶಾಂತಿಯುತ ದೇಶ, ಅಂಚನೆ ಮಧ್ಯಪ್ರಾಚ್ಯ ಬೊಕ್ಕ ಉತ್ತರ ಆಫ್ರಿಕಾಡ್ ಮೂಜನೆ ಅತಿ ಶಾಂತಿಯುತ ದೇಶ ಪಂದ್ ಪುಗರ್ತೆ ದೆತೊಂದುಂಡು.
ಇತಿಹಾಸೊ
[ಸಂಪೊಲಿಪುಲೆ]ಒಮಾನ್ ಅರಬ್ ಪ್ರಪಂಚೊಡು ಉಪ್ಪುನ ಬಾರಿ ಪರತ್ತ್ ಸ್ವತಂತ್ರ ರಾಜ್ಯ, ಬೊಕ್ಕ 1744ರ್ದ್ ಆಲ್ ಬು ಸೈದ್ ಅರಸುವಂಸೊ ಉಂದೆನ್ ಆಳೊಂದು ಉಂಡು.[೨] 17ನೇ ಶತಮಾನೊಡು, ಒಮಾನ್ ಒಂಜಿ ಮಲ್ಲ ಪ್ರಾದೇಶಿಕ ಶಕ್ತಿಯಾದ್ ಬುಳೆದ್ ಬತ್ತ್ಂಡ್. ಪೋರ್ಚುಗೀಸೆರೆನ್ ಕಡಲಬರಿರ್ದ್ ಗಿಡತ್ತ್‌ದ್, ಪರ್ಷಿಯನ್ ಕೊಲ್ಲಿ ಬೊಕ್ಕ ಹಿಂದೂ ಮಹಾಸಾಗರೊಡು ಒಂಜಿ ಸಾಮ್ರಾವಾದ್ ಉದಿತ್ ಬತ್ತ್ಂಡ್.[೨] 19ನೇ ಶತಮಾನೊಡು ಒಮಾನ್‌ದ ಪ್ರಭಾವ ಹಾರ್ಮುಜ್ ಜಲಸಂಧಿರ್ದ್ ಇರಾನ್ ಬೊಕ್ಕ ಪಾಕಿಸ್ತಾನ ಮುಟ್ಟ, ಬೊಕ್ಕ ದಕ್ಷಿಣೊಡು ಜಾಂಜಿಬಾರ್ ಮುಟ್ಟ ಪಗರ್‌ದ್ ಇತ್ತ್ಂಡ್.[೩] 20ನೇ ಶತಮಾನೊಡು, ಒಮಾನ್ ಬ್ರಿಟಿಷ್ ಸಾಮ್ರಾಜ್ಯದ ಪ್ರಭಾವೊಗು ತಿಕ್ಕಿಂಡಲಾ, ಕಾಯ್ದೆದ ಪ್ರಕಾರ ಸ್ವತಂತ್ರವಾದೆ ಒರಿಂಡ್.[೪]
ಆಡಳಿತ
[ಸಂಪೊಲಿಪುಲೆ]ಒಮಾನ್ ದೇಸೊನು ಒರಿ ಸುಲ್ತಾನೆ ಆಳುನ ಸಂಪೂರ್ಣ ರಾಜಪ್ರಭುತ್ವ ಆದುಂಡು. ದೇಶದ ಬೊಕ್ಕ ಸರಕಾರದ ಮುಖ್ಯಸ್ಥೆ ಪಂಡ ಸುಲ್ತಾನೆ. ಮೇರ್ ಮಂತ್ರಿಮಂಡಲದ ಮೂಲಕ ಕಾರ್ಯಾಂಗದ ಅಧಿಕಾರೊನು ನಡಪಾವೆರ್. ಖಬೂಸ್ ಬಿನ್ ಸಯೀದ್ 1970ನೇ ಇಸವಿರ್ದ್ 2020ನೇ ಇಸವಿ ಮುಟ್ಟ (ಉಂದುವೇ ವರ್ಸೊ ಆರ್ ತೀರಿಯೆರ್) ಸುಲ್ತಾನೆ ಆದಿತ್ತೆರ್. ಐನ್ ದಶಕದ ಆರೆನ ಆಳ್ವಿಕೆಡ್ ಒಮಾನ್‌ಡ್ ಬಾರಿ ಬೇಗ ಆಧುನೀಕರಣ ಆಂಡ್. ಉಂದೆನ್ ಒಮಾನಿ ಪುನರುಜ್ಜೀವನ ಪಂದ್ ಲೆಪ್ಪುವೆರ್. ಈ ಪೊರ್ತುಡು ಜನಕುಲೆನ ಜೀವನ ಮಟ್ಟ ಸುದಾರಿಂಡ್. ಗುಲಾಮಗಿರಿನ್ ದೆತ್ ಪಾಡಿಯೆರ್. ದೋಫಾರ್ ದಂಗೆ ಅಂತ್ಯ ಆಂಡ್. ಬೊಕ್ಕ ಒಮಾನ್‌‌ಗ್ ಒಂಜಿ ಪೊಸತ್ ಸಂವಿಧಾನೊನು ಜಾರಿಗ್ ಕನತೆರ್. ೧೦ನೇ ತಾರೀಕ್‌ದ ಜನವರಿ 2020ನೇ ಇಸವಿಡ್ ಖಬೂಸ್ ತೀರಿಬೊಕ್ಕ, ಹೈತಮ್ ಬಿನ್ ತಾರಿಖ್ ಒಮಾನ್‌ದ ಸುಲ್ತಾನೆಯಾದ್ ಅಧಿಕಾರೊಗು ಬತ್ತೆರ್.[೫]
ಉಲ್ಲೇಕೊಲು
[ಸಂಪೊಲಿಪುಲೆ]- ↑ "Country Facts". un.int. UN. Retrieved 13 September 2026.
- 1 2 "Oman profile – Overview". BBC News. 11 September 2012. Archived from the original on 12 March 2020. Retrieved 18 January 2013.
- ↑ Kharusi, N. S. (2012). "The ethnic label Zinjibari: Politics and language choice implications among Swahili speakers in Oman". Ethnicities. 12 (3): 335–353. doi:10.1177/1468796811432681. ISSN 1468-7968. S2CID 145808915.
- ↑ Owtram, Francis (2014-12-11). "A Close Relationship: Britain and Oman since 1750". Qatar National Library (in English). Retrieved 2025-08-20.
{{cite web}}: CS1 maint: unrecognized language (link) - ↑ "Oman: Government". globaledge.msu.edu. globalEDGE, Michigan State University. Retrieved 13 September 2026.