ಕಂಚಿಕಲ್ಲ್

ಕಂಚಿಕಲ್ಲ್ ಬೂತಾರಾದನೆ ಬೊಕ್ಕ ದೈವಾರಾದನೆಡ್ದ್ ಲಾ ಪಿರಾಕ್ ಡ್ ಇತ್ತಿ 'ನಂಬಿನ ಸತ್ಯೊಲೆನ' ಅರಾದನೆದ ಒಂಜಿ ವಿಸ್ತೃತ ರೂಪೊ. ಕುಲಬಾಂದವೆರೆನ ಅರಾದನೆನ್ ತುಳುವೆರ್ ತಮ್ಮ ಆದಿ ಅಲಡೆಲೆಡ್ ಅರಾದನೆ ಮಲ್ತಿನ ಸುರೂತ ಸಂಕೇತನೇ ಕಂಚಿಕಲ್ಲ್. ಮುಲ್ಪ ಆಲಡೆ ಪಂಡ ಪ್ರಸ್ತುತ ಗುರುತುವಿಕೆ ಪಡೆಯಿನ ಸಿರಿ ಆಲಡೆ ಅತ್ತ್. ನೆಡ್ದ್ ಲಾ ದುಂಬು ಆದಿ ಆಲಡೆ ಪನ್ಪಿನವು ಇತ್ತ್ಂಡ್.

ಕಂಚಿಕಲ್ಲ್ ದ ಉಲ್ಲೇಕೊ

ತುಳುಟ್ಟ್ ಕಂಚಿ ಪನ್ಪಿನ ಸಬ್ಧೊಗ್ ಅಂಗ ಪಂಡ್‍ದ್ ಅರ್ತ ಉಂಡು, 'ಕಂಚಿಕಳಲಿ' ಪಂಡ ಅಂಗ‌ಸಾದನೆ ನಡೆಪಿನ ಜಾಗೆ ಪಂಡ್‍ದ್ ಅಂಚನ್ ಮೇರ್ ತಮ್ಮ ಕೃತಿಟ್ಟ್ ಗುರುತಿಸಾದೆರ್. ಈ ಬಗೆಟ್ ಒಂಜಿ ನುಡಿಗಟ್ಟ್ ಅರೆನ ಕೃತಿಟ್ಟ್ ಉಲ್ಲೇಕೊವಾದುಂಡು. 'ಊರುಗಾಪಿನ ಕಂಚಿಕಳಲಿ ಸಾದಗದ ಕೊಟ್ಯ ಕಟ್ಟಾಯೆರ್' ಪಂಡ ಊರುಗು ಅನುಕೂಲ ಆಪುನಂಚ ಅಂಗ ಸಾದನೆದ ಕೊಟ್ಯನ್ ಕಟ್ಟಾಯೆರ್ ಪಂಡ್‍ದ್.

ಕಂಚಿಕಲ್ಲ್ ದ ಗುರುತುವಿಕೆ

ತುಳುವೆರೆನ ಪ್ರಾಚೀನ ಆದಿ ಆಲಡೆಟ್ ಇತ್ತಿನ ರಡ್ಡ್ ಕಂಚಿಕಲ್ಲ್ ಕರಿ ಬಂಡೆಲು ಆದಿತ್ತ. ನಮ ಪೂರ್ವೊ ದಿಕ್ಕ್ ಗ್ ಮೋನೆ ಮಲ್ತ್‍ದ್ ಉಂತುನಗ ನಮನ ಬಲಬಾಗೊಗ್ ಇಪ್ಪುನ ಕಲ್ಲ್ 'ಪೊಣ್ಣು' ಅಂಚನೆ ಎಡಬಾಗೊಡ್ ಇಪ್ಪುನ ಕಲ್ಲ್ 'ಆಣ್' ಪಂಡ್‍ದ್ ಗುರುತಿಸಾವೆರ್.

ಪದ್ಧತಿ

ದುಂಬು ಮಾನವೆರ್ ಬೋಂಟೆಗ್ ಪೋದು ಆಹಾರ ಸಂಗ್ರಹ ಮಲ್ತೊಂದಿತ್ತೆರ್. ಆ ಕಾಲೊಡ್ ಕುಟುಂಬೊದ ಮೂಲ ಆಲಡೆರ್ದ್ ಪೋದು ಬೇತೆ ಬೇತೆ ಕುಲೊತ್ತಕುಲು ಒಂಜಿ ಜಾಗೆಡ್ ಒಟ್ಟಾವೊಂದಿತ್ತೆರ್. ಆ ಜಾಗೆಗ್ ಪಂಜಿಕಲ್ಲ್ ಪಂಡ್‍ದ್ ಪುದರ್ ಇತ್ತ್ಂಡ್. ಈ ಪಂಜಿಕಲ್ಲ್ ಡ್ ಬೋಂಟೆಡ್ ತಿಕ್ಕಿನ ಮೃಗೊತ್ತ ಮಾಸೊನ್ ಪಟ್ಟಿ ಬೊಕ್ಕ ತನ್ನ ಪಾಲ್‍ನ್ ಗೆತೊಂದು ತನ್ನ ಆಲಡೆಗ್ ಬತ್‍ದ್ ಅಲ್ಪ ನಂಬಿನ ಸತ್ಯೊಲೆನನ ಕಂಚಿಕಲ್ಲ್ ಗ್ ಮಾಸೊನ್ ಅರ್ಪಣೆ ಮಲ್‍ತ್‍ದ್ ಪ್ರಾರ್ತನೆ ಮಲ್ಪುನವು ತುಳುವೆರೆನ ಪ್ರಾಚೀನ ಸಂಸ್ಕೃತಿದ ಒಂಜಿ ಪದ್ದತಿ. ಈ ರಡ್ಡ್ ಜೋಡಿಕಲ್ಲ್ ಲೆಗ್ ಕಲ್ಲುಕುಟಿಕ ಬುಕ್ಕ ಕಲ್ಲುರುಟಿ ಪನ್ಪಿನ ಪುದರ್ ಇತ್‍ದ್ ಅವೆನ್ ಕಂಚಿಕಲ್ಲ್ಂದ್ ಪನೊಂದಿತ್ತೆರ್. ಈ ಕಲ್ಲುರುಟಿ ಕಲ್ಲುಕುಟಿಕೊಲೆಗ್ ಇತ್ತಿನ ಕಲ್ಕುಡ ಕಲ್ಲುರ್ಟಿ ದೈವೊಲೆಗ್ ವೊವ್ವೇ ಸಂಬಂದ ಇಜ್ಜಿ. ಈ ಕಂಚಿಕಲ್ಲ್ ದ ಅರಾದನೆಗ್ಲಾ ಒಂಜಿ ಕೂಡು ಕಟ್ಟ್ ಬುಕಗಕ ಅರಾದನೆದ ವ್ಯವಸ್ಥೆ ಇತ್ತ್ಂಡ್. ಅಯಾ ಕುಲೊತ್ತ ಪಿರಿಯ ಯಜಮಾನ ಯಜಮಾನ್ತಿಗ್ ಕಾಪಾಡ‌ ಕಪಾಡ್ತಿಯಿ ಪಂಡ್‍ದ್ ಪುದರ್ ಇತ್ತ್ಂಡ್. ಮೊಕುಲೇ ಕುಲೊತ್ತ ಮುಖ್ಯ ಮಾರ್ಗದರ್ಶಕೆರಾದಿತ್ತೆರ್. ಕಾಲಾಂತರೊಡ್ ಈ‌ ಪದವಿಗ್ ಪರ್ಯಾಯವಾದ್ 'ಪಾಲವ' ಬುಕ್ಕ ಮುಕ್ಕಾರಿ ಪನ್ಪಿನ ಸಬ್ದೊಲೆದ ಗಲಸರೆ ಸುರು ಮಲ್ತೆರ್.