ಕತಾರ್
ಕತಾರ್- ಅಧಿಕೃತವಾದ್ ಕತಾರ್ ರಾಜ್ಯ- ಪಶ್ಚಿಮ ಏಷ್ಯಾದ ಒಂಜಿ ದೇಶ. ಉಂದು ಮಧ್ಯಪ್ರಾಚ್ಯದ ಅರೇಬಿಯನ್ ಪರ್ಯಾಯ ದ್ವೀಪದ ಈಶಾನ್ಯ ಕರಾವಳಿದ ಕತಾರ್ ಪರ್ಯಾಯ ದ್ವೀಪಡ್ ಉಂಡು. ಉಂದೆತ ಒಂಜೇ ಒಂಜಿ ಭೂ-ಗಡಿ ದಕ್ಷಿಣಡ್ ಸೌದಿ ಅರೇಬಿಯಾದ ಒಟ್ಟುಗು ಉಂಡು, ಬೊಕ್ಕ ಬಾಕಿದ ಜಾಗೆ ಪರ್ಷಿಯನ್ ಕೊಲ್ಲಿರ್ದ್ ಆವೃತ ಆತ್ಂಡ್. ಪರ್ಷಿಯನ್ ಕೊಲ್ಲಿದ ಒಂಜಿ ಭಾಗ ಆಯಿನ ಬಹ್ರೇನ್ ಕೊಲ್ಲಿ, ಕತಾರ್‌ನ್ ಬಹ್ರೇನ್‌ರ್ದ್ ಬೇತೆ ಮಲ್ಪುಂಡು. ದೋಹಾ ಕತಾರ್‌ದ ರಾಜಧಾನಿ. ಕತಾರ್‌ದ ೮೦%ದಾತ್ ಜನೊಕುಲು ದೋಹಾಡ್ ವಾಸ ಮಲ್ಪುವೆರ್. ಮುಲ್ಪದ ಮುಕ್ಕಾಲ್ವಾಸಿ ಜಾಗೆ ಸಮತಟ್ಟಾಯಿನ ಮರುಭೂಮಿರ್ದ್ ಆತ್ಂಡ್.
ಕತಾರ್‌ದ ಜನಸಂಖ್ಯೆ ಅಂದಾಜಿ ೩೨ ಲಕ್ಷ ಉಂಡು. ಇಂದೆಟ್ ಅಂದಾಜಿ ೩೦ ಲಕ್ಷ ಜನೊಕುಲು ಪರದೇಸೊದಕ್ಲು ಬೊಕ್ಕ ವಲಸೆ ಕಾರ್ಮಿಕೆರ್ ಉಲ್ಲೆರ್.[1][2] ಒರಿದಿನ ಅಂದಾಜಿ ೨ ಲಕ್ಷ ಜನೊಕುಲು ಮುಲ್ಪದ ಮೂಲ ನಿವಾಸಿಲು. ಕತಾರ್‌ದ ಅಧಿಕೃತ ಧರ್ಮ ಇಸ್ಲಾಂ.[3] ಕತಾರ್‌ದ ಒಟ್ಟು ಇಸ್ತೀರ್ನೊ ೧೧,೫೮೧ ಚದರ ಕಿಮೀ ಉಂಡು. ಇಸ್ತೀರ್ನೊದ ಲೆಕ್ಕೊಡು ಪ್ರಪಂಚೊಡು ಕತಾರ್ ೧೫೯ನೇ ಸಾನೊಡು ಉಂಡು. ತಲಾದಾಯನ್ ಲೆಕ್ಕ ಪತ್ತಿಂಡ, ಕತಾರ್, ಪ್ರಪಂಚಡ್ ನಾಲನೇ ಮಲ್ಲ ಸ್ಥಾನಡ್ ಉಂಡು.[4] ಪ್ರಪಂಚದ ಮೂಜನೇ ಮಾಮಲ್ಲ ನೈಸರ್ಗಿಕ ಅನಿಲ ಬೊಕ್ಕ ತೈಲ ನಿಕ್ಷೇಪೊಲು ಮುಲ್ಪ ಉಂಡು. ಕತಾರ್ ಪ್ರಪಂಚಡ್ ಅತಿ ಹೆಚ್ಚ್ ದ್ರವೀಕೃತ ನೈಸರ್ಗಿಕ ಅನಿಲ (LNG ಪನ್ಪೆರ್) ರಫ್ತು ಮಲ್ಪುನ ದೇಶೊಲೆಡ್ ಒಂಜಿ.[5]
ಇತಿಹಾಸೊ
[ಸಂಪೊಲಿಪುಲೆ]ಸುಮಾರು ೫೦,೦೦೦ ವರ್ಷದ ದುಂಬೆ ಕತಾರ್‌ಡ್ ನರಮಾನಿಲು ಇತ್ತಿನ ಬಗೆಟ್ ಕುರುಹುಲು ತಿಕ್ಕ್‌ದ್ಂಡ್. ಶಿಲಾಯುಗದ ಶಿಬಿರೊಲು ಬೊಕ್ಕ ಉಪಕರಣೊಲು ತಿಕ್ಕ್‌ದ್ಂಡ್. ನವಶಿಲಾಯುಗದ ಪೊರ್ತುಡು ಮೆಸಪೊಟೊಮಿಯಾ ನಾಗರೀಕತೆ ಈ ಜಾಗೆಡ್ ಇತ್ತ್ಂಡ್. ಕಡಲ ಬರಿತ ಶಿಬಿರೊಲೆದ ಕೈತಲ್ ಉಬೈದ್ ಕಾಲಗ್ ಸೇರಿನ ಕರತ ಚೂರುಲು ತಿಕ್ಕಿನನೇ ಉಂದೆಕ್ ಸಾಕ್ಷಿ ಆತ್ಂಡ್.[6]
ಸುರುತ್ತ ವರ್ಷೊಲೆಡ್, ಈ ಪರ್ಯಾಯ ದ್ವೀಪ ಸೆಲ್ಯೂಸಿಡ್, ಪಾರ್ಥಿಯನ್ನೆರ್ ಬೊಕ್ಕ ಸಸಾನಿಯನ್ನೆರ್ ಸೇರಿನಂಚನೆ ಮಸ್ತ್ ಬೇತೆ ಬೇತೆ ಸಾಮ್ರಾಜ್ಯೊಲೆದ ಆಳ್ವಿಕೆಡ್ ಇತ್ತ್ಂಡ್. ಕ್ರಿ.ಶ ೬೨೮ಡ್, ಪೂರ್ವ ಅರೇಬಿಯಾದ ಸಸಾನಿಡ್ ಗವರ್ನರ್ ಆದಿತ್ತಿನ ಮುಂಜಿರ್ ಇಬ್ನ್ ಸಾವಾಗ್ ಮುಹಮ್ಮದ್ ಪೈಗಂಬರೆರ್ ರಾಯಭಾರಿನ್ ಕಡಪುಡಿನ ಬೊಕ್ಕ ಮುಲ್ಪ ಇಸ್ಲಾಮ್ ಹರಡಿಯೆರೆ ಸುರು ಆಂಡ್. ೮ನೇ ಶತಮಾನದ ಪೊರ್ತುಗು ಉಂದು ಮುತ್ತುದ ವ್ಯಾಪಾರದ ಕೇಂದ್ರ ಆಂಡ್. ಅಬ್ಬಾಸಿದ್ ಯುಗಟ್ ಮಸ್ತ್ ವಸಾಹತುಲು ಮುಲ್ಪ ಪುಟ್ಟ್ಂಡ್. ೧೭೮೩ಡ್ ಬಾನಿ ಉತ್ಬಾ ಬೊಕ್ಕ ಬೇತೆ ಅರಬ್ ಬುಡಕಟ್ಟುದಕುಲು ಬಹ್ರೇನ್‌ನ್ ವಶಗ್ ದೆತೊಂಡಿನ ಬೊಕ್ಕ, ಬುಡಕಟ್ಟುದ ಪ್ರಮುಖ ರಾಜವಂಶ ಅಲ್ ಖಲೀಫಾ ಮನೆತನ ಬಹ್ರೇನ್ ಬೊಕ್ಕ ಕತಾರ್‌ದ ಮಿತ್ತ್ ಅಕುಲೆನ ಅಧಿಕಾರನ್ ಸ್ಥಾಪನೆ ಮಲ್ತೆರ್.
೧೯೧೬ಡ್, ಕತಾರ್ ಬ್ರಿಟಿಷೆರೆನ ಕೈಗ್ ಬತ್ತ್ಂಡ್. ಕಡಲ್‌ದ ಮಾರ್ಗ ಬೊಕ್ಕ ಭೂಮಿದ ಮಿತ್ತ್‌ದ ಆಕ್ರಮಣೊರ್ದು ರಕ್ಷಣೆ ಕೊರೊಡು ಪನ್ಪಿನ ಕರಾರ್‌ದ ಒಟ್ಟುಗು ಅಪಗದ ಸುಲ್ತಾನೆರ್ ಅಬ್ದುಲ್ಲಾ ಅಲ್ ಥಾನಿ, ಬ್ರಿಟೀಷೆರೆನ ಒಟ್ಟುಗು ಒಪ್ಪಂದಗ್ ಸಹಿ ಪಾಡಿಯೆರ್.[7]
೧೯೬೮ಡ್ ಪರ್ಷಿಯನ್ ಕೊಲ್ಲಿದ ಶೇಖ್‌ಶಾಹಿಲೆನ ಒಟ್ಟುಗು ಬ್ರಿಟೀಷೆರ್ ಮಲ್ತೊಂದಿತ್ತಿನ ಒಪ್ಪಂದೊಲೆನ್ ರದ್ದು ಮಲ್ಪುವ ಪಂಡ್‍ದ್ ಬ್ರಿಟನ್ ಘೋಷಣೆ ಮಲ್ತ್ಂಡ್. ಆತಾನಗ, ಬ್ರಿಟಿಷ್ ರಕ್ಷಣೆಡ್ ಇತ್ತಿನ ಎನ್ಮ ರಾಜ್ಯೊಲು ಸೇರ್‌ದ್ ಅರಬ್ ಎಮಿರೇಟ್‌ಲೆದ ಒಕ್ಕೂಟನ್ ಮಲ್ಪುನ ಯೋಜನೆ ಒಂಜಿ ಪುಟ್ಟ್ಂಡ್. ಕತಾರ್‌ಲಾ ಈ ಯೋಜನೆಡ್ ಕೈ ಸೇರಾಂಡು. ೧೯೭೧ದ ನಡುತ ಪೊರ್ತುಗು, ಬ್ರಿಟಿಷ್ ಒಪ್ಪಂದದ ಸಂಬಂಧ ಮುಗಿಯುನ ಪೊರ್ತು ಬತ್ಂಡಲಾ ಒಕ್ಕೂಟದ ಒರ್ಂಬ ರಾಜ್ಯೊಲು ನನಲಾ ಒಕ್ಕೂಟದ ನಿಯಮೊಲೆನ್ ಒಪ್ಪೊಂದು ಇಜ್ಜಾಂಡ್. ಉಂದೆತ ಪರಿಣಾಮವಾದ್, ಕತಾರ್ ಒಕ್ಕೂಟೊರ್ದು ಪಿದಯಿ ಬತ್ತ್ಂಡ್ ಬೊಕ್ಕ ಸೆಪ್ಟೆಂಬರ್ ೩, ೧೯೭೧ಡ್ ತನ್ನ ಸ್ವಾತಂತ್ರ್ಯನ್ ಘೋಷಣೆ ಮಲ್ತೊಂಡ್. ಜೂನ್ ೧೯೯೫ಡ್, ಉಪ ಅಮೀರ್ ಆದಿತ್ತಿನ ಹಮದ್ ಬಿನ್ ಖಲೀಫಾ, ಅಮೀರ್ ಆದಿತ್ತಿನ ಅರೆನ ಅಮ್ಮೆರ್ ಖಲೀಫಾ ಬಿನ್ ಹಮದ್ ಅರೆನ್ ಅಧಿಕಾರೊರ್ದು ಜಪುಡಾದ್ ಬೊಕ್ಕ ಪೊಸ ಅಮೀರೆರ್ ಆದ್ ಅಧಿಕಾರ ದೆತೊಂಡೆರ್. ಸಂಸದೀಯ ಚುನಾವಣೆಲು ನಡತ್ಂಡ್. ಏಪ್ರಿಲ್ ೨೦೦೩ಡ್ ಸಾರ್ವಜನಿಕ ಜನಾಭಿಪ್ರಾಯ ಸಂಗ್ರಹದ ಮುಖಾಂತರ ಪೊಸ ಸಂವಿಧಾನನ್ ಅನುಮೋದನೆ ಮಲ್ತೆರ್ ಬೊಕ್ಕ ಅವು ಜೂನ್ ೨೦೦೪ಡ್ ಜಾರಿಗ್ ಬತ್ತ್ಂಡ್.[7]
ಉಲ್ಲೇಕೊಲು
[ಸಂಪೊಲಿಪುಲೆ]- ↑ "Qatar population statistics".
- ↑ "Qatar Population (2026)". Worldometer (in ಇಂಗ್ಲಿಷ್). Retrieved 2026-06-22.
- ↑ "The Constitution". Archived from the original on 24 October 2004. Retrieved 29 October 2017.
- ↑ "GDP per capita, PPP (current international $) | Data". data.worldbank.org. Archived from the original on 22 June 2019. Retrieved 20 November 2022.
- ↑ "Indices & Data | Human Development Reports". United Nations Development Programme. 14 March 2013. Archived from the original on 12 January 2013. Retrieved 27 June 2013.
- ↑ Khalifa, Haya; Rice, Michael (1986). Bahrain Through the Ages: The Archaeology. Routledge. pp. 79, 215. ISBN 978-0710301123.
- 1 2 "Background Note: Qatar". U.S. Department of State (June 2008). This article incorporates text from this source, which is in the public domain.