ಕಾರ್ಗಿಲ್

ಕಾರ್ಗಿಲ್ ಲಡಾಖ್‌ದ ಒಂಜಿ ಪೇಂಟೆ. ಉಂದು ನಮ ದೇಸೊದ ಕೇಂದ್ರಾಡಳಿತ ಪ್ರದೇಶವಾಯಿನ ಲಡಾಖ್‌ದ ಚಳಿಗಾಲೊದ ರಾಜಧಾನಿ ಬೊಕ್ಕ ಕಾರ್ಗಿಲ್ ಜಿಲ್ಲೆದ ಮುಖ್ಯ ಕೇಂದ್ರ ಆದುಂಡು. ಲೇಹ್ ಬುಡ್ಂಡ ಲಡಾಖ್‌ದ ರಡ್ಡನೇ ಮಲ್ಲ ನಗರ ಕೇಂದ್ರ ಕಾರ್ಗಿಲ್ಂದ್ ಪನೊಲಿ. ಕಾರ್ಗಿಲ್ ಶ್ರೀನಗರೊರ್ದು ಮೂಡಾಯಿಗ್ ೨೦೪ ಕಿಲೋಮೀಟರ್ ಬೊಕ್ಕ ಲೇಹ್‌ರ್ದ್ ಪಡ್ಡಾಯಿಗ್ ೨೩೪ ಕಿಲೋಮೀಟರ್ ದೂರೊಡು ಉಂಡು. ಕಾರ್ಗಿಲ್ ಸುರು ತುದೆತ್ತ ಬರಿಟ್ಟ್ ಉಂಡು. ಅಂಚನೆ ಕಾರ್ಗಿಲ್‌ದ ಕೈತಲ್‌ಡ್ ಇಪ್ಪುನ ದ್ರಾಸ್ ಪನ್ಪಿನ ಜಾಗೆಡ್, ೧೯೯೯ತ ಭಾರತ-ಪಾಕಿಸ್ತಾನ ಕಾರ್ಗಿಲ್ ಯುದ್ಧದ ನೆಂಪುಗು ಕಾರ್ಗಿಲ್ ಯುದ್ಧ ಸ್ಮಾರಕನ್ ಕಟ್ಟಾದೆರ್.

೮ನೇ ಶತಮಾನರ್ದ್ ದುಂಬು, ಐತಿಹಾಸಿಕವಾದ್ 'ಪುರಿಕ್' ಪಂದ್ ಲೆಪ್ಪೊಂದಿತ್ತಿನ ಕಾರ್ಗಿಲ್, ಪಿರಾಕ್‌ದ ಕಾಲೊಡು ಇತ್ತಿನ ರೇಷ್ಮೆ ಮಾರ್ಗದ (ಸಿಲ್ಕ್ ರೂಟ್) ನಡುತ ಪ್ರಮುಖ ಸಾಂಸ್ಕೃತಿಕ ಕೇಂದ್ರ ಆದಿತ್ತ್ಂಡ್. ಇತಿಹಾಸಪೂರ್ವ ಕಾಲೊರ್ದಿಂಚಿ ಮೂಲು ಜನಕುಲು ವಾಸ ಮಲ್ತೊಂದಿತ್ತೆರ್ ಪನ್ಪಿನೆಕ್ ಪುರಾತತ್ವ ಸಂಶೋಧನೆಲೆಡ್ ಆಧಾರ ತಿಕ್ಕ್‌ದ್ಂಡ್. ಬೊಕ್ಕ ದ್ರಾಸ್ ಜಾಗೆಡ್ ತೋಜಿದ್ ಬರ್ಪಿನ ಹಿಂದೂ ಮಹಾಕಾವ್ಯ ಪ್ರೇರಿತವಾಯಿನ ಪುದರ್‌ಲು ಮೂಲು ಇತ್ತಿನ ವೈದಿಕ ಸಂಪ್ರದಾಯದ ಪ್ರಭಾವೊನು ತೋಜಾವುಂಡು. ಗಿಲ್ಗಿಟ್‌ರ್ದ್ ವಲಸೆ ಬೈದಿನ ಇಂಡೋ-ಆರ್ಯನ್ 'ದಾರ್ಡ್' ಬುಡಕಟ್ಟ್‌ದ ಜನಕುಲು ಮೂಲು ಸುರುಕು ನೆಲೆ ಆಯಿನಕುಲು. ಅಕುಲು ದ್ರಾಸ್ ಬೊಕ್ಕ ದ-ಹನು ಜಾಗೆಲೆಡ್ ನೆಲೆಸಾದ್ 'ಶಿನಾ' ದಂಚಿನ ಭಾಷೆಲೆನ್ ಪರಿಚಯ ಮಲ್ತೆರ್. ಭಾರತೊಡು ಪುಟ್ಟಿನ ಬೌದ್ಧ ಧರ್ಮ ಭಾರತೀಯ ಉಪಖಂಡೊಡು ಪಗರಿಲೆಕ್ಕ, ಈ ಜಾಗೆಲಾ ಬೌದ್ಧ ಸಮಾಜವಾದ್ ಬದಲಾಂಡ್. ರೇಷ್ಮೆ ಮಾರ್ಗದ ಮುಖಾಂತರ ಟಿಬೆಟ್‌ಗ್ ಪೋವೊಂದಿತ್ತಿನ ಸನ್ಯಾಸಿಲೆಗ್ ಕಾರ್ಗಿಲ್ ಒಂಜಿ ಪ್ರಮುಖವಾಯಿನ ತಂಗುದಾಣ ಆಂಡ್. ಬೌದ್ಧ ಧರ್ಮದ ಪ್ರಭಾವ ಮೂಲು ೭ನೇ ಶತಮಾನದ ಕಡೆಮುಟ್ಟ ಉತ್ತುಂಗೊಡು ಇತ್ತ್ಂಡ್. ಸುಮಾರ್ ಈ ಕಾಲೊಡೇ ಮೈತ್ರೇಯ ಬುದ್ಧನ ೯ ಮೀಟರ್ ಎತ್ತರದ ಮಲ್ಲ 'ಮುಲ್ಬೆಕ್ ಚಂಬಾ' ಕಲ್ಲ್‌ದ ಮೂರ್ತಿನ್ (ವಿಗ್ರಹೊನು) ಕೆತ್ತನೆ ಮಲ್ತೆರ್. ಗಿಲ್ಗಿಟ್ ರಾಜವಂಶೊಲು ಬತ್ತಿ ಬೊಕ್ಕ ರಾಜಕೀಯ ಚಿತ್ರಣ ಬದಲಾವೊಂದು ಬತ್ತ್‌ದ್, ಮುಸಲ್ಮಾನ ದಾಳಿಕೋರರೆನ ದಾಳಿಗ್ ಈ ಜಾಗೆ ಈಡಾಂಡ್.