ಕಿರ್ಗಿಝ್‌ಸ್ತಾನ್

ಕಿರ್ಗಿಝ್‌ಸ್ತಾನ್-ಅಧಿಕೃತವಾದ್ ಕಿರ್ಗಿಜ್ ಗಣರಾಜ್ಯ. ಇಂದೆಕ್ ದುಂಬು ಕಿರ್ಗಿಜಿಯಾ ಪಂಡ್ದ್ ಲೆಪ್ಪೊಂದಿತ್ತೆರ್- ಮಧ್ಯ ಏಷ್ಯಾಡ್ ಉಪ್ಪುನ ಒಂಜಿ ದೇಸೊ. ತ್ಸಿಯಾನ್ ಶಾನ್ ಬೊಕ್ಕ ಪಾಮಿರ್ ಪರ್ವತ ಶ್ರೇಣಿದ ನಡುಟು ಈ ದೇಸೊ ಉಂಡು. ಕಿರ್ಗಿಝ್‌ಸ್ತಾನ್ ಒಂಜಿ ಸುತ್ತಲಾ ಭೂಮಿ ಇಪ್ಪುನ ದೇಸೊ. ಉಂದೆತ ಬಡಕಾಯಿಡ್ ಕಜಾಕಿಸ್ತಾನ್, ಪಡ್ಡಾಯಿಡ್ ಉಜ್ಬೇಕಿಸ್ತಾನ್, ತೆಂಕಾಯಿಡ್ ತಜಿಕಿಸ್ತಾನ್, ಬೊಕ್ಕ ಮೂಡಾಯಿ ಬೊಕ್ಕ ಆಗ್ನೇಯಡ್ ಚೀನಾ ದೇಶೊಲು ಉಲ್ಲ. ಬಿಶ್ಕೆಕ್ ಉಂದೆತ ರಾಜಧಾನಿ ಬೊಕ್ಕ ಮಲ್ಲ ನಗರ. ಉಂದು ಬಡಕಾಯಿದ ಕಜಾಕಿಸ್ತಾನ್ ಗಡಿಟ್ ಉಂಡು. ಮುಲ್ಪದ ಜನಸಂಕ್ಯೆ ಅಂದಾಜಿ ೭೫ ಲಕ್ಷ ಜನಸಂಖ್ಯೆ ಉಂಡು. ಒಟ್ಟು ಜನಸಂಕ್ಯೆಡ್ ಕಿರ್ಗಿಜ್ ಜನಾಂಗದಕುಲು ಎಚ್ಚ ಉಲ್ಲೆರ್, ಅಯಿರ್ದ್ ಬೊಕ್ಕ ಉಜ್ಬೇಕ್ ಬೊಕ್ಕ ರಷ್ಯನ್ ಜನಾಂಗದಕುಲು ಉಲ್ಲೆರ್.

ಕಿರ್ಗಿಸ್ತಾನ್‌ದ ಇತಿಹಾಸೊಡು ಬೇತೆ ಬೇತೆ ಸಂಸ್ಕೃತಿಲು ಬೊಕ್ಕ ಸಾಮ್ರಾಜ್ಯೊಲು ಆದ್ ಪೋತ. ಈ ಜಾಗೆ ಪರ್ವತೊಲೆರ್ದ್ ಆವೃತವಾದ್ ಬೇತೆ ಆದಿತ್ಂಡಲಾ, ದುಂಬುದ ರೇಷ್ಮೆ ಮಾರ್ಗ ಬೊಕ್ಕ ಬೇತೆ ವ್ಯಾಪಾರ ಮಾರ್ಗೊಲೆದ ಒಂಜಿ ಭಾಗವಾದ್ ಇತ್ತ್ಂಡ್. ಬೇತೆ ಬೇತೆ ಬುಡಕಟ್ಟು ಬೊಕ್ಕ ವಂಶದಕುಲು ಮುಲ್ಪ ಬದುಕ್ದಿತ್ತೆರ್. ಅಂಚನೆ ಕಿರ್ಗಿಸ್ತಾನ್ ಮಸ್ತ್ ಸರ್ತಿ ಮಲ್ಲ ಮಲ್ಲ ಸಾಮ್ರಾಜ್ಯೊಲೆನ -ಉದಾರ್ನೆಗ್ ಟರ್ಕಿಕ್ ಅಲೆಮಾರಿ ಜನೊಕುಲು- ಆಡಳಿತೊಗು ಬತ್ತ್ಂಡ್. ಐಡ್ದ್ ಬೊಕ್ಕ ಉಂದು ಯೆನಿಸೇಯ್ ಕಿರ್ಗಿಜ್ ಖಗಾನೇಟ್ ಆದ್ ಸ್ಥಾಪನೆ ಆಂಡ್. ೧೩ನೇ ಶತಮಾನೊಡು ಮಂಗೋಲ್ ರಾಜವಂಶೊಲು ಉಂದೆನ್ ಗೆಂದಿಯೆರ್; ಉಂದು ಸ್ವತಂತ್ರ ಆಂಡಲಾ ಬೊಕ್ಕ ಜುಂಗಾರ್ ಖಾನ್ ಅರಸುವಂಸೊದಕ್ಲು ಉಂದೆತ ಮಿತ್ತ್ ದಾಳಿ ಮಲ್ತೆರ್. ಕ್ವಿಂಗ್ ರಾಜವಂಶ ಜುಂಗಾರ್‌ಲೆನ್ ನಾಶ ಮಲ್ತಿ ಬೊಕ್ಕ, ಕಿರ್ಗಿಜ್ ಬೊಕ್ಕ ಕಿಪ್ಚಾಕ್‌ ಅಲೆಮಾರಿಲು ಕೊಕಂಡ್ ಪ್ರಾಂತ್ಯೊಡು ಸೇರ್ದ್ ಪೋಯೆರ್.

೧೮೭೬ನೇ ಇಸವಿಡ್, ಕಿರ್ಗಿಸ್ತಾನ್ ರಷ್ಯಾ ಸಾಮ್ರಾಜ್ಯದ ಒಂಜಿ ಭಾಗ ಆಂಡ್, ಬೊಕ್ಕ ೧೯೩೬ನೇ ಇಸವಿಡ್ ಕಿರ್ಗಿಜ್ ಸೋವಿಯೆಟ್ ಒಕ್ಕೂಟಡ್ ಇತ್ತ್ಂಡ್. ೩೧ ತಾರೀಕ್ ಆಗಸ್ಟ್ ೧೯೯೧ನೇ ಇಸವಿಡ್, ಕಿರ್ಗಿಸ್ತಾನ್ ಯು.ಎಸ್.ಎಸ್.ಆರ್-ರ್ದ್ ಸ್ವಾತಂತ್ರ್ಯೊನು ಘೋಷಣೆ ಮಲ್ತ್ಂಡ್. ಬೊಕ್ಕ ಒಂಜಿ ಪ್ರಜಾಸತ್ತಾತ್ಮಕ ಸರ್ಕಾರ ಮುಲ್ಪ ಸ್ಥಾಪನೆ ಆಂಡ್. ೧೯೯೧ನೇ ಇಸವಿಡ್ ಸೋವಿಯೆಟ್ ಯೂನಿಯನ್ ಬೂರ್ದು ಪೋಯಿ ಬೊಕ್ಕ ಕಿರ್ಗಿಸ್ತಾನ್ ಒಂಜಿ ಸ್ವತಂತ್ರ ರಾಷ್ಟ್ರವಾದ್ ಸಾರ್ವಭೌಮತ್ವ ಪಡೆಂಡ್.