ಕುಂದಾಪುರ ಕುಷ್ಠ ಗಾಣಿಗ

ಕುಂದಾಪುರ ಕುಷ್ಠ ಗಾಣಿಗ (ಮೂಲೊಡು ಕೋಡಿ ಕೃಷ್ಣ ಗಾಣಿಗ 6 ಸೆಪ್ಟೆಂಬರ್ 1947 – 12 ಜೂನ್ 2025) ಪನ್ಪಿನಾರ್ ಯಕ್ಷಗಾನದ ತೆಂಕುತಿಟ್ಟು ಬೊಕ್ಕ ಬಡಗುತಿಟ್ಟು ರಡ್ಡ್ ಶೈಲಿಲೆಡ್ ಪ್ರಸಿದ್ಧಿ ಪಡೆದಿನ ಹಿರಿಯ ಸ್ತ್ರೀವೇಷಧಾರಿ ಕಲಾವಿದ್ ಆದುಲ್ಲೆರ್. ದೇವಿ ಪಾತ್ರದ ಅಭಿನಯೊದ ಮೂಲಕ ಅಪೂರ್ವ ಜನಮನ್ನಣೆ ಪಡೆದೆರ್. "ಕುಷ್ಠರ ದೇವಿ" ಪನ್ಪುನ ಅಭಿವ್ಯಕ್ತಿ ಯಕ್ಷಗಾನಾಭಿಮಾನಿಲೆನ ನಡುಟು ಪ್ರಸಿದ್ಧ ಆತೆರ್.

ಆರಂಭಿಕ ಜೀವನ

ಕುಷ್ಠ ಗಾಣಿಗ 1947ರ ಸೆಪ್ಟೆಂಬರ್ 6 ತಾರೀಕುಡು ಲಕ್ಷ್ಮಣ ಗಾಣಿಗ ಬೊಕ್ಕ ಮಂಜಿ ದಂಪತಿಲೆನ ಮಗನಾದ್ ಜನ್ಮ ಪಡೆಯೆರ್. ಬಡಗುತಿಟ್ಟುದ ಪ್ರಸಿದ್ಧ ಕಲಾವಿದ ಹೇರಂಜಾಲು ವೆಂಕಟರಮಣ ಗಾಣಿಗರೆನ ಕೈಡ್ ಬಡಗುತಿಟ್ಟುದ ನಾಟ್ಯಾಭ್ಯಾಸ ಪಡೆದು ಇತ್ತೆರ್. ಬೊಕ್ಕ ಪಡ್ರೆ ಚಂದುರೆಡ ಕೈಡ್ ತೆಂಕುತಿಟ್ಟುದ ನಾಟ್ಯಾಭ್ಯಾಸ ಕಲ್ತೆರ್.

ಯಕ್ಷಗಾನ ಜೀವನ

ಅಮೃತೇಶ್ವರಿ ಮೇಳ, ಮಾರಣಕಟ್ಟೆ ಮೇಳ, ಕಲಾವಿಹಾರ ಮೇಳ ಬೊಕ್ಕ ರಾಜರಾಜೇಶ್ವರಿ ಮೇಳಲೆಡ್ ಸೇವೆ ಮಲ್ತುದೆರ್. 1970ಡ್ ಕಟೀಲು ಮೇಳ ಸೇರ್‌ದ್ ಸುಮಾರು 21 ವರ್ಷೊಲೆಗ್ ನಿರಂತರವಾದ್ ಕಲಾಸೇವೆ ಮಲ್ತೆರ್. ಸುರುಕ ಕಟೀಲು ಒಂಜನೇ ಮೇಳೊಡು, ಬೊಕ್ಕ ಕಟೀಲು ರಡ್ಡನೇ ಮೇಳೊಡು, ಅಕೆರಿಗ್ ಕಟೀಲು ಮೂಜನೇ ಮೇಳೊಡು ಸೇವೆ ಮಲ್ತುದು ಶಾಶ್ವತವಾದ್ ಮೇಳೊ ಬುಡಿಯೇರ್.

ದೇವಿ, ನಂದಿನಿ, ಸುಭದ್ರೆ, ಮಂಡೋದರಿ, ದ್ರೌಪದಿ, ಕಯಾದು, ಸೀತೆ, ಅಂಬೆ, ದಮಯಂತಿ, ಮಾಯಾಪೂತನಿ, ಮಾಯಾಶೂರ್ಪನಖಿ ಬೊಕ್ಕ ಚಂದ್ರಮತಿ ಅಂಚಿನ ಕೆಲವು ಸ್ತ್ರೀಪಾತ್ರಲೆನ್ ಯಶಸ್ವಿಯಾದ್ ಅಭಿನಯ ಮಲ್ತೊಂದು ಇತ್ತೆರ್. ಪರಶುರಾಮ, ವಿಷ್ಣು ಬೊಕ್ಕ ಕೃಷ್ಣ ಅಂಚಿನ ಸಾತ್ವಿಕ ಪುರುಷ ಪಾತ್ರಲೆನ್‌ಲಾ ಅಭಿನಯ ಮಲ್ತುದೆರ್.

ವಿಶೇಷವಾದ್ ಶ್ರೀದೇವಿ ಮಹಾತ್ಮೆ ಪ್ರಸಂಗದ ದೇವಿ ಪಾತ್ರ ಬೊಕ್ಕ ಕಟೀಲು ಕ್ಷೇತ್ರಮಹಾತ್ಮೆ ಪ್ರಸಂಗದ ನಂದಿನಿ ಪಾತ್ರ ಮೇರೆಗ್ ಅಪಾರ ಜನಪ್ರಿಯತೆ ಕೊರ್ತುಂಡು.

ಪ್ರಶಸ್ತಿ ಬುಕ್ಕ ಸನ್ಮಾನೊಲು

ಯಕ್ಷಗಾನ ಕ್ಷೇತ್ರೊಗ್ ಕೊರ್ಪಿನ ಸೇವೆಗಾದ್ ಮೆರೆಗ್ ಉಡುಪಿ ಕಲಾರಂಗ ಪ್ರಶಸ್ತಿ, ಕರ್ನಾಟಕ ಯಕ್ಷಗಾನ ಅಕಾಡೆಮಿದ ಯಕ್ಷಸಿರಿ ಪ್ರಶಸ್ತಿ (2022), ಹಾರಾಡಿ ರಾಮ ಗಾಣಿಗ ಪ್ರಶಸ್ತಿ, ಯಕ್ಷಧ್ರುವ ಪಟ್ಲ ಪ್ರತಿಷ್ಠಾನ ಪ್ರಶಸ್ತಿ ಬೊಕ್ಕ ಡಾ. ಜಿ. ಶಂಕರ್ ಫ್ಯಾಮಿಲಿ ಟ್ರಸ್ಟ್ ಪ್ರಶಸ್ತಿ ಮಲ್ಪುನ ಗೌರವೊಲು ಲಭಿಸುದುಂಡು.

ನಿಧನ

ಕುಷ್ಠ ಗಾಣಿಗ 2025ರ ಜೂನ್ 12 ತಾರೀಕುಡ್ ಕುಂದಾಪುರ ತಾಲೂಕುದ ಕೋಡಿಯಡ್ ಉಪ್ಪುನ ಅರೆನ ಇಲ್ಲಡ್ ಅಲ್ಪಕಾಲದ ಅಸೌಖ್ಯದ ಕಾರಣೊಡ್ ನಿಧನ ಆಯೆರ್. ಆ ಸಮಯೊಡ್ ಅರೆಗ್ 78 ವರ್ಷ ಪ್ರಾಯ ಆದು ಇತ್ತುಂಡು. ಮೆರೆಗ್ ಬೊಡೆದಿ, ಮೂಜಿ ಆನ್ ಜೋಕುಲು ಬೊಕ್ಕ ಒಂಜಿ ಪೊಣ್ಣು ಮಗಳ್ ಉಲ್ಲೆರ್.