ಖೋರ್ತ್ಯಿತ್ಸ್ಯಾ
ಖೋರ್ತ್ಯಿತ್ಸ್ಯಾ ಉಕ್ರೇನ್‌ಡ್ ದ್ನಿಪ್ರೊ ತುದೆಟ್ ಇಪ್ಪುನ ಮಾ ಮಲ್ಲ ದ್ವೀಪೊ. ಸುಮಾರು 12.5 ಕಿಲೋಮೀಟರ್ ಉದ್ದೊ ಬೊಕ್ಕ ಸುಮಾರು 2.5 ಕಿಲೋಮೀಟರ್ ಅಗಲೊ ಉಂಡು. ಈ ದ್ವೀಪೊ ಖೋರ್ತ್ಯಿತ್ಸ್ಯಾ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶದ ಭಾಗೊ ಆದುಂಡು. ಇಂಚ ಐತಿಹಾಸಿಕ ಸ್ಥಳೊ ಜಪೊರಿಝ್ಝ್ಯಾ ನಗರೊದ ಗಡಿತ ಉಲಯಿ ಉಂಡು.[1]
ಖೋರ್ತ್ಯಿತ್ಸ್ಯಾ ಉಕ್ರೇನ್‌ದ ಇತಿಹಾಸೊಡು, ವಿಶೇಷೊಗು ಜಪೊರಿಝ್ಝ್ಯಾ ಕೊಸಾಕ್ಲೆನ ಇತಿಹಾಸೊಡು, ಮಹತ್ವೊದ ಪಾತ್ರ ವಹಿಸಾದುಂಡು. ದ್ವೀಪೊಡು ವಿಶಿಷ್ಟ ಸಸ್ಯೊಲು ಪ್ರಾಣಿ ವೈವಿಧ್ಯೊಲು ಲಾ ಉಂಡು. ಉತ್ತರ ಭಾಗೊ ಎತ್ತರ ಪ್ರದೇಶೊ ಆದು ಕಲ್ಲುಲು ಉಂಡು ಬೊಕ್ಕ ದಕ್ಷಿಣ ಭಾಗೊ ತಗ್ಗು ಪ್ರದೇಶವಾದುಂಡು ಬೊಕ್ಕ ದ್ವೀಪೊ ನೀರ್‌ಡ್ದ್ ಒತ್ತೊತ್ತ್ ಮುಳುಗುನ ಪ್ರದೇಶೊ ಆದುಂಡು.[1]
ಭೂಗೋಳ ಬೊಕ್ಕ ಸ್ಥಾನ
[ಸಂಪೊಲಿಪುಲೆ]ಖೋರ್ತ್ಯಿತ್ಸ್ಯಾ ದ್ನಿಪ್ರೊ ತುದೆಟ್ ಜಪೊರಿಝ್ಝ್ಯಾ ನಗರೊದ ವ್ಯಾಪ್ತಿ ಉಳತ್ತ್ ಇಪ್ಪುನ ದ್ವೀಪೊ ಆದುಂಡು. ದ್ವೀಪೊದ ಉದ್ದೊ 12.5 ಕಿಲೋಮೀಟರ್ ಬೊಕ್ಕ ಗರಿಷ್ಠ ಅಗಲೊ 2.5 ಕಿಲೋಮೀಟರ್ ಉಂಡು. ಒಟ್ಟು ವಿಸ್ತೀರ್ಣೊ ಸುಮಾರು 23.5–23.6 ಚದರ ಕಿಲೋಮೀಟರ್ ಉಂಡು.[2]
ಖೋರ್ತ್ಯಿತ್ಸ್ಯಾದ ಭೂಗರ್ಭೊಡು ಸುಮಾರು 3 ಬಿಲಿಯನ್ ವರ್ಷ ದುಂಬುದ ಗ್ರಾನೈಟಾಯ್ಡ್ ಶಿಲೆಲು ಉಲ್ಲ. ದ್ವೀಪೊದ ಭೂಭಾಗೊಡು ಎತ್ತರೊದ ವ್ಯತ್ಯಾಸ ಸುಮಾರು 56 ಮೀಟರ್ ಆದುಂಡು. ಉತ್ತರ ಭಾಗೊಡು ಗ್ರಾನೈಟ್ ಶಿಲೆತ ದ್ನಿಪ್ರೊದ ನೀರ್‌ಡ್ದ್ ಸುಮಾರು 30 ಮೀಟರ್ ಎತ್ತರೊಡು ತೋಜುಂಡು; ದಕ್ಷಿಣ ಭಾಗೊಡು ತಗ್ಗು ಬೊಕ್ಕ ನೀರ್‌ದ ಕೈತಲ್ ಉಪ್ಪುಂಡು.[2]
1930ರ ದಶಕೊಡು ದ್ನಿಪ್ರೊ ಜಲವಿದ್ಯುತ್ ಕೇಂದ್ರ ನಿರ್ಮಾಣ ಆದು ದ್ನಿಪ್ರೊದ ಜಲಪಾತೊಲೆ ನೀರ್‌ಡ್ದ್ ಮುಚ್ಚಲ್ಪಟುದುಂಡು. ಖೋರ್ತ್ಯಿತ್ಸ್ಯಾದ ದಕ್ಷಿಣೊಡು ಇತ್ತಿನ ಗ್ರೇಟ್ ಮೆಡೊ ಪ್ರದೇಶೊ 1950ರ ದಶಕೊಡ್ದು 2023ರ ಪರ್ಂತ ಕಖೋವ್ಕಾ ಜಲಾಶಯೊಡ್ದ್ ನೀರ್‌ಡ್ದ್ ಮುರ್ಕುದುಂಡು.[3]
ಇತಿಹಾಸ
[ಸಂಪೊಲಿಪುಲೆ]ಪಾತೆರ್ದ ಉಲ್ಲೇಕೊಲು
[ಸಂಪೊಲಿಪುಲೆ]ಖೋರ್ತ್ಯಿತ್ಸ್ಯಾ ಪುದರ್ ಬತ್ತಿನ ಮೂಲೊದ ಬಗ್ಗೆ ಬೇತೆ ಬೇತೆ ಅಭಿಪ್ರಾಯೊಲೆ ಉಂಡು. ಒಂಜಿ ಅಭಿಪ್ರಾಯೊದ ಪ್ರಕಾರ ಈ ಪುದರ್ ಪುರಾತನ ಸ್ಲಾವಿಕ್ ದೇವತೆ ಖೋರ್ಸ್ನ ಪುದರ್‌ಡ್ದ್ ಬತ್ತು ಉಪ್ಪೊಡು.[3]
ಖೋರ್ತ್ಯಿತ್ಸ್ಯಾ ಪ್ರದೇಶೊಡು ಐನ್ ಸಾವಿರ ವರ್ಷೊಡ್ದಿಂಚಿ ಮಾನವ ವಾಸೊ ಇತ್ತುಂಡು ಅತ್ತ್ಂಡ ಅಯಿತ್ತ ಕೈತಲ್ಡ್ದ ದ್ವೀಪೊಲೆಡು ಪ್ರಾಚೀನ ಮಾನವ ವಾಸೊದ ಸಾಕ್ಷ್ಯೊಲೆ ಸಿಕ್ಕುಂಡು. ಎಲ್ಯಾ ಖೋರ್ತ್ಯಿತ್ಸ್ಯಾ ದ್ವೀಪೊಡು ಸ್ಕಿಥಿಯನ್ ಕಾಲೊದ ಅವಶೇಷೊಲೆ ಬೊಕ್ಕ ಕೊಸಾಕ್ ಕೋಟೆದ ಅವಶೇಷೊಲೆ ಸಿಕ್ಕುಂಡು. ಖೋರ್ತ್ಯಿತ್ಸ್ಯಾದ ಈಶಾನ್ಯೊಡು ಇಪ್ಪುನ ಸ್ರೆಡ್ನಿ ಸ್ಟಿಹ್ ದ್ವೀಪೊ 1927ರ ವರ್ಷೊಡು ಉತ್ಖನನ ಮಲ್ಪುನಗ ಸ್ರೆಡ್ನಿ ಸ್ಟೊಗ್ ಸಂಸ್ಕೃತಿಗ್ ಪುದರ್ ಪೋತುಂಡು.[3]
ಸುಮಾರು ಕ್ರಿ.ಶ. 950ರ ಕಾಲೊಡು ಬರೆತಿನ De Administrando Imperio ಗ್ರಂಥೊಡು ಬೈಜಾಂಟೈನ್ ಚಕ್ರವರ್ತಿ ಕಾನ್ಸ್ಟಾಂಟೈನ್ VII ದ್ನಿಪ್ರೊ ಜಲಪಾತೊಲೆನ ತಿರ್ತುದ ಭಾಗೊಡು ಇಪ್ಪುನ "ಸೇಂಟ್ ಜಾರ್ಜ್ ದ್ವೀಪೊ"ದ ಉಲ್ಲೇಖ ಉಂಡು. ಈ ಪ್ರದೇಶೊ ರುಸ್ ಜನೊಲೆಗ್ ಮಹತ್ವೊದ ಮಾರ್ಗೊ ಆದ್ ಉಂಡು; ಜಲಪಾತೊಲೆ ದಾಟುನ ಸಮಯೊಡು ಪೆಚೆನೆಗ್ ಜನೊಲೆನ ದಾಳಿಗ್ ಅವು ಸುಲಭ ಗುರಿ ಆತುಂಡು.[1]
972ರ ವರ್ಷೊಡು ಕೀವನ್ ರುಸ್ ರಾಜಕುಮಾರ ಸ್ವ್ಯಾಟೊಸ್ಲಾವ್ I ದ್ನಿಪ್ರೊ ಜಲಪಾತೊಲೆ ದಾಟುನ ಪ್ರಯತ್ನೊಡು ಪೆಚೆನೆಗ್ ಜನೊಲೆನ ದಾಳಿಡ್ ತೀರ್ ಪೋಯೆರ್.[1]
Primary Chronicleಡು 1103ರ ವರ್ಷೊದ ಘಟನೆದ ಸಂದರ್ಭೊಡು ಖೋರ್ತ್ಯಿತ್ಸ್ಯಾ ದ್ವೀಪೊದ ಪುದರ್ ನೇರವಾದ್ ಉಲ್ಲೇಕ ಆತುಂಡು. ಸ್ವ್ಯಾಟೊಪೊಲ್ಕ್ II ಬೊಕ್ಕ ವ್ಲಾದಿಮಿರ್ ಮೊನೊಮಾಖ್ ಪೋಲೊವ್ಸಿ ಜನೊಲೆನ ವಿರುದ್ಧ ಮಲ್ಪುನ ಸೈನಿಕ ಕಾರ್ಯಾಚರಣೆದ ಸಮಯೊಡು ಸೈನ್ಯೊ ಖೋರ್ತ್ಯಿತ್ಸ್ಯಾ ದ್ವೀಪೊದ ಕೈತಲ್ ತಂಗುದು ಇತ್ತುಂಡು.[4]
ಕೊಸಾಕ್ ಕಾಲೊ
[ಸಂಪೊಲಿಪುಲೆ]ಖೋರ್ತ್ಯಿತ್ಸ್ಯಾ ಬೊಕ್ಕ ಅಯಿತ ಕೈತಲ್ದ ಎಲ್ಯಾ ಖೋರ್ತ್ಯಿತ್ಸ್ಯಾ ದ್ವೀಪೊ ಜಪೊರಿಝ್ಝ್ಯಾ ಕೊಸಾಕ್ಲೆನ ಇತಿಹಾಸೊಡು ಮಹತ್ವೊದ ಸ್ಥಾನೊ ಪಡೆದುಂಡು. 1550ರ ದಶಕೊಡು ವೊಲಿನ್ ಪ್ರದೇಶೊದ ರಾಜಕುಮಾರ ದ್ಮಿತ್ರೊ ವ್ಯಶ್ನೆವೆತ್ಸ್ಕಿ (ಬೈದಾ) ಎಲ್ಯಾ ಖೋರ್ತ್ಯಿತ್ಸ್ಯಾ ದ್ವೀಪೊಡು ಒಂಜಿ ಕೋಟೆ ನಿರ್ಮಾಣ ಮಲ್ಪೆರ್. ಈ ಕೋಟೆನ್ ಬೊಕ್ಕ ಕೊಸಾಕ್ ಸಿಚ್‌ಲೆನ ಪಾತೆರ್ದ ರೂಪೊಲೆಡು ಒಂಜಿ ಪ್ರಮುಖ ಹಂತೊ ಆದ್ ಪರಿಗಣಿಸಾವುಂಡು.[1]
ಖೋರ್ತ್ಯಿತ್ಸ್ಯಾ ದ್ವೀಪೊ ಜಪೊರಿಝ್ಝ್ಯಾ ಕೊಸಾಕ್ಲೆನ ಸೈನಿಕ ಚಟುವಟಿಕೆಲೆಗ್ ಪ್ರಮುಖ ಪ್ರದೇಶೊ ಆದುಂಡು. 16ನೇ ಬೊಕ್ಕ 17ನೇ ಶತಮಾನೊಡು ಕೊಸಾಕ್‌ಲೆ ಟಾಟರ್, ಪೋಲಿಷ್ ಬೊಕ್ಕ ಬೇತೆ ಶಕ್ತಿಲೆನ ವಿರುದ್ಧದ ಯುದ್ಧೊಲೆಡು ಈ ಪ್ರದೇಶೊನ್ ಬಳಕೆ ಮಲ್ಪೆರ್. 1648ರ ವರ್ಷೊಡು ಬೊಹ್ದಾನ್ ಖ್ಮೆಲ್ನಿತ್ಸ್ಕಿ ನೇತೃತ್ವೊದ ಕೊಸಾಕ್ ಸೈನ್ಯೊ ಈ ಪ್ರದೇಶೊಡು ಪ್ರಮುಖ ಸೈನಿಕ ಕಾರ್ಯಾಚರಣೆ ಮಲ್ಪೆರ್.[1]
ಖೋರ್ತ್ಯಿತ್ಸ್ಯಾ ಪ್ರದೇಶೊ ಜಪೊರಿಝ್ಝ್ಯಾ ಸಿಚ್ ದ ಇತಿಹಾಸೊಡು ಕುಡಾ ಮಹತ್ವೊ ಪಡೆದುಂಡು. 1775ತ ವರ್ಷೊಡು ಜಪೊರಿಝ್ಝ್ಯಾ ಸಿಚ್ ನಾಶ ಆದ್ ಪಿರಾಕ್ ದ್ವೀಪೊದ ಕೊಸಾಕ್ ಮಹತ್ವೊ ಕಡಿಮೆ ಆತುಂಡು.[1]
1737ರ ವರ್ಷೊಡು ರಷ್ಯಾ-ಟರ್ಕಿ ಯುದ್ಧೊದ ಸಮಯೊಡು ಖೋರ್ತ್ಯಿತ್ಸ್ಯಾ ಪ್ರದೇಶೊಡು ಒಂಜಿ ಕೋಟೆ ಬೊಕ್ಕ ಹಡಗು ನಿರ್ಮಾಣ ಕೇಂದ್ರೊ ನಿರ್ಮಾಣ ಆದುಂಡು. ಉಂದೆತ ಅವಶೇಷೊಲು ಇತ್ತೆಲಾ ಒರಿದುಂಡು.[1]
ಆಧುನಿಕ ಕಾಲೊ
[ಸಂಪೊಲಿಪುಲೆ]1789ರ ವರ್ಷೊಡು ಮೆನ್ನೊನೈಟ್ ಜನೊಲೆನ್ ರಷ್ಯನ್ ಸಾಮ್ರಾಜ್ಯದ ಸ್ಟೆಪ್ಪ್ ಪ್ರದೇಶೊಡು ನೆಲೆಸಲೆಗ್ ಆಹ್ವಾನ ಕೊರ್ಪೆರ್. ಖೋರ್ತ್ಯಿತ್ಸ್ಯಾ ದ್ವೀಪೊಡು ಒಂಜಿ ಮೆನ್ನೊನೈಟ್ ನೆಲೆ ಸ್ಥಾಪನೆ ಆತುಂಡು. ಅವುಲು ದ್ವೀಪೊದ ಫಲವತ್ತಾದ ಭೂಮಿಡ್ ಕೃಷಿ ಮಲ್ಪೆರ್ ಬೊಕ್ಕ ಕಾಡ್‌ದ ಮರೊದ ವ್ಯಾಪಾರ ಮಲ್ತೆರ್. 1916ರ ವರ್ಷೊಡು ಮೆನ್ನೊನೈಟ್ ವಸಾಹತು ನಿವಾಸಿಲೆ ಖೋರ್ತ್ಯಿತ್ಸ್ಯಾ ದ್ವೀಪೊನ್ ಅಲೆಕ್ಸಾಂಡ್ರೊವ್ಸ್ಕ್ ನಗರ ಮಂಡಳಿಗ್ ಮಾರಾಟ ಮಲ್ತೆರ್.[3]
1965ರ ವರ್ಷೊಡು ಖೋರ್ತ್ಯಿತ್ಸ್ಯಾ ದ್ವೀಪೊನ್ ಐತಿಹಾಸಿಕ ಬೊಕ್ಕ ಸಾಂಸ್ಕೃತಿಕ ಸಂರಕ್ಷಿತ ಪ್ರದೇಶ ಆದ್ ಘೋಷಣೆ ಮಲ್ದೆರ್. 1974ರ ವರ್ಷೊಡು ದ್ನಿಪ್ರೊ ರ್ಯಾಪಿಡ್ಸ್ ರಾಜ್ಯ ಐತಿಹಾಸಿಕ ಬೊಕ್ಕ ಸಾಂಸ್ಕೃತಿಕ ಸಂರಕ್ಷಿತ ಪ್ರದೇಶ ಸ್ಥಾಪನೆ ಆತುಂಡು. ಉಂದೆಟ್ ಖೋರ್ತ್ಯಿತ್ಸ್ಯಾ ದ್ವೀಪೊ, ಪಕ್ಕದ ದ್ವೀಪೊಲು ಬೊಕ್ಕ ಕಲ್ಲುಬಂಡೆಲು ಬೊಕ್ಕ ದ್ನಿಪ್ರೊದ ಬಲ ದಂಡೆದ ಒಂಜಿ ಭಾಗೊಲಾ ಸೇರುದುಂಡು. 1993ರ ವರ್ಷೊಡು ಈ ಸಂರಕ್ಷಿತ ಪ್ರದೇಶೊಗ್ ರಾಷ್ಟ್ರೀಯ ಸ್ಥಾನಮಾನ ಕೊರಿಯೆರ್.[2]
ಖೋರ್ತ್ಯಿತ್ಸ್ಯಾ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶ
[ಸಂಪೊಲಿಪುಲೆ]ಖೋರ್ತ್ಯಿತ್ಸ್ಯಾ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶ ಉಕ್ರೇನ್‌ದ ಪ್ರಮುಖ ಐತಿಹಾಸಿಕ ಬೊಕ್ಕ ಸಾಂಸ್ಕೃತಿಕ ಸಂರಕ್ಷಿತ ಪ್ರದೇಶೊಲೆಡ್ ಒಂಜಿ. 1993ರ ವರ್ಷೊಡು ಉಂದೆಕ್ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶದ ಸ್ಥಾನಮಾನ ಸಿಕ್ಕುಂಡು.[2]
ಇತ್ತೆದ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶೊಡು ಖೋರ್ತ್ಯಿತ್ಸ್ಯಾ ದ್ವೀಪೊದ ಜೊತೆಯಾದ್ ಬೈದಾ ದ್ವೀಪೊ, ತ್ರಿ ಸ್ಟೋಗಿ, ದುಬೊವಿ, ರೊಸ್ತೆಬಿನ್ ಬೇತೆ ಪೂರಾ ಪಕ್ಕೊದ ದ್ವೀಪೊಲೆ ಬೊಕ್ಕ ದ್ನಿಪ್ರೊದ ಬಲ ದಂಡೆದ ಕೆಲವು ಪ್ರದೇಶೊಲುಲಾ ಸೇರುದು ಇತ್ತುಂಡು.ಕಾಮಿಯಾನ್ಸ್ಕಾ ಸಿಚ್ ಐತಿಹಾಸಿಕ ಸ್ಮಾರಕೊ ಬೊಕ್ಕ ಸಂರಕ್ಷಿತ ಪ್ರದೇಶದ ಭಾಗೊ ಆದುಂಡು.[2]
ಖೋರ್ತ್ಯಿತ್ಸ್ಯಾ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶೊಡು ಜಪೊರಿಝ್ಝ್ಯಾ ಸಿಚ್ ದ ಪುನರ್ ನಿರ್ಮಿತ ಐತಿಹಾಸಿಕ ಸಂಕೀರ್ಣೊ ಉಂಡು. 2007ರ ವರ್ಷೊಡು ಈ ಐತಿಹಾಸಿಕ ಸಂಕೀರ್ಣೊ ನಿರ್ಮಾಣ ಪೂರ್ಣ ಆತುಂಡು.[1]
ಪ್ರಕೃತಿ
[ಸಂಪೊಲಿಪುಲೆ]ಖೋರ್ತ್ಯಿತ್ಸ್ಯಾ ದ್ವೀಪೊಡು ಓಕ್ ಕಾಡ್, ಸ್ಪ್ರೂಸ್ ಕಾಡ್, ಹುಲ್ಲುಗಾವಲು ಬೊಕ್ಕ ಸ್ಟೆಪ್ಪ್ ಪ್ರದೇಶೊಲೆ ಉಂಡು. ದ್ವೀಪೊದ ಉತ್ತರ ಭಾಗೊ ಕಲ್ಲುಬಂಡೆಲೆನ್ ಒಳಗೊಂಡುದುಂಡು ಎತ್ತರೊದ ಪ್ರದೇಶೊ ಆದುಂಡು; ದಕ್ಷಿಣ ಭಾಗೊಡು ಪ್ರವಾಹೊಡ್ದ್ ನೀರ್‌ ಉಂತುದು ಮುರ್ಕುನ ಜಲಭೂಮಿ ಬೊಕ್ಕ ಹುಲ್ಲುಗಾವಲು ಪ್ರದೇಶೊಲೆ ಉಂಡು.[2]
ದ್ವೀಪೊದ ಭೂಗರ್ಭೊಡು ಗ್ರಾನೈಟ್ ಬೊಕ್ಕ ಗ್ರಾನಿಟಾಯ್ಡ್ ಶಿಲೆಲು ಉಂಡು. ಅಧಿಕೃತ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶೊದ ಮಾಹಿತಿ ಪ್ರಕಾರ ಈ ದ್ವೀಪೊದ ಭೂಗರ್ಭೊದ ವರ್ಷ ಸರಿ ಸುಮಾರ್ 3 ಬಿಲಿಯನ್ ವರ್ಷ ಪಿರ ಪೋಪುಂಡು.[2]
ಉಂದೆನೂಲಾ ತೂಲೆ
[ಸಂಪೊಲಿಪುಲೆ]- ಜಪೊರಿಝ್ಝ್ಯಾ
- ಜಪೊರಿಝ್ಝ್ಯಾ ಕೊಸಾಕ್
- ಜಪೊರಿಝ್ಝ್ಯಾ ಸಿಚ್
- ದ್ನಿಪ್ರೊ ನದಿ
- ಖೋರ್ತ್ಯಿತ್ಸ್ಯಾ ರಾಷ್ಟ್ರೀಯ ಸಂರಕ್ಷಿತ ಪ್ರದೇಶ
- ದ್ನಿಪ್ರೊ ಜಲವಿದ್ಯುತ್ ಕೇಂದ್ರ
ಉಲ್ಲೇಕೊಲು
[ಸಂಪೊಲಿಪುಲೆ]- 1 2 3 4 5 6 7 8 9 Zhukovsky, Arkadii. "Khortytsia Island". Internet Encyclopedia of Ukraine. Canadian Institute of Ukrainian Studies. Retrieved 22 August 2026.
- 1 2 3 4 5 6 7 "Національний заповідник "Хортиця"" [National Reserve "Khortytsia"] (in ಉಕ್ರೇನಿಯನ್). Ministry of Culture of Ukraine. Retrieved 22 August 2026.
- 1 2 3 4 "Khortytsia". Wikipedia. Retrieved 22 August 2026.
- ↑ Cross, Samuel Hazzard; Olgerd P. Sherbowitz-Wetzor (1953). The Russian Primary Chronicle, Laurentian Text. Cambridge, Massachusetts: The Mediaeval Academy of America. pp. 200–201.
ಗ್ರಂಥಸೂಚಿ
[ಸಂಪೊಲಿಪುಲೆ]- Zhukovsky, Arkadii. "Khortytsia Island". Internet Encyclopedia of Ukraine. Canadian Institute of Ukrainian Studies, University of Alberta.
- Mytsyk, Yu. A.; Vortman, D. Ya. "Хортиця". Encyclopedia of the History of Ukraine. Institute of History of Ukraine, National Academy of Sciences of Ukraine. 2013.
- Kostenko, L.; Yukhymovych, L. Хортиця: Фотобуклет. Kyiv: Mystetsvo, 1979.
- Cross, Samuel Hazzard; Sherbowitz-Wetzor, Olgerd P. The Russian Primary Chronicle, Laurentian Text. Cambridge, Massachusetts: The Mediaeval Academy of America, 1953.