ಗೆಜ್ಜೆಗಿರಿ

ಗೆಜ್ಜೆಗಿರಿ ನಂದನ ಬಿತ್ತಿಲ್
ಗೆಜ್ಜೆಗಿರಿ ನಂದನ ಬಿತ್ತಿಲ್
ದರ್ಮೊ
ಸೇರಿಗೆ	ಹಿಂದೂ ಧರ್ಮ
ಜಿಲ್ಲೆ	ದಕ್ಷಿಣ ಕನ್ನಡ
ದೇವೆರ್	ದೇಯಿ ಬೈದ್ಯೆತಿ ಬೊಕ್ಕ ಕೋಟಿ ಚೆನ್ನಯೆರ್
ಜಾಗೆ
ಜಾಗೆ	ಪಡುಮಲೆ,ಪುತ್ತೂರು, ಕರ್ನಾಟಕ
ರಾಜ್ಯ	ಕರ್ನಾಟಕ
ದೇಸೊ	ಭಾರತ

ಗೆಜ್ಜೆಗಿರಿ, ದಕ್ಷಿಣ ಕನ್ನಡ ಜಿಲ್ಲೆದ ಪುತ್ತೂರು ತಾಲ್ಲೂಕುದ ಒಂಜಿ ಐತಿಹಾಸಿಕ ಜಾಗೆ, ದಕ್ಷಿಣ ಕನ್ನಡ ಜಿಲ್ಲೆದ ಪುತ್ತೂರುರ್ದ್ ಸುಮಾರ್ 22ಕಿ.ಮೀ ದೂರಡ್ ಉಂಡು. ತುಳುನಾಡ್ದ ಅಮರ್ ವೀರೆರ್ ಆಯಿನ ಕೋಟಿಚೆನ್ನಯೆರೆ ಅಪ್ಪೆ ದೇಯಿಬೈದ್ಯೆತಿಗ್ ಪುನರ್ ಜೀವನ ಕೊರ್ನ ಇಲ್ಲೇ ಈ ಗೆಜ್ಜೆ ಗಿರಿ ನಂದನ ಬಿತ್ತಿಲ್ ಕ್ಷೇತ್ರೊ.

ಇತಿಹಾಸ

ಸಾಯನಬೈದ್ಯನ ತಂಗಡಿ ದೇಯಿ. ಆಲೆನ ಕಂಡನಿ ಕರ್ಗಲ್ಲ ತೋಟ ಕಾಂತಣ್ಣ ಬೈದ್ಯೆ. ಕಾಂತಣ್ಣ ಬೈದ್ಯೆರ್ ಸಾಯನ ಬೈದ್ಯನ ತಮ್ಮಲೆನ‌ಮಗೆ . ಅಂಚಾದ್ ಭಾವನೇ ದೇಯಿ ಮರಿಯೆ ಆಯಲ್. ಅಕುಲೆಡ್ ಪುಟ್ಟುನ ಪೊಣ್ಣು ಬಾಲೆ ದಾರು. ಬಿರ್ಮಣ್ಣ ಬೈದ್ಯೆರ್ನ ಬುಡೆದಿನ ಪುದರ್ಲಾ ದಾರು. ಅಜ್ಜಿನ ಸುದರ್ಶನ್ ಪುಲ್ಲಿಗ್ ದೀಪುನವು ದುಂಬು ದ ಕಾಲದ ಕ್ರಮ . ಆಲ್ ಗೋಲ್ಮಾಲ್ ಆಯಿನ ಕಾರಣ‌ ಕಿನ್ನಿ ದಾರು ಪಂದ್ ಲೆಪ್ಪೆರೆ ಸುರು ಮಲ್ತೆರ್.

ಈ ನಡುಟು ದೇಯಿ ತೀರ್ ಪೋಯಲ್. ಕಿನ್ನಿದಾರುನು ಎಲ್ಲಿಯೂ ಪ್ರಾಯೊಡೆ ಪಂಜದ ಮಂತ್ರಿ ಪಯ್ಯ ಬೈದ್ಯೆರೆಗ್ ಮದಿಮೆ ಮಲ್ತ್ ಕೊರಿಯೆರ್ .

ದುಂಬುದ ಕಾಲೊದ ಸಂಪ್ರದಾಯದಲೆಕ ಮದಿಮೆಗ್ ದುಂಬು ಮಲ್ಲೆ ಆಯಿನ ಜೇವು ಕೇದಗೆ ಪನ್ಪುನ ಪೊಣ್ಣು ಮಗಲೆನ್ ಅಲೆನ ಇಲ್ಲದಕುಲು ಕಣ್ಣ್ ಗ್ ‌ಕುಂಟು ಕಟ್ಟ್ ದ್ ಕಡ್ಗ್ ಬುಡ್ನಗ ಆಲ್ ಮೂರ್ತೆ ಕೆಲಸಗ್ ಬೋಡಾದ್ ಕಾಡ್ಗ್ ಪೋಯಿನ ಸಾಯನ ಬೈದ್ಯೆರ್ನ ಕಣ್ಣ್ ಗ್ ಬೂರ್ಬಾಲ್. ಪ್ರತಿಷ್ಠಿತ ಏರಾಜೆ ಬರ್ಕೆ ಮನೆತನೊದ ಗುರಿಕಾರೆರಾಯಿನ ಸಾಯನ ಬೈದ್ಯೆರ್ ಆಲೆನ್ ಮೆಗ್ದಿ ಆದ್ ಸ್ವೀಕಾರ ಮಲ್ತ್ ದ್ ದೇಯಿ ಪಂದ್ ಪುದರ್ ದೀದ್ , ತಾಂಕ್ದ್ ನಾಟಿ ಮರ್ದ್ ದ ವಿದ್ಯೆನ್ ಕಲ್ಪಾಬೆರ್. ಬೊಕ್ಕ ಅಲೆನ್ ತನ್ನ ಬಾವೆ ಆಯಿನ ಕಾಂತಣ್ಣ ಬೈದ್ಯರೆಗ್ ಮದಿಮೆ ಮಲ್ತ್ ಕೊರ್ಪೆರ್ .ಇಂಚ ದೇಯಿಬೈದ್ಯೆತಿಗ್ ಆಶ್ರಯ ಕೊರ್ದು ಸಕಲ ನಾಟಿವಿದ್ಯೆನ್ ಕಲ್ಪಾ ದ್ ಪೊಸ ಬದ್ಕ್ ಕೊರ್ನ ಇಲ್ಲ್ ಗೆಜ್ಜೆ ಗಿರಿ ನಂದನ ಬಿತ್ತಿಲ್ .

ದೇಯಿಬೈದ್ಯೆತಿ ಏಳ್ ತಿಂಗೊಲುದ ಬಂಜಿನಾಲ್ ಆದುಪ್ಪುನಗ ಬೋಂಟೆಗ್ ಕಾಡ್ಗ್ ಪೋಯಿನ ಪಡುಮಲೆ ಬಲ್ಲಾಳ್ರೆಗ್ ಕಾರ್ಗ್ ವಿಷತ ಮುಳ‍್ಳುತಾಗ್ದ್ ಜೀವಸಂಕಟೊಡು ಪುಡೆರೊಂದು ಉಪ್ಪುವೆರ್. ವಾ‌ಮರ್ದ್ ಲಾ ಪತ್ತಂದೆ ಉಪ್ಪುನಗ ಬಲ್ಲಾಳ್ರ್ರು ಬಂಜಿನಾಲ್ ದೇಯಿಬೈದ್ಯೆತಿನ್ ಲೆತೊಂದು ಬರೆರೆ ದಂಡಿಗೆನ್ ಕಡಪುಡುವೆರ್. ದೇಯಿಬೈದ್ಯೆತಿ ಪಡುಮಲೆತ ಅರಸು ಬಲ್ಲಾಳೆರೆಗ್ ನಾಟಿ ಮರ್ದ್ ಕೊರ್ದು ಜೀವ ಒರಿಪುವಲ್. ಬಲ್ಲಾಳ ಅರಸು ಗುಣ ಆಯಿನ ಕಾರಣ ದೇಯಿಬೈದ್ಯೆತಿ ತನ್ನ ಗೆಜ್ಜೆ ಗಿರಿ ನಂದನ ಬಿತ್ತಿಲ್ಗ್ ಪಿದಾಡ್ದ್ ಉಂತುವಲ್ .

ಒಂತೆ ಪಜ್ಜೆ ದೂರ ಪೋದಾನಗ ದೇಯಿಬೈದ್ಯೆತಿಗ್ ಪೆದ್ದೊಲ್ದಿ ಬೇನೆ ಸುರು ಆಪುಂಡು ಪಡುಮಲೆತ ಅರಸು ಬೀಡಿಗೆ ಕನತ್ ದ್ ಅಲ್ಪನೇ ನಿದ್ದೆಗೆ ಅಟ್ಟಣೆ ಮಲ್ಪುವೆ. ಪಡುಮಲೆ ಬೀಡ್ ಡ್ ದೇಯಿಬೈದ್ಯೆತಿ ಅಮರ್ ಜೋಕುಲು ಆಯಿನ ಕೋಟಿ ಚೆನ್ನಯೆರೆಗ್ ಜನ್ಮ ಕೊರ್ಪಲ್. ಆಂಡ ಪೆದ್ ದ್ 16ನೇ ದಿನತಾನಿ ದೇಯಿಬೈದ್ಯೆತಿ ಬೀಡ್ದ ಕೈತಲ್ದ ಕೆರೆಟ್ ಆಕಸ್ಮಿಕವಾದ್ ತೀರ್ ಪೋಪಲ್ . ವಿಷಯ ತೆರಿನ ಪಲೆ ಸಾಯನಬೈದ್ಯೆ ದೇಯಿಬೈದ್ಯೆತಿನ ಪುಣನ್ ಗೆಜ್ಜೆಗಿರಿಕ್ ಕನತ್ ದ್ ಸಮಾಧಿ ಮಲ್ತೆ ನೆಕ್ ಸುಮಾರು 450 ವರ್ಷೊದ ಇತಿಹಾಸ ಉಂಡು. ಸಾಯನ ಬೈದ್ಯೆ ಕೋಟಿಚೆನ್ನಯ್ಯೆರೆನ್ ತಾಂಕ್ದ್ ಬುಳೆಪಾಯಿನ ಇಲ್ಲ್ “ಗೆಜ್ಜೆಗಿರಿ ನಂದನ ಬಿತ್ತಿಲ್” ಪಂದ್ ಲೆಪ್ಪುವೆರ್.

ಕೋಟಿ-ಚೆನ್ನಯೆರ್ ತಮ್ಮಲೆನ ಇಲ್ಲ್ ಆಯಿನ ಗೆಜ್ಜೆಗಿರಿಟೇ ಬಳತ್ದ್‌ಮಲ್ಲೆ ಆಪೆರ್ . ಗೆಜ್ಜೆಗಿರಿ ನಂದನ ಬಿತ್ತಿಲ್ ಇಲ್ಲ್ ಕೋಟಿ-ಚೆನ್ನಯೆರ್ ಗೊಬ್ಬುದು , ಪಾಠ ಕಲ್ತ್ ದ್, ಪರಾಕ್ರಮಿ ಆದ್ ಕಾರಣಿಕ ಪುರುಷೆರಾದ್ ಪಿದಾಯಿ ಬರ್ಪೆರ್.

ಗೆಜ್ಜೆಗಿರಿ ನಂದನ ಬಿತ್ತಿಲ್, ಏರಾಜೆ ಬಾರಿಕೆ ಪನ್ಪುನ ಬಿಲ್ಲವ ಮನೆತನೊದ ನೆಲ. ಪಡುಮಲೆ ಬಲ್ಲಾಳ ಅರಸೆರ್ನ ವ್ಯಾಪ್ತಿಡ್ ಇತ್ತ್ ನ ನಾಲ್ ಗುತ್ತು ಬೊಕ್ಕ ಎನ್ಮ ಬಾರಿಕೆಲೆಡ್ ಏರಾಜೆ ಬಾರಿಕೆ ಒಂಜಿ. ಅರಸಗ್ ಆಡಳಿತೊಡು ನೆರವಾವೊಂದಿತ್ತ್ ನ ಮನೆತನ ಉಂದು.

ದಾದ ಉಂಡು ಗೆಜ್ಜೆಗಿರಿ ನಂದನಬಿತ್ತ್ ಲ್ಡ್

ಸರೋಳಿಮಂಜಕಟ್ಟೆ ಬಲ್ಲಾಳೆರ್ ದೇಯಿಬೈದ್ಯೆತಿನ್ ಕನಯೆರೆ ಕಡಪುರ್ನ ದಂಡಿಗೆ ದೀನ ಸರೋಳಿಮಂಜಕಟ್ಟೆ ಇತ್ತೆ ಲಾ ಉಂಡು. ಈ ಕಟ್ಟೆಡ್ ಪವಾಡದಲೆಕ ಒಂಜೆರ್ದ್ ಬೊಕ್ಕ ನನೊಂಜೆಲೆಕ ಸರೋಳಿಮರ ಅವೇ ಜಾಗೆಡ್ ಬಳಪುಂಡು.

ಧೂಮಾವತಿ ದೈವಸ್ಥಾನ

ಸರೋಳಿ ಮಂಜಕಟ್ಟೆ ಎದುರುಡು ಧೂಮಾವತಿ ದೈವದ ತಾನ ಉಂಡು. ದೇಯಿಬೈದ್ಯೆತಿನ ಮರಣರ್ದ್ ಬೊಕ್ಕ ಆಲ್ ಆರಾಧನೆ ಮತ್ತೊಂದು ಇತ್ತ್ ನ ಧೂಮಾವತಿ ದೈವೊನು ನಂಬುದು ಇತ್ತೆಲಾ ಆ ಜಾಗೆಡ್ ಆರಾಧನೆ ನಡಪುಂಡು.