ಗ್ಯಾಂಗ್‌ಟೊಕ್

ಗ್ಯಾಂಗ್‌ಟೊಕ್ ಭಾರತದ ಸಿಕ್ಕಿಂ ರಾಜ್ಯದ ರಾಜಧಾನಿ ಬೊಕ್ಕ ಸಿಕ್ಕಿಂ ರಾಜ್ಯೊಡೆ ಎಚ್ಚ ಜನಸಂಖ್ಯೆ ಉಪ್ಪುನ ನಗರ. ಉಂದು ಗ್ಯಾಂಗ್‌ಟೊಕ್ ಜಿಲ್ಲೆದ ಜಿಲ್ಲಾಕೇಂದ್ರಲಾ ಅಂದ್. ಮೂಡಾಯಿ ಹಿಮಾಲಯ ಪರ್ವತ ಸಾಲ್‌ದ ಮುದೆಲ್‌ಡ್ ಬರ್ಪುನ ಗ್ಯಾಂಗ್‌ಟೊಕ್ ಸಮುದ್ರಮಟ್ಟೊಡ್ದು ೧,೬೫೦ ಮೀಟರ್ ಎತ್ತರೊಡು ಉಂಡು. ೧,೦೦,೦೦೦ ಜನಸಂಖ್ಯೆ ಇಪ್ಪುನ ಈ ನಗರೊಡು ಮೂಜಿ ಸಿಕ್ಕಿಂ ಜನಾಂಗೊಲು- ಭುಟಿಯಾ, ಲೆಪ್ಚಾ, ಭಾರತೀಯ ಗೂರ್ಖಾಲು- ಬೊಕ್ಕ ಭಾರತದ ಬೇತೆ ರಾಜ್ಯೊಲೆಡ್ದ್ ಬತ್ತಿನ ಜನಕುಲು ವಾಸಿಸೊಂದುಲ್ಲೆರ್.

೧೮೪೦ಡ್ ಎಂಚೆ ಮಠ-ಬೌದ್ಧೆರೆನ ಒಂಜಿ ಮಠ ಕಟ್ಟಾಯಿ ಬೊಕ್ಕ ಗ್ಯಾಂಗ್ಟಾಕ್ ಒಂಜಿ ಜನಪ್ರಿಯ ಬೌದ್ಧ ತೀರ್ಥಯಾತ್ರಾ ಕೇಂದ್ರವಾದ್ ಪುದರ್ ಪೋಂಡು. ೧೮೯೪ನೇ ಇಸವಿಡ್, ಆಡಳಿತ ಮಲ್ತೊಂದಿತ್ತಿನ ಸಿಕ್ಕಿಂ ಚೋಗ್ಯಾಲ್ (ರಾಜೆ) ಆಯಿನ ತುಟೋಬ್ ನಮ್ಗ್ಯಾಲ್, ರಾಜಧಾನಿನ್ ಗ್ಯಾಂಗ್ಟಾಕ್‌ಗ್ ಬದಲಾವಣೆ ಮಲ್ತೆರ್. ೨೦ನೇ ಶತಮಾನದ ಸುರುಟು, ಟಿಬೆಟ್‌ದ ಲಾಸಾ ಬೊಕ್ಕ ಬ್ರಿಟಿಷ್ ಭಾರತದ ಕಲ್ಕತ್ತಾ ನಗರೊಲೆದ ನಡುತ ವ್ಯಾಪಾರ ಮಾರ್ಗೊಡು ಗ್ಯಾಂಗ್ಟಾಕ್ ಒಂಜಿ ಪ್ರಮುಖ ತಂಗುದಾಣ ಆದಿತ್ತ್ಂಡ್. ೧೯೪೭ಡ್ ಭಾರತ ಸ್ವಾತಂತ್ರ್ಯ ಪಡೆಯಿ ಬೊಕ್ಕ, ಸಿಕ್ಕಿಂ ಸ್ವತಂತ್ರ ರಾಜಪ್ರಭುತ್ವವಾದ್ ಒರಿಯರೆ ನಿರ್ಧಾರ ಮಲ್ತ್ಂಡ್. ಅಪಗ ಗ್ಯಾಂಗ್‌ಟೊಕ್ ಸಿಕ್ಕಿಂ‌ದ ರಾಜಧಾನಿಯಾದ್ ಇತ್ತ್ಂಡ್. ೧೯೭೫ಡ್ ಸಿಕ್ಕಿಂ ಭಾರತದೊಟ್ಟುಗು ಸೇರಿ ಬೊಕ್ಕಲ, ಗ್ಯಾಂಗ್ಟಾಕ್ ರಾಜ್ಯದ ರಾಜಧಾನಿಯಾದ್ ಒರಿಂಡ್.

ಇತಿಹಾಸೊ

ಗ್ಯಾಂಗ್ಟಾಕ್‌ದ ಸುರುತ ಇತಿಹಾಸದ ಬಗ್ಗೆ ಎಚ್ಚ ಮಾಹಿತಿ ಇಜ್ಜಿ. ೧೭೧೬ಡ್ ಕಟ್ಟಾದಿನ ಗ್ಯಾಂಗ್ಟಾಕ್ ಆಶ್ರಮದ ದಾಖಲೆಲು ಮುಲ್ಪದ ಮಸ್ತ್ ಪಿರಾಕ್‌ದ ದಾಖಲೆ ಪನೊಲಿ. ೧೮೪೦ಡ್ ಎಂಚೆ ಮಠ ಕಟ್ಟಾಯಿ ಬೊಕ್ಕ ಉಂದು ಒಂಜಿ ತೀರ್ಥಯಾತ್ರಾ ಕೇಂದ್ರ ಆಂಡ್. ಅಯಿಡ್ದ್ ದುಂಬು ಗ್ಯಾಂಗ್ಟಾಕ್ ಒಂಜಿ ಎಲ್ಯ ಹಳ್ಳಿಯಾದಿತ್ತ್ಂಡ್. ೧೯ನೇ ಶತಮಾನದ ನಡುಟು ಇಂಗ್ಲಿಷೆರ್ ಆಕ್ರಮಣ ಮಲ್ತಿ ಬೊಕ್ಕ, ಒರಿದಿನ ಸಿಕ್ಕಿಮ್‌ಗು ಉಂದು ರಾಜಧಾನಿ ಆಂಡ್. ಬ್ರಿಟಿಷೆರೆ ಕೈಟ್ ಟಿಬೆಟಿಯನ್ನೆರ್ ಸೋತಿ ಬೊಕ್ಕ, ೧೯ನೇ ಶತಮಾನದ ಕಡೆಕ್ ಟಿಬೆಟ್ ಬೊಕ್ಕ ಬ್ರಿಟಿಷ್ ಭಾರತದ ನಡುತ ವ್ಯಾಪಾರೊಡು ಗ್ಯಾಂಗ್ಟಾಕ್ ಒಂಜಿ ಮುಖ್ಯ ತಂಗುದಾಣ ಆದಿತ್ತ್ಂಡ್. ಮುಲ್ಪದ ಎಚ್ಚದ ರಸ್ತೆಲು ಬೊಕ್ಕ ಟೆಲಿಗ್ರಾಫ್‌ ವ್ಯವಸ್ಥೆನ್ ಆ ಪೊರ್ತುಡೇ ಕಟ್ಟಾಯೆರ್.

೧೮೯೪ಡ್, ಬ್ರಿಟಿಷ್ ಆಡಳಿತದ ಅಡಿಟಿತ್ತಿನ ಸಿಕ್ಕಿಂ ರಾಜೆ ತುಟೋಬ್ ನಮ್ಗ್ಯಾಲ್, ರಾಜಧಾನಿನ್ ತುಮ್ಲಾಂಗ್‌ಡ್ದ್ ಗ್ಯಾಂಗ್ಟಾಕ್‌ಗ್ ಸ್ತಲಾಂತರ ಮಲ್ತೆರ್, ನೆಡ್ದಾವರ ಈ ನಗರದ ಪ್ರಾಮುಖ್ಯತೆ ಜಾಸ್ತಿ ಆಂಡ್. ಪೊಸ ರಾಜಧಾನಿಡ್ ಒಂಜಿ ಪೊಸ ಮಲ್ಲ ಅರಮನೆ ಬೊಕ್ಕ ಬೇತೆ ಸರಕಾರಿ ಕಟ್ಟಡೊಲೆನ್ ಕಟ್ಟಾಯೆರ್. ೧೯೪೭ಡ್ ಭಾರತಗ್ ಸ್ವಾತಂತ್ರ್ಯ ತಿಕ್ಕಿ ಬೊಕ್ಕ, ಗ್ಯಾಂಗ್ಟಾಕ್ ರಾಜಧಾನಿಯಾದಿಪ್ಪುನ ಒಂಜಿ ರಾಷ್ಟ್ರ-ರಾಜ್ಯವಾದ್ ಸಿಕ್ಕಿಂ ಉದಿತ್ಂಡ್. ಚೋಗ್ಯಾಲ್ ಬೊಕ್ಕ ಅಪಗದ ಭಾರತದ ಪ್ರಧಾನ ಮಂತ್ರಿ ಜವಾಹರಲಾಲ್ ನೆಹರೂನ ನಡುಟು ಆಯಿನ ಒಪ್ಪಂದದ ಪ್ರಕಾರ, ಸಿಕ್ಕಿಂ ತನ್ನ ಸ್ವಾತಂತ್ರ್ಯನ್ ಒರಿಪಾವೊನೊಡು ಪನ್ಪಿನ ಷರತ್ತುದೊಟ್ಟುಗು ಭಾರತದ ಅಧಿಪತ್ಯದ ಅಡಿಕ್ ಬತ್ತ್ಂಡ್. ಈ ಒಪ್ಪಂದ ಭಾರತ ಸರಕಾರೊಗು ಸಿಕ್ಕಿಂದ ಮಿತ್ ನಿಯಂತ್ರಣ ಕೊರ್ಂಡು. ನಾಥುಲಾ ಬೊಕ್ಕ ಜೆಲೆಪ್ಲಾ ಕಣಿವೆ ಮಾರ್ಗೊದ ಮುಖಾಂತರ ಭಾರತ ಬೊಕ್ಕ ಟಿಬೆಟ್‌ದ ನಡುಟು ವ್ಯಾಪಾರ ಅಭಿವೃದ್ಧಿ ಆಂಡ್, ಉಂದು ಗ್ಯಾಂಗ್ಟಾಕ್‌ಗ್ ಲಾಭ ಆಂಡ್. ೧೯೫೯ಡ್ ಟಿಬೆಟ್‌ನ್ ಚೀನಾ ಆಕ್ರಮಿಸಾಯಿ ಬೊಕ್ಕ ಸಿಕ್ಕಿಮ್-ಟಿಬೆಟ್ ವ್ಯಾಪಾರ ಕಮ್ಮಿ ಆಂಡ್. ಅತ್ತಂದೆ ೧೯೬೨ದ ಚೀನಾ-ಭಾರತ ಯುದ್ಧಡ್ದ್ ಬೊಕ್ಕ ಈ ಕಣಿವೆ ಮಾರ್ಗೊಲೆನ್ ಮುಚ್ಚೊಡಾಂಡ್. ಕಡೆಕ್ ೨೦೦೬ಡ್ ನಾಥುಲಾ ಕಣಿವೆ ಮಾರ್ಗೊನ್ ಮಿತವಾದ್ ವ್ಯಾಪಾರೊಗು ದೆತ್ತ್‌ದ್, ಆರ್ಥಿಕ ಅಭಿವೃದ್ಧಿದ ಆಸೆನ್ ಎಚ್ಚಾಯೆರ್.

೧೯೭೫ಡ್, ಮುಲ್ಪದ ಲಡಾಯಿ ಬುಕ್ಕ ರಾಜಕೀಯ ಅಸ್ಥಿರತೆಡ್ದಾವರ ಜನಮತಸಂಗ್ರಹ ನಡತ್ತ್ಂಡ್. ಇಂದೆಟ್ ಎಚ್ಚ ಜನೊಕ್ಲು ಭಾರತೊಡು ಸೇರಿಯೆರೆ ಮನಸುಂಡು ಪಂಡೆರ್. ಅಂಚ ಮುಲ್ಪದ ರಾಜಪ್ರಭುತ್ವ ಪೋದು ಸಿಕ್ಕಿಮ್ ನಮ ದೇಸೊದೊಟ್ಟುಗು ಇರ್ವತ್ತ ರಡ್ಡನೇ (೨೨ನೇ) ರಾಜ್ಯ ಆದ್ ವಿಲೀನ ಆಂಡ್.