ಚೆನ್ನೈ

ಚೆನ್ನೈ ಭಾರತದ ತೆಂಕಾಯಿದ ರಾಜ್ಯವಾಯಿನ ತಮಿಳುನಾಡು ರಾಜ್ಯೊದ ರಾಜಧಾನಿ ಬೊಕ್ಕ ಮಾಮಲ್ಲ ನಗರ. ಇಂದೆಕ್ ದುಂಬು 'ಮದ್ರಾಸ್' ಪಂದ್ ಪುದರ್ ಇತ್ತ್ಂಡ್. ಉಂದು ಬಂಗಾಳ ಕೊಲ್ಲಿದ ಕೊರಮಂಡಲ ಕರಾವಳಿ ತೀರ ಪ್ರದೇಸೊಡು ಉಂಡು. ೨೦೧೧ ದ ಭಾರತೀಯ ಜನಗಣತಿದ ಪ್ರಕಾರ, ಚೆನ್ನೈದ ಜನಸಂಖ್ಯೆ ೬೭,೪೮,೦೨೬ ಉಂಡು. ನಮ ದೇಸೊಡು ಎಚ್ಚ ಜನಸಂಖ್ಯೆ ಇಪ್ಪುನ ಮಲ್ಲ ಪೇಂಟೆಲೆಡ್ ಚೆನ್ನೈ ೬ನೇ ಸಾನೊಡು ಉಂಡು. ಇಸ್ತೀರ್ನೊನು ಲೆಕ್ಕ ಪತ್ತಿಂಡ ೪೨೬ ಚದರ ಕಿಲೋಮೀಟರ್ ಇಪ್ಪುನ ಚೆನ್ನೈ ನಮ ದೇಸೊಡು ೧೪ನೇ ಸಾನೊಡು ಉಂಡು. ಚೆನ್ನೈ ಗ್ರೇಟರ್ ಚೆನ್ನೈ ಕಾರ್ಪೊರೇಷನ್‌ದ ಆಡಳಿತ ಅಡಿಟ್ ಬರ್ಪುಂಡು. ಚೆನ್ನೈ ನಗರಪಾಲಿಕೆನ್ 1688ನೇ ಇಸವಿಡ್ ಸ್ಥಾಪನೆ ಮಲ್ತೆರ್. ಲಂಡನ್‌ದ ಲಂಡನ್ ನಗರಪಾಲಿಕೆ ಬುಡಿಂಡ ಪ್ರಪಂಚೊಡೆ ರಡ್ಡನೇ ಪರಾತ್ ನಗರಪಾಲಿಕೆ ಚೆನ್ನೈದ ನಗರಪಾಲಿಕೆ ಪನ್ಪಿನ ಪುಗರ್ತೆ ಉಂಡು.

ಈ ಜಾಗೆಡ್ ಶಿಲಾಯುಗಡ್ದಿಂಚಿಲಾ ಜನಕುಲು ಇತ್ತೆರ್. ಚೋಳ, ಪಲ್ಲವ, ಪಾಂಡ್ಯ, ಬೊಕ್ಕ ವಿಜಯನಗರ ಸಾಮ್ರಾಜ್ಯೊದ ಅರಸುಲು ಈ ಜಾಗೆನ್ ಆಳ್ದೆರ್. ೧೬೩೯ನೇ ಇಸವಿಡ್ ಬ್ರಿಟೀಷ್ ಈಸ್ಟ್ ಇಂಡಿಯಾ ಕಂಪೆನಿ ಮುಲ್ಪ ಬ್ಯಾರ ಮಲ್ಪರಗಾದ್ ಒಂಜಿ ಕೋಟೆ ಕಟ್ಟಿಯರ ಕಡಲ ಬರಿತ ಒಂಜಿ ಜಾಗೆನ್ ದೆತೊಂದೆರ್. ಆ ಜಾಗೆಡ್ ಬುಕ್ಕ 'ಮದ್ರಾಸ್‌ಪಟ್ಟಿನಂ ಹಳ್ಳಿಲಾ ಸೇರಿಂಡ್. ಆ ಜಾಗೆಡ್ ಬ್ರಿಟೀಷೆರ್ ಫೋರ್ಟ್ ಸೇಂಟ್ ಜಾರ್ಜ್ ಪುದರ್‌ದ ಒಂಜಿ ಕೋಟೆನ್ ಕಟ್ಟಿಯೆರ್. ಉಂದು ಬ್ರಿಟೀಷೆರ್ ನಮ ದೇಸೊಗು ಬತ್ತ್‌ದ್ ಕಟ್ಟಿನ ಸುರುತ ಕೋಟೆ ಆದುಂಡು. ಆತಾನಗ ಫ್ರೆಂಚೆರ್ ಆ ಜಾಗೆನ್ ಆಕ್ರಮಿಸಾಯೆರ್. ಆಂಡ ಫ್ರೆಂಚೆರೆನ್ ಬ್ರಿಟೀಷೆರ್ ಸೋಪಾಯೆರ್. ಅತ್ತಂದೆ ಸುತ್ತದ ಜಾಗೆಲೆನ್ ಸೇರಾದ್ ಮದ್ರಾಸ್ ಪ್ರಾಂತ್ಯೊನು ಉಂಡುಮಲ್ತೆರ್. ಐಕ್ ಮದ್ರಾಸ್‌ನ್ ರಾಜಧಾನಿ ಮಲ್ತೆರ್. ನಮ ದೇಸೊಗು ಸ್ವಾತಂತ್ರ್ಯ ತಿಕ್ಕಿ ಬೊಕ್ಕ ಮದ್ರಾಸ್ ರಾಜ್ಯೊನು ಉಂಡು ಮಲ್ತೆರ್. ಆ ರಾಜ್ಯೊಗುಲಾ ಮದ್ರಾಸ್ ರಾಜಧಾನಿ ಆದಿತ್ತ್ಂಡ್. ೧೯೯೬ನೇ ಇಸವಿಡ್ ಮದ್ರಾಸ್‌ಗ್ ಚೆನ್ನೈ ಪಂದ್ ಪೊಸ ಪುದರ್ ದೀಯೆರ್.

ಚೆನ್ನೈದ ದಿಂಜ ಬಾಗೊ ಸಮತಟ್ಟಾಯಿನ ಮೂಡಾಯಿ ಕರಾವಳಿ ಪ್ರದೇಸೊಡು ಉಂಡು. ಈಶಾನ್ಯ ಮಾನ್ಸೂನ್‌ ಈ ಪ್ರದೇಸೊಗು ಎಚ್ಚ ಬರ್ಸನ್ ಕನಪುಂಡು. ಈ ಪೊರ್ತುಡು ಚಂಡಮಾರುತೊಲು ಬರ್ಪುನು ಸಾಮಾನ್ಯ. ಚೆನ್ನೈ ಕಡಲ ಬರಿತ ಪಟ್ಟಣ ಆಯಿನೆರ್ದಾವರ ಬರ್ಸಗಾಲದ ಪೊರ್ತುಡು ಬೊಲ್ಲ ಬರ್ಪುನು ಸರ್ವೇಸಾಮಾನ್ಯ.

೨೦೨೩-ತ ಪೊರ್ತುಗು, ಚೆನ್ನೈದ ಒಟ್ಟು ಆಂತರಿಕ ಉತ್ಪನ್ನ (ಜಿಡಿಪಿ) ಅಂದಾಜು ೧೨ ಲಕ್ಷ ಕೋಟಿ ಆದಿತ್ತ್‌ದ್, ಉಂದು ಭಾರತದ ಎಚ್ಚ ಉತ್ಪಾದಕ ಮೆಟ್ರೋ ಪ್ರದೇಶೊಲೆಡ್ ಒಂಜಾದುಂಡು. ಭಾರತದ ದಿಂಜ ಪಾಲ್ ಆಟೋಮೊಬೈಲ್ ಕಂಪೆನಿಲೆನ ಉತ್ಪಾದನಾ ಕೇಂದ್ರೊಲು ಚೆನ್ನೈಡೇ ಉಲ್ಲ. ಚೆನ್ನೈ ವೈದ್ಯಕೀಯ ಪ್ರವಾಸೋದ್ಯಮದ ಕೇಂದ್ರಲಾ ಅಂದ್. ಇಂದೆನ್ "ಭಾರತದ ಆರೋಗ್ಯ ರಾಜಧಾನಿ" ಪಂಡ್‌ದ್ ಲೆಪ್ಪುವೆರ್. ೨೦೨೩-ಡ್ ರಾಷ್ಟ್ರೀಯ ಅಪರಾಧ ದಾಖಲೆದ ಬ್ಯೂರೋ ಬುಡ್ಕಡೆ ಮಲ್ತಿನ ವರದಿದ ಪ್ರಕಾರ, ಉಂದು ಭಾರತದ ರಡ್ಡನೇ ಅತ್ಯಂತ ಸುರಕ್ಷಿತ ನಗರ ಪನ್ಪಿನ ಪುಗರ್ತೆ ಚೆನ್ನೈ ಪೇಂಟೆಗ್ ಉಂಡು.

ಚೆನ್ನೈಡ್ ಬೇತೆ ಬೇತೆ ಜನಾಂಗ ಬೊಕ್ಕ ಧರ್ಮದಕುಲು ವಾಸಿಸೊಂದು ಉಲ್ಲೆರ್. ನೆಟ್ಟ್ ೮೦%ದಾತ್ ಹಿಂದೂಲು ಉಲ್ಲೆರ್. ಈ ಪೇಂಟೆಡ್ ಸರಿಸುಮಾರ್ ೩೦ ಲಕ್ಷದಾತ್ ಜನೊಕ್ಲು ಬೇತೆ ಬರಿಡ್ದ್ ಬತ್ತಿನಕ್ಲು-ಪಂಡ ವಲಸಿಗೆರ್ ಉಲ್ಲೆರ್. ನಮ ದೇಸೊಡು ವಿದೇಶಿ ಜನಸಂಖ್ಯೆ ಉಪ್ಪುನ ಮೂಜನೆ ಮಲ್ಲ ಪೇಂಟೆ ಪನ್ನಗ ಚೆನ್ನೈ. ಈ ಪೇಂಟೆಗ್ ದಕ್ಷಿಣ ಭಾರತದ ಹೆಬ್ಬಾಗಿಲ್ ಪಂದ್ ಪುದರ್ ಉಂಡು. ಚೆನ್ನೈಗ್ ವಿದೇಶಿ ಪ್ರವಾಸಿಗೇರ್ ಜಾಸ್ತಿ ಬರ್ಪೆರ್. 2019ನೇ ಇಸವಿದ ಯೂರೋಮಾನಿಟರ್‌ದ ಪ್ರಕಾರ ಪ್ರಪಂಚೊಡೆ ಎಚ್ಚ ಜನ ಬತ್ತಿನ ಪೇಂಟೆಲೆಡ್ ಉಂದು 36ನೇ ಸ್ಥಾನೊಡು ಇತ್ತ್ಂಡ್. ಚೆನ್ನೈ ಸಂಗೀತ, ಕಲೆ ಬೊಕ್ಕ ನಲಿಕೆಗ್ ಒಂಜಿ ಮಲ್ಲ ಕೇಂದ್ರ ಆದುಂಡು ಬೊಕ್ಕ ಉಂದೆನ್ 'ದಕ್ಷಿಣ ಭಾರತದ ಸಾಂಸ್ಕೃತಿಕ ರಾಜಧಾನಿ' ಪಂದ್ ಲೆಪ್ಪುವೆರ್.