ಜಮ್ಮು ಬೊಕ್ಕ ಕಾಶ್ಮೀರ (ಕೇಂದ್ರಾಡಳಿತ ಪ್ರದೇಸೊ)

ಜಮ್ಮು ಬೊಕ್ಕ ಕಾಶ್ಮೀರ ನಮ ದೇಸೊದ ಕೇಂದ್ರಾಡಳಿತ ಪ್ರದೇಸೊಲೆಡ್ ಒಂಜಿ ಆದುಂಡು. ಕಾಶ್ಮೀರ ಇಬಾಗೊದ ಬಡೆಕಾಯಿದ ಮಲ್ಲ ಬಾಗ ಈ ಕೇಂದ್ರಾಡಳಿತ ಪ್ರದೇಸೊಡು ಉಂಡು. ಮುಲ್ಪ ಇಪ್ಪುನ ಗಡಿ ನಿಯಂತ್ರಣ ರೇಖೆದ ಒಂಜಿ ಬರಿಟ್ ಪಾಕಿಸ್ತಾನ ಆಕ್ರಮಿಸಾದಿನ ಪಾಕ್ ಆಕ್ರಮಿತ ಕಾಶ್ಮೀರ ಬೊಕ್ಕ ಗಿಲ್ಗಿಟ್-ಬಾಲ್ಟಿಸ್ತಾನ್ ಇತ್ತ್ಂಡ ನನೊಂಜಿ ಬರಿಟ್ ನಮ ದೇಸೊದ ಕೇಂದ್ರಾಡಳಿತ ಪ್ರದೇಸೊ ಆಯಿನ ಜಮ್ಮು ಬೊಕ್ಕ ಕಾಶ್ಮೀರ ಉಂಡು. ಭಾರತದ ರಾಜ್ಯೊಲಾಯಿನ ಹಿಮಾಚಲ ಪ್ರದೇಶ ಬೊಕ್ಕ ಪಂಜಾಬ್‌ದ ಬಡಕಾಯಿಡ್ ಬೊಕ್ಕ ಭಾರತದ ಕೇಂದ್ರಾಡಳಿತ ಪ್ರದೇಶವಾಯಿನ ಲಡಾಖ್‌ದ ಪಡ್ಡಾಯಿಡ್ ಜಮ್ಮು ಬೊಕ್ಕ ಕಾಶ್ಮೀರ ಉಂಡು. ೨೦೧೯ಡ್ ಜಮ್ಮು-ಕಾಶ್ಮೀರ ಪುನರ್ವಿಂಗಡಣಾ ಕಾಯ್ದೆನ್ ಜಾರಿಗ್ ಕನತ್‌ದ್, ಪಿರಾಕ್‌ದ ಜಮ್ಮು-ಕಾಶ್ಮೀರ ರಾಜ್ಯೊನು ರಡ್ಡ್ ಕೇಂದ್ರಾಡಳಿತ ಪ್ರದೇಶೊಲಾದ್ ವಿಂಗಡಣೆ ಮಲ್ತೆರ್. ಅವು ಪಂಡ ಮೂಡಾಯಿಡ್ ಲಡಾಖ್ ಬೊಕ್ಕ ಪಡ್ಡಾಯಿಡ್ ಒರಿದಿನ ಜಮ್ಮು-ಕಾಶ್ಮೀರ. ಶ್ರೀನಗರ ಬೊಕ್ಕ ಜಮ್ಮು ಈ ಕೇಂದ್ರಾಡಳಿತ ಪ್ರದೇಸೊದ ರಾಜದಾನಿ ಆದ್ ಉಲ್ಲ; ಉಂದು ರಡ್ಡ್ ವಿಭಾಗ ಬೊಕ್ಕ ೨೦ ಜಿಲ್ಲೆಲಾದ್ ವಿಂಗಡಣೆ ಆತ್ಂಡ್.

ಜಮ್ಮು ಬೊಕ್ಕ ಕಾಶ್ಮೀರೊಡು ನೀಲಮಣಿ, ಬೊರಾಕ್ಸ್ ಬೊಕ್ಕ ಗ್ರ್ಯಾಫೈಟ್‌ದ ಮಲ್ಲ ಖನಿಜ ನಿಕ್ಷೇಪೊಲು ಉಂಡು. ಕೃಷಿ ಬೊಕ್ಕ ಸೇವಾ ವಲಯಲು ಮುಲ್ಪದ ಆರ್ಥಿಕತೆದ ಕಂಬ ಆದುಂಡು. ತೋಟಗಾರಿಕೆ, ಕರಕುಶಲ ವಸ್ತುಲು ಬೊಕ್ಕ ಪ್ರವಾಸೋದ್ಯಮ ನೆಕ್ಕ್ ಮಲ್ಲ ಕೊಡುಗೆ ಕೊರ್ಪುಂಡು. ಸೇಬು ಕೃಷಿ ಮುಲ್ಪದ ಮಲ್ಲ ಉದ್ಯಮೊಲೆಡ್ ಒಂಜಿ. ಕಾಶ್ಮೀರದ ಸೇಬು ದೇಸೊರ್ಮೆ ಪುಗರ್ತೆ ಪಡೆದಿನ ಒಂಜಿ ಪರ್ಂದ್. ಉಂದು ೩೫ ಲಕ್ಷ ಜನಕ್ಲೆಗ್ ಬೇಲೆ ಕೊರ್ಪುಂಡು. ರಾಜ್ಯದ ಒಟ್ಟು ಆಂತರಿಕ ಉತ್ಪನ್ನೊಡು ೧೦% ಪಾಲ್ ಸೇಬು ಬುಲೆಟ್ ಬರ್ಪುಂಡು.