ಜಾರ್ಜ್ ಫೆರ್ನಾಂಡಿಸ್
ಜಾರ್ಜ್ ಮ್ಯಾಥ್ಯೂ ಫೆರ್ನಾಂಡಿಸ್ (೩ ಜೂನ್ ೧೯೩೦ – ೨೯ ಜನವರಿ ೨೦೧೯) ಒರಿ ಭಾರತೀಯ ರಾಜಕಾರಣಿ, ಕಾರ್ಮಿಕ ಸಂಘಟನಾಕಾರೆ, ಮುತ್ಸದ್ದಿ ಬೊಕ್ಕ ಪತ್ರಕರ್ತರಾದಿತ್ತೆರ್.[1] ಆರ್ ೧೯೯೮ ಡ್ದ್ ೨೦೦೪ ಮುಟ್ಟ ಭಾರತದ ರಕ್ಷಣಾ ಸಚಿವೆರಾದ್ ಸೇವೆ ಮಲ್ತೆರ್. ಹಿರಿಯ ಸಮಾಜವಾದಿಯಾದಿತ್ತಿನ ಮೇರ್, ೧೯೬೭ಡ್ದ್ ೨೦೦೯ ಮುಟ್ಟ ೩೦ ವರ್ಷಡ್ದ್ ಜಾಸ್ತಿ ಕಾಲ ಲೋಕಸಭೆತ ಸದಸ್ಯರಾದಿತ್ತೆರ್. ಆರ್ ಸಂಯುಕ್ತ ಸೋಷಿಯಲಿಸ್ಟ್ ಪಾರ್ಟಿ ಬೊಕ್ಕ ಸೋಷಿಯಲಿಸ್ಟ್ ಪಾರ್ಟಿದ ನಾಯಕರಾದಿತ್ತೆರ್. ಜನತಾ ಪಕ್ಷ, ಜನತಾ ಪಕ್ಷ (ಜಾತ್ಯತೀತ) ಬೊಕ್ಕ ಜನತಾ ದಳದ ಪ್ರಮುಖ ಸದಸ್ಯರಾದಿತ್ತೆರ್. ಅಕೇರಿಗ್ ಸಮತಾ ಪಾರ್ಟಿದ ಸಂಸ್ಥಾಪಕರಾದಿತ್ತೆರ್.[2] ರಾಜಕೀಯ ಜೀವನೊಡು ಸಂಪರ್ಕ, ಕೈಗಾರಿಕೆ, ರೈಲ್ವೆ ಬೊಕ್ಕ ರಕ್ಷಣೆ ಸೇರ್‌ದ್ ಮಸ್ತ್ ಪ್ರಮುಖ ಸಚಿವ ಖಾತೆಲೆನ್ ನಿಭಾಯಿಸಾದಿತ್ತಿನ ಜಾರ್ಜ್ ಅರೆಗ್, ೨೦೨೦ಡ್ ಮರಣೋತ್ತರವಾದ್ ಭಾರತದ ರಡ್ಡನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾಯಿನ ಪದ್ಮವಿಭೂಷಣೊನು ಕೊರ್ದು ಗೌರವಿಸಾಯೆರ್.[3]
ಕುಡ್ಲದಾರ್ ಆಯಿನ ಫೆರ್ನಾಂಡಿಸ್‌ನ್ ೧೯೪೬ಡ್ ಪಾದ್ರಿಯಾದ್ ತರಬೇತಿ ದೆತೊನರೆಗ್ ಬೆಂಗ್‌ಳೂರ್‌ಗ್ ಕಡಪುಡ್‌ದಿತ್ತೆರ್. ೧೯೪೯ಡ್ ಆರ್ ಬಾಂಬೆಗ್ ಪೋಯೆರ್. ಅಲ್ಪ ಆರ್ ಸಮಾಜವಾದಿ ಕಾರ್ಮಿಕ ಸಂಘದ ಚಳುವಳಿಗ್ ಸೇರಿಯೆರ್. ಕಾರ್ಮಿಕ ಸಂಘದ ನಾಯಕರಾಯಿನ ಬೊಕ್ಕ, ಫೆರ್ನಾಂಡಿಸ್ ಆರ್ ಭಾರತೀಯ ರೈಲ್ವೆಡ್ ಬೇಲೆ ಮಲ್ತೊಂದಿಪ್ಪುನಗ ೧೯೫೦ ಬೊಕ್ಕ ೧೯೬೦ತ ದಶಕೊಲೆಡ್ ಬಾಂಬೆಡ್ ಮಸ್ತ್ ಮುಷ್ಕರೊಲೆನ್ ಬೊಕ್ಕ ಬಂದ್‌ಲೆನ್ ಆಯೋಜನೆ ಮಲ್ತೆರ್. ಆರ್ ೧೯೬೭ತ ಸಂಸತ್‌ದ ಚುನಾವಣೆಡ್ ಬಾಂಬೆ ದಕ್ಷಿಣ ಕ್ಷೇತ್ರಡ್ದ್ ಸ್ಪರ್ಧೆ ಮಲ್ತ್‌ದ್, ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್‌ದ ಎಸ್.ಕೆ. ಪಾಟೀಲ್ ಅರೆನ್ ಸೋಪಾಯೆರ್. ಅಖಿಲ ಭಾರತ ರೈಲ್ವೆಮೆನ್ ಫೆಡರೇಶನ್‌ದ ಅಧ್ಯಕ್ಷರಾದ್, ಆರ್ ೧೯೭೪ತ ರೈಲ್ವೆ ಮುಷ್ಕರದ ನೇತೃತ್ವ ವಹಿಸಾದಿತ್ತೆರ್. ೧೯೭೫ತ ತುರ್ತುಪರಿಸ್ಥಿತಿದ ಪೊರ್ತುಡು, ತುರ್ತುಪರಿಸ್ಥಿತಿನ್ ವಿರೋಧ ಮಲ್ತಿನೆಕ್ಕ್ ಇಂದಿರಾ ಸರಕಾರಡ್ದ್ ಬಂಧನ ಭೀತಿನ್ ಎದುರಿಸಾಯೆರ್. ಉಂದೆನ್ ತಪ್ಪಾವೊನರೆ ಫೆರ್ನಾಂಡಿಸ್ ತರೆ ದೆಂಗಾವೊಂಡೆರ್. ೧೯೮೯ಡ್ದ್ ೧೯೯೦ ಮುಟ್ಟ ರೈಲ್ವೆ ಸಚಿವರಾದ್, ಆರ್ ಕೊಂಕಣ ರೈಲ್ವೆ ಯೋಜನೆದ ಪಿರವುದ ಪ್ರಮುಖ ಪ್ರೇರಕ ಶಕ್ತಿಯಾದಿತ್ತೆರ್. ಭಾರತೀಯ ಜನತಾ ಪಾರ್ಟಿ ನೇತೃತ್ವದ ಅಟಲ್ ಬಿಹಾರಿ ವಾಜಪೇಯಿ ಅರೆನ ರಡ್ಡನೇ ಬೊಕ್ಕ ಮೂಜಿನೇ ಮಂತ್ರಿಮಂಡಲೊಡು (೧೯೯೮-೨೦೦೪) ರಕ್ಷಣಾ ಸಚಿವರಾದ್, ಕಾರ್ಗಿಲ್ ಯುದ್ಧ ಬೊಕ್ಕ ಪೋಖ್ರಾನ್‌ಡ್ ಪರಮಾಣು ಪರೀಕ್ಷೆದ ಅನುಷ್ಠಾನದ ಮೇಲ್ವಿಚಾರಣೆನ್ ವಹಿಸಾದಿತ್ತೆರ್. ಫೆರ್ನಾಂಡಿಸ್ ಬರಾಕ್ ಕ್ಷಿಪಣಿ ಹಗರಣ ಬೊಕ್ಕ ತೆಹಲ್ಕಾ ಪ್ರಕರಣ ಸೇರ್‌ದ್ ಬೇತೆ-ಬೇತೆ ವಿವಾದೊಲೆಗ್‌ಲಾ ಗುರಿಯಾದಿತ್ತೆರ್. ಜಾರ್ಜ್ ಫೆರ್ನಾಂಡಿಸ್ ಆರ್ ೧೯೬೭ಡ್ದ್ ೨೦೦೪ ಮುಟ್ಟ ಒರ್ಂಬ ಲೋಕಸಭಾ ಚುನಾವಣೆಲೆಡ್ ಜಯಗಳಿಸಾದಿತ್ತೆರ್. ಆರ್ ೨೯ ಜನವರಿ ೨೦೧೯ಡ್ ತನ್ಕುಲೆನ ೮೮ನೇ ಪ್ರಾಯೊಡು ತೀರ್‌ದ್ ಪೋಯೆರ್.
ಪುಟ್ಟು ಬೊಕ್ಕ ಕಲ್ಪಟಿಗೆ
[ಸಂಪೊಲಿಪುಲೆ]ಜಾರ್ಜ್ ಫರ್ನಾಂಡಿಸ್ 1930ನೇ ಇಸವಿದ ಜೂನ್ 3ನೇ ತಾರೀಕ್ ಕುಡ್ಲದ ಕ್ಯಾಥೋಲಿಕ್ ಕುಟುಂಬೊಡು ಪುಟ್ಟಿಯೆರ್. ಅಮ್ಮೆರ್ ಜಾನ್ ಜೋಸೆಫ್ ಫರ್ನಾಂಡಿಸ್, ಅಪ್ಪೆ ಆಲಿಸ್ ಮಾರ್ಥಾ ಫರ್ನಾಂಡಿಸ್. ಮೊಕ್ಲೆಗ್ ಒಟ್ಟು ಆಜಿ ಆಣ್ ಜೋಕುಲು. ಮಲ್ಲಾರ್ ಜಾರ್ಜ್. ಆಯಿನ ಮೇರ್ನ ಮೆಗ್ಯಪಲಯನಕುಲು ಏರೆಂಡ ಲಾರೆನ್ಸ್, ಮೈಕೆಲ್, ಪಾಲ್, ಅಲೋಶಿಯಸ್ ಬೊಕ್ಕ ರಿಚರ್ಡ್. ಜಾರ್ಜೆರೆನ ಅಪ್ಪೆಗ್ ೫ನೇ ಕಿಂಗ್ ಜಾರ್ಜ್‌ನ ಮಾಮಲ್ಲ ಅಭಿಮಾನಿಯಾದಿತ್ತೆರ್. ಅಂಚಾದ್ ಸುರುತ ಮಗಕ್ಕ್ ಜಾರ್ಜ್ ಪಂಡ್‌ದ್ ಪುದರ್ ದೀಯೆರ್. ಅಮ್ಮೆರ್ ಜಾನ್ ಜೊಸೆಫ್ ಪೀರ್‌ಲೆಸ್ ಫೈನಾನ್ಸ್ ಗ್ರೂಪ್‌ಡ್ ವಿಮಾ ಅಧಿಕಾರಿಯಾದ್ ಬೇಲೆಡ್ ಇತ್ತೆರ್. ಜಾರ್ಜ್ ಸುರುತ ಶಾಲಾ ಶಿಕ್ಷಣೊನು ಇಲ್ಲ್‌ದ ಕೈತಲ್ ಇತ್ತಿನ ಬೋರ್ಡ್ ಶಾಲೆಡ್, ಮುನ್ಸಿಪಲ್ ಶಾಲೆ ಬೊಕ್ಕ ಚರ್ಚ್ ಶಾಲೆಡ್ ಪಡೆಯೆರ್. ಐಡ್ದ್ ಬುಕ್ಕ ಕುಡ್ಲದ ಸೈಂಟ್ ಅಲೋಶಿಯಸ್ ಕಾಲೇಜ್‌‌ದಕ್ಲೆನ ಶಾಲೆಡ್ ೫ನೇ ಕ್ಲಾಸ್‌ರ್ದ್ ೧೦ ಮುಟ್ಟ ಓದಿಯೆರ್.[4] ಜಾರ್ಜೆರೆನ ಅಮ್ಮೆರೆಗ್, ಮಗೆ ಲಾಯರ್ ಆವೊಡು ಪಂದ್ ಮನಸಿತ್ಂಡ್. ಆಂಡ ಜಾರ್ಜೆರೆಗ್ ಮನಸಿತ್ತಿಜಿ. ಜಾರ್ಜೆರೆನ ಅಮ್ಮೆರ್ ತನ್ನ ಜಾಗೆಡ್ ಇತ್ತಿನ ಗೇಣಿದಾರೆರೆನ್ ಅಪಗಪಗ ಲಕ್ಕಾವೊಂದಿತ್ತೆರ್. ಒಂಜಿ ವೇಳೆ ತಾನ್ ಲಾಯರ್ ಆಂಡ ಅಮ್ಮೆರೆನ ಪರವಾದ್ ವಾದ ಮಲ್ಪೊಡಾವು ಪಂದ್ ಜಾರ್ಜ್ ಲಾಯರ್ ಆವರ ಮನಸ್ ಮಲ್ತಿಜೆರ್.
ಲಾಯರ್ ಆಪುನೆಡ್ದ್ ಆರೆಗ್ ಚರ್ಚ್‌ದ ಅರ್ಚಕೆ ಆವೊಡು ಪಂದ್ ಆಸೆ ಇತ್ಂಡ್. ಐಕಾತ್ರ ಜಾರ್ಜ್ ತನ್ನ ೧೬ನೇ ಪ್ರಾಯೊಡು ೧೯೪೬ನೇ ಇಸವಿಡ್ ಬೆಂಗಳೂರುದ ಸೈಂಟ್ ಪೀಟರ್ ಚರ್ಚ್‌ಡ್ ಸೇರಿಯೆರ್. ಅಲ್ಪ ೧೯೪೬ಡ್ದು ೧೯೪೮ನೇ ಇಸವಿ ಮುಟ್ಟ ತತ್ವಶಾಸ್ತ್ರೊನು ಕಲ್ತೆರ್. ಆಂಡ ಅಲ್ಪದ ಚರ್ಚ್‌ಡ್ ರೆಕ್ಟರ್ ಬುಕ್ಕ ಕಲ್ಪುನಕ್ಲೆನ ಮಧ್ಯೆ ಇತ್ತಿನ ಭೇದ ಬಾವೊನು ತೂದು ಜಾರ್ಜೆರೆಗ್ ನಿರಾಸೆ ಆದ್ ತನ್ನ ೧೯ನೇ ಪ್ರಾಯೊಡು ಚರ್ಚ್‌ನ್ ಬುಡ್ದು ಪಿರ ಬತ್ತೆರ್.
ಬೊಂಬಾಯಿಡ್
[ಸಂಪೊಲಿಪುಲೆ]ರಾಜಕೀಯ ಬದ್ಕ್
[ಸಂಪೊಲಿಪುಲೆ]ವಿವಾದೊಲು
[ಸಂಪೊಲಿಪುಲೆ]ಬರವಣಿಗೆ
[ಸಂಪೊಲಿಪುಲೆ]ವೈಯಕ್ತಿಕ ಬದ್ಕ್
[ಸಂಪೊಲಿಪುಲೆ]ಉಲ್ಲೇಕ
[ಸಂಪೊಲಿಪುಲೆ]- ↑ Sharma, Surender (1 July 2010). "By George! It's out on the street". MiD DAY. Archived from the original on 16 September 2012. Retrieved 3 September 2010.
As if it had not earned enough bad name and publicity for one of the most veteran politicians and trade unionist George Fernandes, claimants to his legacy slug it out in streets on Wednesday.
- ↑ "Flaming torch a free symbol, EC can allot it to any other party: Delhi HC dismisses Samata Party's appeal". The Indian Express (in ಇಂಗ್ಲಿಷ್). 2022-11-19. Retrieved 2022-11-26.
- ↑ "George Fernandes, Arun Jaitley and Sushma Swaraj conferred Padma awards". business-standard.com (in ಇಂಗ್ಲಿಷ್). Press Trust of India. 2021-11-09. Retrieved 2022-10-10.
- ↑ Lasrado, Richie. "A Knight in Shining Armour (A profile of union defence minister George Fernandes)". Daijiworld Media Pvt Ltd Mangalore. Archived from the original on 28 June 2009. Retrieved 1 January 2010.