ಜೈಪುರ

ಜೈಪುರ ವಾಯುವ್ಯ ಭಾರತದ ರಾಜ್ಯವಾಯಿನ ರಾಜಸ್ಥಾನದ ರಾಜಧಾನಿ ಬೊಕ್ಕ ಮಲ್ಲ ನಗರ. 2011ತ ಲೆಕ್ಕಾಚಾರದ ಪ್ರಕಾರ, ಈ ನಗರಡ್ 3.1 ಮಿಲಿಯನ್ ಜನಸಂಖ್ಯೆ ಇತ್ತ್ಂಡ್, ಉಂದು ದೇಸೊಡು ಮಸ್ತ್ ಜನಸಂಖ್ಯೆ ಇಪ್ಪುನ ಪೇಂಟೆಲೆಡ್ ೧೦ನೇ ಸಾನೊಡು ಉಂಡು. ರಾಷ್ಟ್ರೀಯ ರಾಜಧಾನಿ ನವದೆಹಲಿರ್ದ್ 268 ಕಿ.ಮೀ ದೂರಡ್ ಉಪ್ಪುನ ಜೈಪುರೊನು 'ಪಿಂಕ್ ಸಿಟಿ' (ಗುಲಾಬಿ ನಗರ) ಪಂದ್ಲಾ ಲೆಪ್ಪುವೆರ್. ಪರತ್ ನಗರದ ಹೆಚ್ಚಿನಂಶ ಕಟ್ಟಡೊಲೆನ ಬಣ್ಣ ಗುಲಾಬಿ ಆದುಪ್ಪುನೆಡ್ದಾತ್ರ ಜೈಪುರಗ್ ಗುಲಾಬಿ ನಗರ- ಪಿಂಕ್ ಸಿಟಿ ಪಂದ್ ಲೆಪ್ಪುವೆರ್.

ಜೈಪುರೊನು 1727ಡ್ ಆಮೇರ್‌ದ ಕಚ್ವಾಹಾ ರಜಪೂತ ಆಡಳಿತಗಾರೆ ಸವಾಯಿ ಜೈ ಸಿಂಗ್ II ಸ್ಥಾಪನೆ ಮಲ್ತೆರ್. ಅರೆನ ಪುದರ್‌ನೆ ಈ ನಗರಗ್ ದೀತೆರ್. ಉಂದು ಆಧುನಿಕ ಭಾರತದ ಸುರುತ ಯೋಜನೆ ಮಲ್ತಿನ ನಗರೊಲೆಡ್ ಒಂಜಿ. ಇಂದೆನ್ ವಿದ್ಯಾಧರ ಭಟ್ಟಾಚಾರ್ಯೆರ್ ವಿನ್ಯಾಸ ಮಲ್ತೆರ್. ಬ್ರಿಟಿಷ್ ವಸಾಹತುಶಾಹಿ ಕಾಲಡ್, ಈ ನಗರ ಜೈಪುರ ರಾಜ್ಯದ ರಾಜಧಾನಿಯಾದಿತ್ತ್ಂಡ್. 1947ಡ್ ಭಾರತಗ್ ಸ್ವಾತಂತ್ರ್ಯ ತಿಕ್ಕಿಬೊಕ್ಕ, ಪೊಸತ್ ರಚನೆ ಆಯಿನ ರಾಜಸ್ಥಾನ ರಾಜ್ಯಗ್ ಜೈಪುರ ರಾಜಧಾನಿಯಾಂಡ್.

ಜೈಪುರ ಭಾರತದ ಒಂಜಿ ಜನಪ್ರಿಯ ಪ್ರವಾಸಿ ತಾಣ. ದೆಹಲಿ ಬೊಕ್ಕ ಆಗ್ರಾದೊಟ್ಟುಗು ಪಶ್ಚಿಮ ಸುವರ್ಣ ತ್ರಿಕೋನ ಪ್ರವಾಸಿ ಸರ್ಕ್ಯೂಟುಡು ಜೈಪುರಲಾ ಬರ್ಪುಂಡು. ಈ ನಗರ ರಾಜಸ್ಥಾನದ ಬೇತೆ ಪ್ರವಾಸಿ ತಾಣೊಲಾಯಿನ ಜೋಧ್‌ಪುರ, ಜೈಸಲ್ಮೇರ್, ಬಿಕಾನೇರ್, ಉದೈಪುರ, ಬುಂದಿ, ಕೋಟಾ ಬೊಕ್ಕ ಮೌಂಟ್ ಅಬುಗ್ ಹೆಬ್ಬಾಗಿಲಾದ್ ಉಂಡು ಪನೊಲಿ ಜೈಪುರಕ್ ಬತ್ತಿನ ಪ್ರವಾಸಿಗೆರ್ ಮುಲ್ಪಡ್ದ್ ಬೊಕ್ಕ ಅಡೆಗ್ ಮಾತ ಪೋಪೆರ್. ಮುಲ್ಪ ವಿಶ್ವ ಪರಂಪರೆದ ತಾಣೊಲಾಯಿನ ಆಮೇರ್ ಕೋಟೆ, ಹವಾ ಮಹಲ್ ಬೊಕ್ಕ ಜಂತರ್ ಮಂತರ್ ಉಂಡು. 6 ಜುಲೈ 2019ಡ್, ಈ ನಗರೊನು ವಿಶ್ವ ಪರಂಪರೆದ ನಗರೊಲೆನ ಪಟ್ಟಿಗ್ ಸೇರಾಯೆರ್. ಇಂದೆನ್ ಭಾರತದ ಪ್ಯಾರಿಸ್ ಪಂದ್ಲಾ ಲೆಪ್ಪುವೆರ್. ಇಂದೆತ ಪೊರ್ಲುಗು ಅಕರ್ಷಿತರಾದ್, ಸಿ.ವಿ. ರಾಮನ್ ಇಂದೆನ್ "ಐಲ್ಯಾಂಡ್ ಆಫ್ ಗ್ಲೋರಿ" (ವೈಭವದ ದ್ವೀಪ) ಪಂದ್ ಲೆತ್ತೆರ್‌ಗೆ.

ಪುದರ್

1727ಡ್ ಆಮೇರ್‌ದ ಕಚ್ವಾಹಾ ರಜಪೂತ ರಾಜೆ ೨ನೇ ಸವಾಯಿ ಜೈ ಸಿಂಗ್ ಸ್ಥಾಪನೆ ಮಲ್ತೆರ್. ಅಂಚಾದ್ ಈ ಪೇಂಟೆಗ್ ಜೈಪುರ ಪಂದ್ ಪುದರ್ ಬತ್ತ್ಂಡ್.

ಇತಿಹಾಸೊ

ಜೈಪುರೊನು ಕಚ್ವಾಹಾ ವಂಶದ ರಜಪೂತ ರಾಜೆ ರಡ್ಡನೇ ಜೈ ಸಿಂಗ್, 18 ನವೆಂಬರ್ 1727ಡ್ ಸ್ಥಾಪನೆ ಮಲ್ತೆರ್. ಆರ್ 1699 ರ್ದ್ 1743 ಮುಟ್ಟ ಈ ಪ್ರಾಂತ್ಯೊನು ಆಳ್ವಿಕೆ ಮಲ್ತೆರ್. ಎಚ್ಚಾವೊಂದುಪ್ಪುನ ಜನಸಂಖ್ಯೆ ಬೊಕ್ಕ ನೀರ್‌ದ ಸಮಸ್ಯೆಡ್ದಾತ್ರ, ಜೈಸಿಂಗ್ ತನ್ನ ರಾಜಧಾನಿನ್ ಆಮೇರ್‌ರ್ದ್, ೧೧ ಕಿಲೋ ಮೀಟರ್ ದೂರೊಡು ಇಪ್ಪುನ ಜೈಪುರೊಗು ಬದಲಾವಣೆ ಮಲ್ಪೆರೆ ಯೋಚನೆ ಮಲ್ತೆರ್. ಜೈಪುರದ ವಿನ್ಯಾಸೊನು ಮಲ್ಪರ ಜೈ ಸಿಂಗ್ ಅಪಗದ ಪುಗರ್ತೆದ ವಾಸ್ತುಶಿಲ್ಪಿ ವಿದ್ಯಾಧರ ಭಟ್ಟಾಚಾರ್ಯೆರೆಡ ಮಾತೆರಿಯೆರ್. ಆರೆನ ಮಾರ್ಗದರ್ಶನಡ್ ಈ ನಗರೊನು ನಿರ್ಮಾಣ ಮಲ್ತೆರ್. ನಗರದ ನಿರ್ಮಾಣದ ಬೇಲೆ 1726ಡ್ ಸುರುವಾಂಡ್.

1876ನೇ ಇಸವಿಡ್ ವರ ಪ್ರಿನ್ಸ್ ಆಫ್ ವೇಲ್ಸ್ ಆಯಿನ ಆಲ್ಬರ್ಟ್ ಎಡ್ವರ್ಡ್ ಜೈಪುರೊಗು ಬರ್ಪುನೆಟ್ ಇತ್ತೆ. ಆಯನ್ ಎದ್ಕೊನಿಯೆರೆಗಾದ್, ರಡ್ಡನೇ ಸವಾಯಿ ರಾಮ್ ಸಿಂಗ್ ಈ ನಗರೊಗು ಗುಲಾಬಿ ಬಣ್ಣನ್ ಮೆತ್ತಾಯೆರ್. ಮಸ್ತ್ ಮಾರ್ಗೊಲೆಡ್ ನನಲಾ ಗುಲಾಬಿ ಬಣ್ಣ ಉಂಡು, ಉಂದು ಜೈಪುರೊಗು ಒಂಜಿ ವಿಶೇಷವಾಯಿನ ರೂಪೊನು ಕೊರ್ಪುಂಡು ಬೊಕ್ಕ 'ಪಿಂಕ್ ಸಿಟಿ' ಪನ್ಪುನ ಪುದರ್‌ಗ್ ಕಾರಣ ಆದುಂಡು.

19ನೇ ಶತಮಾನಡ್, ಈ ನಗರ ಮಸ್ತ್ ಬೇಗ ಅಭಿವೃದ್ಧಿಯಾಂಡ್ ಬೊಕ್ಕ 1900 ನೇ ಇಸವಿದ ಪೊರ್ತುಗು ಮುಲ್ಪದ ಜನಸಂಖ್ಯೆ 1,60,000 ಇತ್ತ್ಂಡ್. ಮುಲ್ಪದ ಅಗಲವಾಯಿನ ರಸ್ತೆಲೆಗ್ ಡಾಂಬರು ಪಾಡ್ಯೆರ್, ಬೊಕ್ಕ 1868ಡ್ ಸ್ಥಾಪನೆಯಾಯಿನ ಕಲಾ ಶಾಲೆದ ಪ್ರಭಾವೊರ್ದು ಲೋಹದ ಬೇಲೆ (ಮೆಟಲ್ ವರ್ಕ್) ಬೊಕ್ಕ ಅಮೃತಶಿಲೆ (ಮಾರ್ಬಲ್) ಮುಲ್ಪದ ಮುಖ್ಯ ಕೈಗಾರಿಕೆಲಾದಿತ್ತ್ಂಡ್. ಆಗಸ್ಟ್ 1981ಡ್ ಆಯಿನ ಮೇಘಸ್ಫೋಟದ (ಕ್ಲೌಡ್‌ಬರ್ಸ್ಟ್) ಭಾರಿ ಬರ್ಸೊರ್ದು ವಿಮಾನ ನಿಲ್ದಾಣದ ಒಟ್ಟುಗು ನಗರದ ಮಸ್ತ್ ಜಾಗೆಲೆಡ್ ಪ್ರವಾಹ (ನೆರೆ) ಬತ್ತ್ಂಡ್. ಇಂದೆರ್ದ್ ಎಡ್ಮ ಜನ ತೀರ್‌ದ್ ಪೋಯೆರ್ ಬೊಕ್ಕ ನಗರದ ದ್ರವ್ಯಾವತಿ ಸುಧೆಗ್ ಮಸ್ತ್ ನಷ್ಟ ಆಂಡ್. 6 ಜುಲೈ 2019ಡ್, ಈ ನಗರೊನು ವಿಶ್ವ ಪರಂಪರೆದ ನಗರೊಲೆನ ಪಟ್ಟಿಗ್ ಸೇರಾಯೆರ್.