ಡೆಹ್ರಾಡೂನ್

ಡೆಹ್ರಾಡೂನ್ ಭಾರತದ ಉತ್ತರಾಖಂಡ ರಾಜ್ಯದ ಚಳಿಗಾಲದ ರಾಜಧಾನಿ ಬೊಕ್ಕ ಉತ್ತರಾಖಂಡ ರಾಜ್ಯೊಡು ಮಸ್ತ್ ಜನಸಂಖ್ಯೆ ಇಪ್ಪುನ ನಗರ. ಉಂದು ಜಿಲ್ಲಾ ಕೇಂದ್ರಲಾ ಅಂದ್. ಉತ್ತರಾಖಂಡ ವಿಧಾನಸಭೆತ್ತ ಚಳಿಗಾಲದ ಅಧಿವೇಶನೊ ಡೆಹ್ರಾಡೂನ್ ನಗರಡ್ ನಡಪುಂಡು. ಡೆಹ್ರಾಡೂನ್‌ ಗರ್ವಾಲ್ ವಿಭಾಗದ ಒಂಜಿ ಭಾಗವಾದ್ ಉಂಡು. ದೆಹಲಿ ಮಹಾನಗರ ಪ್ರದೇಶಡ್ ವಲಸೆ ಬೊಕ್ಕ ಜನಸಂಖ್ಯೆದ ಏರಿಕೆನ್ ಕಡಿಮೆ ಮಲ್ಪರಗಾತ್ರ ಬೊಕ್ಕ ಹಿಮಾಲಯದ ಕೈತಲ್ ಒಂಜಿ ಸ್ಮಾರ್ಟ್ ಸಿಟಿನ್ ಸ್ಥಾಪನೆ ಮಲ್ಪರೆಗಾತ್ರ ಪರ್ಯಾಯ ನಗರವಾದ್ ಡೆಹ್ರಾಡೂನ್‌ನ್ ಅಭಿವೃದ್ಧಿ ಮಲ್ತೊಂದುಲ್ಲೆರ್. ಡೆಹ್ರಾಡೂನ್ ಹಿಮಾಲಯ ಪರ್ವತದ ಮುದೆಲ್‌ಡ್ ಇಪ್ಪುನ ಡೂನ್ ಕಣಿವೆಡ್ ಉಂಡು. ಮೂಡಾಯಿಡ್ ಸಾಂಗ್ ಸುದೆ (ಗಂಗಾ ಸುದೆತ ಉಪನದಿ) ಬೊಕ್ಕ ಪಡ್ಡಾಯಿಡ್ ಆಸನ್ ಸುದೆ(ಯಮುನಾ ಸುದೆತ ಉಪನದಿ)ತ ನಡುಟು ಈ ಪೇಂಟೆ ಉಂಡು. ಈ ನಗರ ಪೊರ್ಲುದ ಪ್ರಕೃತಿದ ದೃಶ್ಯೊಲೆಗ್ ಪುದರ್ ಪೋಯಿನವು ಬೊಕ್ಕ ಸುತ್ತಮುತ್ತದ ಪ್ರದೇಶೊಲೆಗ್ ಒಂಜಿ ಹೆಬ್ಬಾಗಿಲಾದ್ ಉಂಡು.

ಡೆಹ್ರಾಡೂನ್ ಒಂಜಿ ಪ್ರಮುಖ ಶೈಕ್ಷಣಿಕ ಬೊಕ್ಕ ಸಂಶೋಧನಾ ಕೇಂದ್ರವಾದುಂಡು. ಮುಲ್ಪ ಇಂಡಿಯನ್ ಮಿಲಿಟರಿ ಅಕಾಡೆಮಿ, ಫಾರೆಸ್ಟ್ ರಿಸರ್ಚ್ ಇನ್ಸ್ಟಿಟ್ಯೂಟ್, ಇಂದಿರಾ ಗಾಂಧಿ ನ್ಯಾಷನಲ್ ಫಾರೆಸ್ಟ್ ಅಕಾಡೆಮಿ, ಡೂನ್ ಸ್ಕೂಲ್, ವೆಲ್ಹ್ಯಾಮ್ ಬಾಯ್ಸ್ ಸ್ಕೂಲ್, ವೆಲ್ಹ್ಯಾಮ್ ಗರ್ಲ್ಸ್ ಸ್ಕೂಲ್, ಬ್ರೈಟ್‌ಲ್ಯಾಂಡ್ಸ್ ಸ್ಕೂಲ್, ರಾಷ್ಟ್ರೀಯ ಇಂಡಿಯನ್ ಮಿಲಿಟರಿ ಕಾಲೇಜ್, ಉತ್ತರಾಖಂಡ ಆಯುರ್ವೇದ ವಿಶ್ವವಿದ್ಯಾಲಯ, ವಾಡಿಯಾ ಇನ್ಸ್ಟಿಟ್ಯೂಟ್ ಆಫ್ ಹಿಮಾಲಯನ್ ಜಿಯಾಲಜಿ ಬೊಕ್ಕ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ರಿಮೋಟ್ ಸೆನ್ಸಿಂಗ್ ಉಂಡು. ಉಂದು ಭಾರತದ ಸರ್ವೇಯರ್-ಜನರಲ್‌ನ ಪ್ರಧಾನ ಕಚೇರಿಯಾದುಂಡು. ದೈನಿಕ್ ಜಾಗರಣ್ ಬೊಕ್ಕ ಕೆಪಿಎಂಜಿ ಸಂಸ್ಥೆಲು ನಡಪಾಯಿನ ಆರೋಗ್ಯ, ಮೂಲಸೌಕರ್ಯ, ಆರ್ಥಿಕತೆ, ಶಿಕ್ಷಣ ಬೊಕ್ಕ ಅಪರಾಧದ ಮಿತ್ತ್ ಆಧಾರಿತವಾಯಿನ ಒಂಜಿ ಸಮೀಕ್ಷೆದ ಪ್ರಕಾರ, ಡೆಹ್ರಾಡೂನ್ ಭಾರತದ ಅತ್ಯಂತ ಸುರಕ್ಷಿತ ನಗರೊಲೆಡ್ ಒಂಜಿ ಪಂದ್ ಪಂತೆರ್. ಡೆಹ್ರಾಡೂನ್ ಅಲ್ಪದ ಬಾಸುಮತಿ ಅರಿ ಬೊಕ್ಕ ಬೇಕರಿ ಉತ್ಪನ್ನೊಲೆಗ್ ಬಾರಿ ಪುದರ್ ಪೋತ್ಂಡ್.

ಪಿರಾಕ್‌ಡ್ ಡೆಹ್ರಾಡೂನ್ ಗರ್ವಾಲ್ ಸಾಮ್ರಾಜ್ಯದ ಒಂಜಿ ಪ್ರಮುಖ ಕೇಂದ್ರವಾದಿತ್ತ್ಂಡ್, ನೆನ್ನ್ ಸುರುಕು ೧೮೦೪ನೇ ಜನವರಿಡ್ ಗೂರ್ಖಾ ಆಡಳಿತಗಾರೆರ್, ಬೊಕ್ಕ ಬ್ರಿಟಿಷೆರ್ ವಶಗ್ ದೆತೊಂಡೆರ್. ಈ ಜಾಗೆದ ಆಯಕಟ್ಟ್ ದ ಮಹತ್ವ ಬೊಕ್ಕ ಪ್ರಮುಖ ಸೇವಾ ಅಕಾಡೆಮಿದ ಸ್ಥಾನದ ಕಾರಣ, ಭಾರತೀಯ ಸಶಸ್ತ್ರ ಪಡೆತ್ತ ಸೈನಿಕೆರ್ ಮುಲ್ಪ ಎಚ್ಚ ಸಂಖ್ಯೆಡ್ ಉಲ್ಲೆರ್.

ಡೆಹ್ರಾಡೂನ್ ಶಿಮ್ಲಾ, ಮಸ್ಸೂರಿ, ಉತ್ತರಕಾಶಿ, ಕೇದಾರಕಾಂತ, ಹರ್ ಕಿ ಡೂನ್ ಬೊಕ್ಕ ಹೇಮಕುಂಡ್ ಸಾಹಿಬ್- ಇಂಚಿನ ಜಾಗೆಲೆಗ್ ಕೈತಲ್ಡ್ ಉಂಡು. ಹರಿದ್ವಾರ ಬೊಕ್ಕ ಋಷಿಕೇಶ, ಅತ್ತಂದೆ ಹಿಮಾಲಯದ ಯಾತ್ರಾ ಸ್ಥಳೊಲಾಯಿನ ಛೋಟಾ ಚಾರ್ ಧಾಮ್- ಪಂಡ ಯಮುನೋತ್ರಿ, ಗಂಗೋತ್ರಿ, ಕೇದಾರನಾಥ ಬೊಕ್ಕ ಬದ್ರಿನಾಥ್‌ಗ್ ಪೋವೊಡಾಂಡ ಡೆಹ್ರಾಡೂನ್ ಮುಖಾಂತರನೇ ಪೋವೊಡಾಪುಂಡು.