ತಝಿಕಿಸ್ತಾನ್
ತಝಿಕಿಸ್ತಾನ್-ಅಧಿಕೃತವಾದ್ ತಝಿಕಿಸ್ತಾನ್ ಗಣರಾಜ್ಯ- ಮಧ್ಯ ಏಷ್ಯಾಡ್ ಇಪ್ಪುನ ಕಡಲಬರಿದಾಂತಿನ ಒಂಜಿ ದೇಶ. ದುಶಾನ್ಬೆ ಈ ದೇಶದ ರಾಜಧಾನಿ ಬೊಕ್ಕ ಮಾಮಲ್ಲ ನಗರ. ತಾಜಿಕಿಸ್ತಾನ್‌ದ ತೆಂಕಾಯಿಗ್ ಅಫ್ಘಾನಿಸ್ತಾನ, ಪಶ್ಚಿಮಗ್ ಉಜ್ಬೇಕಿಸ್ತಾನ್, ಬಡಕಾಯಿಗ್ ಕಿರ್ಗಿಸ್ತಾನ್ ಬೊಕ್ಕ ಮೂಡಾಯಿಗ್ ಚೀನಾ ದೇಸೊ ಉಂಡು. ಅಫ್ಘಾನಿಸ್ತಾನ್‌ದ ವಾಖಾನ್ ಕಾರಿಡಾರ್‌ರ್ದಾವರ ಉಂದು ಪಾಕಿಸ್ತಾನ್‌ರ್ದ್ ಒಂತೆ ಅಂತರಡ್ ಬೇತೆ ಆತ್ಂಡ್. ಈ ದೇಶದ ಒಟ್ಟು ಜನಸಂಖ್ಯೆ ೧.೧ ಕೋಟಿ ಉಂಡು ಉಂಡು.[೧][೨] ತಝಿಕಿಸ್ತಾನ್ ದೇಸೊದ ಒಟ್ಟು ಇಸ್ತೀರ್ನೊ ೧,೪೩,೧೦೦ ಚದರ ಕಿಮೀ. ಜನಸಂಕೆದ ಲೆಕ್ಕೊಡು ಪ್ರಪಂಚೊಡು ೮೮ನೇ ಸಾನೊಡು ಉಂಡು, ಅಂಚನೆ ಇಸ್ತೀರ್ನೊಡು ೯೬ನೇ ಸಾನೊಡು ಉಂಡು.
ತಾಜಿಕಿಸ್ತಾನ್ ಒಂಜಿ ಅಧ್ಯಕ್ಷೀಯ ಗಣರಾಜ್ಯ. ಪಂಡ ದೇಸೊದ ಅಧ್ಯಕ್ಸೆರೆಗ್ ಅದಿಕಾರ ಚಲಾವಣೆ ಮಲ್ಪರ ಎಚ್ಚ ಅವಕಾಸೊ ಉಂಡು. ಈ ದೇಶಡ್ ತಾಜಿಕ್ ಜನಕುಲು ಬಹುಸಂಖ್ಯಾತೆರಾದ್ ಉಲ್ಲೆರ್. ಅಕುಲೆನ ರಾಷ್ಟ್ರೀಯ ಭಾಷೆ ತಾಜಿಕ್ ಆತ್ಂಡ್. ರಷ್ಯನ್ ಭಾಷೆನ್, ಅಂತರ್-ಜನಾಂಗೀಯ ಭಾಷೆಯಾದ್ ಬಳಕೆ ಮಲ್ಪುವೆರ್. ಸಂವಿಧಾನದ ಪ್ರಕಾರ ಈ ದೇಶ ಜಾತ್ಯತೀತ ಆದಿತ್ತ್ಂಡಲಾ, ಮುಲ್ಪದ ೯೭.೫% ಜನಕುಲು ಇಸ್ಲಾಂ ಧರ್ಮನ್ ಪಾಲನೆ ಮಲ್ಪುವೆರ್. ಗೋರ್ನೊ-ಬಡಕ್ಷಾನ್ ಪ್ರಾಂತ್ಯಡ್, ರುಶಾನಿ, ಶುಘ್ನಿ, ಇಷ್ಕಾಶಿಮಿ, ವಾಖಿ, ಬೊಕ್ಕ ತಾಜಿಕ್ ಭಾಷೆಲೆನ್ ಪಾತೆರುನಕುಲು ಉಲ್ಲೆರ್, ಅಂಚಾದ್ ಮುಲ್ಪ ಮಸ್ತ್ ಭಾಷಾ ವೈವಿಧ್ಯತೆ ತೋಜಿದ್ ಬರ್ಪುಂಡು. ಈ ದೇಶದ ೯೦% ರ್ದ್ಲಾ ಜಾಸ್ತಿ ಜಾಗೆಡ್ ಬೆಟ್ಟ-ಗುಡ್ಡೆಲು (ಪರ್ವತೊಲು) ದಿಂಜಿದ್ಂಡ್. ಉಂದು ಅಭಿವೃದ್ಧಿ ಆವೊಂದುಪ್ಪುನ ದೇಶ ಆತ್ಂಡ್. ಮುಲ್ಪದ ಆರ್ಥಿಕತೆ ಪಿದಯಿ ಊರುರ್ದು ಕಡಪುಡುನ ದುಡ್ಡು, ಬೊಕ್ಕ ಅಲ್ಯುಮಿನಿಯಂ ಅಂಚನೆ ಪರ್ತಿದ ಉತ್ಪಾದನೆದ ಮಿತ್ತ್ ಅವಲಂಬಿತ ಆತ್ಂಡ್. ತಾಜಿಕಿಸ್ತಾನ್ ವಿಶ್ವಸಂಸ್ಥೆ, ಸಿಐಎಸ್, ಒಎಸ್‌ಸಿಇ, ಒಐಸಿ, ಇಸಿಒ, ಎಸ್‌ಸಿಒ, ಬೊಕ್ಕ ಸಿಎಸ್‌ಟಿಒ ಸಂಸ್ಥೆಲೆದ ಸದಸ್ಯ ಆತ್ಂಡ್ ಬೊಕ್ಕ ನ್ಯಾಟೋ ಪಿಎಫ್‌ಪಿ ಪಾಲುದಾರ ದೇಶಲಾ ಆತ್ಂಡ್.
ಇತಿಹಾಸೊ
[ಸಂಪೊಲಿಪುಲೆ]ಈ ಪ್ರದೇಶ (ಜಾಗೆ) ದುಂಬು ನವಶಿಲಾಯುಗ ಬೊಕ್ಕ ಕಂಚಿದ ಯುಗದ ಸಂಸ್ಕೃತಿಲೆಗ್, ಅಂಚನೆ ಪಶ್ಚಿಮದ ಆಕ್ಸಸ್ ನಾಗರಿಕತೆಗ್ ನೆಲೆಯಾದಿತ್ತ್ಂಡ್. ಈ ದೇಶದ ಕೆಲವು ಭಾಗೊಲು ಸೋಗ್ಡಿಯನ್ ಬೊಕ್ಕ ಬ್ಯಾಕ್ಟ್ರಿಯನ್ ನಾಗರಿಕತೆಲೆದ ಭಾಗ ಆದಿತ್ತ್ಂಡ್. ಅಂಚನೆ ಉಂದೆನ್ ಅಕೆಮೆನಿಡ್‌ಲು, ಅಲೆಕ್ಸಾಂಡರ್ ದಿ ಗ್ರೇಟ್, ಗ್ರೆಕೋ-ಬ್ಯಾಕ್ಟ್ರಿಯನ್ನೆರ್, ಕುಶಾನೆರ್, ಕಿಡಾರೈಟ್‌ಲು, ಹೆಫ್ತಾಲೈಟ್‌ಲು, ಸುರುತ ತುರ್ಕಿಕ್ ಕಗಾನೇಟ್, ಉಮಯ್ಯದ್ ಬೊಕ್ಕ ಅಬ್ಬಾಸಿದ್ ಕ್ಯಾಲಿಫೇಟ್‌ಲು, ಸಮಾನಿಡ್ ಸಾಮ್ರಾಜ್ಯ, ಕಾರಾ-ಖಾನಿಡ್‌ಲು, ಸೆಲ್ಜುಕ್‌ಲು, ಖ್ವಾರಜ್ಮಿಯನ್ನೆರ್, ಮಂಗೋಲೆರ್, ತೈಮುರಿಡ್‌ಲು ಬೊಕ್ಕ ಬುಖಾರಾದ ಖಾನೇಟ್ ಆಳ್ವಿಕೆ ಮಲ್ತೊಂದಿತ್ತೆರ್. ಈ ಪ್ರದೇಶ ಸೋವಿಯತ್ ಒಕ್ಕೂಟದ ಭಾಗ ಆಪಿನೆರ್ದ್ ದುಂಬು, ಬೊಕ್ಕದ ದಿನೊಲೆಡ್ ರಷ್ಯಾದ ಸಾಮ್ರಾಜ್ಯದ ವಶಗ್ ಬತ್ತ್ಂಡ್. ಡಿಸೆಂಬರ್ ೫, ೧೯೨೯ಡ್ ಸೋವಿಯತ್ ಒಕ್ಕೂಟದ ಅಂಗ ಗಣರಾಜ್ಯ ಆಪಿನೆರ್ದ್ ದುಂಬು, ಉಂದು ಉಜ್ಬೇಕಿಸ್ತಾನ್‌ದ ಸ್ವಾಯತ್ತ ಗಣರಾಜ್ಯ ಆದಿತ್ತಿನ ಪೊರ್ತುಡೇ ಸೋವಿಯತ್ ಒಕ್ಕೂಟದ ಉಲೈ ಈ ದೇಶದ ಗಡಿಕ್ಲೆನ್ ಗುರುತು ಮಲ್ತ್‌ದಿತ್ತೆರ್.[೩]
ಸೆಪ್ಟೆಂಬರ್ ೯, ೧೯೯೧ಡ್, ಸೋವಿಯತ್ ಒಕ್ಕೂಟೊ ಒಡೆದ್ ಪೋಪುನ ಪೊರ್ತುಡು, ತಾಜಿಕಿಸ್ತಾನ್ ಒಂಜಿ ಸ್ವತಂತ್ರ ಸಾರ್ವಭೌಮ ರಾಜ್ಯ ಪಂಡ್‌ದ್ ಘೋಷಣೆ ಮಲ್ತೊಂಡ್. ಸ್ವಾತಂತ್ರ್ಯ ತಿಕ್ಕಿನ ಬೊಕ್ಕ, ಮೇ ೧೯೯೨ ರ್ದ್ ಜೂನ್ ೧೯೯೭ ಮುಟ್ಟ ಮುಲ್ಪ ಅಂತರ್ಯುದ್ಧ ನಡತ್ಂಡ್. ಯುದ್ಧ ಮುಗಿದಿನ ಬೊಕ್ಕ, ಪೊಸತಾದ್ ಉಂಡಾಯಿನ ರಾಜಕೀಯ ಸ್ಥಿರತೆ ಬೊಕ್ಕ ವಿದೇಶಿ ಸಹಾಯೊರ್ದು ಈ ದೇಶದ ಆರ್ಥಿಕತೆ ಬುಳೆಯೆರೆ ಕಾರಣ ಆಂಡ್. ೧೯೯೪ ರ್ದ್ ಈ ದೇಶೊನು ಎಮೊಮಾಲಿ ರಹಮಾನ್ ಆಳೊಂದುಲ್ಲೆರ್.[೪]
ಉಲ್ಲೇಕ
[ಸಂಪೊಲಿಪುಲೆ]- ↑ "World Bank Open Data". World Bank Open Data. Retrieved 2026-03-07.
- ↑ "Tajikistan Population (2025)". Worldometer (in ಇಂಗ್ಲಿಷ್). Retrieved 2025-06-25.
- ↑ Bergne, Paul (2007) The Birth of Tajikistan: National Identity and the Origins of the Republic, IB Taurus & Co Ltd, pg. 39–40
- ↑ "World Report 2019: Rights Trends in Tajikistan". Human Rights Watch (in ಇಂಗ್ಲಿಷ್). 15 January 2019. Archived from the original on 24 February 2019. Retrieved 13 May 2020.