ದಮನ್

ದಮನ್ ನಮ ದೇಸೊದ ಕೇಂದ್ರಾಡಳಿತ ಪ್ರದೇಶವಾಯಿನ ದಾದ್ರಾ-ನಗರ ಹವೇಲಿ ಬೊಕ್ಕ ದಮನ್-ದಿಯುದ ರಾಜಧಾನಿಯಾದುಂಡು. ಉಂದು ದಮನ್ ಜಿಲ್ಲೆದ ಕೇಂದ್ರಲಾ ಅಂದ್.

ದಮನ್ ಗಂಗಾ ಸುದೆ ದಮನ್‌ನ್ ನಾನಿ-ದಮನ್ (ಎಲ್ಯ ದಮನ್) ಬೊಕ್ಕ ಮೋತಿ-ದಮನ್ (ಮಲ್ಲ ದಮನ್) ಪಂದ್ ರಡ್ಡ್ ಭಾಗ ಮಲ್ಪುಂಡು. ಎಲ್ಯ ದಮನ್ ಪನ್ಪಿನ ಪುದರ್ ಇತ್ತ್ಂಡಲಾ, ಈ ರಡ್ಡ್ ಭಾಗೊಲೆಡ್ ನಾನಿ-ದಮನ್ ಮಲ್ಲ ಉಂಡು. ಮುಲ್ಪ ಮಲ್ಲ ಆಸ್ಪತ್ರೆಲು, ಸೂಪರ್ ಮಾರ್ಕೆಟ್ ಲು, ಬೊಕ್ಕ ಮಲ್ಲ ವಸತಿ ಪ್ರದೇಶೊಲೆನಂಚಿನ ಮಸ್ತ್ ಮುಖ್ಯವಾಯಿನ ಜಾಗೆಲು ಉಂಡು. ಆಂಡ ಪರತ್ ನಗರ ಜಾಸ್ತಿಯಾದ್ ಮೋತಿ-ದಮನ್ ಡ್ ಉಂಡು. ಗುಜರಾತ್‌ದ ವಾಪಿ, ದಮನ್‌ಗ್ ಉಪ್ಪುನ ಕೈತಲ್‌ದ ಪೇಂಟೆ ಆದುಂಡು.

ಇತಿಹಾಸೊ

ಪೋರ್ಚುಗೀಸ್ ಕ್ಯಾಪ್ಟನ್ ಆಯಿನ ಮೇಜರ್ ಡಿಯೊಗೊ ಡಿ ಮೆಲೊ ೧೫೨೩ಡ್ ಹಾರ್ಮುಜ್‌ಗ್ ಪೋವೊಂದುಪ್ಪುನಗ ಆಕಸ್ಮಿಕವಾದ್ ದಮನ್ ಕಡಲಬರಿಕ್ ಬತ್ತೆ. ಆಯೆ ಒಂಜಿ ಭಯಂಕರವಾಯಿನ ಬಿರುಗಾಳಿಡ್ ಸಿಕ್ಕ್‌ದ್, ಆಯನ ಓಡ ದಮನ್‌ದ ಕರಾವಳಿಗ್ ಗಾಳಿಡ್ ತೂಕೊಂದು ಬತ್ತ್ಂಡ್. ಐಡ್ದ್ ಬೊಕ್ಕ, ಉಂದು ೪೦೦ ವರ್ಷೊರ್ದುಲಾ ಜಾಸ್ತಿ ಕಾಲ ಪೋರ್ಚುಗೀಸೆರೆನ ವಸಾಹತು ಆದ್ ಇತ್ತ್ಂಡ್. ಪೋರ್ಚುಗೀಸೆರ್ ಬರ್ಪಿನೆಡ್ದ್ ದುಂಬು ಈ ಪ್ರದೇಶೊನು ಮೊಘಲ್ ಸುಲ್ತಾನೆರ್ ಆಳೋಂದಿತ್ತೆರ್. ಪೋರ್ಚುಗೀಸೆರ್ ಇಡೆ ಬತ್ತ್‌ದ್ ದಮನ್‌ನ್ ಮೊಘಲ್ ಸುಲ್ತಾನೆರೆಡ್ದ್ ತನ್ಕುಲೆ ವಶೊಕ್ಕು ದೆತೊಂದೆರ್. ಐಡ್ದ್ ಬೊಕ್ಕ ಮೊಕ್ಲು ಮೋತಿ ದಮನ್‌ಡ್ ಒಂಜಿ ಕೋಟೆನ್ ಕಟ್ಟಾಯೆರ್. ಅಂದಾಜಿ ೧೫೫೯ನೇ ಇಸವಿಡ್ ಉಂದೆನ್ ಕಟ್ಟರ ಸುರು ಮಲ್ತೆರ್. ೧೫೮೧ನೇ ಇಸವಿಡ್ ಕಟ್ಟುನ ಬೇಲೆ ಮುಗಿಂಡ್. ಉಂದು ಇನಿಕ್‌ಲಾ ಉಂಡು. ಐತ ಜಾಸ್ತಿ ಭಾಗೊಲು ಐತ ಮೂಲ ರೂಪೊಡೇ ಒರಿದುಂಡು. ಇತ್ತೆ ಪುರಸಭೆತ ಜಾಸ್ತಿ ಸರ್ಕಾರಿ ಕಚೇರಿಲು ಈ ಕೋಟೆದ ಉಲಯಿಡ್ ಉಂಡು.

೪೫೧ ವರ್ಸೊದ ಅತಿಕ್ರಮಣಡ್ದ್ ಬೊಕ್ಕ ೧೯೬೧ದ ಡಿಸೆಂಬರ್ ತಿಂಗೊಲುಡು ದಮನ್‌ ಭಾರತ ಗಣರಾಜ್ಯೊಗು ಸೇರಿಂಡ್. ಭಾರತದ ಮುಖ್ಯ ಭೂಭಾಗೊನು ಕಾಲಿ ಮಲ್ಪೆರೆ ಒಪ್ಪಂದಿನಪಗ ನಮ ದೇಸೊದ ಸೈನಿಕೆರ್ ಆಪರೇಶನ್ ವಿಜಯ್ ಪುದರ್‌ದ ಮಿಲಿಟರಿ ಕಾರ್ಯಾಚರಣೆನ್ ಸುರು ಮಲ್ತೆರ್. ಈ ಲಡಾಯಿ ೩೬ ಗಂಟೆ ಮುಟ್ಟ ನಡತ್ತ್ಂಡ್. ನಮ ಸೈನಿಕೆರೆನ ದಾಳಿಗ್ ಸೋತುಪೋಯಿನ ಪೋರ್ಚುಗೀಸೆರ್ ಕಡೇಕ್ ನಮ ಸೈನಿಕೆರ್ನ ಎದುರು ಶರಣಾಯೆರ್. ಈ ಕಾಳಗೊಡು ನಾಲ್ ಜನ ಭಾರತೀಯೆರ್ ತೀರ್ ಪೋಯೆರ್. ಬೊಕ್ಕ ೧೪ ಜನಕ್ ಗಾಯ ಆಂಡ್. ಪೋರ್ಚುಗೀಸೆರೆಡ್ ೧೦ ಜನ ತೀರ್ ಪೋಯೆರ್. ಬೊಕ್ಕ ರಡ್ಡ್ ಜನಕ್ ಗಾಯ ಆಂಡ್.