ದಿಸ್ಪುರ
ದಿಸ್ಪುರ್ ಭಾರತದ ಅಸ್ಸಾಂ ರಾಜ್ಯದ ರಾಜಧಾನಿ ಬೊಕ್ಕ ಉಂದು ಗುವಾಹಟಿದ ಒಂಜಿ ಉಪನಗರ. ೧೯೭೨ನೇ ಇಸವಿಡ್, ಅಸ್ಸಾಮ್‌ದ ರಡ್ ಜಿಲ್ಲೆಲೆನ್ ಸೇರಾದ್ ಮೇಘಾಲಯ ರಾಜ್ಯೊನು ಉಂಡು ಮಲ್ತೆರ್. ಅಡೆ ಮುಟ್ಟ ಅಸ್ಸಾಂ ರಾಜ್ಯೊದ ರಾಜಧಾನಿ ಶಿಲ್ಲಾಂಗ್ ಆದಿತ್ತ್ಂಡ್. ಮೇಘಾಲಯ ರಾಜ್ಯೊನು ಉಂಡು ಮಲ್ತಿಬೊಕ್ಕ ಅಸ್ಸಾಮ್‌ಡಿತ್ತಿನ ಶಿಲ್ಲಾಂಗ್ ಮೇಘಾಲಯೊಗು ಸೇರಿಂಡ್ ಅತ್ತಂದೆ ಆ ರಾಜ್ಯೊದ ರಾಜಧಾನಿ ಆಂಡ್. ಐಡ್ದ್ ಬುಕ್ಕ ದಿಸ್ಪುರ ಅಸ್ಸಾಂ ರಾಜ್ಯೊದ ರಾಜಧಾನಿ ಆದ್ ಮಲ್ತೆರ್.[1]
ದಿಸ್ಪುರ್ ಅಸ್ಸಾಂ‍ದ ರಾಜಧಾನಿ ಆವರ ದುಂಬು, ಒಂಜಿ ಎಲ್ಯ ಹಳ್ಳಿ ಆದಿತ್ತ್ಂಡ್. ಅಸ್ಸಾಂ‍ದ ಬೇತೆ ಬೇತೆ ಜಾಗೆರ್ದ್ ಜನಕುಲು ವಲಸೆ ಬತ್ತ್‌ದ್ ದಿಸ್ಪುರ್ ಬೊಕ್ಕ ನೆತ್ತ ಸುತ್ತಮುತ್ತ ನೆಲೆ ಆಯೆರ್, ಇಂಚಾದ್ ಈ ಗ್ರಾಮೀಣ ಪ್ರದೇಶ ಬೇಗನೆ ದಟ್ಟ ಜನಸಂಖ್ಯೆದ ಜಾಗೆ ಆದ್ ಬದಲಾಂಡ್. ವರ್ಷೊಲು ಕರಿನಗ, ಗುವಾಹಟಿ ನಗರ ಮಲ್ಲ ಆಂಡ್, ಬೊಕ್ಕ ದಿಸ್ಪುರ್‌ನ್ ಗ್ರೇಟರ್ ಗುವಾಹಟಿ ನಗರೊಗು ಸೇರಾಯೆರ್.
ಅಸ್ಸಾಂ ಸರ್ಕಾರೊದ ಸಚಿವಾಲಯ (ಜನತಾ ಭವನ) ಕಟ್ಟಡ, ಅಸ್ಸಾಂ ವಿಧಾನಸಭೆ, ಶಾಸಕರೆನ ಹಾಸ್ಟೆಲ್‌ಲು ಬೊಕ್ಕ ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರೊಲು ದಿಸ್ಪುರ್‌ಡ್ ಉಂಡು. ಅಸ್ಸಾಂ ಟ್ರಂಕ್ ರೋಡ್ ಬೊಕ್ಕ ಜಿ ಎಸ್ ರೋಡ್ ದಿಸ್ಪುರ್‌ದ ಮುಖಾಂತರ ಪೋಪುಂಡು. ದಿಸ್ಪುರ್‌ದ ತೆಂಕಾಯಿಗ್ ಧಾರ್ಮಿಕವಾದ್ ಪ್ರಮುಖವಾಯಿನ ವಸಿಷ್ಠ ಆಶ್ರಮ ಬೊಕ್ಕ ೧೯೯೦ದ ದಶಕೊಡು ಕಟ್ಟ್‌ದಿನ ಸಾಂಸ್ಕೃತಿಕ ಕೇಂದ್ರವಾಯಿನ ಶಂಕರದೇವ್ ಕಲಾಕ್ಷೇತ್ರ ಉಂಡು. ದಿಸ್ಪುರ್‌ದ ಕೈತಲ್ ಜಟಿಯಾ ಪನ್ಪಿ ಊರು ಉಂಡು.
ಅಸ್ಸಾಮ್ ರಾಜ್ಯೊಡು ಅತ್ತಂದೆ ಲೋಕೊಡು ಪುಗರ್ತೆ ಪಡೆದಿನ ಚಾ ವ್ಯಾಪಾರ ಕೇಂದ್ರ ಗುವಾಹಟಿ ಟೀ ಆಕ್ಷನ್ ಸೆಂಟರ್ ದಿಸ್ಪುರಡು ಉಂಡು.
ಇತಿಯಾಸೊ
[ಸಂಪೊಲಿಪುಲೆ]ಪಿರಾಕ್‌ದ ಕಾಲಡ್, ಈ ದಿಸ್ಪುರ್ ಜಾಗೆ ಪ್ರಾಚೀನ ಕಾಮರೂಪ ಸಾಮ್ರಾಜ್ಯದ (ಕ್ರಿ.ಶ 350-1140) ಒಂಜಿ ಭಾಗ ಆದಿತ್ತ್ಂಡ್. ಪುರಾಣ ಬೊಕ್ಕ ಕಾಳಿಕಾ ಪುರಾಣದ ಪ್ರಕಾರ, ಮುಲ್ಪದ ಸಂಧ್ಯಾಚಲ ಗುಡ್ಡೆಡ್ ವಸಿಷ್ಠ ಮುನಿಕ್ಕುಲು ಇತ್ತೆರ್. ವಸಿಷ್ಠ ರಾಮಾಯಣ ಬರೆಯೆರ್ ಪನ್ಪಿನ ನಂಬಿಕೆ ಉಂಡು. ಕ್ರಿ.ಶ 1000-1100 ದ ಕಾಲಡ್, ಪಾಲ ವಂಶದಕುಲು ಆಳೊಂದುಪ್ಪುನಗ, ಮುಲ್ಪ ಒಂಜಿ ಕಲ್ಲ್‌ದ ಶಿವ ದೇವಸ್ಥಾನ ಇತ್ತ್ಂಡ್ ಪಂಡ್‌ದ್ ಪುರಾತತ್ವ ಇಲಾಖೆದಕುಲು ಪನ್ಪೆರ್. ಉಂದು ಆ ಕಾಲಡ್ ಒಂಜಿ ಮಲ್ಲ ಭಕ್ತಿ ಬೊಕ್ಕ ಧ್ಯಾನದ ಜಾಗ ಆದಿತ್ತ್ಂಡ್. ಮಧ್ಯಕಾಲಡ್, ಈ ಜಾಗೆ ಆಹೋಮ್ ಸಾಮ್ರಾಜ್ಯದ ಅಡಿಕ್ಕ್ ಬತ್ತ್ಂಡ್. ಅಕುಲು ಕ್ರಿ.ಶ 1228 ರ್ದ್ ಸುಮಾರ್ 600 ವರ್ಷ ಬ್ರಹ್ಮಪುತ್ರ ಕಣಿವೆನ್ ಆಳಿಯೆರ್. 1671 ಡ್ ನಡತಿನ ಸಾರೈಘಾಟ್ ಕಾಳಗಡ್ ಮೊಘಲೆರೆನ್ ಮೊಕುಲು ಸೋಪಾಯೆರ್. ಆಹೋಮ್ ರಾಜಕುಲು ಮುಲ್ಪದ ದೇವಸ್ಥಾನೊಲೆಗ್ಲಾ ಸಹಾಯ ಮಲ್ತೆರ್; 1764 ಡ್, ಆಹೋಮ್ ರಾಜ ರಾಜೇಶ್ವರ ಸಿಂಘೆ, ಬಸಿಷ್ಠ(ವಸಿಷ್ಟ) ಆಶ್ರಮದ ಪಿರಾಕ್‌ದ ಕಲ್ಲ್‌ದ ಮಿತ್ತ್ ಒಂಜಿ ಇಟ್ಟಿಗೆದ ಶಿವ ದೇವಸ್ಥಾನ ಕಟ್ಟಾಯೆರ್. ಈ ಕೆಂಪು ಇಟ್ಟಿಗೆದ ದೇವಸ್ಥಾನನ್ ಕಾಮರೂಪ ಶೈಲಿಡ್ ಕಟ್ಟಾದ್, ಆಶ್ರಮಗ್ 835 ಬಿಘಾ(೨೭೬ ಎಕರೆ) ಜಾಗೆನ್ ದಾನ ಕೊರಿಯೆರ್. ಈ ಜಾಗೆ ದುಂಬಗ್ ಮಲ್ಲ ಪುಣ್ಯಕ್ಷೇತ್ರ ಆಂಡ್. ಇಂಚಿತ್ತಿನ ಮಲ್ಲ ಸಾಂಸ್ಕೃತಿಕ ಬೊಕ್ಕ ಧಾರ್ಮಿಕ ಚರಿತ್ರೆ ಇತ್ತ್ಂಡಲಾ, ದಿಸ್ಪುರ್ ಪನ್ಪಿನ ಈ ಜಾಗೆ ಮಾತ್ರ ಸುಮಾರ್ ಸಮಯ ಪ್ರಾಗ್ಜ್ಯೋತಿಷ್ಪುರ (ಗುವಾಹಟಿ) ದ ಬರಿಟ್ ಒಂಜಿ ಎಲ್ಯ ಹಳ್ಳಿ ಆದೇ ಒರಿದಿತ್ತ್ಂಡ್.[2]
ಭಾರತಗ್ ಸ್ವಾತಂತ್ರ್ಯ ತಿಕ್ಕಿ ಬೊಕ್ಕ, ಈಶಾನ್ಯ ರಾಜ್ಯೊಲೆನ್ ಬೇತೆ ಬೇತೆ ಮಲ್ಪುನಗ ಉಂದು ಪೂರಾ ಬದಲಾಂಡ್. 1972ನೇ ಇಸವಿಡ್ ಅಸ್ಸಾಂ‌ರ್ದ್ ಮೇಘಾಲಯನ್ ಬೇತೆ ಮಲ್ಪುನಗ, ಪಿರಾಕ್‌ದ ರಾಜಧಾನಿ ಶಿಲ್ಲಾಂಗ್ ಪೊಸ ರಾಜ್ಯಗ್ ಪೋಂಡ್. ಅಪಗ 1973 ಡ್, ಅಸ್ಸಾಂ ಸರ್ಕಾರ ದಿಸ್ಪುರ್ ಪನ್ಪಿನ ಈ ಎಲ್ಯ ಹಳ್ಳಿನ್ ಪೊಸ ರಾಜಧಾನಿ ಮಲ್ತೆರ್.[3] ಇಂದೆಡ್ದ್ ಬುಕ್ಕ ಬೇತೆ ಬೇತೆ ಕಡೆರ್ದ್ ಜನಕುಲು ಮುಲ್ಪಗ್ ಬತ್ತ್‌ದ್ ನೆಲೆ ಆಯೆರ್. ಪೊಸ ಸರ್ಕಾರಿ ಕಟ್ಟಡೊಲು, ಆಫೀಸ್‌ಲು ಸುರು ಆಂಡ್. ಒಂಜಿ ಕಾಲಡ್ ಎಲ್ಯ ಹಳ್ಳಿ ಆದಿತ್ತಿನ ಜಾಗೆ, ಇತ್ತೆ ಜನಕುಲು ದಿಂಜಿದಿನ ಮಲ್ಲ ಪೇಟೆ ಆಂಡ್.
ಉಲ್ಲೇಕ
[ಸಂಪೊಲಿಪುಲೆ]- ↑ "Assam History". assam.gov.in. National Informatics Centre (NIC). Retrieved 29 July 2026.
- ↑ "Basistha Ashram". kamrupmetro.assam.gov.in. National Informatics Centre, Assam. Retrieved 29 July 2026.
- ↑ "Assam History". assam.gov.in. National Informatics Centre (NIC). Retrieved 29 July 2026.