ಪಂಜಾಬ್ ನ್ಯಾಶನಲ್ ಬ್ಯಾಂಕ್
ಪಂಜಾಬ್ ನ್ಯಾಷನಲ್ ಬ್ಯಾಂಕ್ (ಎಲ್ಯಡ್-ಪಿಎನ್‌ಬಿ) ಭಾರತದ ಒಂಜಿ ಸಾರ್ವಜನಿಕ ವಲಯದ ಬ್ಯಾಂಕ್ ಆದುಂಡು. ಮೇ ೧೮೯೪ನೇ ಇಸವಿಡ್ ಸ್ಥಾಪನೆ ಆಯಿನ ಈ ಬ್ಯಾಂಕ್‌ದ ಮುಖ್ಯ ಕಛೇರಿ ಸ್ವಾತಂತ್ರ್ಯಗ್ ದುಂಬು ಅನಾರ್ಕಲಿ ಬಝಾರ್‌ಡ್ ಇತ್ಂಡ್. ಈ ಪ್ರದೇಸೊ ಇತ್ತೆ ಪಾಕಿಸ್ತಾನೊದ ರಾಜಧಾನಿ ಲಾಹೋರ್‌ಡು ಉಂಡು. ಇತ್ತೆ ನಮ ದೇಸೊದ ರಾಜದಾನಿ ನವದೆಹಲಿಡ್ ಉಂಡು. ಮಾರ್ಚ್ ೨೦೨೫ ಮುಟ್ಟದ ವರದಿದ ಪ್ರಕಾರೊ ಪಿಎನ್‌ಬಿಗ್ ದೇಸೊರ್ಮೆ ಒಟ್ಟು ೧೦೩೨೪ ಶಾಕೆಲು ಬುಕ್ಕ ೧೧,೮೨೨ದಾತ್ ಎ.ಟಿ.ಎಂ‌ಲು ಉಲ್ಲ.[೧]
ಮಾರುಕಟ್ಟೆ ಬಂಡವಾಳೊನು ಲೆಕ್ಕ ಪತ್ತಿಂಡ, ಸಾರ್ವಜನಿಕ ವಲಯದ ಬ್ಯಾಂಕ್ಲೆಡ್ ಪಿಎನ್‌ಬಿ ೪ನೇ ಸಾನೊಡು ಉಂಡು.
ಇತಿಯಾಸೊ
[ಸಂಪೊಲಿಪುಲೆ]ಪಂಜಾಬ್ ನ್ಯಾಶನಲ್ ಬ್ಯಾಂಕ್‌ನ್ ೧೯ ಮೇ ೧೮೯೪ದಾನಿ ಇಂಡಿಯನ್ ಕಂಪೆನೀಸ್ ಆಕ್ಟ್ ದ ಅಡಿಟ್ ನೋಂದಣಿ ಮಲ್ಪಾಯೆರ್. ದೇಶದ ಆರ್ಥಿಕ ಹಿತಾಸಕ್ತಿನ್ ಬುಳೆಪಾವುನ ಒಂಜಿ ನಿಜವಾಯಿನ ರಾಷ್ಟ್ರೀಯ ಬ್ಯಾಂಕ್‌ನ್ ಸ್ಥಾಪನೆ ಮಲ್ಪುನ ಉದ್ದೇಶದೊನು ದಿಯೋಂದಿನ, ಬೇತೆ ಬೇತೆ ಧರ್ಮದ ಹಿನ್ನೆಲೆ ಉಪ್ಪುನ ಭಾರತದ ಬೇತೆ ಬೇತೆ ಭಾಗದ ಜನಕುಲು ಉಂದೆತ್ತ ಸಂಸ್ಥಾಪಕ ಮಂಡಳಿಡ್ ಇತ್ತೆರ್. ಈ ಬ್ಯಾಂಕ್ ಏಪ್ರಿಲ್ ೧೨ನೇ ತಾರೀಕ್ ೧೮೯೪ದಾನಿ ವ್ಯವಹಾರ ಸುರು ಮಲ್ತ್ಂಡ್.[೨]
ಸ್ವಾತಂತ್ರಗ್ ದುಂಬುದ ಬಾರತ(ಅಪಗ ಪಾಕಿಸ್ತಾನ್ ಪುಟ್ಟುದಿತ್ತಿಜಿ)ದ ಅನಾರ್ಕಲಿ ಬಝಾರ್‌ಡ್ ಪಿಎನ್‌ಬಿದ ಮುಖ್ಯ ಕಛೇರಿ ಇತ್ತ್ಂಡ್. ಪಿ.ಎನ್.ಬಿ ದ ಸಂಸ್ಥಾಪಕರೆಡ್ ಸ್ವದೇಶಿ ಚಳುವಳಿದ ನಾಯಕರಾಯಿನ ದಯಾಳ್ ಸಿಂಗ್ ಮಜಿಥಿಯಾ, ಲಾಲಾ ಹರ್ಕಿಶನ್ ಲಾಲ್, ಲಾಲಾ ಲಾಲ್‌ಚಂದ್, ಕಾಳಿ ಪ್ರಸನ್ನ ರಾಯ್, ಇ. ಸಿ. ಜೆಸ್ಸಾವಾಲಾ, ಪ್ರಭು ದಯಾಳ್, ಬಕ್ಷಿ ಜೈಶಿ ರಾಮ್ ಬೊಕ್ಕ ಲಾಲಾ ಧೋಲನ್ ದಾಸ್ ಸೇರ್ದ ಇತ್ತೆರ್. ಲಾಲಾ ಲಜಪತ್ ರಾಯ್ ಆರ್ ಈ ಬ್ಯಾಂಕ್‌ದ ಸುರುತ ವರ್ಷದ ವ್ಯವಸ್ಥಾಪನೆಡ್ ಸಕ್ರಿಯವಾದ್ ಪಾಲ್ ಪಡೆದಿತ್ತೆರ್. [೩]
ಭಾರತದ ವಿಭಜನೆ ಬೊಕ್ಕ ಪಾಕಿಸ್ತಾನದ ರಚನೆದ ಪೊರ್ತುಡು, ಪಿ.ಎನ್.ಬಿ ಲಾಹೋರ್‌ಡ್ ಇತ್ತಿನ ತನ್ನ ಜಾಗೆ ಬೊಕ್ಕ ಕಚೇರಿಲೆನ್ ಕಳೆವೊಂಡ್‌ಲಾ, ಪಾಕಿಸ್ತಾನೊಡು ತನ್ನ ಕೆಲಸನ್ ಮುಂದುವರಿಸ್‌ದ್ ನಡಪಾಂಡ್. ವಿಭಜನೆದ ಕಾರಣಡ್ದ್ ಪಿ.ಎನ್.ಬಿ ಪಶ್ಚಿಮ ಪಾಕಿಸ್ತಾನೊಡು ಇತ್ತಿನ ೯೨ ಕಚೇರಿಲೆನ್ ಮುಚ್ಚೊಡಾಂಡ್. ಆಂಡಲಾ ಪಿ.ಎನ್.ಬಿ ಕೆಲವು ಉಸ್ತುವಾರಿ ಶಾಕೆಲೆನ್ ಒರಿಪಾದ್ ದೀತಿತ್ತ್ಂಡ್. ೩೧ ಮಾರ್ಚ್ ೧೧೪೭ದಾನಿ, ವಿಭಜನೆ ಆಪುನೆಕ್ ದುಂಬೇ, ಪಿ.ಎನ್.ಬಿ ಲಾಹೋರ್‌ನ್ ಬುಡುದು ತನ್ನ ನೋಂದಾಯಿತ ಕಚೇರಿನ್ ಭಾರತೊಗು ವರ್ಗಾವಣೆ ಮಲ್ಪೆರೆ ತೀರ್ಮಾನ ಮಲ್ತ್ಂಡ್.