ಪಚ್ಚೆ (ನವರತ್ನೊ)

ಪಾರದರ್ಶಕ ಬೆರಿಲ್ ಕನಿಜೊದ ಷಟ್ಕೋನ ಪರೆಲ್

ಪಚ್ಚೆ ಪನ್ನಗ ಪಚ್ಚೆ ರಂಗ್‍ದ ಒಂಜಿ ವಿಶೇಷ ಜಾತಿದ ಮಣಿ ರತ್ನೊ - ಕನಿಜೊ. ತುಳು ಕನ್ನಡ ಬಾಸೆಲೆಡ್ "ಪಚ್ಚೆ" ಸಂಸ್ಕೃತೊಡು ಮರಕತ, ಗಾರುತ್ಮತ ಮಣಿ ಪನ್ಪುನ ಪುದುರುಲು ಉಂಡು. ಇಂಗ್ಲಿಸ್ ಬಾಸೆಡ್ ಎಮರಾಲ್ಡ್ (Emerald) ಪಂಡ್‍ದ್ ಪಣ್ಪೆರ್. ಮಣಿ ರತ್ನೊಲೆನ್ ದುಂಬುದ ಕಾಲೊಡುದಿಂಚಿ ಅಲಂಕಾರೊಗು ಪದ್ದೆಯಿ ಆಭರಣಲೆಡ್ ಅಂಚನೆ ರಾಜ ಮಹಾರಾಜೆರೆನ ಪ್ರತಿಷ್ಟೆದ ಪ್ರದರ್ಶನೊಗು ಉಪಯೋಗ ಮಲ್ತೊಂದಿತ್ತೆರ್.

ಪಚ್ಚೆ ಮಣಿ

ಬೆರಿಲ್ ಕನಿಜೊ

ಬೆರಿಲ್ ಕನಿಜೊ

ಪಚ್ಚೆ ಮಣಿರತ್ನೊದ ಕನಿಜೊದ ಪುದರ್ ಬೆರಿಲ್ ಪಂಡ್‍ದ್. ಬೆರಿಲ್ (Beryl) ಇಂದೆತ ರಾಸಾಯನಿಕ ಸಂಗಟನೆದ ಸೂತ್ರ ಬೆರಿಲಿಯಂ ಅಲ್ಯುಮಿನಿಯಂ ಸೈಕ್ಲೊ ಸಿಲಿಕೇಟ್ (Be₃Al₂SiO₆) ಆದುಂಡು. ಬೆರಿಲ್ ಪದ ಗ್ರೀಕ್ ಮೂಲೊಡು ಬತ್ತ್ಂಡ್. ಗ್ರೀಕ್ ಬಾಸೆಡ್ ಬೆರಿಲ್ ಪಣ್ಣಗ ಕಡಲ್ದ ನೀರ್ದ ಬಣ್ಣದ ಮಣಿ ಪಂಡ್‌ದ್ಆಪುಂಡು. ಈ ಕನಿಜೊಗು ನಮ್ಮ ದೇಶದ ಪ್ರಾಕೃತ ಬಾಸೆಡ್ ವೆರುಲಿಯಾ ಪನ್ಪುನ ಪುದರು ಇತ್ತ್ಂಡ್.

ಬೆರಿಲ್ ಕನಿಜೊ ಶುದ್ಧರೂಪೊಡು ಕಾಜಿದ ಲೆಕ್ಕ ಪಾರದರ್ಶಕವಾದ್ ತಿಕ್ಕುನ ಉಂಡು. ಆಂಡ ಬೂಮಿದ ಉಲಾಯಿ ಬೆರಿಲ್ ಉಂಡಾನಗ ಬೇತೆ ಲೋಹ ಮೂಲ ವಸ್ತುಲೆನ ಕಿನ್ಯ ಕಿನ್ಯ ಅಂಶೊಲೆನ ಕಜವು ಬಿರಕೆಯಾದ್ ಬೆರಿಲ್ ಕನಿಜೊಗು ಬೇತೆ ಬೇತೆ ನಮೂನೆದ ಬಣ್ಣೊಲು ಬರ್ಪುಂಡು. ಬೆರಿಲ್ ಸಾಮಾನ್ಯವಾದ್ ನಸು ಪಚ್ಚೆ ರಂಗ್‍ದ ಅಪಾರದರ್ಶಕ ಕನಿಜೊ. ಆಂಡ ವಿಶೇಷ ಸನ್ನಿವೇಶೊಲೆಡ್ ಕಡು ಪಚ್ಚೆ, ತೆಳು ನೀಲಿ, ನಡು ನೀಲಿ, ಮಂಜಲ, ಬೊಲ್ದು ಇಜಿಂಡ ಅಪರೂಪೊಡು ಕೆಂಚಿ ಬಣ್ಣದ ಪರೆಲ್‌ಲೆನ ರೂಪೊಡು ಪೆಗ್ಮಟೈಟ್ ಜಾತಿದ ಶಿಲೆಕುಲೆನ ಉಲಾಯಿ ಉಂಡಾಪುಂಡು. ಬೆರಿಲ್ ಕನಿಜೊ ಆಜಿಮೂಲೆದ ಷಟ್ಕೋನ (Hexagonal) ಪರೆಲುಲೆನ ರೂಪೊಡು ಬೂಮಿಡು ತಿಕ್ಕುಂಡು. ಸಾಮಾನ್ಯವಾದ್ ಪೆಗ್ಮಟೈಟ್ (Pegmatite) ಪನ್ಪುನ ಶಿಲೆಕುಲೆನ ಒಟ್ಟುಗು ಬೆರಿಲ‍್ ಕನಿಜೊದ ಪರೆಲುಲು ಒಂಜೊಂಜಾದ್ ಇಜಿಂಡ ಚೊಪ್ಪದ ರಾಶಿಲೆನ ರೂಪೊಡು ತೋಜಿದ್ ಬರ್ಪುಂಡು.

ಬೆರಿಲ್ ಕನಿಜೊ ಮುಖ್ಯವಾದ್ ರಡ್ಡ್ ಬಗೆತ ಮಣಿರತ್ನೊಲೆನ ರೂಪೊಡು ತಿಕ್ಕುನ ಉಂಡು: (೧) ಪಚ್ಚೆ (೨) ನೀಲ.

ಪಚ್ಚೆ : ಎಮರಾಲ್ಡ್

ಪಚ್ಚೆ ರಂಗ್‍ದ ಬೆರಿಲ್ ಕನಿಜೊಗು ಪಚ್ಚೆ ಪನ್ಪಿನ ಪುದರು ದುಂಬುಡುದಿಂಚಿ ಚಾಲ್ತಿಡು ಉಂಡು. ಕರ್ನಾಟಕದ ಬಯಲು ಸೀಮೆದ ಕೆಲವು ತಾಣೊಲೆಡ್ ಪಚ್ಚೆ ಮಣಿ ತಿಕ್ಕೊಂದಿತ್ತೆನೆನ್ ಚರಿತ್ರಕಾರೆರ್ ದಾಖಲು ಮಲ್ತ್ ದೆರ್.

ಪಚ್ಚೆಗ್ ಭಾರತದ ಬಾಸೆಲೆಡ್ ಮರಕತ, ವೆರುಲಿಯಾ, ಗಾರುತ್ಮತ ರತ್ನ ಪನ್ಪುನ ಮಾತಾ ಪುದರುಲು ಉಂಡು. ಎಮರಾಲ್ಡ್ ಪನ್ಪುನ ಇಂಗ್ಲಿಸ್ ಪುದರುಲಾ ಚಾಲ್ತಿಡ್ ಉಂಡು.

ನೀಲ: ಅಕ್ವಾಮೆರೈನ್

ನೀಲ- ಅಕ್ವಾಮೆರೈನ್

ನೀಲಿ ಬಣ್ಣದ ಬೆರಿಲ್ ಕನಿಜೊದ ಮಣಿ ರೂಪೊಗು ಅಕ್ವಾಮೆರೈನ್ (Aquamarine) ಪನ್ಪುನ ಪುದರುಂಡು. ಭಾರತದ ಬಾಸೆಲೆಡ್ ಉಂದೆಕ್ ನೀಲ ಪನ್ಪುನ ರತ್ನದ ಪುದರು ಉಂಡು ಆಂಡ ನೀಲ ಬಣ್ಣದ ಬೇತೆ ಕನಿಜೊ ಜಾತಿದ ಮಣಿಕುಲುಲಾ ಬಳಕೆಡ್ ಉಲ್ಲಾ.