ಪಾಲೆ ಮರತ್ತ ಕೆತ್ತೆದ ಕಸಾಯೊ

ತುಳುವೆರೆ ನ ಆಟಿ ತಿಂಗೊಳುಡು, ನಮ್ಮ ಗ್ರೆಗೋರಿಯನ್ ಕ್ಯಾಲೆಂಡರ್ ದ ಜುಲೈ‌ ಬುಕ್ಕೊ ಅಗಸ್ಟ್ ತಿಂಗೊಳು ನಮ‌ ತುಳುವೆರೆ ನ ಆಷಾಢ ಅಥಾವೋ ಆಟಿ ತಿಂಗೊಳುಡು ಬರ್ಪಿನ ಅಮಾವಾಸ್ಯೆ ನ್ ಆಟಿದ ಅಮಾವಾಸ್ಯೆ ಪಂದ್ ಪನ್ಪೆರ್. ತುಳುನಾಡುದ ತುಳು ಜನಕುಲೆಗ್ ಆಟಿ ಅಮವಾಸ್ಯೆ ಮಸ್ತ್ ವಿಶೇಷ.

ಪಾಲೆ ಮರತ್ತ ಕೆತ್ತೆದ ಕಸಾಯೊ

ಆಟಿ ಅಮವಾಸ್ಯೆದಾನಿ ಪಾಲೆ ಮರತ್ತ ಕೆತ್ತೆದ ಕಸಾಯೊ ಪರ್ಪಿನ ಒಂಜಿ ಪದ್ಧತಿ ಮುಲ್ಪ ಅವು ಏತೋ ವರ್ಷೊಲೆಡ್ದು ನಡತ್ ಬಯಿದುಂಡು. ಪಾಲೆ ಮರೊನು ಕನ್ನಡೊಡು ಹಾಲೆ ಮರ ಪಂದ್, ಸಂಸ್ಕೃತೊಡು ಸಪ್ತಪರ್ಣಿ ಮರ ಪಂದ್ ಲೆಪ್ಪುವೆರ್. ಈ ಪಾಲೆ ಮರತ್ತ ಕೆತ್ತೆ ದ ಕಸಾಯೊ ಪೂರಾ ರೋಗೊಲೆಗ್ ರಾಮಬಾಣ ಪಂದ್ ಪನ್ಪೆರ್. ಆಟಿ ತಿಂಗಳೊಡು ಈ ಮರೊಟು ಪೂರಾ ಬಗೆತೊ ದಿವ್ಯ ಔಷಧಿಲು ಸೇರುದುಪ್ಪುಂಡು. ಅಂಚಾ ಆಟಿದ ಅಮಾವಾಸ್ಯೆ ದ ದಿನೊ ಪಾಲೆ ಮರತ್ತ ಕಸಾಯೊನ್ ತುಳುನಾಡುದ ಜನೊಕುಲು ಪರ್ಪೇರ್. ಆಟಿದ ಅಮಾವಾಸ್ಯೆದ ದಿನ ಬೊಲ್ಪು ದೇವೆರ್ ಮೂಡೂನ ದುಂಬುಗು, ಪಾಲೆ ಮರೊತ್ತ ಕೆತ್ತೆ ದೆತ್ತು ಕನೊಡು. ಪಾಲೆದ ಮರಕ್ ಬರೀ ಕಲ್ಲುಡೇ ಕುಟ್ಟುದು ಕುಟ್ಟುದು ಕೆತ್ತೆನ್ ಲಕ್ಕಾದ್ ಕನೊಡು. ಇಂಚಾ ಕೆತ್ತುದು ಕಂದಿನ ಕೆತ್ತೆದ ಮಿತ್ತು ಭಾಗೊಡು ಇತ್ತಿನ ಕಪ್ಪುದ ಚೋಲಿಲೆನ್ ಪೂರಾ ದೆತ್ತುದು, ಉಲಾಯಿದ ಬೊಲ್ದು ದ ಭಾಗೊನು ಕಲ್ಲುಡೇ ಜಜ್ಜುದು ಆಯಿತ ರಸೊ ದೆತ್ತುದು ಒಂಜಿ ಬಾಜನೊಡು ಪಾಡುದು ದೀವೊಡು.^[೧] ಉಂದೆಕ್ ಎಡ್ಡೆ ಮುಂಚಿ, ಓಮ ಬುಕ್ಕೊ ಬೊಳ್ಳೋಳ್ಳಿ ಜಜ್ಜುದು ಪಾಡೊಡು‌. ಉಂದೇಕ್ ಬೊಳ್ಳಿ ಕಲ್ಲುನ್ ಬೆಚ್ಚ ಬೆಚ್ಚ ಕೆಂಡೊಡು ಕಾಯಾದು ಕಸಾಯೊಗು ಪಾಡೋಡು. ಇತ್ತೆ ಪಾಲೆದ ಮರತ್ತ ಕೆತ್ತೆದ ಕಸಾಯೋ ಪರ್ರೆ ತಯಾರಾದುಂಡು.^[೨]