ಪೆಲಕಾಯಿ ಗಟ್ಟಿ
ತುಳುವೆರೆ ತಿಂಗೊಳುಡು ಬರ್ಪಿನ ಅಮಾವಾಸ್ಯೆ ನ್ ಆಟಿದ ಅಮಾವಾಸ್ಯೆ ಪಂದ್ ಪನ್ಪೆರ್. ತುಳುನಾಡುದ ತುಳು ಜನಕುಲೆಗ್ ಆಟಿ ಅಮವಾಸ್ಯೆ ಮಸ್ತ್ ವಿಶೇಷ. ಆಟಿದ ಅಪಗ ಕೀರ್ ಕಟ್ಟ್ ದ್ ಬರ್ಸ ಬನ್ನಗ, ಆಟಿಡ್ ಇಲ್ಲಡೇ ರಾಶಿ ಬುರುದು ಉಪ್ಪುನ ಪೆಲಕಾಯಿಡ್ ಹೆಚ್ಚಾದ್ ಸುಲಭಡ್ ಮನ್ಪರೆ ಆಪಿನ ಅಡ್ಡೆ ಪಂಡಾ ಅವು ಪೆಲಕಾಯಿದ ಗಟ್ಟಿ.
ಪೆಲಕಾಯಿದ ಗಟ್ಟಿ ಮನ್ಪರೆ ಬೋಡಾಪಿನ ಸಾಮಾಗ್ರಿಲು
[ಸಂಪೊಲಿಪುಲೆ]ಒಂಜಿ ನಾಲ್ ಬೊಗೋಣಿ ಡು ಜತ್ತುದು,ಬೋಲೆ ದೆಯಿದಿನ ಪರ್ಂದ್ ಪೆಲಕಾಯಿದ ಪಚ್ಚೀರ್, ಒಂಜಿ ಬೋಗೋಣಿ ಬೊಲಂತೆ ಅರಿ, ಒಂಜಿ ಅರ್ಧ ಬೊಗೋಣಿ ಪೆರಿದಿನ ತಾರಾಯಿ, ಒಂಜಿ ಕಾಲ್ ಬೋಗೋಣಿ ಊರುದ ಬೆಲ್ಲ. ಬುಕ್ಕೊ ರುಚಿಗ್ ತಕ್ಕೊ ಉಪ್ಪು. ಬುಕ್ಕೊ ತೆಕ್ಕಿದ ಮರತ ಮಲ್ಲ ಮಲ್ಲ ಇರೆಕುಲು.[೧] [೨]
ಪೆಲಕಾಯಿದ ಗಟ್ಟಿ ಮಲ್ಪುನ ವಿಧಾನ
[ಸಂಪೊಲಿಪುಲೆ]ಬೊಲಂತೆ ಅರಿನ್ ನೀರುಡು ರಡ್ಡ್ ಮೂಜಿ ಸಲ ದೆಕ್ಕುದು, ಒಂಜಿ ಅರ್ಧ ಗಂಟೆ ಬೊದುಲರೆ ದೀವೋಡು. ಪರ್ಂದ್ ಪೆಲಕಾಯಿದ ಪಚ್ಚೀರ್ ನ್ ಕಿನ್ಯ ತುಂಡು ತುಂಡು ಮಂತುದು ದೀವೋಡು. ಕಡೆಪಿ ಕಲ್ಲುಗ್ ಬೊದುಲ್ದಿನ ಅರಿ ಬುಕ್ಕೊ, ಪರ್ಂದ್ ಪೆಲಕಾಯಿದ ಪಚ್ಚೀರ್ ಬುಕ್ಕೊ ಉಪ್ಪು ಸೇರಾದ್ ಗರಿ ಗರಿ ಆಪಿಲೆಕ್ಕ ಕಡೆಯೊಡು, ಕಡೆನಗ ನೀರ್ ಪಾಡೊಡು ಪಂದ್ ಇಜ್ಜಿ. ಗಟ್ಟಿ ಗಟ್ಟಿ ಉಪ್ಪುನ ಈ ಬಂದೊನು ಒಂಜಿ ಮಲ್ಲ ಬಾಜನೊಗು ಪಾಡೊಡು. ಬುಕ್ಕೊ ತಾರಾಯಿದ ಕಿನ್ಯ ಕಿನ್ಯ ತುಂಡು ಮಂತುದು ಬಂದೊಗು ಪಾಡುದು ಬಂದೊನು ಒರ ತಿರುಗಾದ್ ದೀವೋಡು. ಬುಕ್ಕೊ ತೆಕ್ಕಿದ ಮಲ್ಲ ಇರೆನು ದೆತ್ತೊಂದು ಅಯಿಟ್ ಪೊರ್ಲುಡು ಒಂತೆ ಬಂದೊನು ದೆತ್ತೊಂದು ಶೋಕುಡು ಇರೆಟ್ ಬಂದ್ ಮನ್ಪೊಡು. ಅಂಚೆನೆ ಒಂಜೊಂಜಿ ತೆಕ್ಕಿದ ಇರೆ ದೆತ್ತೊಂದು ಬಂದೊನು ಆಯಿತ ಮಿತ್ತು ದಪ್ಪೊಡು ಪಾಡುದು ಪೊರ್ಲುಡು ಬಂದ್ ಮನ್ಪೊಡು. ಬುಕ್ಕೊ ಮಲ್ಲ ತೊಂದುರುಡು ನೀರು ಪಾಡುದು ದಿಕ್ಕೇಲುಡು ಬೆಚ್ಚ ಆವಾರೆ ದೀವೊಡು. ನೀರು ಕೊದಿದ್ ಶಿಕೆ ಬನ್ನಗಾ, ಬಂದ್ ಮಂದಿನ ತೆಕ್ಕಿದ ಇರೆಟ್ ಕಟ್ಟುದಿನ ಪೂರಾ ಗಟ್ಟಿಲೆನ್ ಶಿಕೆಟ್ ಬೈಪಾರೆ ದೀದ್ ಒಂಜಿ ಅರ್ಧ ಗಂಟೆ ಬೇಯರೆ ದೀವೊಡು. ಅರ್ಧ ಗಂಟೆ ಬೇಯಿ ಬುಕ್ಕೊ ನಮ್ಮ ಪೆಲಕಾಯಿದ ಗಟ್ಟಿ ತಿನರೆ ತಯಾರಾದುಪ್ಪುಂಡು.[೧] [೨]
ಪೆಲಕಾಯಿದ ಗಟ್ಟಿ ನ್ ತಿನ್ಪಿನ ವಿಧಾನ
[ಸಂಪೊಲಿಪುಲೆ]ಈ ಪೆಲಕಾಯಿದ ಗಟ್ಟಿ ನ್ ಅಂಚೇನೇ ತಿನೊಲಿ, ಇಜ್ಜಿಂಡಾ ತಾರಾಯಿದ ಚಟ್ನಿ, ಕೋರಿದ ರೆಸೊಟು ತೀನರೆ ಲಾ ಬಾರೀ ಎಡ್ಡೆ ಆಪುಂಡು.