ಪೊಳಲಿ ಶಂಕರನಾರಾಯಣ ಶಾಸ್ತ್ರಿ

ವಿಕಿಪೀಡಿಯರ್ದ್

ಯಕ್ಷಗಾನ ವಾಚಸ್ಪತಿ ಪೊಳಲಿ ಶಂಕರನಾರಾಯಣ ಶಾಸ್ತ್ರಿ ಮೇರ್ ಯಕ್ಷಗಾನ ಅಂಚನೆ ಪುರಾಣಪ್ರವಚನೊಲೆಡ್ ಪೋಯಿನ ಶತಮಾನೊಡು ಘನವಿದ್ವಾಂಸೆರಾದಿತ್ತೆರ್‌. ಮೇರ್ ಪೊಳಲಿಡೇ ಇತ್ತಿನೈರ್ದಾವರ ಮೆರೆನ್ ಪೊಳಲಿ ಶಂಕರನಾರಾಯಣ ಶಾಸ್ತ್ರಿ ಪಂಡ್‍ದೇ ಲೆತ್ತೊಂದಿತ್ತೆರ್. ಅಯ್ಯನಕಟ್ಟೆಡ್ ನಡೆತಿನ ಯಕ್ಷಗಾನ ಬಯಲಾಟೊಡು ಕುಮಾರವಿಜಯ ಪ್ರಸಂಗೊದ ಬೃಹಸ್ಪತಿ ಪಾತ್ರೊಡು ಶಾಸ್ತ್ರಿ ಮೆರೆನ ಪಾತ್ರೊ ಅರ್ಥಪೂರ್ಣವಾದಿತ್ತಿನೈರ್ದಾವರ ವಿದ್ಯಾಧಿಕಾರಿ ಡಾ. ತಾತಾಚಾರ್ಯೆರ್ ಯಕ್ಷಗಾನ ವಾಚಸ್ಪತಿ ಪನ್ಪಿನ ಬಿರುದುನ್ ಮೆರೆಗ್ ಕೊರಿಯೆರ್. ಅವೆರ್ದ್ ಬೊಕ್ಕ ಮೆರೆನ ಪುದರ್ ಯಕ್ಷಗಾನ ವಾಚಸ್ಪತಿ ಪೊಳಲಿ ಶಂಕರನಾರಾಯಣ ಶಾಸ್ತ್ರಿ ಪಂಡ್‍ದ್ ಪ್ರಸಿದ್ದಿ ಪಡೆಂಡ್.[೧]

ಪುಟ್ಟು, ಕಲಿಕೆ ಬೊಕ್ಕ ಜೀವನ[ಸಂಪೊಲಿಪುಲೆ]

ಶಾಸ್ತ್ರಿಲು ಕುಡ್ಲದ ಮಿಜಾರ್ ಮಾಗಣೆದ ಕೆಲಂಜಾರು ಗ್ರಾಮೊಡು ಕೃಷ್ಣ ಕಾರಂತೆರ್ ಬೊಕ್ಕ ಪದ್ಮಾವತಿಯಮ್ಮ ದಂಪತಿಲೆಗ್ ಪುಟ್ಟಿಯೆರ್. ಅಪಗದ ಗುರುಕುಲ ಪದ್ದತಿಡೇ ಶಾಸ್ತ್ರಿಲು ಬರವು ಕಲ್ತೆರ್. ದುಂಬಗ್ ಚಿದಂಬರಂಡ್ ಮಹಾಗುರುವಾಯಿನ ದಂಡಪಾಣಿ ದೀಕ್ಷಿತೆರೆರ್ದ್ ವ್ಯಾಕರಣಶಾಸ್ತ್ರೊದ ಬರವು ಕಲ್ತೆರ್. ಆಣನ ಬರವುದ ಪರಿಶ್ರಮೊನ್ ತೂದು ಗುರುಕುಲು ಅರೆಗ್ ಶಾಸ್ತ್ರಿ ಪನ್ಪಿನ ಬಿರುದುನ್ ಕೊರಿಯೆರ್.
ವೃತ್ತಿಜೀವನೊದ ಸುರೂಟ್ ಕಾಸರಗೋಡುದ ಮಂಗಲ್ಪಾಡಿಡ್ ಅಧ್ಯಾಪಕೆಯಾದ್ ಮೇರ್ ಬೇಲೆ ಮಲ್ತೆರ್. ಬೊಕ್ಕ ಕುಡ್ಲದ ಸಂತ ಅಲೋಶಿಯಸ್ ಪ್ರೌಢಸಾಲೆಡ್ ಕನ್ನಡದ ಪಂಡಿತೆರಾದ್ ಬೇಲೆ ಮಲ್ತೆರ್. ನೆತ್ತ ಮದ್ಯೊಡ್ ಮೆರೆಗ್ ತಾಳಮದ್ದಲೆದ ಮಿತ್ತ್ ಆಸಕ್ತಿ ಪುಟ್ಟುಂಡು. ಅಂಚಾದ್ ರಡ್ಡ್ ಮೂಜಿ ಕಡೆಟ್ ತಾಳಮದ್ದಲೆಡ್ ಪಾಲ್ ಪಡೆಯೆರ್. ಆಂಡ ಸುರುತ್ತ ಬಾರಿ ಅರ್ಥಗಾರಿಕೆಡ್ ಮೆರೆಗ್ ಸೋಲಾಂಡ್ ಅವೆಕ್ಕಾತ್ರ ಉಂದೇ ಸೋಲುನು ಕಲಾಜೀವನೊಗ್ ಸವಾಲಾದ್ ದೆತೊಂದು ಪ್ರಸಂಗೊದ ಬಗ್ಗೆ ಕುಡ ಅಧ್ಯಯನ ಮಲ್ತೆರ್. ಅವೆರ್ದ್ ಬೊಕ್ಕ ಕಲಾಭಿಮಾನಿಲೆನ ಮನಸ್ಸ್ ನ್ ಮುಟ್ಟುಲೆಕ ಪ್ರಸಿದ್ದಿ ಪಡೆಯೆರ್.

ಕಲಾಸಾಧನೆ[ಸಂಪೊಲಿಪುಲೆ]

ಗಾಂಧಿನ ಟೊಪ್ಪಿ, ವೇಷ್ಟಿನ್ ಗಲಸ್‍ದ್ ಕಚ್ಚೆ ಪಾರ್ದ್, ಪೈರನ್, ಪುಗೆಲ್‍ಡ್ ಬೊಲುದುದ ಸಾಲ್ ಪಾಡೊಂದು ವೇದಿಕೆಡ್ ಅರ್ಥಗಾರಿಕೆಗ್ ಕುಲ್ಲೊಂದಿತ್ತೆರ್ಗೆ. ಮೆರೆನ ಅರ್ಥಗಾರಿಕೆ ಎಂಚ ಇಪ್ಪೆದ್ಂಡ್ ಪಂಡ್ಂಡ ಪುರಾಣಲೋಕೊಲೆನ್ ಪುನಃ ಸೃಷ್ಟಿಮಲ್ಪುಲೆಕ ಇಪ್ಪೆದ್ಂಡ್‍ಗೆ. ಶಾಸ್ತ್ರಿಲೆನ ಅರ್ಥಗಾರಿಕೆಡ್ ಕಾಲಿ ಮನೋರಂಜನೆ ಮಾತ್ರ ಅತ್ತಂದೆ ಶ್ರೋತ್ರವರ್ಗೊಗ್ ಕೊರ್ಪಿನ ಜ್ಙಾನೊನ್ಲಾ ಕೊರ್ಪೆದ್ಂಡ್ ಪಂಡ್‍ದ್ ಹರಿದಾಸ ದೊಡ್ಡ ಸಾಮಗರು ತಮ್ಮ ಬರವುಡು ಬರೆತೆರ್‍ಗೆ.

ಪುರಸ್ಕಾರೊಲು[ಸಂಪೊಲಿಪುಲೆ]

1930 ನೆ ಇಸವಿಡ್ ಬೆಳ್ಳಾರೆದ ಅಯ್ಯನಕಟ್ಟೆಡ್ ಗೊಬ್ಬಿನ ಯಕ್ಷಗಾನ ಬಯಲಾಟೊಡು ಕುಮಾರವಿಜಯ(ನಂದಳಿಕೆ ಕವಿಮುದ್ದಣ್ಣ ಮೆರೆನ ಕೃತಿ) ಪ್ರಸಂಗೊದ ಬೃಹಸ್ಪತಿ ಪಾತ್ರೊಡು ಶಾಸ್ತ್ರಿ ಮೆರೆನ ಪಾತ್ರೊ ಅರ್ಥಪೂರ್ಣವಾದಿತ್ತ್ಂಡ್‍ಗೆ. ಅಂಚಾದ್ ಆನಿದ ಮೇಳೊದ ಸಭಾಧ್ಯಕ್ಷೆ, ವಿದ್ಯಾಧಿಕಾರಿ ಡಾ. ತಾತಾಚಾರ್ಯೆರ್ ಯಕ್ಷಗಾನವಾಚಸ್ಪತಿ ಪನ್ಪಿನ ಬಿರುದುನ್ ಮೆರೆಗ್ ಕೊರಿಯೆರ್.

ಪ್ರಕಟನೆಲು[ಸಂಪೊಲಿಪುಲೆ]

  • ಶ್ರೀ ಕ್ಷೇತ್ರ ಪೊಳಲಿ.[೨][೩]

ತೀರಿನಿ[ಸಂಪೊಲಿಪುಲೆ]

ಶಾಸ್ತರಿ ಮೇರ್ 1972ನೇ ಇಸವಿಡ್ ತೀರಿಯೆರ್. ಆರ್ ತಿರಿ ಬೊಕ್ಕ ಅರೆನ ನೆನಪುಗು ಪೊಳಲಿ ಶಾಸ್ತ್ರಿ ಸ್ಮಾರಕ ಸಮಿತಿ ಪನ್ಪಿನ ಸಂಘೊನ್ ಕಟ್ಟಿಯೆರ್. ಪ್ರತಿ ವರ್ಷ ತಾಳಮದ್ದಲೆ ಬೊಕ್ಕ ಪ್ರವಚನೊಡ್ ಪ್ರವೀಣೆರಾಯಿನಕ್ಲೆಗ್ ಪೊಳಲಿ ಶಾಸ್ತ್ರಿ ಪ್ರಶಸ್ತಿನ್ ಕೊರ್ಪೆರ್.[೪]

ಉಲ್ಲೇಕೊಲು[ಸಂಪೊಲಿಪುಲೆ]

  • ಪುಸ್ತಕ: ಕರಾವಳಿ ಮಹನೀಯರ ಬದುಕು ಸಾಧನೆ,ಸಂಪಾದಕೆರ್: ಡಾ.ಶ್ರೀಪತಿ ಕಲ್ಲೂರಾಯ ಪಿ.[೫]
  1. "Talamaddale, Indian Theatre Form". IndiaNetzone.com. Retrieved 31 July 2022.
  2. "Bantwal: Longest-duration annual festival in Tulunadu launched at Polali". www.daijiworld.com (in ಇಂಗ್ಲಿಷ್). Retrieved 31 July 2022.
  3. "polali in a sentence - polali sentence". eng.ichacha.net. Retrieved 31 July 2022.
  4. "YAKSHAGANA VACHASPATI POLALI SHANKARANARAYANA SHASTRI (1890 – 1972) | Yakshagana". yakshagana.com. Retrieved 30 July 2022.
  5. "ಕರಾವಳಿ ಮಹನೀಯರ ಬದುಕು ಸಾಧನೆ". Retrieved 30 July 2022.