ಪ್ರಸಾದ್ ಬಲಿಪ

ಪ್ರಸಾದ್ ಬಲಿಪ (1975 – 11 ಏಪ್ರಿಲ್ 2022) ತುಳು ನಾಡ್ದ ಪ್ರಸಿದ್ಧ ಯಕ್ಷಗಾನ ಭಾಗವತೆರ್. ಆರ್ ಕಟೀಲು ದುರ್ಗಾಪರಮೇಶ್ವರಿ ಪ್ರಸಾದಿತ ಯಕ್ಷಗಾನ ಮಂಡಳಿದ ರಡ್ಡನೇ ಮೇಳೊದ ಪ್ರಧಾನ ಭಾಗವತರಾದ್ ಸೇವೆ ಮಲ್ತೊಂದಿತ್ತೆರ್. ಅರೆನ ಮಧುರ ಕಂಠ, ಶಾಸ್ತ್ರೀಯ ಹಿನ್ನೆಲೆ ಬೊಕ್ಕ ಭಾವಪೂರ್ಣ ಭಾಗವತಿಕೆಡ್ ಯಕ್ಷಗಾನ ಪ್ರೇಕ್ಷಕೆರೆನ ಮನಸ್ಸು ಗೆದ್ದಿತ್ತೆರ್.

ಆರಂಭಿಕ ಜೀವನ

ಪ್ರಸಾದ್ ಬಲಿಪ ಖ್ಯಾತ ಯಕ್ಷಗಾನ ಭಾಗವತ ಬಲಿಪ ನಾರಾಯಣ ಭಾಗವತ ಅರೆನ ಮಗೆ. ಆರ್ ಪೊಪ್ಪನೊಟ್ಟಿಗೆನೇ ಭಾಗವತಿಕೆದ ಪ್ರಾಥಮಿಕ ತರಬೇತಿ ಪಡೆಯೆರ್. ಎಲ್ಯ ಪ್ರಾಯೋಡೇ ಯಕ್ಷಗಾನದಂಚಿ ಆಸಕ್ತಿ ಬೆಳೆಸಾಯಿನ ಮೇರ್, ಸುಮಾರು 15ನೇ ಪ್ರಾಯೋಡೇ ಭಾಗವತರಾದ್ ರಂಗ ಪ್ರವೇಶ ಮಲ್ತೆರ್.

ಯಕ್ಷಗಾನ ಕ್ಷೇತ್ರೊದ ಸೇವೆ

ಪ್ರಸಾದ್ ಬಲಿಪ ತೆಂಕುತಿಟ್ಟು ಯಕ್ಷಗಾನದ ಪ್ರಮುಖ ಭಾಗವತೆರ್ ನಕಲೆನೆಟ್ ಒರಿ. ಆರ್ ಕಟೀಲು ದುರ್ಗಾಪರಮೇಶ್ವರಿ ಪ್ರಸಾದಿತ ಯಕ್ಷಗಾನ ಮಂಡಳಿದ ರಡ್ಡನೇ ಮೇಳೊಡ್ ಸೇವೆ ಮಲ್ತೊಂದಿತ್ತೆರ್. ಬೊಕ್ಕ ರಡ್ಡನೆ ಮೇಳೊದ ಪ್ರಧಾನ ಭಾಗವತರಾದ್ ಅರೆನ ಕಡೇ ಜೀವನೊದ ಮುಟ್ಟ ಅಲ್ಪನೇ ಸೇವೆ ಮಂದೆರ್. ಕನ್ನಡ ಬೊಕ್ಕ ತುಳು ಭಾಷೆಲೆಡ್ ಸಮಾನ ಪಾಂಡಿತ್ಯ ಉಳ್ಳೆರಾಯಿನ ಆರ್, ಪದ್ಯೊಲೆನ ಅರ್ಥಪೂರ್ಣವಾದ ನಿರೂಪಣೆ ಮಲ್ಪುನದ್ ಬೊಕ್ಕ ರಾಗಬದ್ಧ ಗಾಯನಡ್ ಪ್ರಸಿದ್ಧಿ ಪಡೆಯೆರ್.

ಯಕ್ಷಗಾನೊದ ಅವೇತೋ ಪ್ರಸಂಗೊಲೆಡ್ ಆರ್ ಭಾಗವತಿಕೆ ಮಲ್ತೊಂದಿತ್ತೆರ್. ಅರೆನ ವಿಶಿಷ್ಟ ಶೈಲಿದ ಅಮೂಲ್ಕ ಅಪಾರ ಅಭಿಮಾನಿಲೆನ ಸಂಪಾದನೆ ಮಲ್ದೆರ್. ಕರಾವಳಿ ಕರ್ನಾಟಕದ ಯಕ್ಷಗಾನ ಪ್ರೇಕ್ಷಕೆರ್ ಮದ್ಯೆ ಆರ್ ಜನಪ್ರಿಯ ಭಾಗವತರಾಯೆರ್.

ಪ್ರಶಸ್ತಿ ಬೊಕ್ಕ ಗೌರವೊಲು

ಯಕ್ಷಗಾನ ಕ್ಷೇತ್ರಗ್ ಕೊರ್ಪಿನ ಸೇವೆಗಾದ್ ಪ್ರಸಾದ್ ಬಲಿಪೆರೆಗ್ ಅನೇಕ ಗೌರವೊಲು ಲಭಿಸುದುಂಡು. 2022ಡ್ ಹಿರಿಯ ಯಕ್ಷಗಾನ ಅರ್ಥಧಾರಿ ಬೊಂಡಾಲ ರಾಮಣ್ಣ ಶೆಟ್ಟಿ ಅರೆನ ಪುದರ್‌ದ್ ಸ್ಥಾಪನೆ ಆಯಿನ ಬೊಂಡಾಲ ಪ್ರಶಸ್ತಿಗ್ ಆರ್ ಆಯ್ಕೆ ಆದ್ ಪ್ರಶಸ್ತಿನ್ ಸ್ವೀಕಾರ ಮಂದೆರ್.

ಅನಾರೋಗ್ಯ ಬೊಕ್ಕ ನಿಧನ

ಗಂಟಲು ಕ್ಯಾನ್ಸರ್‌ದ ತೊಂದರೆ ಅನುಭವಿಸಾಯಿನ ಪ್ರಸಾದ್ ಬಲಿಪೆರ್ 11 ಏಪ್ರಿಲ್ 2022ಡ್ ಮಂಗಳೂರುಡ್ ನಿಧನ ಆಯೆರ್. ನಿಧನ ಆಪುನ ಕಾಲೊಡ್ ಆರೆಗ್ 46 ವರ್ಷ ಪ್ರಾಯ ಆದು ಇತ್ತುಂಡು. ಆರೆನ ಅಗಲಿಕೆಗ್ ಯಕ್ಷಗಾನ ಕ್ಷೇತ್ರೊದ ಗಣ್ಯರ್, ಕಲಾವಿದರ್ ಬೊಕ್ಕ ಅಭಿಮಾನಿಲು ಸಂತಾಪ ವ್ಯಕ್ತ ಮಲ್ತೆರ್.