ಬಹ್ರೇನ್

ಬಹ್ರೇನ್ ಅಧಿಕೃತವಾದ್ ಬಹ್ರೇನ್ ಸಾಮ್ರಾಜ್ಯ ಪಶ್ಚಿಮ ಏಷ್ಯಾದ ಪರ್ಷಿಯನ್ ಗಲ್ಫ್‌ ಪ್ರದೇಸೊಡು ಇಪ್ಪುನ ಒಂಜಿ ದ್ವೀಪ ದೇಸೊ. ಸುಮಾರ್ 50 ನೈಸರ್ಗಿಕ ದ್ವೀಪೊಲು ಬುಕ್ಕ 33 ಕೃತಕ ದ್ವೀಪೊಲು ಸೇರ್ದ್ ಈ ದೇಸೊ ಉಂಡಾತ್ಂಡ್. ಬಹ್ರೈನ್‌ದ ರಾಜಧಾನಿ ಮನಾಮಾ. ಅರೇಬಿಕ್ ಬಾಸೆ ಈ ದೇಸೊದ ಅಧೀಕೃತ ಬಾಸೆ ಆದುಂಡು. ಕತಾರ್ ಮತ್ತು ಸೌದಿ ಅರೇಬಿಯಾದ ಈಶಾನ್ಯ ಕರಾವಳಿದ ನಡುಟು ಬಹ್ರೇನ್ ಉಂಡು. ಬಹ್ರೆನ್ ದೇಸೊಡ್ದು ಸೌದಿ ಅರೇಬಿಯಾ ದೇಸೊನು ಸಂಪರ್ಕಿಸಾವರ ಕಿಂಗ್ ಫಹದ್ ಕಾಸ್‌ವೇ ಪುದರ್‌ದ ಮಲ್ಲ ಸಂಕ ಉಂಡು. ಬಹ್ರೇನ್‌ ದೇಸೊದ ಜನಸಂಖ್ಯೆ 1,501,635.‌ ಸುಮಾರ್ 760 ಚದರ ಕಿಲೋಮೀಟರ್ ಇಸ್ತೀರ್ನ ಇಪ್ಪುನ ಈ ದೇಸೊ ಮಾಲ್ಡೀವ್ಸ್ ಬುಕ್ಕ ಸಿಂಗಾಪುರ ಬುಡಿಂಡ ಏಷ್ಯಾ ಖಂಡೊಡು ಮೂಜಿನೇ ಎಲ್ಯ ದೇಸ ಆದುಂಡು. ಇಸ್ತೀರ್ನೊ ಲೆಕ್ಕಡ್ ಬಹ್ರೈನ್ ದೇಸೊ ಜಗತ್‌ಡ್ ೧ ೭೩ನೇ ಸ್ತಾನೊಡು ಉಂಡು.

ಪುರಾತತ್ವಶಾಸ್ತ್ರಜ್ಞೆ ಜೆಫ್ರಿ ಬಿಬ್ಬಿ ಪನ್ಪಿನ ಪ್ರಕಾರ, ಬಹ್ರೇನ್ ಪ್ರಾಚೀನ ದಿಲ್ಮುನ್ ನಾಗರಿಕತೆದ ಮೂಲಸ್ಥಾನ. ಇಸ್ಲಾಮ್ ಧರ್ಮೊ ಉಂಡಾಯಿನ ಸುರುಟು ಬಹ್ರೆನ್ ಸಾಮ್ರಾಜ್ಯೊಡು ಎಚ್ಚ ಪ್ರಬಾವ ಇತ್ಂಡ್. ಇರಾನ್ ಸಾಮ್ರಾಜ್ಯೊದ ರಾಜವಂಸೊದ ಅರಸೆ ಅಬ್ಬಾಸ್ ಅರಬ್ ಆಳ್ವಿಕೆ ಮುಗಿಬೊಕ್ಕ, ಬಹ್ರೇನ್ ಪೋರ್ಚುಗೀಸ್ ಸಾಮ್ರಾಜ್ಯದ ಅಡಿಕ್ ಬತ್ಂಡ್. ಈ ದೇಸೊನು ಪೋರ್ಚುಗೀಸೆರ್ 1521 ಡ್ದು 1602ನೆ ಇಸವಿ ಮುಟ್ಟ ಆಳ್ವಿಕೆ ಮಲ್ತೆರ್. ಅವೆಡ್ದ್ ಬೊಕ್ಕ ಸಫಾವಿದ್ ಇರಾನ್‌ದ ಮಹಾನ್ ಷಾ ಅಬ್ಬಾಸ್ ಪೋರ್ಚುಗೀಸೆರೆನ ಮಿತ್ತ್ ಆಕ್ರಮಣ ಮಲ್ತ್‌ದ್ ಇಂದೆನ್ ತನ್ನ ವಶೊಕ್ಕು ದೆತೊಂದೆ. ೧೭೮೩ಡ್, ಬನಿ ಉತ್ಬಾ ಬೊಕ್ಕ ಮಿತ್ರ ಬುಡಕಟ್ಟುದ ಜನೊಕ್ಲು ಬಹ್ರೈನ್‌ದ ಮಿತ್ ದಾಳಿ ಮಲ್ತೆರ್. ಆ ಪೊರ್ತುಡು ಷಾ ಅಬ್ಬಾಸ್‌ನ ಜಾಗೆಡ್ ನಸ್ರ್ ಅಲ್-ಮದ್ಕೂರ್‌ ಆಡಳಿತ ಮಲ್ತೊಂದಿತ್ತೆ. ಆಯನ ಕೈಡ್ದ್ ಬಹ್ರೇನ್‌ನ್ ತನ್ಕುಲೆ ವಶೊಕ್ಕು ದೆತೊಂದೆರ್. ಅಪಗಡ್ದ್ ಇಂಚಿಗ್, ಅಲ್ ಖಲೀಫಾ ರಾಜಮನೆತನ ಉಂದೆನ್ ಆಳೊಂದುಂಡು.