ಬ್ಯಾಂಕ್ ಆಫ್ ಬರೋಡಾ

ಬ್ಯಾಂಕ್ ಆಫ್ ಬರೋಡಾ (ಎಲ್ಯಡ್- ಬಿಒಬಿ) ನಮ ದೇಸೊದ ಒಂಜಿ ಸಾರ್ವಜನಿಕ ವಲಯದ ಬ್ಯಾಂಕ್. ನೆತ್ತ ಪ್ರಧಾನ ಕಚೇರಿ ಗುಜರಾತ್‌ದ ವಡೋದರಾಡ್ ಉಂಡು. ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಬುಡಿಂಡ, ಭಾರತದ ರಡ್ಡನೇ ಮಾಮಲ್ಲ ಸಾರ್ವಜನಿಕ ವಲಯದ ಬ್ಯಾಂಕ್ ಆದುಂಡು.

ಬರೋಡಾದ ಮಹಾರಾಜೆರಾಯಿನ ೩ನೇ ಸಯಾಜಿರಾವ್ ಗಾಯಕ್ವಾಡ್ ಮೆರ್, 20 ಜುಲೈ 1908ಡ್ ಗುಜರಾತ್‌ದ ಬರೋಡಾ ಸಂಸ್ಥಾನೊಡ್ ಈ ಬ್ಯಾಂಕ್‌ನ್ ಸ್ಥಾಪನೆ ಮಲ್ತೆರ್. 19ನೇ ತಾರೀಕ್ ಜುಲೈ 1969ನೇ ಇಸವಿಡ್ ಬ್ಯಾಂಕ್ ಆಫ್ ಬರೋಡಾನ್ ಭಾರತ ಸರ್ಕಾರ ರಾಷ್ಟ್ರೀಕರಣ ಮಲ್ತ್ಂಡ್.

ದೇಸೊರ್ಮೆ ಬ್ಯಾಂಕ್ ಆಫ್ ಬರೋಡಾಗ್ ೮೫೦೦ಡ್ದ್ ಎಚ್ಚ ಶಾಕೆಲು, ಅಂಚನೆ ೧೦,೦೦೦ಡ್ದ್ ಎಚ್ಚ ಎಟಿಎಮ್‌ಲು ಉಲ್ಲ.

ಇತಿಯಾಸೊ

೧೯೦೮ ರಡ್, ಸಯಾಜಿರಾವ್ ಗಾಯಕ್ವಾಡ್ III ಮೆರ್, ಸಂಪತ್ರಾವ್ ಗಾಯಕ್ವಾಡ್, ರಾಲ್ಫ್ ವೈಟೆನಾಕ್, ವಿಠಲದಾಸ್ ಠಾಕರ್ಸೆ, ಲಲ್ಲುಭಾಯ್ ಶ್ಯಾಮಲದಾಸ್, ತುಳಸಿದಾಸ್ ಕಿಲಾಚಂದ್ ಬೊಕ್ಕ ಎನ್.ಎಮ್. ಚೋಕ್ಸಿ ಮೆರೆನಂಚಿನ ಕೈಗಾರಿಕೋದ್ಯಮಿಲೆನ ಒಟ್ಟುಗು ಸೇರ್ದ್ 'ಬ್ಯಾಂಕ್ ಆಫ್ ಬರೋಡಾ ಸ್ಥಾಪನೆ ಮಲ್ತೆರ್. ರಡ್ಡ್ ವರ್ಷಡ್ದ್ ಬೊಕ್ಕ, ತನ್ನ ಸುರುತ್ತ ಶಾಕೆನ್ ಅಹಮದಾಬಾದ್‌ಡ್ ಸುರು ಮಲ್ತ್ಂಡ್.

೧೯೫೩ನೇ ಇಸವಿಡ್ ಆಫ್ರಿಕಾ ಕಂಡೊದ ಕೀನ್ಯಾ ದೇಸೊದ ಮೊಂಬಾಸಾಡ್ ಬುಕ್ಕ ಉಗಾಂಡಾ ದೇಸೊದ ರಾಜಧಾನಿ ಕಂಪಾಲಾಡ್ ಶಾಕೆನ್ ಸುರು ಮಲ್ತ್ಂಡ್. ನೆತ್ತ ಮರು ವರ್ಷನೇ, ಕೀನ್ಯಾದ ನೈರೋಬಿಡ್ ರಡ್ಡನೆ ಬ್ರಾಂಚ್ ಸುರು ಆಂಡ್.

೧೯೫೬ನೇ ಇಸವಿಡ್ ತಾಂಜಾನಿಯಾದ ದಾರ್-ಎಸ್-ಸಲಾಮ್‌ಡ್ ನನೊಂಜಿ ಶಾಕೆ ಪಾಡಿಯೆರ್. ೧೯೫೭ನೇ ಇಸವಿಡ್ ಲಂಡನ್‌ಡ್ ಒಂಜಿ ಬ್ರಾಂಚ್ ಸ್ಥಾಪನೆ ಆಂಡ್.

೧೯೬೫ ಡ್, ಗಯಾನಾಡ್ ಒಂಜಿ ಶಾಕೆನ್ ಸುರು ಮಲ್ತೆರ್. ಅವ್ವೇ ವರ್ಷೊಡು, ಭಾರತ-ಪಾಕಿಸ್ತಾನ ಯುದ್ಧಡ್ದಾವರ, ಅಪಗದ ಪೂರ್ವ ಪಾಕಿಸ್ತಾನ-ಇತ್ತೆದ ಬಾಂಗ್ಲಾದೇಶ-ದ ನಾರಾಯಣಗಂಜ್‌ಡ್ ಇತ್ತಿನ ತನ್ನ ಬ್ರಾಂಚ್‌ನ್ ಕಳೆವೊನೊಡಾಂಡ್. ಅಂಚನೆ ೧೯೬೭ನೇ ಇಸವಿಡ್, ಟಾಂಜಾನಿಯಾ ಸರ್ಕಾರ ತನ್ನ ದೇಸೊಡು ಇತ್ತಿನ ಬ್ಯಾಂಕ್ದ ಆಫ್ ಬರೋಡಾದ ಮೂಜಿ ಬ್ರಾಂಚ್‌ಲೆನ್ (ದಾರ್ ಎಸ್ ಸಲಾಮ್, ಮ್ವಾಂಗಾ ಬೊಕ್ಕ ಮೋಶಿ) ರಾಷ್ಟ್ರೀಕರಣ ಮಲ್ತ್‌ದ್, ಅಯಿತ್ತ ವ್ಯವಹಾರೊಲೆನ್ ಸರ್ಕಾರಿ ಸ್ವಾಮ್ಯದ 'ನ್ಯಾಷನಲ್ ಬ್ಯಾಂಕಿಂಗ್ ಕಾರ್ಪೊರೇಷನ್'ಗ್ ಹಸ್ತಾಂತರ ಮಲ್ಪುನ ಮುಖಾಂತರ ರಡ್ಡನೆ ಸರ್ತಿ ತನ್ನ ಬ್ರಾಂಚ್‌ಲೆನ್ ಕಳೆವೊನೊಡಾಂಡ್.

1974ನೇ ಇಸವಿಡ್, ಬ್ಯಾಂಕ್ ಆಫ್ ಬರೋಡಾ ದುಬೈ ಬೊಕ್ಕ ಅಬುಧಾಬಿಡ್ ಶಾಖೆಲೆನ್ ಸುರು ಮಲ್ತ್ಂಡ್.

1976 ಡ್ ಓಮನ್ ಬೊಕ್ಕ ಬ್ರಸೆಲ್ಸ್‌ಡ್ ಶಾಖೆಲೆನ್ ಸುರು ಮಲ್ತ್ಂಡ್. ಬ್ರಸೆಲ್ಸ್ ಶಾಖೆನ್ ಬೊಂಬಾಯಿಡ್ದ್ ಬ್ರಸೆಲ್ಸ್‌ದ ಆಂಟ್‌ವಾರ್ಪ್‍ಗ್ ಪೋದು ನೆಲೆ ಉಂತಿನ, ವಜ್ರದ ಬುಕ್ಕ ಆಭರಣ ಮಲ್ಪುನಕ್ಲೆನೊಟ್ಟುಗು ವ್ಯಾಪಾರ ಮಲ್ಪುನ ಸಂಸ್ಥೆಲೆಗಾದ್ ಸುರು ಮಲ್ತ್‌ದಿತ್ತೆರ್, ದಾಯೆ ಪಂಡ ಮೊಕ್ಲೆಗ್ ವಜ್ರ ಕೆತ್ತುನೆದ ಮಲ್ಲ ಕೇಂದ್ರ ಆಯಿನ ಆಂಟ್‌ವರ್ಪ್‌ಡ್ ವ್ಯಾಪಾರ ಇತ್ತ್ಂಡ್.