ಮಾಲ್ಡಿವ್ಸ್

ಮಾಲ್ಡೀವ್ಸ್- ಅಧಿಕೃತವಾದ್ ಮಾಲ್ಡೀವ್ಸ್ ಗಣರಾಜ್ಯೊ- ದಕ್ಷಿಣ ಏಷ್ಯಾದ ಒಂಜಿ ದ್ವೀಪೊಲೆ ದೇಶ. ಉಂದು ಅರಬ್ಬೀ ಸಮುದ್ರದ ಆಗ್ನೇಯ ಗಡಿಕ್ ಕೈತಲ್ ಹಿಂದೂ ಮಹಾಸಾಗರಡ್ ಉಂಡು. ಉಂದು ಭಾರತ ಬೊಕ್ಕ ಶ್ರೀಲಂಕಾದ ನೈರುತ್ಯಡ್, ಏಷ್ಯಾ ಖಂಡಡ್ದ್ ಸುಮಾರ್ ೭೫೦ ಕಿಲೋಮೀಟರ್ ದೂರಡ್ ಉಂಡು. ಈ ದೇಸೊ ಬಡಕಾಯಿದ ಇಹಾವಂಧಿಪ್ಪೊಲ್ಹು ದ್ವೀಪಡ್ದ್ ಪತ್ತ್‌ದ್ ತೆನ್ಕಾಯಿದ ಅಡ್ಡು ದ್ವೀಪೊ ಮುಟ್ಟ ಪರಡ್‌ದ್ ಉಂಡು. ಸಮಭಾಜಕ ವೃತ್ತದ ಗೀಟ್ ಈ ದೇಸೊದ ಮಿತ್ ಪೋಪುಂಡು. ಮಾಲ್ಡೀವ್ಸ್‌ ದೇಸೊಡು ಒಟ್ಟು ೨೬ ಹವಳದ ದ್ವೀಪೊಲು ಉಲ್ಲ. ಈ ದೇಸೊದ ರಾಜದಾನಿ ಮಾಲೆ. ಮಾಲ್ಡೀವ್ಸ್ ಏಷ್ಯಾ ಖಂಡದ ಮಸ್ತ್ ಎಲ್ಯ ದೇಶ. ನೆತ್ತ ಭೂಮಿ ಕಾಲಿ ೨೯೮ ಚದರ ಕಿಲೋಮೀಟರ್ ಆಂಡಲಾ, ಉಂದು ಸುಮಾರ್ ೯೦,೦೦೦ ಚದರ ಕಿಲೋಮೀಟರ್‌ದಾತ್ ಸಮುದ್ರಡ್ ಪರಡ್‌ದ್ ಉಂಡು. ಅಂಚಾದ್ ಉಂದು ಪ್ರಪಂಚದ ಮಸ್ತ್ ಚದುರುದು ಉಪ್ಪುನ ಸ್ವತಂತ್ರ ದೇಶೊಲೆಡ್ ಒಂಜಿ. ೨೦೨೨ದ ಜನಗಣತಿದ ಪ್ರಕಾರ ಮುಲ್ಪ ೫,೧೫,೧೩೨ ಜನಸಂಖ್ಯೆ ಉಂಡು. ಅಂಚನೆ ಏಷ್ಯಾಡ್ ರಡ್ಡನೆ ಅತಿ ಕಮ್ಮಿ ಜನ ಉಪ್ಪುನ ಬೊಕ್ಕ ವಿಸ್ತೀರ್ಣಡ್ ಒರ್ಂಬನೆ ಎಲ್ಯ ದೇಶವಾದುಂಡು. ಮಾಲ್ಡೀವ್ಸ್ ಸಮುದ್ರ ಮಟ್ಟಡ್ದ್ ಸರಾಸರಿ ೧.೫ ಮೀಟರ್ ಎತ್ತರಡ್ ಉಂಡು, ಬೊಕ್ಕ ನೆತ್ತ ಅತಿ ಎತ್ತರದ ಜಾಗ ಕೇವಲ ೨.೪ ಮೀಟರ್ ಉಂಡು. ಅಂಚಾದ್ ಉಂದು ಪ್ರಪಂಚೊದ ಅತಿ ತಗ್ಗ್‌ಡ್ ಇಪ್ಪುನ ದೇಶ. ಕೆಲವು ಮೂಲೊಲೆನ ಪ್ರಕಾರ ನೆತ್ತ ಅತಿ ಎತ್ತರದ ಜಾಗ ಮೌಂಟ್ ವಿಲ್ಲಿಂಗಿಲಿ ಕಾಲಿ ೫.೧ ಮೀಟರ್ ಎತ್ತರ ಉಂಡು.

ಮಾಲ್ಡೀವ್ಸ್‌ಡ್ ೨,೫೦೦ ವರ್ಸೊ ಪಿರಾಕ್‌ಡ್ದ್ ಜನಕುಲು ಉಲ್ಲೆರ್. ಸುಮಾರ್ ೯೪೭ನೇ ಇಸವಿಡ್ ಅರಬ್ ಪ್ರವಾಸಿಲು ಈ ದ್ವೀಪೊಗು ಬತ್ತಿ ಬೊಕ್ಕ ಪಿದಯಿದ ಪ್ರಪಂಚದ ಒಟ್ಟುಗು ಸಂಪರ್ಕ ಸುರು ಆಂಡ್. ಹಿಂದೂ ಮಹಾಸಾಗರಡ್ ನಡತೊಂದಿತ್ತಿನ ಅರಬೆರ್ ಬೊಕ್ಕ ಪರ್ಷಿಯನ್ನೆರ್ನ ವ್ಯಾಪಾರದ ಪ್ರಭಾವಡ್ದ್ ೧೨ನೇ ಶತಮಾನಡ್ ಇಸ್ಲಾಮ್ ಧರ್ಮ ಮಾಲ್ಡೀವ್ಸ್ ದ್ವೀಪೊಗು ಬತ್ತ್ಂಡ್. ಅಂಚಾದ್ ಮುಲ್ಪ ಇಸ್ಲಾಮ್ ದರ್ಮೊ ಮಾತ್ರ ಪಗರಿದ್ ಬುಳೆಯಿಜಿ, ಇಸ್ಲಾಮ್ ಸುಲ್ತಾನೆರ್‌ಲಾ ಮುಲ್ಪ ಆಡಳಿತ ಸುರು ಮಲ್ತೆರ್. ಕ್ರಮೇಣ ಮಾಲ್ಡಿವ್ಸ್ ಮುಸ್ಲಿಮ್ ದೇಶವಾದ್ ಬುಲೆಂಡ್. ಅತ್ತಂದೆ, ಏಷ್ಯಾ ಬೊಕ್ಕ ಆಫ್ರಿಕಾದ ಒಟ್ಟುಗು ಎಡ್ಡೆ ವ್ಯಾಪಾರ ಬೊಕ್ಕ ಸಾಂಸ್ಕೃತಿಕ ಸಂಬಂಧೊಲೆನ್ ಬುಲೆಪಾಂಡ್. ೧೬ನೇ ಶತಮಾನದ ನಡುಟು, ಈ ಜಾಗ ಯುರೋಪಿಯನ್ ವಸಾಹತುಶಾಹಿ ಶಕ್ತಿಲೆನ ಅಡಿಕ್ ಬತ್ತ್ಂಡ್. ೧೮೮೭ನೇ ಇಸವಿಡ್ ಮಾಲ್ಡೀವ್ಸ್ ಬ್ರಿಟಿಷೆರನ ಕೈಕ್ ಬತ್ತ್ಂಡ್. ೧೯೬೫ನೇ ಇಸವಿಡ್ ಬ್ರಿಟೀಷೆರೆಡ್ದ್ ಸ್ವಾತಂತ್ರ್ಯ ತಿಕ್ಕ್ಂಡ್, ಬೊಕ್ಕ ೧೯೬೮ಡ್ ಚುನಾವಣೆ ನಡತ್ತ್ಂಡ್. ಐಟ್ ಗೆಂದಿನ ಅಬ್ಯರ್ತಿಲು ಮಾಲ್ಡಿವ್ಸ್‌ದ ಸಂಸತ್ತ್ ಪೀಪಲ್ಸ್ ಮಜ್ಲಿಸ್‌ದ ಸದಸ್ಯೆರಾದ್ ಆಯ್ಕೆ ಆಯೆರ್. ಮೊಕ್ಲೆನ್ ಸೇರ್ದ್ ಮುಲ್ಪ ಅಧ್ಯಕ್ಷೀಯ ಗಣರಾಜ್ಯ ಆಂಡ್ ಅಸ್ತಿತ್ವೊಗು ಬತ್ತ್ಂಡ್. ಮಾಲ್ಡೀವ್ಸ್ ಸಾರ್ಕ್ ಸಂಸ್ಥೆದ ಸ್ಥಾಪಕ ಸದಸ್ಯೆಲ ಅಂದ್.