ಮೂಲ್ಕಿ

ವಿಕಿಪೀಡಿಯರ್ದ್

ಮೂಲ್ಕಿ ದಕ್ಷಿಣ ಕನ್ನಡ ಜಿಲ್ಲೆದ ಕುಡ್ಲ ತಾಲೂಕುದ ಒಂಜಿ ಪಟ್ಟಣೋ. ಒಂರ್ಬೊ ಮಾಗಣೆದ ಊರು ಮೂಲ್ಕಿ[೧]. ಬಡೆಕಾಯಿಡ್ ಶಾಂಭವಿ ಬೊಕ್ಕ ತೆನ್ಕಾಯಿಡ್ ನಂದಿನಿ ಸುದೆ ಮೂಲ್ಕಿದ ಗಡಿ. ಪಡ್ಡಾಯಿಡ್ ಕಡಲ್, ಮೂಡಾಯಿಡ್ ಮುಂಡ್ಕೂರು ಗಡಿ ಉಂಡು.

ಹಿನ್ನೆಲೆ[ಸಂಪೊಲಿಪುಲೆ]

ಇತಿಹಾಸ ಕಾಲೊಡು ಬಾರೀ ಪುಗರ್ತೆ ಪಡೆಯಿನ ಊರು ಉಂದು. ಮೂಲ್ಕಿ ಸಾವಂತ ಅರಸುಲು ಆಲ್ವಿಕೆ ಮಲ್ತಿನ ಜಾಗ್‌ಲಾ ಅಂದ್. ಬಪ್ಪನಾಡ್‌ದ ಅಪ್ಪೆ ಉಳ್ಳಾಲ್ತಿ ಉಪ್ಪುನ ಊರುಲಾ ಅಂದ್. ಮೂಲ್ಕಿ, ಮುಲ್ಕಿ, ಮುಲ್ಕೆ ಇಂಚಿತ್ತಿನ ಪುದರ್‌ಡ್ ಲೆಪ್ಪುವೆರ್.

ಪುದರ್ ದ ಹಿನ್ನೆಲೆ[ಸಂಪೊಲಿಪುಲೆ]

ಮೂಲತಃ 'ಮೂಲಿಕೆ' ಪನ್ಪಿನ ಶಬ್ದೊಡ್ದಾದ್ ಈ ಪುದರ್ ಬತ್ತ್‌ಂಡ್‌ಂದ್ ಚರಿತ್ರೆಕಾರೆರ್ ಪನ್ಪೆರ್. 'ಮೂಲಿಕೆ' ಪಂಡ ಮರ್ದ್‌ದ ದಯಿ. 'ಮೂಲಿಕೆ' ಶಬ್ದ ಕನ್ನಡ ಬೊಕ್ಕ ತುಳು ರಡ್ಡ್ ಬಾಸೆಡ್ಲಾ ಉಂಡು. ಈ ಊರುಡು ದಿಂಜ ಮೂಲಿಕೆ ದಯಿಕುಲು ಇತ್ತಿನೆಡ್ದಾದ್ ಇಡೆಗ್ 'ಮೂಲಿಕೆ' ಪನ್ಪಿನ ಪುದರ್ ಬೈದುಪ್ಪು. ಅವ್ವೇ ಪುದರ್ ಬೊಕ್ಕ 'ಮೂಲ್ಕೆ' ಆದ್ ಕ್ರಮೇಣ'ಮೂಲ್ಕಿ' ಆಂಡ್. ಬಾರೀ ವಿಶೇಷವಾಯಿನ ಒಂಜಿ ಸಂಗತಿ ಪಂಡ ಇತ್ತೆ ನಂಕ್ ಮಲ್ಲ ಪೇಟೆದ ರೂಪೊಡು ತೋಜುನ ಈ ಮೂಲ್ಕಿ ಪ್ರದೇಶೊ ಸುಮಾರು 400 ವರ್ಸೊಗು ಇತ್ತಿಜಂಡ್. ಶಾಂಭವಿ ಸುದೆ ಈ ಬಾಗೊಡೇ ಪರಿತೊಂದು ಇತ್ತ್‌ಂಡ್.

ಇತಿಹಾಸೊ[ಸಂಪೊಲಿಪುಲೆ]

ಇತ್ತೆದ ಕಾರ್ನಾಡ್ (ಕಾರನಾಡ್) ಆ ಕಾಲೊಡು ಸುದೆತ ಬರಿತ ಊರಾದಿತ್ತ್‌ಂಡ್. ಕ್ರಿ.ಶ.1623ನೇ ಇಸ್ವಿದ ಪೊರ್ತುಡು ಕಾರನಾಡ್ ಸುದೆ ಬರಿತ ವ್ಯಾಪಾರಿ ಕೇಂದ್ರವಾದಿತ್ತ್‌ಂಡ್ ಪಂಡ್‌ದ್ ವಿದೇಶಿ ಪ್ರವಾಸಿಗೆರ್ ಬರೆತೆರ್. ಇಟಲಿ ಪ್ರವಾಸಿಗೆ ಬಾರ್ಬೊಸ್(ಕ್ರಿ.ಶ.1516) ಬೊಕ್ಕ ಡೆಲ್ಲಾವೆಲ್ಲಿ (ಕ್ರಿ.ಶ.1623) ಬರೆಯಿನ ಪ್ರಕಾರ ಆ ಕಾಲೊಡು ಇತ್ತೆದ ಮೂಲ್ಕಿ ಪ್ರದೇಶ ಸುದೆ ನೀರ್‌ಡ್ ಮುರ್ಕ್‌ದಿತ್ತ್‌ಂಡ್. ಆಂಡ ಕಾಲ ಕ್ರಮೇಣ ಸುದೆ ತನ್ನ ಸಾದಿನ್ ತಿರ್ಗಾದ್ ಪೋಂಡು. ಅಪಗ ನೀರ್ ಜತ್ತ್‌ದ್ ಉಂಡಾಯಿನ ಜಾಗೆನೇ ಇತ್ತೆದ ಮೂಲ್ಕಿ. 14ನೇ ಶತಮಾನೊಡ್ದು 18ನೇ ಶತಮಾನ ಮುಟ್ಟ ಆಳ್ವಿಕೆ ಮಲ್ತಿನ ಸಾವಂತ ಅರಸು ಮನೆತನ ಸುರುಟು ಏಳಿಂಜೆನ್ ರಾಜಧಾನಿ ಮಲ್ತಿತ್ತೆರ್. ಅವು ಬೊಕ್ಕ ಸೀಮಂತೂರುಗು ವರ್ಗಾವಣೆ ಆಂಡ್. ಅಲ್ಪಡ್ಡ್ ಬೊಕ್ಕ ಅವು ಪಡುಪಣಂಬೂರುಗು ವರ್ಗಾವಣೆ ಆಂಡ್. ಇತ್ತೆಲಾ ಪಡುಪಣಂಬೂರುಡು ಅರಸು ಮನೆತನ ಉಂಡು. ಪ್ರಸಿದ್ಧ ಜನಪದ ವಿದ್ವಾಂಸೆರಾಯಿನ ಮುದ್ದು ಮೂಡುಬೆಳ್ಳೆ ಮೇರ್ ಬರೆಯಿನ 'ಮೂಲ್ಕಿಯ ಸಾವಂತರು' ಪುಸ್ತಕ ಇಡೀ ಮೂಲ್ಕಿ ಚರಿತ್ರೆಗ್ ತುಡರ್ ಪತ್ತುಂಡು.

ಉಲ್ಲೇಕೊಲು[ಸಂಪೊಲಿಪುಲೆ]

{{reflist}

  1. https://en.wikipedia.org/wiki/Mulki,_India
  2. https://kn.wikipedia.org/wiki/%E0%B2%AE%E0%B3%81%E0%B2%B2%E0%B3%8D%E0%B2%95%E0%B2%BF_%E0%B2%B8%E0%B3%80%E0%B2%AE%E0%B3%86%E0%B2%AF_%E0%B2%A6%E0%B2%82%E0%B2%A1%E0%B2%A8%E0%B2%BE%E0%B2%AF%E0%B2%95%E0%B2%B0%E0%B3%81
  3. https://kn.wikipedia.org/wiki/%E0%B2%AE%E0%B3%82%E0%B2%B2%E0%B2%BF%E0%B2%95%E0%B2%BE%E0%B2%AA%E0%B3%81%E0%B2%B0
  1. https://web.archive.org/web/20160322143003/http://vijaykarnataka.indiatimes.com/home/languages/tulu/-/articleshow/46344933.cms
"https://tcy.wikipedia.org/w/index.php?title=ಮೂಲ್ಕಿ&oldid=160623"ಡ್ದ್ ದೆತ್ತೊಂದುಂಡು