ಮೊಳಹಳ್ಳಿ ಶಿವರಾವ್

ಮೊಳಹಳ್ಳಿ ಶಿವರಾವ್(೪ ಅಗಸ್ಟ್ ೧೮೮೦- ಇಂಬೆರ್ ಅವಿಭಜಿತ ದಕ್ಷಿಣ ಕನ್ನಡದ ಸಹಕಾರಿ ಪಿತಾಮಹೆ ಪಂಡ್‍ದ್ ಪುದರ್ ದೆಂತೊಂದಿನಾರ್. ತನ್ನ ಪೂರ್ತಿ ಜೀವನೊನು ಜನಕುಲೆಗಾದ್ ಧಾರೆ ಎರೆಯಿನ ಮಹಾಮಹಿಮೆ.

ಬಾಲ್ಯ ಬೊಕ್ಕ ಜೀವನ

ಶಿವರಾಯರೆನ್ ಮೂಲ ಕುಂದಾಪುರದ ಕೈತಲ್ ಉಪ್ಪುನ ಮೊಳಹಳ್ಳಿ. ಹಿರಿಯೆರ್ ಪುತ್ತೂರುಗು ಬತ್ತ್‍ದ್ ನೆಲೆ ಉಂತಿಯೆರ್. ಇಂಬೆರ್ ಭಾರೀ ಶ್ರೀಮಂತ ಕುಟುಂಬಗ್ ಸೇರ್ನಾರ್.ವಕೀಲಿ ವೃತ್ತಿ ಮಾಲ್ತೊಂದಿತ್ತಿನಾರ್.ಸಾರಸ್ವತ ಬ್ರಾಹ್ಮಣ ಪಂಗಡೊಗು ರಂಗಪ್ಪಯ್ಯ ಬೊಕ್ಕ ಮುಕಾಂಬಿಕ ದಂಪತಿಲೆಗ್ ೪ ಅಗಸ್ಟ್ ೧೮೮೦ ದಾನಿ ಪುತ್ತೂರುಡ್ ಪುಟ್ಟಿಯೆರ್. ತನ್ನ ಜೀವನನ್ ಶಾಲೆದ ಮಾಸ್ತರ್ ಆದ್ ಮಡಿಕೇರಿಡ್ ಸುರುಮಲ್ತೆರ್. ಬೊಕ್ಕ ಲಾ ಕಲ್ತ್‍ದ್ ಪುತ್ತೂರುಡ್ ವಕೀಲೆರಾದ್ ಬೇಲೆ ಸುರುಮಲ್ತೆರ್. ಬಡವೆರ್ನ ವಕೀಲೆ ಪಂಡ್ದ್ ಪುದರ್ ದೆತೊಂಡೆರ್. ಇಂಬೆರ್ ತನ್ನ ಜೀವನ ಪೂರ್ತಿ ಸಹಕಾರ ಚಳವಳಿ, ಸ್ವಾತಂತ್ರ್ಯ ಚಳವಳಿ, ಬಡ ಜನಕುಲೆನ ಉದ್ಧಾರಗಾತ್ ಮುಡಿಪು ದೀಡಿದ್ ಬೇಲೆ ಮಲ್ತೆರ್.

ಸಹಕಾರ ಚಳವಳಿ

೧೯೦೪ ಬ್ರಿಟಿಷ್ ಸರಕಾರ ಕೋ ಅಪೊರೇಟಿವ್ ಬಗೆಟ್ ಒಂಜಿ ಕಾನೂನು ಕೊಂಡತ್‍ಂಡ್. ಉಂದೆನ್ ಉಪಯೋಗ ಮಲ್ತ್‍ದ್ ಮಸ್ತ್ ಪ್ರಯತ್ನಡ್ ಶಿವರಾಯೆರ್ ಪುತ್ತೂರು ಕೋ ಆಪರೇಟಿವ್ ಟೌನ್ ಬ್ಯಾಂಕ್‍ನ್ ಪುತ್ತೂರುಡ್ ಸ್ಥಾಪನೆ ಮಲ್ತೆರ್..ಬೊಕ್ಕ ಹಳ್ಳಿ ಹಳ್ಳಿಡ್ ಸಹಕಾರ ಸಂಘೊಲು ಸ್ಥಾಪನೆ ಆಪಿಲೆಕ ಪ್ರಚಾರ ಬೊಕ್ಕ ಸಹಕಾರ ಕೊರಿಯೆರ್. ೧೯೧೪ನೆ ಇಸವಿಡ್ ಕುಡ್ಲಡ್ ಎಸ್.ಸಿ.ಡಿ.ಸಿ.ಸಿ ಬ್ಯಾಂಕ್‍ನ್ ಪ್ರಾರಂಭ ಮಲ್ತೆರ್. ಅಯಿಡ್ ಬೊಕ್ಕ ೨೦-೨೫ ವರ್ಷಡ್ ದಕ್ಷಿಣ ಕನ್ನಡ ಜಿಲ್ಲೆಡ್ ಸಮೃದ್ಧವಾದ್ ಸಹಕಾರ ಚಳವಳಿ ಹರಡ್‍ಂಡ್. ಹಳ್ಳಿ ಹಳ್ಳಿ ಬಗೆ ಬಗೆತ ಸಹಕಾರ ಸಂಘೋಲು ಪ್ರಾರಂಭ ಆಂಡ್. ಮಾತೈಕ್‍ಲಾ ಪ್ರೇರಣಾ ಶಕ್ತಿಯಾದ ಬೆಂದ್‍ನಾರ್ ಶಿವರಾಯೆರ್.

ಸ್ವಾತಂತ್ರ್ಯ ಹೋರಾಟೊ

ಶಿವರಾಯೆರ್ ಗಾಂಧೀಜಿನ ಮಲ್ಲ ಭಕ್ತೆ. ಗಾಂಧೀಜಿ ಆ ಕಾಲಡ್ ಪ್ರಚಾರ ಮಲ್ತೊಂದಿತ್ತಿನ ತತ್ವಲೆನ್ ಶಿವರಾಯೆರ್ಲಾ ತನ್ನ ಸಹಕಾರ ತತ್ವದೊಟ್ಟುಗು ಈ ಪ್ರದೇಶೊಡು ಪ್ರಚಾರ ಮಲ್ತೆರ್. ಕುಡ್ಲದ ಆರೆನ ಇಲ್ಲ್ ಸ್ವಾತಂತ್ರ್ಯ್ ಹೋರಾಟಗಾರೆರೆಗ್ ಮಲ್ಲ ಆಶ್ರಯ ಸ್ಥಾನ ಆದಿತ್ತ್‍ಂಡ್. ಈ ಮಾತ ಸೇವೆ, ಚಟುವಟಿಕೆಡ್ ಶಿವರಾಯೆರ್ ತನ್ನ, ಬೊಕ್ಕ ಕುಟುಂಬದ ಬಗ್ಗೆ ಗಮನಕೊರಂದೆ ತನ್ನ ಆಸ್ತಿನ್ ಕಳೆವೊಂದ್ ಬಡತನಗ್ ಜಾರ್ಯೆರ್.

ಮುಖ್ಯ ಸಾಧನೆಲು

ಪುತ್ತೂರುಡ್ ವಿದ್ಯಾವರ್ಧಕ ಸಂಘ ಸ್ಥಾಪನೆ ಮಲ್ತೆರ್. ಉಂದು ಇತ್ತೆ ವಿವೇಕಾನಂದ ಕಾಲೇಜ್ ಆದ್ ಬೊಳೆತ್‍ಂಡ್.ಧಾನ್ಯ ಬ್ಯಾಂಕ್,ಜೇನು ಕೃಷಿ ಸಹಕಾರ ಸಂಘ,ಸಗಟು ಮಾರಾಟ ಸಂಘ ಇಂಚಿನ ಮಸ್ತ್ ಸಂಸ್ಥೆಲೆನ್ ಸ್ಥಾಪನೆ ಮಲ್ತೆರ್. ವಿದ್ಯಾರ್ಥಿಲೆಗ್ ಹಾಸ್ಟೇಲ್, ಇಂಬೆರೆನ ದೋಸ್ತಿ ಶಿವರಾಮ ಕಾರಂತೆರ್‍ನ ಪ್ರೇರಣೆಡ್ ಶಾಲೆಲೆಡ್ ಜೋಕುಲುನ ವಿಕಾಸಗ್ ಬೋಡಾಯಿನ ಚಟುವಟಿಕೆದ ವಿಸ್ತರಣೆ ಇಂಚಿನ ಬೇಲೆಡ್‍ಲಾ ಸಕ್ತ್ರಿಯವಾದಿತ್ತೆರ್.ಪುತ್ತೂರುಡ್ ದಸರಾ ಉತ್ಸವ ಸುರುಮಲ್ತೆರ್. ಶಿವರಾಯೆರ್ ಮಲ್ಲ ಆತ್ಮಾಭಿಮಾನಿ ಆದಿತ್ತೆರ್. ಸರಕಾರ ಅಥವಾ ಸಂಘ ಸಂಸ್ಥೆಲು ಕೊರ್ನ ಒವ್ವೇ ಗೌರವನ್ ಸ್ವೀಕಾರ ಮಲ್ತ್‍ಜ್ಜೆರ್. ಆಂಡಲಾ ಶಿವರಾಮ ಕಾರಂತೆರ್ ಶಿವರಾಯೆರ್‍ನ ಜೀವನ ಚರಿತ್ರೆ ಆಧಾರಡ್ ಔದಾರ್ಯದ ಉರುಳಲ್ಲಿ ಪನ್ಪಿ ಪುಸ್ತಕ ಬರೆತೆರ್.ಇಂಬೆರೆನ ಗೌರವಾರ್ಥ ಆಗಸ್ಟ್ ೪ನೆ ತಾರೀಕ್‍ದಾನಿ ಸಹಕಾರ ಸಂಘ ದಿನ ಪಂಡ್‍ದ್ ಆಚರಣೆ ಮಲ್ಪುವೆರ್. ಪುತ್ತೂರುದ ಡಿ.ಸಿ.ಸಿ ಬ್ಯಾಂಕ್‌ಡ್ ಇಂಬೆರನ ಪುತ್ಥಳಿ ಸ್ಥಾಪನೆ ಮಲ್ತೆರ್.

ನಿಧನ

೧೯೬೭ ಇಸವಿಡ್ ಶಿವರಾಯೆರ್ ಪುತ್ತೂರುಡ್ ನಿಧನರಾಯೆರ್.