ಯುಕೋ ಬ್ಯಾಂಕ್

ಯುನೈಟೆಡ್ ಕಮರ್ಷಿಯಲ್ ಬ್ಯಾಂಕ್ ಪಂದ್ ದುಂಬು ಪುದರ್ ಇತ್ತಿನ ಯುಕೋ ಬ್ಯಾಂಕ್, ನಮ‌ ದೇಸೊದ ಸಾರ್ವಜನಿಕ ವಲಯದ ಬ್ಯಾಂಕ್ ಆದುಂಡು. ಭಾರತ ಸರ್ಕಾರದ ಗುರ್ಕಾರ್ತೆಡ್ ಇಪ್ಪುನ ಈ ಬ್ಯಾಂಕ್‌ದ ಮುಖ್ಯ ಕಚೇರಿ ಪಶ್ಚಿಮ ಬಂಗಾಲ ರಾಜ್ಯದ ರಾಜಧಾನಿ ಆಯಿನ ಕೊಲ್ಕತ್ತಾಡುಂಡು. ಯುಕೊ ಬ್ಯಾಂಕ್ 2018 ನೇ ವರ್ಷದ ಫೋರ್ಬ್ಸ್ ಗ್ಲೋಬಲ್ 2000 ಪಟ್ಟಿಡ್ 1948 ನೇ ಸ್ಥಾನ ಅಂಚನೆ 2020ನೇ ಇಸವಿದ ಫಾರ್ಚೂನ್ ಇಂಡಿಯಾ 500 ಪಟ್ಟಿಡ್ 80ನೇ ಸ್ಥಾನೊಡು ಇತ್ತ್ಂಡ್. ಯುಕೊ ಬ್ಯಾಂಕ್‌ನ್ ಉದ್ಯಮಿ ಆದಿತ್ತಿನ ಜಿ ಡಿ ಬಿರ್ಲಾ ೧೯೪೩ನೇ ಇಸವಿಡ್ ಈ ಬ್ಯಾಂಕ್‌ನ್ ಸ್ತಾಪಿಸಾಯೆರ್.

ರೂಪಾಯಿ-ರಿಯಾಲ್ (ಇರಾನ್) ಬೊಕ್ಕ ರೂಪಾಯಿ-ರುಬೆಲ್ (ರಷ್ಯ) ಇಂಚ ರಡ್ ದೇಸೊಲೆ ಕರೆನ್ಸಿಡ್ ವ್ಯವಹಾರ ಮಲ್ಪುನ ವಿಶೇಷ ಬ್ಯಾಂಕ್‌ಲೆಡ್ ಯುಕೋ ಬ್ಯಾಂಕ್ ಕೂಡ ಒಂಜಿ. ಅತ್ತಂದೆ, ಶನಿ ದೇವೆರೆನ್ ನಂಬುನ ಜನಕ್ಲೆನ ನಂಬಿಕೆನ್ ಗೌರವಿಸಾವರ ಆದ್ದ್, ಮಹಾರಾಷ್ಟ್ರದ ಶನಿ ಶಿಂಗ್ಣಾಪುರಡು ಒಂಜಿ ವಿಶಿಷ್ಟವಾಯಿನ "ತಾರ್ ಇಜ್ಜಾಂದಿನ" ಶಾಖೆನ್ ಸುರು ಮಲ್ತಿನ ಸುರುತ ಬ್ಯಾಂಕ್ ಪನ್ಪಿನ ಹೆಗ್ಗಳಿಕೆ ಯುಕೊ ಬ್ಯಾಂಕ್‌ಗ್ ಉಂಡು.

ದೇಸೊರ್ಮೆ ಯುಕೋ ಬ್ಯಾಂಕ್‌ಗ್ ೩೪೧೨ ಶಾಕೆಲು ಉಲ್ಲ. ಅಂಚನೆ ೨೬೪೭ ಎಟಿಎಮ್‌ಲು ಉಲ್ಲ. ಮಾರುಕಟ್ಟೆ ಬಂಡವಾಳೊದ ಆದಾರೊಡು ಯುಕೊ ಬ್ಯಾಂಕ್ ೧೦ನೇ ಸಾನೊಡು ಉಂಡು.

ಇತಿಹಾಸ

1942 ನೇ ವರ್ಷದ ಪೊರ್ತುಡು ಭಾರತ ಬಿಟ್ಟು ತೊಲಗಿ ಚಳುವಳಿ ನಡತೊಂದಿತ್ಂಡ್. ಆ ಸಮಯೊಡು, ದೇಸೊದ ಪುದರ್ ಪೋತಿನ ಉದ್ಯಮಿಯಾಯಿನ ಘನಶಾಮ್ ದಾಸ್ ಬಿರ್ಲಾ ಆರ್ ಭಾರತದ ಬಂಡವಾಳ ಬೊಕ್ಕ ಆಡಳಿತ ಇಪ್ಪುನ ಒಂಜಿ ವಾಣಿಜ್ಯ ಬ್ಯಾಂಕ್‌ ಒಂಜಿ ಬೋಡು ಪಂದ್ ಆಲೋಚನೆ ಮಲ್ತೆರ್. ಅಂಚ ಸುರು ಆಯಿನ ಬ್ಯಾಂಕ್ ಯುನೈಟೆಡ್ ಕಮರ್ಷಿಯಲ್ ಬ್ಯಾಂಕ್ ಲಿಮಿಟೆಡ್. ಈ ಬ್ಯಾಂಕ್‌ಗ್ ಕೊಲ್ಕತ್ತಾಡು ಪ್ರಧಾನ ಕಚೇರಿ ಇತ್ತ್‌ಂಡ್. ನೆತ್ತ ಇಶ್ಯೂಡ್ ಬಂಡವಾಳ ₹2 ಕೋಟಿ ಆದಿತ್ತ್ಂಡ್, ನೆಟ್ಟ್ ₹1 ಕೋಟಿನ್ ಪಾವತಿ ಬಂಡವಾಳ ಇತ್ಂಡ್. ಬಿರ್ಲಾ ಈ ಬ್ಯಾಂಕ್‌ದ ಅಧ್ಯಕ್ಷರಾಯೆರ್. ಇಂದೆತ ನಿರ್ದೇಶಕರ ಮಂಡಳಿಡ್ ಭಾರತದ ಬೇತೆ ಬೇತೆ ಕ್ಷೇತ್ರೊಲೆನ ಮಸ್ತ್ ಪುದರ್ ಪೋತಿನ ಗಣ್ಯ ವ್ಯಕ್ತಿಲು ಇತ್ತೆರ್.

ಪರದೇಸೊಡು ಶಾಕೆಲು

ರಡ್ಡನೇ ಜಾಗತಿಕ ಯುದ್ಧದ ಬೊಕ್ಕ, ಯುನೈಟೆಡ್ ಕಮರ್ಷಿಯಲ್ ಬ್ಯಾಂಕ್ ಮಸ್ತ್ ಪರದೇಸೊಡು ಶಾಖೆಲೆನ್ ಸುರು ಮಲ್ತ್ಂಡ್. ಸುರುತ ಶಾಖೆನ್, 1947 ಡ್ ಬರ್ಮಾದ ರಂಗೂನ್ ನಗರೊಡು ಸ್ಥಾಪನೆ ಮಲ್ತೆರ್. ನೆತ್ತ ಬೆರಿಕ್ಕೆ ಸಿಂಗಾಪುರ (1951), ಹಾಂಗ್ ಕಾಂಗ್ (ಮಾರ್ಚ್ 1952), ಲಂಡನ್ (1953) ಬೊಕ್ಕ ಮಲೇಷ್ಯಾಡು ಶಾಖೆಲು ಸುರು ಆಯೊ. 1963ಡ್ ಬರ್ಮಾ ಸರ್ಕಾರ ಯುನೈಟೆಡ್ ಕಮರ್ಷಿಯಲ್ ಬ್ಯಾಂಕ್‌ದ ಮೂಜಿ ಶಾಖೆಲೆನ್ ರಾಷ್ಟ್ರೀಕರಣ ಮಲ್ತ್ಂಡ್, ಉಂದು ಬೊಕ್ಕ 'ಪೀಪಲ್ಸ್ ಬ್ಯಾಂಕ್ ನಂಬ್ರ 6' ಆದ್ ಬದಲಾಂಡ್.

21 ಏಪ್ರಿಲ್ 1951 ಡ್ ಸಿಂಗಾಪುರ ಮೇನ್ ಶಾಖೆದ ಆರಂಭದೊಟ್ಟುಗು ಸುರು ಆಂಡ್. ನೆತ್ತ ಬೊಕ್ಕ 7 ಮಾರ್ಚ್ 1959 ಡ್ "ಲಿಟಲ್ ಇಂಡಿಯಾ" ಪನ್ಪಿನ ಜಾಗೊಡು ಸೆರಂಗೂನ್‌ದಲ್ಪ ಶಾಖೆ ಸುರು ಆಂಡ್.

ಸದ್ಯೊಗು ಯುಕೋ ಬ್ಯಾಂಕ್‌ಗ್ ರಡ್ಡ್- ಒಂಜಿ ಸಿಂಗಾಪುರಡ್ ಬೊಕ್ಕ ಒಂಜಿ ಹಾಂಗ್‌ಕಾಂಗ್‌ಡ್- ವಿದೇಶಿ ಬ್ರಾಂಚ್‌ಲು ಉಲ್ಲೊ ಅಂಚನೆ ಇರಾನ್‌ದ ತೆಹ್ರಾನ್‌ಡ್ ಒಂಜಿ ಪ್ರತಿನಿಧಿ ಕಚೇರಿನ್ ಸ್ಥಾಪನೆ ಮಲ್ತ್‌ದೆರ್.