ಲೇಹ್

ಲೇಹ್ ಲಡಾಖ್‌ಡ್ ಇಪ್ಪುನ ಒಂಜಿ ಪೇಂಟೆ, ನಮ ದೇಸೊದ ಕೇಂದ್ರಾಡಳಿತ ಪ್ರದೇಸವಾಯಿನ ಲಡಾಖ್‌ದ ಅರೆಗಾಲೊದ ರಾಜದಾನಿ ಆದುಂಡು. ಉಂದು ಲೇಹ್ ಜಿಲ್ಲೆದ ಜಿಲ್ಲಾಕೇಂದ್ರಲಾ ಆದುಂಡು. ಲೇಹ್ ದುಂಬು ಲಡಾಖ್ ಸಾಮ್ರಾಜ್ಯೊದ ರಾಜಧಾನಿಯಾದಿತ್ತ್ಂಡ್. ಸಮುದ್ರ ಮಟ್ಟೊಡ್ದು ಲೇಹ್ ೩,೫೨೪ ಮೀಟರ್ ಎತ್ತರೊಡು ಉಂಡು. ಲೇಹ್ ನೈಋತ್ಯೊಡು ಉಪ್ಪುನ ಶ್ರೀನಗರೊಗು ರಾಷ್ಟ್ರೀಯ ಹೆದ್ದಾರಿ ೧ ದ ಮೂಲಕ ಅಂಚನೆ ದಕ್ಷಿಣೊಡು ಉಪ್ಪುನ ಮನಾಲಿಗ್ ಲೇಹ್-ಮನಾಲಿ ಹೆದ್ದಾರಿದ ಮೂಲಕ ಸಂಪರ್ಕ ಮಲ್ಪುಂಡು.

ದುಂಬು 'ಮರ್ಯುಲ್', 'ಕಿಯಾ-ಛಾ' ಖಾ ಛುಂಪಾ ಇಂಚಿತ್ತಿ ಬೇತೆ ಬೇತೆ ಪುದರ್‌ ಇತ್ತಿನ ಲೇಹ್ ಪ್ರದೇಶೊಡು ಸುರುಕು ಬ್ರೋಕ್ಪಾ, ಮಾನ್ ಅಂಚನೆ ಡಾರ್ಡ್ ಜನಾಂಗದಕುಲು ನೆಲೆ ಆಯೆರ್. ಬೊಕ್ಕದ ಕಾಲೊಡು ಬೌದ್ಧ ಬೊಕ್ಕ ಇಸ್ಲಾಂ ಧರ್ಮಲು ಮುಲ್ಪ ಪಗರ್‌ದ್ ಬುಲೆಂಡ್. ೧೦ನೇ ಶತಮಾನೊಡು ಸ್ಕಿಟ್ ಲೈ ನೆಮಾಗಾನ್ ರಾಜೆ ಲೇಹ್‌ನ್ ರಾಜಧಾನಿ ಮಲ್ತೊಂದು ಗಟ್ಟಿಮುಟ್ಟಾಯಿನ ಸ್ವತಂತ್ರ ಸಾಮ್ರಾಜ್ಯೊನು ಉಂಡು ಮಲ್ತೆ, ಬೊಕ್ಕ ಬತ್ತಿನ ಪ್ರಸಿದ್ಧ ರಾಜ ಸಿಂಗ್ಯೆ ನಾಮ್ಗ್ಯಾಲ್ ೯ ಮಾಳಿಗೆದ ಅರಮನೆನ್ ಲೇಹ್‌ಡ್ ಕಟ್ಟಾಯೆ. ಭಾರತದ ವಿಭಜನೆಡ್ದ್ ಬೊಕ್ಕ ನಡತಿನ ಪಾಕಿಸ್ತಾನೊದ ಬೊಕ್ಕ ಚೀನಾದ ಆಕ್ರಮಣೊಡ್ದಾವರ ಸುಮಾರ್ ಭೂಭಾಗೊನು ಕಳೆವೊಂಡು. ಕಡೆಕ್ ಭಾರತ ಒಕ್ಕೂಟೊಗು ಸೇರ್‌ನ ಈ ಪ್ರದೇಶೊನು ಆಡಳಿತದ ಅನುಕೂಲೊಗಾದ್ ೧೯೭೯ಡ್ ಲೇಹ್ ಬೊಕ್ಕ ಕಾರ್ಗಿಲ್ ಪನ್ಪಿ ರಡ್ಡ್ ಬೇತೆ ಬೇತೆ ಜಿಲ್ಲೆಗಳಾದ್ ಬಾಗ ಮಲ್ತೆರ್.