ಶಿಮ್ಲಾ

ಶಿಮ್ಲಾ ಬಡಕಾಯಿ ಭಾರತದ ಹಿಮಾಚಲ ಪ್ರದೇಶ ರಾಜ್ಯದ ರಾಜಧಾನಿ ಬೊಕ್ಕ ಮಲ್ಲ ನಗರ. ಬ್ರಿಟಿಷೆರೆನ ಆಡಳಿತ ಇಪ್ಪನಗ ಶಿಮ್ಲಾ ೧೮೬೪ನೇ ಇಸವಿಡ್ ಭಾರತದ ಅರೆಗಾಲದ ರಾಜಧಾನಿ ಪಂದ್ ಘೋಷಣೆ ಮಲ್ತೆರ್. ಸ್ವತಂತ್ರ ಬತ್ತಿ ಬೊಕ್ಕ, ಈ ನಗರ ಪೂರ್ವ ಪಂಜಾಬ್‌ದ ರಾಜಧಾನಿ ಆದಿತ್ತ್ಂಡ್. ಇತ್ತೆ ಹಿಮಾಚಲ ಪ್ರದೇಶದ ರಾಜಧಾನಿ ಆದುಂಡು. ಉಂದು ಹಿಮಾಚಲ ಪ್ರದೇಶದ ಮಲ್ಲ ಬೊಕ್ಕ ಅಭಿವೃದ್ಧಿ ಆಯಿನ ನಗರ, ಅತ್ತಂದೆ ರಾಜ್ಯದ ಮುಖ್ಯ ವ್ಯಾಪಾರ, ಸಂಸ್ಕೃತಿ ಬೊಕ್ಕ ಶಿಕ್ಷಣದ ಕೇಂದ್ರಲಾ ಅಂದ್.

೧೮೧೫ನೇ ಇಸವಿಡ್ ಬ್ರಿಟಿಷೆರ್ ಈ ಜಾಗೆನ್ ತನ್ಕುಲೆ ವಶ ಮಲ್ತೊಂದೆರ್. ನೆಕ್ ದುಂಬು, ಮುಲ್ಪ ಎಲ್ಯ ಎಲ್ಯ ಹಳ್ಳಿಲು ಇತ್ತ್ಂಡ್ ಪಂದ್ ದಾಖಲೆ ಉಂಡು. ಮುಲ್ತ ಹವಾಮಾನ ಬ್ರಿಟಿಷೆರೆಗ್ ಇಷ್ಟ ಆಂಡ್, ಅಂಚಾದ್ ಹಿಮಾಲಯದ ದಟ್ಟ ಕಾಡ್‌ಡ್ ಈ ನಗರನ್ ಕಟ್ಯೆರ್. ಬ್ರಿಟೀಷೆರೆನ ಅರೆಗಾಲದ ರಾಜಧಾನಿಯಾದಿಪ್ಪನಗ, ಶಿಮ್ಲಾ ೧೯೦೬ದ ಸಿಮ್ಲಾ ಡೆಪ್ಯುಟೇಶನ್, ೧೯೧೪ದ ಸಿಮ್ಲಾ ಒಪ್ಪಂದ ಬೊಕ್ಕ ೧೯೪೫ದ ಸಿಮ್ಲಾ ಸಮ್ಮೇಳನ ಅತ್ತಂದೆ ಬೇತೆ ಬೇತೆ ಮುಖ್ಯ ರಾಜಕೀಯ ಸಬೆಕ್ಲು ಮಾತ ಮುಲ್ಪ ನಡತ್ತ. ನಮ ದೇಸೊಗು ಸ್ವಾತಂತ್ರ ಬತ್ತಿ ಬೊಕ್ಕ, ೨೮ ಸಂಸ್ಥಾನೊಲೆನ್ ಒಟ್ಟು ಸೇರಾದ್ ೧೯೪೮ಡ್ ಹಿಮಾಚಲ ಪ್ರದೇಶ ರಾಜ್ಯ ಉದಿತ್ ಬತ್ತ್ಂಡ್. ಸ್ವತಂತ್ರ ಬತ್ತಿ ಬೊಕ್ಕಲಾ, ಈ ನಗರ ಒಂಜಿ ಮುಖ್ಯ ರಾಜಕೀಯ ಕೇಂದ್ರವಾದ್ ಒರಿಂಡ್, ೧೯೭೨ನೇ ಇಸವಿದ ಸಿಮ್ಲಾ ಒಪ್ಪಂದ ಮುಲ್ಪ ಆಂಡ್. ಹಿಮಾಚಲ ಪ್ರದೇಶ ರಾಜ್ಯದ ಪುನರ್ವಿಂಗಡಣೆ ಆಯಿ ಬೊಕ್ಕ, ಅಲ್ಪದ ಇತ್ತಿನ ಮಹಾಸು ಜಿಲ್ಲೆಗ್ ಶಿಮ್ಲಾ ಪಂದ್ ಪುದರ್ ದೀಯೆರ್.

ಶಿಮ್ಲಾಡ್ ಬ್ರಿಟಿಷೆರೆ ಕಾಲೊದ ನಿಯೋ-ಗೋಥಿಕ್ ಶೈಲಿದ ಕಟ್ಟೊಣೊಲು, ಅತ್ತಂದೆ ಮಸ್ತ್ ದೇವಸ್ಥಾನೊಲು ಬೊಕ್ಕ ಚರ್ಚ್‌ಲು ಮಾತ ಉಲ್ಲ. ಈ ಪೇಂಟೆದ ನೈಸರ್ಗಿಕ ಪರಿಸರ ಪ್ರವಾಸಿ ಜನೊಕ್ಲೆನ ಮನಸ್ ಮರ್ಲ್ ಮಲ್ಪುಂಡು. ನಗರದ ಮುಖ್ಯ ಆಕರ್ಷಣೆಲು ಪಂಡ ಶ್ರೀ ಹನುಮಾನ್ ದೇಸ್ತಾನ, ವೈಸ್‌ರೀಗಲ್ ಲಾಡ್ಜ್, ಕ್ರೈಸ್ಟ್ ಚರ್ಚ್, ಮಾಲ್ ರೋಡ್, ದ ರಿಡ್ಜ್ ಬೊಕ್ಕ ಅನ್ನಾಡೇಲ್. ನಗರದ ಕೇಂದ್ರದ ಬಡಕಾಯಿಗ್ ಜಾಖು ಬೊಕ್ಕ ತೆಂಕಾಯಿಗ್ ಅನ್ನಾಡೇಲ್, ಮೂಡಾಯಿಗ್ ಸಂಜೌಲಿ ಬೊಕ್ಕ ಪಡ್ಡಾಯಿಗ್ ಚೋಟಾ ಶಿಮ್ಲಾ ಉಂಡು. ಬ್ರಿಟಿಷೆರ್ ಕಟ್ಟಾದಿನ, ಯುನೆಸ್ಕೋ ವಿಶ್ವ ಪರಂಪರೆದ ತಾಣ ಕಾಲ್ಕಾ-ಶಿಮ್ಲಾ ರೈಲ್ವೆ ಮಾರ್ಗಲಾ ಮುಖ್ಯ ಪ್ರವಾಸಿ ಆಕರ್ಷಣೆ ಆದುಂಡು.

ನೆತ್ತ ಗುಡ್ಡೆದ ಇಳಿಜಾರ್‌ದ ಜಾಗೆರ್ದಾತ್ರ, ೨೦೦೫ಡ್ ಶುರುವಾಯಿನ 'ಎಂಟಿಬಿ ಹಿಮಾಲಯ' ಪನ್ಪಿ ಬೈಕಿಂಗ್ ರೇಸ್ ಮುಲ್ಪ ನಡಪುಂಡು. ಉಂದು ದಕ್ಷಿಣ ಏಷ್ಯಾದ ಮಲ್ಲ ಲೇಸ್ ಇನ್ಪಿ ಪುಗರ್ತೆ ಉಂಡು. ದಕ್ಷಿಣ ಏಷ್ಯಾದ ಮಲ್ಲ ನೈಸರ್ಗಿಕ ಐಸ್ ಸ್ಕೇಟಿಂಗ್ ಮೈದಾನ ಮುಲ್ಪ ಉಂಡು. ಪ್ರವಾಸೋದ್ಯಮ ಕೇಂದ್ರ ಅತ್ತಂದೆ, ಈ ನಗರ ಮಸ್ತ್ ಕಾಲೇಜುಲು ಬೊಕ್ಕ ಸಂಶೋಧನಾ ಸಂಸ್ಥೆಲು ಇಪ್ಪುನ ಒಂಜಿ ಶಿಕ್ಷಣದ ಕೇಂದ್ರಲಾ ಆತುಂಡು.