ಸಾಂಬಾರ್

ಸಾಂಬಾರ್

ಸಾಂಬಾರ್, ಅತ್ತ್ಂಡ ಸಾಂಭಾರ್, ಪಂಡ ಮಸೂರ ಆಧಾರಿತ ತರಕಾರಿ ಮಸಾಲೆದ ಕರಿ ಅತ್ತ್ಂಡ ಸ್ಟ್ಯೂ, ಉಂದೆನ್ ಪಾರಿವಾಳದ ಬಟಾಣಿ ಬೊಕ್ಕ ತಾರಾಯಿದ ಸಾರುಡ್ ಬೇಯಿಪಾವೆರ್. ಉಂದು ದಕ್ಷಿಣ ಭಾರತದ ಪಾಕಪದ್ಧತಿಡ್ ಪುಟ್ಟುಂಡು ಬೊಕ್ಕ ಭಾರತದ ಬೇತೆ ಭಾಗೊಲೆಡ್ಲಾ ಉನ್ಪೆರ್.

ಚರಿತ್ರೆ

ಸಾಂಬಾರ್ ದ ದಾಖಲಾತಿನ ಇತಿಹಾಸ ಅಸ್ಪಷ್ಟವಾಯಿನವು.ವಿಜಯನಗರ ರಾಜೆ ಕೃಷ್ಣದೇವರಾಯರೆನ ತೆಲುಗು ಕಬಿತೆದ ಅಮೂಕ್ತಮಲ್ಯದ (ಸುಮಾರ್ ೧೫೧೭) ಶ್ಲೋಕ ೨.೯೮ಡ್ "ಸಂಬರಂಪುಚಿಂತಪಂದು" ಶಬ್ದ ಉಲ್ಲೇಖ ಉಂಡು. ಆಂಧ್ರ ವಿಶ್ವವಿದ್ಯಾಲಯದ ಶ್ರೀನಿವಾಸ್ ಸಿಸ್ತ್ಲಾ 2010 ಡ್ ಮಲ್ತಿನ ಅನುವಾದದ ಪ್ರಕಾರ, ಇತ್ತೆದ ತಮಿಳುನಾಡುದ ಶ್ರೀವಿಲ್ಲಿಪುತೂರುಡು ಪೆರಿಯಾಲ್ವರ್ ನ ಪತ್ನಿ ಪ್ಯಾಕ್ ಮಲ್ಪುನ ಆಹಾರೊನು ವರ್ಣನೆ ಮಲ್ಪುನಗ "ಸಾಂಬಾರ್ ಪದಾರ್ಥೊಲೆನ್ ಪ್ರತ್ಯೇಕ ಪ್ಯಾಕ್ ಡ್ ಪ್ಯಾಕ್ ಮಲ್ತ್ ದ್, ಬೆಲ್ಲ, ತಾರಾಯಿದ ಪೇಸ್ಟ್" ಪನ್ಪಿನ ಕಬಿತೆಡ್ ಉಲ್ಲೇಖ ಉಂಡು. ಬಹುಜನಪಳ್ಳಿ ಸೀತಾರಾಮಾಚಾರ್ಯುಲೆನ ನಿಘಂಟು ಸಬ್ದರತ್ನಾಕರಮು(೧೮೮೫) ಬೊಕ್ಕ ವೇದಂ ವೆಂಕಟರಾಯ ಶಾಸ್ತ್ರಿರ್ನ ವ್ಯಾಖ್ಯಾನ (೧೯೨೭) ಕಬಿತೆದ ಬಗ್ಗೆಲಾ ಉಂದೇ ರೀತಿಡ್ ಶಬ್ದೊನು ಅರ್ಥ ಮಲ್ಪುವೆರ್. ಅಂಚಾದ್, ಸಿಸ್ತ್ಲಾ 16ನೆ ಶತಮಾನೊಗು ಸಾಂಬಾರ್ ತಮಿಳು ಪಾಕಪದ್ಧತಿದ ಒಂಜಿ ಅವಿಭಾಜ್ಯ ಅಂಗ ಆದುಪ್ಪೊಡು ಪನ್ಪಿನ ಸಿದ್ಧಾಂತೊನು ಮಲ್ತೆರ್.ಆಹಾರ ಇತಿಹಾಸಕಾರೆ ಕೆ.ಟಿ.ಅಚಾಯ (೧೯೯೪) ನ ಪ್ರಕಾರ, ಸಾಂಬಾರ್ ಗ್ "ಪುಳಿ" ಪನ್ಪಿನ ಸುರುತ ಉಲ್ಲೇಖ ಇತ್ತೆದ ಕರ್ನಾಟಕೊಡು ೧೭ನೆ ಶತಮಾನೊಗು ಸೇರ್ದುಂಡು.ಕಾಂತಿರವ ನರಸರಾಜ ವಿಜಯ, ಕನ್ನಡ ವಿದ್ವಾಂಸೆರ್ ಗೋವಿಂದ ವೈದ್ಯನ 1648 ಗ್ರಂಥೊಡು, ಹುಳಿ (ಪುಳಿ) (ಅಕ್ಷರಶಃ "ಹುಳಿ") ನ್ ಉಲ್ಲೇಖ ಮಲ್ತೆರ್, ಉಂದು ಆಧುನಿಕ ಸಾಂಬಾರ್ ಗ್ ಹೋಲಿಕೆ ಆಪಿನ ಒಂಜಿ ಕರಿ, ಉಂದೆನ್ ತರಕಾರಿ ಬೊಕ್ಕ ತೂರ್ ದಾಲ್ ಡ್ ಮಲ್ಪುವೆರ್.

ಒಂಜಿ ದಂತಕಥೆ

ಒಂಜಿ ದಂತಕಥೆದ ಪ್ರಕಾರ, ಶಾಹುಜಿ I (1684–1712) ನ ಆಳ್ವಿಕೆದ ಪೊರ್ತುಡು ತಂಜಾವೂರು ಮರಾಠಾ ರಾಜ್ಯೊಡು ಸಾಂಬಾರ್ ನ್ ಸುರುಕು ಮಲ್ತೆರ್.ದಂತಕಥೆ ಪನ್ಪುಂಡು ಸಂಭಾಜಿನ ಭೇಟಿಡ್, ಒರಿ ರಾಜೆ ಅತ್ತಂದೆ ಅರೆನ ರಾಜಮನೆತನದ ಬಾಣಸಿಗೆರ್ ಸಾಂಪ್ರದಾಯಿಕ ಅಮ್ತಿಡ್ (ಮಸೂರದ ಸೂಪ್) ಕೋಕುಮ್ ನ್ ತಾರಾಯಿಗ್ ಬದಲಾವಣೆ ಮಲ್ತೆರ್, ಬೊಕ್ಕ ಅಯಿಕ್ ಕೆಲವು ತರಕಾರಿಲೆನ್ ಸೇರಾವೆರ್: ಫಲಿತಾಂಶದ ಕರಿಗ್ ಸಂಭಾಜಿನ ಪುದರ್ಡ್ ಸಾಂಬಾರ್ ಅತ್ತಂದೆ ಸಂಭಾರ್ ಪಂಡ್ದ್ ಪುದರ್ ದೀಯೆರ್.ಸೌರೀಶ್ ಭಟ್ಟಾಚಾರ್ಯ, ದಿ ಬ್ಲೂಮ್ಸ್ಬರಿ ಹ್ಯಾಂಡ್ಬುಕ್ ಆಫ್ ಇಂಡಿಯನ್ ಕುಸಿನ್ (೨೦೨೩) ಡ್, ಶಾಹುಜಿ I ಬೊಕ್ಕ ಸಂಭಾಜಿನ ಅಪ್ಪೆ ಅರ್ಧ ಮೆಗ್ಯೆಪಲಯನಾಕ್ಲು ಬೊಕ್ಕ ಎಡ್ಡೆ ಸಂಬಂಧೊಡು ಇಜ್ಜೆರ್ ಪಂಡ್ದ್ ಗಮನಿಸಯೆರ್, ಉಂದು ಈ ದಂತಕಥೆದ ವಿಶ್ವಾಸಾರ್ಹತೆನ್ ಕಮ್ಮಿ ಮಲ್ಪುಂಡು. ಆಂಡಲಾ, ರಡ್ಡ್ ಕುಟುಮೊಲೆನ ನಡುಟು ಸೌಹಾರ್ದಯುತ ಸಂಬಂಧೊಲೆನ್ ಸ್ಥಾಪಿಸವುನ ಪ್ರಯತ್ನೊದ ಭಾಗವಾದ್ ಶಾಹುಜಿ ಈ ಖಾದ್ಯೊಗು ಸಂಭಾಜಿನ ಪುದರ್ ದೀಯೆರ್ ಪನ್ಪಿನ ಸಾಧ್ಯತೆ ಉಂಡು ಪಂದ್ ಭಟ್ಟಾಚಾರ್ಯೆರ್ ಸೇರ್ಪಾವೆರ್.

ಪ್ರಾದೇಶಿಕ ಬದಲಾವಣೆಲು

ಸಾಂಬಾರ್ ನ್ ತಿನ್ಪಿನ ಜನಕುಲೆನ ಆದ್ಯತೆಲೆನ್ ಅವಲಂಬಿಸಾದ್ ಮಸಾಲೆದ ಮಟ್ಟೊಡು ಬದಲಾವಣೆ ಆವೊಲಿ, ಅಂಚನೆ ಪ್ರಾದೇಶಿಕ ಬದಲಾವಣೆಲೆನ್ ಅವಲಂಬಿಸಾದ್. ಉಂದೆನ್ ಸಾಮಾನ್ಯವಾದ್ ದೋಸೆ ಅತ್ತ್ಂಡ ಇಡ್ಲಿದ ಒಟ್ಟುಗು ಉನ್ಪೆರ್. ಕೆಲವೊಂಜಿ ಸರ್ತಿ, ಉಂದೆನ್ ಅರಿತ ಒಟ್ಟುಗು ಬೆರೆಸಾದ್ ಮುರುಕ್ಕು ಅತ್ತ್ಂಡ ಆಲೂಗಡ್ಡೆ ಚಿಪ್ಸ್ ದಂಚಿನ ಗರಿಗರಿತ ಆಹಾರೊಲೆನೊಟ್ಟುಗು ತಿನ್ಪೆರ್. ಉಂದು ತಮಿಳುನಾಡುದ ಪಾಕಪದ್ಧತಿದ ಒಂಜಿ ಪ್ರಮುಖ ಆಹಾರ.

ಭಾರತದ ದಕ್ಷಿಣ ರಾಜ್ಯೊಲೆಡ್, ಅಂಚನೆ ಕರ್ನಾಟಕ, ಆಂಧ್ರಪ್ರದೇಶ, ತೆಲಂಗಾಣ, ಕೇರಳ ಬೊಕ್ಕ ತಮಿಳುನಾಡುಡ್ ಸಾಂಬಾರ್ ನ್ ಮಸೂರ ಅತ್ತ್ಂಡ ತಾರಾಯಿದ ಒಟ್ಟುಗು ಬೇತೆ ಬೇತೆ ತರಕಾರಿಲೆನ್ ಬಳಸದ್ ಮಲ್ಪುವೆರ್. ಪ್ರತಿಯೊಂಜಿ ಪ್ರದೇಶೊಗು ಸಾಂಬಾರ್ ಮಲ್ಪುನ ತನ್ನನೇ ಆಯಿನ ಆವೃತ್ತಿ ಉಂಡು; ಒಂಜೇ ತರಕಾರಿಲೆನ್ ಬಳಕೆ ಮಲ್ಪುನಗಲಾ, ಮಸಾಲೆಲು ಬೊಕ್ಕ ಪದಾರ್ಥೊಲು, ಅಂಚನೆ ವಿಧಾನೊಲು ಬೇತೆ ಬೇತೆ ಉಪ್ಪುಂಡು.ಕರಾವಳಿ ಕನಾಟಕದ ತುಳು ಪಾತೆರುನ ಪ್ರದೇಶೊಲೆಡ್ ತಾರಾಯಿನ್ ಪ್ರಧಾನವಾದ್ ಕೊದ್ದೆಲ್ (ಸಾಂಬಾರ್) ತಯಾರ್ ಮಲ್ಪುವೆರ್. ತುರಿದ್ ದೀತಿನ ತಾರಾಯಿನ್ ಮಸಾಲೆಡ್ ಪುಡಿ ಮಲ್ತ್ ದ್ ಒಂಜಿ ಪೇಸ್ಟ್ ಮಲ್ಪುವೆರ್, ಉಂದೆನ್ ಬೇಯಿನ ತರಕಾರಿಲೆಗ್ ಸೇರಾವೊಡು.ಕನ್ನಡ ಬಾಸೆ ಪಾತೆರುನ ಪ್ರದೇಶೊಲೆಡ್ ಉಂದೆನ್ ಸಾರು ಪನ್ಪೆರ್.

ಉಲ್ಲೇಕೊ

[[ವರ್ಗ:Kerala Culture Month 2026]]