ಸೈಪ್ರಸ್

ಸೈಪ್ರಸ್ , ಅಧಿಕೃತವಾದ್ ಸೈಪ್ರಸ್ ಗಣರಾಜ್ಯ , ಪೂರ್ವ ಮೆಡಿಟರೇನಿಯನ್ ಸಮುದ್ರೊಡು ಉಪ್ಪುನ ಒಂಜಿ ದ್ವೀಪ ದೇಶ. ಭೌಗೋಳಿಕವಾದ್ ಉಂದು ಪಶ್ಚಿಮ ಏಷ್ಯಾಡ್ ಉಂಡು. ಮೆಡಿಟರೇನಿಯನ್ ಕಡಲ್‌ಡ್ ಇಪ್ಪುನ ದೇಸೊಲೆಡ್ ಸೈಪ್ರಸ್ ಇಸ್ತೀರ್ನೊಡು ಮೂಜಿನೆ ಮಲ್ಲ ದೇಸೊ ಅಂಚನೆ ಎಚ್ಚ ಜನಸಂಖ್ಯೆ ಇಪ್ಪುನ ದೇಸೊ ಆದುಂಡು.ಪ್ರಪಂಚೊಡು ಜನಸಂಕೆನ್ ಲೆಕ್ಕ ದೆತೊಂಡ ೫೧ನೇ ಸಾನೊಡು ಉಂಡು. ಸೈಪ್ರಸ್ ಒಂಜಿ ದ್ವೀಪರಾಷ್ಟ್ರ ಆಯಿನೆಡ್ದಾವರ ಬೇತೆ ದೇಸೊಲೊಟ್ಟುಗು ಬೂಮಿದ ಮಿತ್ ಗಡಿಲೆನ್ ಪಟ್ಟೊಂದಿಜಿ. ಆಂಡ ಯುನೈಟೆಡ್ ಕಿಂಗ್‌ಡಮ್‌ದ ವಸಾಹತು ಆಯಿನ ಅಕ್ರೊಟಿರಿ ಬೊಕ್ಕ ಧೆಕೆಲಿಯಾ ಪುದರ್‌ದ ಪ್ರದೇಸೊಲು ಸೈಪ್ರಸ್‌ದ ಬೂಬಾಗೊಗು ತಾಗ್‌ದ್ ಉಲ್ಲ. ಸೈಪ್ರಸ್‌ದ ಪಡ್ಡಾಯಿಡ್ ಗ್ರೀಸ್, ಬಡಕಾಯಿಡ್ ಈಜಿಪ್ಟ್ , ತೆಂಕಾಯಿಡ್ ತುರ್ಕಿ, ಮೂಡಾಯಿಡ್ ಸಿರಿಯಾ ದೇಸೊಲು ಉಲ್ಲ. ಈಶಾನ್ಯ ಭಾಗೊಡು ಉತ್ತರ ಸೈಪ್ರಸ್ ಪ್ರದೇಸೊ ಉಂಡು.

ಸೈಪ್ರಸ್ ದೇಸೊದ ಅದೀಕೃತ ಬಾಸೆ ಗ್ರೀಕ್ ಬುಕ್ಕ ತುರ್ಕಿ ಬಾಸೆ. ಈ ದೇಸೊಡು ೭೨%ದಾತ್ ಕ್ರಿಸ್ತಾನೆರ್ ಉಲ್ಲೆರ್. ಅಂಚನೆ ೨೫% ಮುಸಲ್ಮಾನೆರ್, ೨%ದಾತ್ ದರ್ಮೊನು ನಂಬಂದಿನಕ್ಲು ಇತ್ಂಡ, ೧% ಬೇತೆ ದರ್ಮೊದ ಜನೊಕುಲು ಉಲ್ಲೆರ್. ಸೈಪ್ರಸ್ ದೇಸೊದ ಒಟ್ಟು ಜನಸಂಖ್ಯೆ ೨೦೨೬ನೇ ಇಸವಿದ ಪ್ರಕಾರ ೧೩,೮೨,೦೦೦ ಉಂಡು. ಈ ದೇಸೊದ ಇಸ್ತೀರ್ನ ೯,೨೫೧ ಚದರ ಕಿಲೋಮೀಟರ್. ಜನಸಂಖ್ಯೆದ ಲೆಕ್ಕೊಡು ಸೈಪ್ರಸ್ ೮೨ನೇ ಸ್ತಾನೊಡು ಇತ್ಂಡ, ಇಸ್ತೀರ್ನೊದ ಲೆಕ್ಕೊಡು ೧೬೨ನೇ ಸ್ತಾನೊಡು ಉಂಡು.

ಸೈಪ್ರಸ್ ಬೂಬಾಗೊಗು ದುಂಬು ಅಲಾಶಿಯಾ ಪನ್ಪಿನ ಪುದರ್ ಇತ್ಂಡ್. ಮುಲ್ಪ ಜನೊಕ್ಲು ಬತ್ತ್‌ದ್ ನಿಲೆ ಆಯಿನ ೧೩,೦೦೦ ವರ್ಸೊಗು ದುಂಬು. ಬೇತೆ ಬರಿಟ್ ಬೋಂಟೆ ಮಲ್ತೊಂದಿತ್ತಿನ ಜನೊಕ್ಲು ಬತ್ತ್‌ದ್ ಮುಲ್ಪ ನಿಲೆ ಆಯೆರ್. ಕೆಲವು ಸಾವಿರ ವರ್ಸೊಡ್ದು ಬೊಕ್ಕ ಬೆನ್ನಿನ್ ಅದಾರಿತವಾದ್ ಇತ್ತಿನ ಜನಾಂಗೊಲು ಮುಲ್ಪ ಬತ್ ನಿಲೆ ಆಯೊ. ಕಂಚ್‌ದ ಯುಗೊತ್ತ ಕಡೆತ ಪೊರ್ತುಡು, ಕ್ರಿಸ್ತಪೂರ್ವ ೨ನೆ ಸಹಸ್ರಮಾನೊದ ಪೊರ್ತುಡು ಮೈಸೀನಿಯನ್ ಗ್ರೀಕೆರ್ ಆಕ್ರಮಣ ಮಲ್ತೆರ್. ಮೊಕ್ಲು ಅತ್ತಂದೆ, ಅಲೆಕ್ಸಾಂಡರ್, ಅಸಿರಿಯನ್, ಈಜಿಪ್ಟಿಯನ್ ಬೊಕ್ಕ ಪರ್ಷಿಯನ್ ಸಾಮ್ರಾಜ್ಯೊಲೆನ್ ಸೇರಾದ್ ಕೆಲವು ಪ್ರಮುಖ ಶಕ್ತಿಲು ಸೈಪ್ರಸ್‍ದ ಮಿತ್ತ್ ಆಕ್ರಮಣ ಮಲ್ತ್‌ದ್, ತನ್ಕುಲೆ ವಸಾಹತುವಾದ್ ಮಲ್ತೊಂದೆರ್. ಅಯಿರ್ದ್ ಬೊಕ್ಕ ಟಾಲೆಮಿಕ್ ಸಾಮ್ರಾಜ್ಯ, ಪ್ರಾಚೀನ ಬೊಕ್ಕ ಪೂರ್ವ ರೋಮನ್ ಸಾಮ್ರಾಜ್ಯ, ಅರಬ್ ಕ್ಯಾಲಿಫೇಟ್, ಫ್ರೆಂಚ್ ಲುಸಿಗ್ನಾನ್ ಬೊಕ್ಕ ವೆನೆಟಿಯನ್ ಸಾಮ್ರಾಜ್ಯಲು ಮುಲ್ಪ ಆಳ್ವಿಕೆ ಮಲ್ತೊ. ಒಟ್ಟೊಮನ್ ತುರ್ಕೆರ್ ಸೈಪ್ರಸ್‌ಡ್ ಅಂದಾಜಿ ೩೦೦ ವರ್ಸೊ ಮುಟ್ಟ ಆಳಿಯೆರ್. ೧೮೭೮ನೇ ಇಸವಿಡ್ ಸೈಪ್ರಸ್ ಬ್ರಿಟಿಷೆರೆನ ಆಡಳಿತೊಗು ಬತ್ತ್ಂಡ್. ೧ನೇ ತಾರೀಕ್ ಅಕ್ಟೋಬರ್‌ ೧೯೬೦ನೇ ಇಸವಿಡ್ ಸೈಪ್ರಸ್ ಸ್ವತಂತ್ರ ದೇಸೊ ಆದ್ ಉದಿತ್ ಬತ್ಂಡ್.