ಹವಾ ಮಹಲ್

ಹವಾ ಮಹಲ್

ಹವಾ ಮಹಲ್ ಭಾರತ ದೇಶದ ರಾಜಸ್ಥಾನದ ಜೈಪುರ ನಗರಡಿಪ್ಪುನ ಅರಮನೆ. ಕೆಂಪು ಬುಕ್ಕೊ್ಕ ಗುಲಾಬಿ ಬಣ್ಣದ ಮರಳುಕಲ್ಲ್ ಡ್ದ್ ನಿರ್ಮಾಣ ಆಯಿನ ಉಂದು ಜೈಪುರದ ನಗರ ಅರಮನೆದ ಅಂಚಿಡ್ ಉಂಡು, ಬುಕ್ಕೊ್ಕ ಜೆನಾನಾ ಅತ್ತ್ಂಡ ಪೊಣ್ಣುಲೆನ ಕೋಣೆಲೆಗ್ ವಿಸ್ತಾರವಾದುಂಡು. ಹವಾ ಮಹಲ್, ಉಂದೆನ್ "ಗಾಳಿದ ಅರಮನೆ"ಪಂಡ್ದ್ ಲೆಪ್ಪುವೆರ್. ಉಂದೆನ್ ೧೭೯೯ಡ್ ಮಹಾರಾಜ ಸವಾಯಿ ಪ್ರತಾಪ್ ಸಿಂಗ್ ನಿರ್ಮಾಣ ಮಲ್ತೆರ್. ಉಂದೆಟ್ ಮಸ್ತ್ ಎಲ್ಯ ಎಲ್ಯ ಕಿಟಕಿಲು ಬುಕ್ಕೊ್ಕ ಬಾಲ್ಕನಿಲು ಉಪ್ಪುನೆರ್ದಾತ್ರ ಉಂದು ಒಂಜಿ ಜೇನುಗೂಡುದಲೆಕ ತೋಜುಂಡು.

ಹವಾ ಮಹಲ್ ನ್ ರಚನೆ ಬುಕ್ಕೊ್ಕ ಕಟ್ಟಿನಕ್ಲು

ರಾಜಸ್ಥಾನೊದ ಜೈಪುರ ನಗರೊದ ಸ್ಥಾಪಕೆರ್ ಆಯಿನ ಮಹಾರಾಜ ಸವಾಯಿ ಜೈ ಸಿಂಗ್ ನ ಮೊಮ್ಮಗ ಮಹಾರಾಜ ಸವಾಯಿ ಪ್ರತಾಪ್ ಸಿಂಗ್ 1799ಡ್ ಈ ರಚನೆನ್ ನಿರ್ಮಾಣ ಮಲ್ತೆರ್.ಖೇತ್ರಿ ಮಹಲ್ ದ ಅನನ್ಯ ರಚನೆಡ್ದ್ ಆರ್ ಎಚ್ಚ ಸ್ಫೂರ್ತಿ ಪಡೆದ್ ಈ ಭವ್ಯ ಬುಕ್ಕೊ್ಕ ಐತಿಹಾಸಿಕ ಅರಮನೆನ್ ನಿರ್ಮಾಣ ಮಲ್ತೆರ್.ಉಂದೆನ್ ಲಾಲ್ ಚಂದ್ ಉಸ್ತಾದ್ ಡಿಸೈನ್ ಮಲ್ತೆರ್. ಐನ್ ಮಹಡಿದ ಪಿದಯಿದ ಭಾಗೊ ಒಂಜಿ ಜೇನುಗೂಡುದಲೆಕ ಉಂಡು. ಉಂದೆತ 953 ಎಲ್ಯ ಕಿಟಕಿಲೆನ್ ಜಾರೋಖಾಸ್ ಪಂಡ್ದ್ ಲೆಪ್ಪುವೆರ್ ಉಂದೆನ್ ಜಟಿಲವಾದ್ ಲ್ಯಾಟಿಸ್ ವರ್ಕ್ ಡ್ ಅಲಂಕರಿಸವೆರ್.ಲ್ಯಾಟಿಸ್ ವಿನ್ಯಾಸದ ಮೂಲ ಉದ್ದೇಶ ಪಂಡ ರಾಜಮನೆತನದ ಪೊಣ್ಣುಲು ನಿತ್ಯಜೀವನೊನು ಬುಕ್ಕೊ್ಕ ಕೆಳ್ಗ್ ಬೀದಿಡ್ ಆಚರಣೆ ಮಲ್ಪುನ ಪರ್ಬೊಲೆನ್ ತೂವಂದೆ ತೂಯೆರೆ ಅನುವು ಮಲ್ಪುನವು. ಈ ವಾಸ್ತುಶಿಲ್ಪದ ಲಕ್ಷಣೊ ವೆಂಚುರಿ ಪರಿಣಾಮೊಡ್ದ್ ತಂಪು ಗಾಳಿನ್ ಪಾಸ್ ಮಲ್ಪೆರೆ ಅನುವು ಮಲ್ಪುಂಡು.ಅಂಚಾದ್ ಬೇಸಿಗೆಡ್ ಎಚ್ಚಿನ ತಾಪಮಾನೊಡು ಇಡೀ ಪ್ರದೇಶೊನು ಮಸ್ತ್ ಆಹ್ಲಾದಕರವಾದ್ ಮಲ್ಪುಂಡು.ಬೀದಿದ ನೋಟೊಡ್ದ್ ಹವಾ ಮಹಲ್ ನ್ ಮಸ್ತ್ ಜನ ತೂದು ಅರಮನೆದ ಎದುರುದ ಭಾಗ ಪಂದ್ ತೆರಿಯೊನುವೆರ್, ಆಂಡ ಉಂದು ಪಿರವುದ ಭಾಗ.

ಸಂರಕ್ಷಣೆ ಬುಕ್ಕೊ್ಕ ನಿರ್ವಹಣೆ

೨೦೦೬ಡ್, ೫೦ ವರ್ಸೊದ ಅಂತರೊಡ್ದ್ ಬುಕ್ಕೊ್ಕ, ೪.೫೬೮ ಮಿಲಿಯನ್ ರೂಪಾಯಿದ ಅಂದಾಜಿ ವೆಚ್ಚೊಡು ಸ್ಮಾರಕೊಗು ಒಂಜಿ ಫೇಸ್ ಲಿಫ್ಟ್ ಕೊರ್ಪಿನ ನಿಟ್ಟಿಡ್ ಮಹಲ್ ಡ್ ನವೀಕರಣೊದ ಬೇಲೆಲೆನ್ ಮಲ್ತೆರ್.ಕಾರ್ಪೊರೇಟ್ ಕ್ಷೇತ್ರ ಜೈಪುರದ ಐತಿಹಾಸಿಕ ಸ್ಮಾರಕೊಲೆನ್ ಸಂರಕ್ಷಣೆ ಮಲ್ಪೆರೆ ಸಹಾಯ ಮಲ್ತ್ಂಡ್ ಬುಕ್ಕೊ್ಕ ಯುನಿಟ್ ಟ್ರಸ್ಟ್ ಆಫ್ ಇಂಡಿಯಾ ಅಯಿನ್ ನಡಪಾಯೆರೆ ಹವಾ ಮಹಲ್ ನ್ ಅಳವಡಿಸೊಂಡು.ಈ ಅರಮನೆ ಒಂಜಿ ಮಲ್ಲ ಸಂಕೀರ್ಣೊದ ವಿಸ್ತಾರವಾದ್ ಉಪ್ಪುನ ಭಾಗ. ಕಲ್ಲ್ ಡ್ ಕೆತ್ತೆದ ಪರದೆಲು, ಎಲ್ಯ ಕ್ಯಾಸೆಮೆಂಟ್ ಲು, ಬುಕ್ಕೊ್ಕ ಕಮಾನುದ ಛಾವಣಿಲು ಈ ಜನಪ್ರಿಯ ಪ್ರವಾಸಿ ತಾಣೊದ ಕೆಲವು ಲಕ್ಷಣೊಲು. ಸ್ಮಾರಕೊಡು ಸೂಕ್ಷ್ಮವಾದ್ ಮಾದರಿ ಮಲ್ತಿನ ತೂಕದ ಕಾರ್ನಿಸ್ ಲುಲಾ ಉಂಡು.

ವಾಸ್ತುಶಿಲ್ಪ

ಈ ಅರಮನೆ ಐನ್ ಮಹಡಿದ ಪಿರಮಿಡ್ ಆಕಾರದ ಸ್ಮಾರಕ ಆದುಂಡು. ಉಂದು ಸುಮಾರ್ ೫೦ ಅಡಿ (೧೫ ಮೀ) ಎತ್ತರೊಗು ಏರುಂಡು. ರಚನೆದ ಮಿತ್ತ್ ದ ಮೂಜಿ ಮಹಡಿಲು ಒಂಜಿ ಕೋಣೆದ ಅಗಲೊಡು ಉಪ್ಪುಂಡು, ಆಂಡ ಸುರುತ ಬುಕ್ಕೊ್ಕ ರಡ್ಡನೆ ಮಹಡಿಲೆಡ್ ಅಯಿಕ್ಲೆನ ಎದುರುಡು ಅಂಗಳೊಲು ಉಪ್ಪುಂಡು. ಎದುರುದ ಎತ್ತರ, ಬೀದಿಡ್ದ್ ತೂನಗ, ಒಂಜಿ ಜೇನುಗೂಡುದಲೆಕ ಉಂಡು, ಉಂದೆಟ್ ಎಲ್ಯ ಗುಂಡಿಲು ಉಂಡು. ಪ್ರತಿಯೊಂಜಿ ಪೋರ್ಥೋಲ್ ಡ್ ಮಿನಿಯೇಚರ್ ಕಿಟಕಿಲು ಬುಕ್ಕೊ್ಕ ಕೆತ್ತೆದ ಮರಳುಕಲ್ಲುದ ಗ್ರಿಲ್ಸ್, ಫಿನಿಯಲ್ಸ್ ಬುಕ್ಕೊ್ಕ ಡೋಮ್ಸ್ ಉಂಡು. ಉಂದು ಅರೆ-ಅಷ್ಟಕೋನ ಕೊಲ್ಲಿಲೆನ ದ್ರವ್ಯರಾಶಿದ ರೂಪೊನು ಕೊರ್ಪುಂಡು, ಸ್ಮಾರಕೊಗು ಅಯಿತ ಅನನ್ಯ ಮುಖಭಾಗೊನು ಕೊರ್ಪುಂಡು. ಕಟ್ಟಡದ ಪಿರವುದ ಮುಖೊಟು ಕನಿಷ್ಠ ಅಲಂಕಾರೊಡು ಸ್ತಂಭೊಲು ಬುಕ್ಕೊ್ಕ ಕಾರಿಡಾರ್ ಲೆನ್ ಕಟ್ಟ್ ದ್ ಮಲ್ತಿನ ಕೋಣೆಲು ಉಂಡು, ಬುಕ್ಕೊ್ಕ ಉಂದು ಮಿತ್ತ್ ದ ಮಹಡಿ ಮುಟ್ಟ ತಲುಪುಂಡು. ಲಾಲ್ ಚಂದ್ ಉಸ್ತಾದ್ ವಾಸ್ತುಶಿಲ್ಪಿ ಆದಿತ್ತೆರ್. ಕೆಂಪು ಬುಕ್ಕೊ್ಕ ಗುಲಾಬಿ ಬಣ್ಣದ ಮರಳುಕಲ್ಲು, ನಗರೊಡುಪ್ಪುನ ಬೇತೆ ಸ್ಮಾರಕೊಲೆನ ಅಲಂಕಾರೊಗು ಅನುಗುಣವಾದ್, ಅಯಿತ ಬಣ್ಣ ಜೈಪುರೊಗು ಕೊರ್ತಿನ "ಗುಲಾಬಿ ನಗರ" ಪನ್ಪಿನ ಪುದರ್ ಗ್ ಪೂರ್ತಿ ಸಾಕ್ಷಿಯಾದುಂಡು. ಜಟಿಲವಾದ್ ಕೆತ್ತೆದ ಝರೋಖೊಲೆನ್ (ಕೆಲವು ಮರತ್ತ ಮಲ್ಪುನವು) 953 ಗೂಡುಲೆನ್ ಒಟ್ಟು ಮಲ್ತ್ ದ್ ಅಯಿತ ಮುಖಭಾಗೊ ರಚನೆದ ಸಾದಾ ತೋಜುನ ಪಿರವುದ ಭಾಗೊಗು ತೀರಾ ವ್ಯತಿರಿಕ್ತವಾದುಂಡು. ಐತ ಸಾಂಸ್ಕೃತಿಕ ಬುಕ್ಕೊ್ಕ ವಾಸ್ತುಶಿಲ್ಪದ ಪರಂಪರೆ ಹಿಂದೂ ರಾಜಪುತ್ ವಾಸ್ತುಶಿಲ್ಪ ಬುಕ್ಕೊ್ಕ ಇಸ್ಲಾಮಿಕ್ ಮೊಘಲ್ ವಾಸ್ತುಶಿಲ್ಪದ ಸಮ್ಮಿಳನೊದ ಪ್ರತಿಬಿಂಬ; ರಾಜಪುತ್ ಶೈಲಿನ್ ಗುಮ್ಮಟದ ಛಾವಣಿಲು, ಫ್ಲೂಟೆಡ್ ಸ್ತಂಭೊಲು, ಕಮಲ, ಬುಕ್ಕೊ್ಕ ಪುಷ್ಪದ ನಮೂನೆಲೆನ ರೂಪೊಡು ತೂವೊಲಿ, ಬುಕ್ಕೊ್ಕ ಇಸ್ಲಾಮಿಕ್ ಶೈಲಿ ಅಯಿತ ಕಲ್ಲ್ ದ ಜೋಡಣೆದ ಫಿಲಿಗ್ರೀ ಕೆಲಸೊಡು ಬುಕ್ಕೊ್ಕ ಕಮಾನುಲೆಡ್ ತೋಜುಂಡು. ನಗರ ಅರಮನೆದ ಕಡೆಟ್ ಹವಾ ಮಹಲ್ ಗ್ ಪ್ರವೇಶ ಒಂಜಿ ಸಾಮ್ರಾಜ್ಯಶಾಹಿ ಬಾಗಿಲುಡ್ದ್ ಉಂಡು. ಉಂದು ಒಂಜಿ ಮಲ್ಲ ಅಂಗಳೊಗು ತೆರೆಪುಂಡು. ಉಂದೆಟ್ ಮೂಜಿ ಕಡೆಟ್ ರಡ್ಡ್ ಮಹಡಿದ ಕಟ್ಟಡೊಲು ಉಂಡು, ಪೂರ್ವೊಡು ಹವಾ ಮಹಲ್ ಸುತ್ತುವರಿದ್ ಉಂಡು. ಈ ಅಂಗಳೊಡು ಒಂಜಿ ಪುರಾತತ್ತ್ವ ಶಾಸ್ತ್ರದ ವಸ್ತುಸಂಗ್ರಹಾಲಯಲಾ ಉಂಡು.

ಮಹಲ್ ದ ಸೊಬಗು ಬುಕ್ಕೊ್ಕ ಅಂತರ್ನಿರ್ಮಿತ ಒಳಾಂಗಣೊಗು ಕಾರಣವಾದ್ ಹವಾ ಮಹಲ್ ನ್ ಮಹಾರಾಜ ಜೈ ಸಿಂಗ್ ನ ಚೆಫ್-ಡಿ'ಯೂವ್ರೆ ಪಂಡ್ದ್ ಲಾ ಲೆಪ್ಪುವೆರ್. ಕೋಣೆಲೆಡ್ ತಂಪು ಮಲ್ಪುನ ಪರಿಣಾಮ, ಮುಖಭಾಗೊದ ಎಲ್ಯ ಕಿಟಕಿಲೆಡ್ದ್ ಪೋಪಿನ ಗಾಳಿಡ್ದ್ ಒದಗಿಸಲ್ಪಡುಂಡು, ಪ್ರತಿಯೊಂಜಿ ಕೋಣೆದ ಮಧ್ಯೊಡು ಒದಗಿಸಾಯಿನ ಕಾರಂಜಿಲೆಡ್ದ್ ವರ್ಧನೆ ಆಪುಂಡು.ಹವಾ ಮಹಲ್ ದ ಮಿತ್ತ್ ದ ರಡ್ಡ್ ಮಹಡಿಲೆಗ್ ರಾಂಪ್ ಮೂಲಕ ಮಾತ್ರ ಪೋವೊಲಿ. ಈ ಮಹಲ್ ನ್ ರಾಜಸ್ಥಾನ ಸರ್ಕಾರದ ಪುರಾತತ್ತ್ವ ಶಾಸ್ತ್ರದ ಇಲಾಖೆ ನಡಪಾವೊಂದುಂಡು.