ಹಾಂಗ್ ಕಾಂಗ್

ಹಾಂಗ್ ಕಾಂಗ್ ಚೀನಾದ ಒಂಜಿ ವಿಶೇಷ ಆಡಳಿತ ಪ್ರದೇಶ. ಇಂದೆತ ಒಟ್ಟು ಇಸ್ತೀರ್ನೊ 2,754.97 ಚದರ ಕಿಲೋಮೀಟರ ಉಂಡು. ಈ ಜಾಗೆಡ್ ಹಾಂಗ್ ಕಾಂಗ್ ದ್ವೀಪೊ, ಕೌಲೂನ್ ಬುಕ್ಕ ಪೊಸ ಪ್ರದೇಸೊಲು- ಈ ಮೂಜಿ ಜಾಗೆಲು ಸೇರ್‌ದ್ ಹಾಂಗ್ ಕಾಂಗ್ ಉಂಡಾತ್ಂಡ್. ಹಾಂಗ್ ಕಾಂಗ್ ಜಗತ್‌ಡ್ ಎಚ್ಚ ದಟ್ಟವಾದ್ ಜನಸಂಖ್ಯೆ ಉಪ್ಪುನ ಪ್ರದೇಸೊಲೆಡ್ ನಾಲನೇ ಸ್ತಾನೊಡು ಉಂಡು. ಹಾಂಗ್ ಕಾಂಗ್‌ದ ಇತ್ತೆದ ಒಟ್ಟು ಜನಸಂಕ್ಯೆ ೨೦೨೩ದ ಸಮೀಕ್ಷೆದ ಪ್ರಕಾರ ೭೪,೯೮,೧೦೦ ಉಂಡು. ಜನಸಂಕೆನ್ ಲೆಕ್ಕ ಪತ್ತಿಂಡ ಹಾಂಗ್ ಕಾಂಗ್ ಪ್ರಪಂಚೊಡು ೧೦೨ನೇ ಸಾನೊಡು ಉಂಡು. ಪಿರಾಕ್‌ಡ್ ಕೃಷಿ ಬೊಕ್ಕ ಮೀನುಗಾರಿಕೆ ಮಲ್ತೊಂದಿತ್ತಿನ ಹಳ್ಳಿ ಆದಿತ್ತಿನ ಹಾಂಗ್ ಕಾಂಗ್, ಇತ್ತೆ ಪ್ರಪಂಚದ ಮಾಮಲ್ಲ ಆರ್ಥಿಕ ಕೇಂದ್ರೊ ಆದ್ ಬೊಕ್ಕ ವಾಣಿಜ್ಯ ಬಂದರುಲೆಡ್ ಒಂಜಿ ಆದುಂಡು. ಹಾಂಕಾಂಗ್ ಪ್ರಪಂಚದ ಹಣಕಾಸು ಕೇಂದ್ರಲೆಡ್ ೩ನೇ ಸ್ತಾನೊಡು ಉಂಡು. ೯ನೇ ಮಾಮಲ್ಲ ರಫ್ತುದಾರ ದೇಸೊ, ೮ನೇ ಮಾಮಲ್ಲ ಆಮದುದಾರ ದೇಸೊಲಾ ಅಂದ್‌. ಹಾಂಗ್ ಕಾಂಗ್ ಡಾಲರ್ ಮುಲ್ಪದ ಅಧೀಕೃತ ಕರೆನ್ಸಿ. ಈ ಕರೆನ್ಸಿ ಪ್ರಪಂಚೊಡು ಎಚ್ಚ ವ್ಯವಹಾರ ಮಲ್ಪುನ ಕರೆನ್ಸಿಲೆಡ್ ೯ನೇ ಸ್ತಾನೊಡು ಉಂಡು. ಕೋಟ್ಯಾಧಿಪತಿ ಜನಕುಲು ಇಪ್ಪುನ ದೇಸೊಲೆಡ್ ೭ನೇ ಸ್ತಾನೊಡು ಉಂಡು. ಅಂಚನೆ, ಜಗತ್‌ಡ್ ಎಚ್ವ ತಲಾದಾಯೊ ಉಪ್ಪುನ ನಗರೊಲೆಡ್ ಒಂಜಿ.

೧೮೩೯-೧೮೪೨ದ ನಡುಟು ನಡತಿನ, ಸುರುತ ಅಫೀಮ್ ಯುದ್ಧೊಡು ಕ್ವಿಂಗ್ ರಾಜವಂಸೊ ಸೋತಿಬೊಕ್ಕ, ಈ ಪ್ರದೇಸೊ ಬ್ರಿಟಿಷೆರೆನ ಕೈಕ್ ಬತ್ತ್ಂಡ್. ಬ್ರಿಟಿಷೆರ್ ಮುಲ್ಪ ಇತ್ತಿನ ಕೌಲೂನ್ ದ್ವೀಪೊ ಬುಕ್ಕ ಹಾಂಕಾಂಗ್ ದ್ವೀಪೊ- ರಡ್ಡೆನ್ ಒಟ್ಟು ಸೇರಾಯೆರ್ ಬುಕ್ಕ ೯೯ ವರ್ಸೊದ ಬೋಗ್ಯಗ್ ದೆತೊಂದೆರ್. ರಡ್ಡನೆ ವಿಶ್ವ ಯುದ್ಧೊದ ಪೊರ್ತುಡು 1941 ಡ್ದ್ 1945 ಮುಟ್ಟ ಹಾಂಗ್ ಕಾಂಗ್‌ನ್ ಜಪಾನ್ ದೇಸೊ ಆಕ್ರಮಣ ಮಲ್ತ್ಂಡ್. 1997ನೇ ಇಸವಿಡ್ ಯುನೈಟೆಡ್ ಕಿಂಗ್‌ಡಂ ಚೀನಾ ದೇಸೊಗು ಹಾಂಕಾಂಗ್ ಬುಡ್ದು ಕೊರಿಂಡ್. ಸದ್ಯ ಹಾಂಕಾಂಗ್ ಒಂಜಿ ದೇಶ, ರಡ್ಡ್ ವ್ಯವಸ್ಥೆ ತತ್ವೊದ ಅಡಿಟ್ ಚೀನಾದ ನಿಯಂತ್ರಣೊಡು ಉಂಡು.

ಹಾಂಗ್ ಕಾಂಗ್ ಒಂಜಿ ಮಸ್ತ್ ಅಭಿವೃದ್ಧಿ ಆಯಿನ ಪ್ರದೇಶ ಆದುಂಡು. ಹಾಂಕಾಂಗ್‌ದ ಮಾನವ ಅಭಿವೃದ್ಧಿ ಸೂಚ್ಯಂಕ (HDI) ೦.೯೫೬ ಉಂಡು.