ಆಟಿದ ಪುಣ್ಣಮೆ

ಆಟಿ

ಆಟಿ ತಿಂಗೋಳು ತುಳುನಾಡ್ ದಕಲೆಗ್ ಮಸ್ತ್ ಕಷ್ಟಕರವಾಯಿನ ಕಾಲವಾದು ಇತ್ತುಂಡು.ಆಂಡಾ ಕಾಲಘಟ್ಟ ಬದಲಾದ್ ಬಡೊತನ, ರೋಗರುಜಿಲು ಕಡಿಮೆಯಾಂಡ್, ತುಳುನಾಡ್ ಬದಲಾಂಡ್. ಆಂಡಾಲಾ ಹಿರಿಯೆರ್ ಉಂಡು ಮಂದಿನ ಆಟಿದೊ ಕೆಲವು ಕಟ್ಟು ಕಟ್ಟಾಲೆಲು ಇತ್ತೆಲಾ ತುಳುಜನಕುಲು ಪಾಲನೆ ಮಂತೊಂದು ಉಲ್ಲೆರ್. ಅಂಚಿನ ಒಂಜಿ ಕಟ್ಟ್ ಕಟ್ದಾಟಳೆನೇ ತಡ್ಯ ಪುಡ್ಯಾಡುನು ಅಥಾವೋ ತಡ್ಯದ ಪೂಜೆ.

ಆಟಿದ ಪುಣ್ಣಮೆ

ತುಳುವರ್ ಆಟಿದ ಅಮವಾಸ್ಸ್ಯೆಗ್ ಪಾಲೆದ ಮರತ ಕೆತ್ತೆದ ಕಶಾಯ ಪರ್ಪೇರ್, ಈಶ್ವರ ದೇವಸ್ಥಾನೊಗು ಪೋದು ತೀರ್ಥ ಸ್ನಾನ ಮನ್ಪುವೇರ್ .ನಾಗರ ಪಂಚಮಿ ಬನ್ನಗ ನಾಗೊಗು ತನು(ಪೇರ್ ) ಮಯಿಪುವೇರ್. ಅಂಚೇನೇ ಆಟಿದ ಪುಣ್ಣಮೆದಾನಿ ತಡ್ಯ ಪುಡ್ಯಾಡುನು ಅಥಾವೋ ತಡ್ಯದ ಪೂಜೆ ಮನ್ಪುವೇರ್ .

ಕುಡುತ ಪೂ

ಆಟಿದ ಪುಣ್ಣಮೆದಾನಿ ತಡ್ಯ ಪುಡ್ಯಾಡುನು ಅಥಾವೋ ತಡ್ಯದ ಪೂಜೆ ಮನ್ಪರೆಗ್, ಅಗತ್ಯ ಬೋಡಾಯಿನ ವಸ್ತುವೇ ಕುಡುತ ಪೂ, ಅಯಿಕ್ ಆಟಿದ ಪುಣ್ಣಮೆ ದ ಒಂತೆ ದಿನೊಗು ದುಂಬುಗು, ಕುಡುನು ನೀರ್ ಡ್ ಪಾಡುದು ಒಂತೆ ದಿನೊ ನೀರ್ ಡ್ ಬೊದುಲರೆ ದೀವೊಡು. ಅಯಿಡ್ದ್ ಬೊಕ್ಕ ಅವೆನ್ ಮಣ್ಣುಡ್ ಪಾಡುದು, ಒಂಜಿ ಬಿಸಲೆನ್ ಕಂಕನೆ ಪಾಡೊಡು. ಆಟಿದ ಪುಣ್ಣಮೆ ದಾನಿ ಅವೆನ್ ದೆತ್ತುದು ತೂನಗ ಮಂಜಲ್ ಬಣ್ಣೊದ ಪೊರ್ಲು ಕಂಟಾಯಿನ ಪೂವುಲು ತಡ್ಯ ಪುಡ್ಯಾಡುನು ಅಥಾವೋ ತಡ್ಯದ ಪೂಜೆಗ್ ತಯಾರಾದು ಉಪ್ಪುವ.

ಆಟಿದ ಪುಣ್ಣಮೆ ದ ತಡ್ಯ ಪುಡ್ಯಾಡುನುಗ ತಡ್ಯ ಡ್ ಬರೆಪಿನ ಕ್ರಮ

ತಡ್ಯ ಪುಡ್ಯಾಡುನು ಅಥಾವ ತಡ್ಯ ದ ಪೂಜೆ ಪನ್ಪಿನಾವು ತುಳುನಾಡುದ ಆಟಿದ ಪುಣ್ಣಮೆದಾನಿ ಬರ್ಪಿನ ಒಂಜಿ ಆಚರಣೆ. ಆ ದಿನೊ ತಡ್ಯ ನ್ ಪೊರ್ಲುಡ್ ದೆಕ್ಕುದು, ಜೇಡಿ ಮಣ್ಣುಡು ಉಲಾಯಿ ಬೊಕ್ಕ ಪಿದಾಯಿ , ಪೊರ್ಲು ಡ್ ರೇಖೆ ದ ರಂಗೋಲಿ ಬರೆಪೇರ್. ಉಂದೆಕ್ ತಡ್ಯ ಡ್ ಬರೆಪಿನಿ ಪಂದ್ ಪನ್ಪೇರ್.

ಆಟಿದ ಪುಣ್ಣಮೆ ದ ತಡ್ಯ ಪುಡ್ಯಾಡುನುಗ ತಡ್ಯ ದ ಪೂಜೆದ ಕ್ರಮ

ತಡ್ಯ ಡ್ ಬರೆಯಿನ ಬೊಕ್ಕ, ಕುಡುತ ಪೂವುನು ತಡ್ಯ ದ ರಡ್ಡ್ ದಿಕ್ಕುಗುಲಾ ದೀದ್ ಅಲಂಕಾರ ಮನ್ಪುವೇರ್ . ಆತ್ ಮಾತ್ರ ಅತ್ತವಂದೆ ಆಟಿದ ಪೆಲತರಿನ್ ಬೇಯಿಪಾದ್ , ಅವೆನ್ಲಾ ತಡ್ಯ ದ ರಡ್ಡ್ ದಿಕ್ಕುಗುಲಾ ದೀದ್, ಅಯಿತ ಒಟ್ಟುಗ್ ಒಂಜಿ ಚೊಂಬು ನೀರ್ ದೀದ್ ತಡ್ಯ ದ ಪೂಜೆನ್ ಮನ್ಪುವೇರ್.

ಉಂದು ಜಾನಪದನೋ ಅಥಾವೋ ವೈಧಿಕ ಕ್ರಮನೋ

ಆಟಿದ ಪುಣ್ಣಮೆದ ದಿನೊತಾನಿ ಮನ್ಪುನ ತಡ್ಯ ಪುಡ್ಯಾಡುನು ಅಥಾವ ತಡ್ಯದ ಪೂಜೆ ಜಾನಪದನೋ ಅಥಾವೋ ವ್ಯಧಿಕ ಕ್ರಮನೋ ಪಂದ್ ಸಾಮಾನ್ಯವಾದ್ ಪೂರೆರೆಗ್ಲಾ ಮನಸ್ ಗ್ ಬರ್ಪಿನ ಒಂಜಿ ಪ್ರಶ್ನೆ. ಆಂಡಾ ಆಟಿದ ಪುಣ್ಣಮೆದ ತಡ್ಯ ಪುಡ್ಯಾಡುನು ಅಥಾವೋ ತಡ್ಯ ದ ಪೂಜೆಗ್ ಉಪಯೋಗಿಸುನ ಪೂರಾ ಸಾಮಾಗ್ರಿಲು ಪ್ರಾಕೃತಿಕವಾದ್ ತೋಜುದು ಬರ್ಪುಂಡು. ಅಂಚಾ ಈ ಆಚರಣೆ ಜಾನಪದವಾದುಂಡು ಪಂದ್ ತುಳು ಜಾನಪದ ವಿದ್ವಾಂಸೆರಾಯಿನ ಕುಂಡಂತಾಯೆರ್ ಅಭಿಪ್ರಾಯ ಪಂತೇರ್.