ಅಕ್ಕಮಕ್ಕೆನ ಬುಡಾರ

ಕುಡ್ಲದ ಅಕ್ಕಮಕ್ಕನ ಬುಡಾರ ಪಂಡ್ದ್‍ ಲೆಪ್ಪುನ ಹೋಟೆಲ್ ಅಕ್ಕಮಕ್ಕೆನ_ಬುಡಾರ : ತುಳುವೆರೆಗ್ ಕೇವಲ ಹೋಟೆಲ್ ಅತ್ತ್, ಶತಮಾನದ ಭಾವನಾತ್ಮಕ ನಂಟ್ ❣️

ಅಕ್ಕಮಕ್ಕೆನ ಹೋಟೆಲ್

ಕುಡ್ಲದ ಅಕ್ಕಮಕ್ಕೆನ ಬುಡಾರ ತುಳುವೆರೆಗ್ ಅವು ಕೇವಲ ಹೋಟೆಲ್ ಅತ್ತ್ ಅಯಿತ್ತ ಒಟ್ಟುಗು ತುಳುವೆರೆನವು ಒಂಜಿ ರೀತಿದ ಭಾವನಾತ್ಮಕವಾಯಿನ ನಂಟ್. ಕುಡ್ಲಡ್ ಇತ್ತೆ ಮಸ್ತ್ ಐಷಾರಾಮಿ ಹೋಟೆಲ್‌ಲು ತರೆದೆರ್ತ್‌ದ್ ಉಂತುದುಂಡು. ಪೈವ್ ಸ್ಟಾರ್, ತ್ರಿಸ್ಟಾರ್ ಇಂಚ ಬೇತೆ ಬೇತೆ ಸ್ಟಾರ್ ಹೋಟೆಲ್‌ಲು ಪುಟ್ಟ್‌ದ್ ಎಡ್ಡೆ ಸರ್ವೀಸ್‌‍ನ್‌ಲಾ ಕೊರೊಂದು ಉಂಡು. ಅಂಡ ೧೩೦ ವರ್ಸೊರ್ದು ದುಂಬೇ ಕುಡ್ಲಡ್ ಒಂಜಿ ಜನಪ್ರಿಯವಾಯಿನ ಹೋಟೆಲೊಂಜಿ ಇತ್ತ್ಂಡ್. ಅವು ಇತ್ತೆಲಾ ಗ್ರಾಹಕೆರೆಗ್ ಎಡ್ಡೆ ಸೇವೆನ್ ಕೊರೊಂದು ಉಂಡು. ಉಂದು ಅವಿಭಜಿತ ಜಿಲ್ಲೆದಕುಲೆಗ್ ಮಾತ ಚಿರಪರಿಚಿತವಾಯಿನವು.

ಅಕ್ಕಮಕ್ಕೆ

ಅಕ್ಕಮಕ್ಕೆ ಮೂಲತಃ ತಲಪಾಡಿದಾರ್. ಮದಿಮೆ ಆಯಿನ ಕೆಲವೇ ವರ್ಸೊಡು ಅರೆನ ಕಂಡನಿ ತೀರ್‌ದ್ ಪೋಯೆರ್. ಬೊಕ್ಕ ಬೇತೆ ಬೇತೆ ಕಾರಣೊಗಾತ್ರ ತಲಪಾಡಿದ ಊರುನು ಆರ್ ಬುಡುದು ಅರೆನ ಮೆಗ್ಯೆ ಐತ್ತಪ್ಪ ಮಾಡೆರೆನ ಒಟ್ಟುಗು ಕುಡ್ಲಡ್ ನೆಲೆ ಉಂತ್ಯೆರ್. ಆ ಪೊರ್ತುಡು ಮೆರೆನ ಎಲ್ಯ ಇಲ್ಲಲ್ ದೂರದ ಹಳ್ಳಿರ್ದ್ ಬರ್ಪುನ ಶಾಲೆದ ಜೋಕುಲೆಗ್ ಉಂತುನ ವ್ಯವಸ್ಥೆ ಇತ್ತ್ಂಡ್. ಬೊಕ್ಕ ಅಕುಲೆಗ್ ಮೂಜಿ ಪೊರ್ತು ಓನಸ್ಸ್ ಕೊರ್ಪುನವು ಅನಿವಾರ್ಯ ಆಂಡ್. ಕಾಂಡೆ ಕರಾವಳಿ ಶೈಲಿದ ಗಂಜಿದ ಓನಸ್ಸ್ ಎಟ್ಟಿದ ಚಟ್ನಿ. ಎಟ್ಟಿದ ಚಟ್ನಿ ಪಂಡ ಕಾಯಿಮುಣ್ಚಿ ಬೊಕ್ಕ ತಾರಾಯಿನ್ ಕಡೆದ್ ಅಯಿಕ್ಕ್ ಪೊಡಿ ಎಟ್ಟಿನ್ ಪೊದ್‌ತ್‌ದ್ ಬೆರವುನೆ. ಬಾರಿ ರುಚಿಕಟ್ಟಾಯಿನ ವಿಸೇಸ ಚಟ್ನಿ ಉಂದು. ಅಪಗ ಅಕ್ಕಮಕ್ಕೆನ ಬುಡಾರೊದು ಮೀನ್‌ದ ಓನಸ್ಸ್ ಇಜ್ಜಾಂಡ್. ಅಕ್ಕಮಕ್ಕೆನ ಮುಖ್ಯ ಉದ್ದೇಸೊ ಬಟವು ಅಯಿನಾಯಗ್ ಒಂಜಿ ಪೊರ್ತುದ ಓನಸ್ಸ್ ಪಾಡುನವು. ಅಪಗ ಆಯಡ ದುಡ್ಡು ಇಜ್ಜಿಂಡಲಾ ಎಲ್ಲೆ ಕೊರ್ಲೆ ಪಂದ್ ಪನೊಂದು ಇತ್ತೆರ್. ದೂರದ ಊರುರ್ದು ಕುಡ್ಲಗ್ ಕೆಲಸೊಗಾರ್ ಜನಕುಲು ಬರೊಂದು ಇತ್ತೆರ್. ಅಪಗ ಅಕ್ಕಮಕ್ಕೆನ ಹೋಟೆಲ್ನೇ ನಾಡೊಂದು ಮಧ್ಯಾಹ್ನದ ಓನಸ್‌ಗ್ ಬರೊಂದು ಇತ್ತೆರ್. ದೂರದ ಊರುರ್ದು ಎಚ್ಚಾದ್ ಕುಡ್ಲಗ್ ನಡತೊಂದು ಅತ್ತ್ಂಡ ಎರುತ್ತ ಗಾಡಿಡ್ ಬರೊಂದು ಇತ್ತೆರ್. ದಣಿದ್ ಬರೊಂದು ಇತ್ತ್‌ನೆರ್ದ್ ಓನಸ್ಸ್ ಮಲ್ತ್‌ದ್ ಅಲ್ಪನೇ ಜಗಲಿಡ್‌ ಒಂತೆ ಪೊರ್ತು ಬಚ್ಚೆಲ್ ದೆತ್ತ್‌ದ್ ಒಂಜಿ ಬಚ್ಚಿರೆ ಅಗಿದ್ ಸುಧಾರಿಸೊಂದು ಅಯರ್ದ್ ಬೊಕ್ಕ ಅಕುಲು ಅಕ್‌ಲೆನ ಊರುಲೆಗ್ ವಾಪಾಸ್ಸ್‌ ಪೋವೊಂದು ಇತ್ತೆರ್! ಆಪಗ ಮಧ್ಯಮ ವರ್ಗದಕುಲೆಗ್ ಬೆಂಚ್, ಮೇಜ್, ಕುರ್ಚಿಲೆಡ್ ಕುಲ್ಲುದು ಓನಸ್ಸ್ ಮಲ್ಪುನಾತ್ ಸವಲತ್ತ್ ಇಜ್ಜಾಂಡ್. ಆಪಗ ಮೆರೆನ ಹೋಟೆಲ್‌ದ ನೆಲಟ್ಟ್ ಮಣೆ ಪಾಡ್‌ದ್ ಓನಸ್ಸ್ ಬಲಸುನ ಕ್ರಮ ಆದ್ ಇತ್ತ್ಂಡ್. ಅರೆನ ಸುಧಾರಿಕೆ, ಯೋಗ ಕ್ಷೇಮ ವಿಚಾರಿಸುನ ರೀತಿ ಮಸ್ತ್ ಜನಕುಲೆಗ್ ಇಷ್ಟ ಆವೊಂದು ಇತ್ತ್ಂಡ್. ಈ ಹೋಟೆಲ್ ಏಪ ಸುರು ಆಂಡ್ ಪನ್ಪುನೆತ ಬಗೆಟ್ಟ್ ನಿಖರವಾದ್ ಏರೆಗ್‌ಲಾ ಗೊತ್ತಿಜ್ಜಿ. ಆಂಡ ಕೆಲವೆರೆನ ಪ್ರಕಾರ 120 ರ್ದ್ 130 ವರ್ಸೊ ಆಂಡ್ ಪನ್ಪುನ ಅಭಿಪ್ರಾಯ ಉಂಡು. ಅಕ್ಕಮಕ್ಕೆರ್ದ್ ಬೊಕ್ಕ ಮಗಳ್ ಚಂದ್ರಾವತಿ ಈ ಹೋಟೆಲ್‌ನ್ ತೂವೊಂದು ಇತ್ತೆರ್. ಅರೆನ್ ಕಿನ್ಯಕ್ಕೆ ಪಂಡ್‌ದ್ ಲೆತ್ತೊಂದು ಇತ್ತೆರ್. ಬೊಕ್ಕ ದುಂಬುಗು ಈ ಹೋಟೆಲ್‌ದ ಜವಾಬ್ದಾರಿ ತೂವೊಂದು ಇತ್ತ್‌ದ್ ಆಯಿರ್ದ್ ಬೊಕ್ಕ ಸತ್ಯವತಿ ಪನ್ಪುನಾರ್ ಹೋಟೆಲ್ ತೂವೊಂದು ಉಲ್ಲೆರ್.

ಈ ಹೋಟೆಲ್ ಓಲುಂಡು..?

ಕುಟ್ಲದ ಹೃದಯಭಾಗದ ಕೆ.ಎಸ್ ರಾವ್ ಮಾರ್ಗದ ಹಂಪನಕಟ್ಟೆ ಸಿಗ್ನಲ್‌ದ ಕೈತಲ್‌ಡೇ ಈ ಹೋಟೆಲ್ ಉಂಡು. ಇತ್ತೆ ಮುಲ್ಪ ಟೇಬಲ್‌ದ ಮಿತ್ತ್ ಬಾರೆದ ಇರೆ ಪಾಡ್‌ದ್ ಓನಸ್ಸ್ ಬಲಸುನ ಕ್ರಮ ಸುರುವಾತ್ಂಡ್. ಪರಿಯೆರೆ ಬೆಚ್ಚ ನೀರ್ , ಕುಚ್ಚಲ್ ಅರಿತ್ತ ನುಪ್ಪು, ಉಪ್ಪಡ್‌, ಒಂಜಿ ಬಗೆತ್ತ ತರಕಾರಿ ಪಲ್ಯ, ಆಯಿರ್ದ್‌ ಬೊಕ್ಕ ಮೀನ್‌ದ ಕಜಿಪ್ಪು ಉಪ್ಪುಂಡು.

ವಿಶೇಷತೆ ದಾದ

ವಿಶೇಷ ಪಂಡ್ಂಡ ಇತ್ತೆಲಾ ಗ್ಯಾಸ್ ಬಳಸಂದೇ ಕನಕ್ಕ್‌ಡೇ ಅಟಿಲ್ ಮಲ್ಪುವೆರ್. ಒಟ್ಟುಗು ಮೂಲು ಮೀನ್‌ದ ಓನಸ್ಸ್ ಬುಡ್ಂಡ ಕೋರಿದ ಕಜಿಪ್ಪು ಅತ್ತ್ಂಡ ಬೇತೆ ವಾ ಕಜಿಪುಲಾ ಮೂಲು ತಿಕ್ಕುಜಿ. ವಿವಿಧ ರೀತಿದ ಮೀನ್‌ದ ಫ್ರೈ ಮೂಲು ತಿಕ್ಕುಂಡು. ವಿಶೇಷ ಪಂಡ ಉಂದೆನ್ ತಾರಯಿದ ಎಣ್ಣೆಡ್‌ ಮಾತ್ರ ಕಾಯಿಪುವೆರ್. ಉಂದು ಪ್ರತಿನಿತ್ಯ ಮಧ್ಯಾಹ್ನ 12.30ರ್ದ್ 3.30 ಮುಟ್ಟ. ರಾತ್ರೆ 7ರ್ದ್ 10ಗಂಟೆ ಮುಟ್ಟ ದೆತ್ತ್‌ದ್ ಉಪ್ಪುವೆರ್. ಇತ್ತೆಲಾ ಮಣ್ಣ್‌ದ ಕರಕುಲೆಡೇ ಕಜಿಪ್ಪುನು ಓನಸ್ಸ್‌ದ ಮೇಜಿದ ಕೈತಲ್ ಕನತ್ತ್‌ದ್ ದೀಪೆರ್. ತಿಪ್ಪಿದ ಕೈಲ್‌ಡ್‍ ಘಮಘಮ ಪರಿಮಳದ ಮೀನ್‌ದ ಕಜಿಪ್ಪುನು ಬಳಸುವೆರ್.

ಬೇತೆ ವಿಚಾರ

ಸ್ವಾತಂತ್ರ್ಯ ಹೋರಾಟದ ಪೊರ್ತುಡು ಬ್ರಿಟಿಷ್ ಪೊಲೀಸೆರೆರ್ದ್ ಪೆಟ್ಟ್ ತಿಂದ್‌ನಕುಲೆಗ್ ಅಕ್ಕಮಕ್ಕೆ ಉಪಚರಿಸಾದ್, ವೈದ್ಯಕೀಯ ಚಿಕಿತ್ಸೆ ಕೊರ್ಪವೊಂದು ಇತ್ತೆರ್ ಪನ್ಪುನೆನ್ ಕೆಲವೆರ್ ಇತ್ತೆಲಾ ನೆನೆಪು ಮಲ್ಪುವೆರ್. ೨೦೧೮ ಟ್ ಈ ಹೋಟೆಲ್‌ದ ಮಿತ್ತ್ ಮರವೊಂಜಿ ಬೂರುದು ಹೋಟೇಲ್‌ದ ಹೆಚ್ಚಿನ ಭಾಗೊಗು ಹಾನಿ ಆದ್ ಇತ್ತ್ಂಡ್. ಬೊಕ್ಕ ಅಯಿನ್ ಸರಿ ಮಲ್ತೆರ್.