ಅರುವ ಕೊರಗಪ್ಪ ಶೆಟ್ಟಿ

ಅರುವ ಕೊರಗಪ್ಪ ಶೆಟ್ಟಿ (ಪುಟ್ಟು-ನವೆಂಬರ್ ೨೪, ೧೯೪೦) ತೆಂಕುತಿಟ್ಟುದ ಯಕ್ಷಗಾನ ಮೇಳೊಡು ಇತ್ತಿನ ಒರಿ ಮಾಮಲ್ಲ ಕಲಾವಿದೆ. ಬೊಳ್ತೆರ್‌ದ ಅರುವ ಮೆರ್ ಪುಟ್ಟಿನ ಊರು. ತುಳು ಬುಕ್ಕ ಕನ್ನಡ- ರಡ್ ಬಾಸೆದ ಯಕ್ಷಗಾನೊಡು ಸೇವೆ ಸಂದಾದೆರ್. ತುಳು ಕಾಲ್ಪನಿಕ ಪ್ರಸಂಗ ಕಾಡಮಲ್ಲಿಗೆದ ಬೀರಣ್ಣೆ, ಪೌರಾಣಿಕ ಪ್ರಸಂಗೊ ಅಕ್ಷಯಾಂಬರ ವಿಲಾಸದ ದುರ್ಯೋಧನೆ ಕೊರಗಪ್ಪೆರೆಗ್ ಪುದರ್ ಕೊಣತಿನ ಪಾತ್ರೊಲು.

ಬದ್‌ಕ್

ಕೊರಗಪ್ಪೆರ್ ೨೪ನೇ ನವಂಬರ್ ೧೯೪೦ನೇ ಇಸವಿಡ್ ಬೊಳ್ತೆರ್ ತಾಲೂಕುದ ಅರುವಡ್ ಪುಟ್ಟಿಯೆರ್. ಅಮ್ಮೆರ್ ಸುಬ್ಬಯ್ಯ ಶೆಟ್ಟಿ, ಅಪ್ಪೆ ಕಾಂತಕ್ಕೆ. ಎಲ್ಯಡೆ ಆಟದ ಮರ್ಲ್ ಇತ್ತಿನ ಕೊರಗಪ್ಪೆರ್ ೫ನೇ ಕ್ಲಾಸ್ ಮುಟ್ಟ ಮಾತ್ರ ಓದುದೆರ್. ಆ ಕಾಲೊಡು ಎಚ್ಚ ಸಾಲೆ ಕಲ್ಪೊಡಾಂಡ ಬೊಳ್ತೆರ್‌ಗ್ ಪೋವೊಡಿತ್ಂಡ್. ಅರುವಡ್ದ್ ಬೊಳ್ತೆರ್‌ಗ್ ಪೋವೊಡಾಂಡ ತುದೆ ಕಡಪೊಡು ಆಂಡ ತುದೆಕ್ ಸರಿಕಟ್ ಸಂಕ ಇಜ್ಜಾನೆಡ್ದಾವರ ಕೊರಗಪ್ಪೆರ್ನ ಕಲ್ಪಾಟಿಕೆ ೫ನೇ ಕ್ಲಾಸ್‌ಗೇ ಉಂತುದುಪೋಂಡು.

ಯಕ್ಷಗಾನ ರಂಗೊಗು ಬತ್ತಿನಿ

ಕೊರಗಪ್ಪೆರೆಗ್ ಎಲ್ಯಡ್ದಿಂಚಿ ಆಟದ ಮರ್ಲ್ ಮಸ್ತ್ ಇತ್ಂಡ್. ಅರುವ ಅರಸು ವಂಶದ ಕೃಷ್ಣರಾಜ ಅಜಿಲೆರ್, ಊರುದು ಹಿರಿಯೆರ್ ಮುತ್ತಯ್ಯ ಹೆಗ್ಡೆ, ವೆಂಕಟರಮಣ ಭಟ್ರ್- ಮೊಕ್ಲೆನ ಬೆರಿಸಾಯ ದೆತೊಂದು ೧೫ನೇ ವರ್ಸೊ ಪ್ರಾಯೊಡು ಕಟೀಲ್ ಮೇಳ ಸೇರಿಯೆರ್. ಮೇಳದ ಹಿರಿಯೆರ್ ಪಡ್ರೆ ಚಂದ್ರು ಮೆರೆನಡಿಟ್ ಯಕ್ಷಗಾನೊದ ನಾಟ್ಯ, ವೇಷಗಾರಿಕೆ ಮಾತ ಕಲ್ತೆರ್.

ಮೇಳೊಲೆಡ್

ಗುರು ಪಡ್ರೆ ಚಂದ್ರು ಅರೆನೊಟ್ಟುಗು ಬಣ್ಣಗಾರಿಗೆ, ಪಾತೆರ್, ನಲಿಪು ಕಲ್ತ್‌ದ್ ಸುಮಾರ್ ೩ ವರ್ಷ ಕಟೀಲ್ ಮೇಳೊಡು ಕೊರಗಪ್ಪೆರ್ ತಿರ್ಗಾಟ ಮಲ್ತೆರ್. ಸುರುಟು ಬಾಲಗೋಪಾಲ ಬುಕ್ಕೊ ಎದುರು ವೇಷ ಇಂಚ ಬೇತೆ ಬೇತೆ ವೇಸೊಲೆನ್ ಮಲ್ತ್‌ದ್ ಆಟೊದ ಪಟ್ಟ್‌ಲೆನ್ ಕಲ್ತೆರ್. ೩ ವರ್ಷ ಕಟೀಲ್ ಮೇಳೊಡು ಮಲ್ತ್ ಬುಕ್ಕ ಕೊರಗಪ್ಪೆರ್ ೨ ವರ್ಷ ಕೂಡ್ಲು ಮೇಳೊದೊಟ್ಟುಗು ತಿರ್ಗಿಯೆರ್. ಅಂಚನೆ ಕುತ್ಯಾಳ ಮೇಳೊಡು ೨ ವರ್ಸೊ, ಕುಂಡಾವು ಮೇಳೊಡು ೭ ವರ್ಷ, ಕರ್ನಾಟಕ ಮೇಳೊಡು ೩೧ ವರ್ಷ, ಎಡನೀರು ಮೇಳೊಡು ೧ ವರ್ಷ, ಮಂಗಳಾದೇವಿ ಮೇಳೊಡು ೧೧ ವರ್ಷ, ಬಪ್ಪನಾಡು ಮೇಳೊಡು ೯ ವರ್ಷ- ಇಂಚ ಒಟ್ಟಾರೆ ಆದ್ ೭೦ ವರ್ಸೊ ಆಟೊದ ಬೇತೆ ಬೇತೆ ಮೇಳೊಲೆಡು ಕೊರಗಪ್ಪೆರ್ ತಿರ್ಗಾಟ ಮಲ್ತೆರ್.

ವೇಸೊಲು

ಸುರುಟು ಬಾಲಗೋಪಾಲ ಎದುರು ವೇಷ ಮಲ್ತಿನ ಕೊರಗಪ್ಪೆರ್, ಪ್ರಸಂಗಗ್ ತಕ್ಕ, ಬಭ್ರುವಾಹನ, ಹನುಮಂತ, ಲಕ್ಷ್ಮಣ, ರಾಮ, ಕೌರವ, ಕಂಸ, ಕರ್ಣ, ಇಂದ್ರಜಿತು, ಸುಧನ್ವ, ಕೃಷ್ಣ, ವಿಷ್ಣು, ಇಂದ್ರಜಿತು, ದ್ರೋಣ, ತುಳು ಪ್ರಸಂಗೊಲೆನ ವೇಸೊಲಾಯಿನ ಬೀರಣ್ಣೆ, ಕೋಟಿ, ಕಾಂತುಪೂಂಜ, ದೇವುಪೂಂಜ ಇಂಚ ಬೇತೆ ಬೇತೆ ವೇಸೊ ಪಾಡೊಂದಿತ್ತೆರ್. ದ್ರೌಪದಿ ವಸ್ತ್ರಾಪಹರಣ(ಅಕ್ಷಯಾಂಬರ ವಿಲಾಸ) ಪ್ರಸಂಗೊದ ದುಶ್ಯಾಸನ ಇಂಬೆರೆಗ್ ಮಸ್ತ್ ಪುಗರ್ತೆ ಕೊರಿನ ವೇಷ. ಕೋಳ್ಯೂರೆರ್ನ ದ್ರೌಪದಿ ಬುಕ್ಕ ಕೊರಗಪ್ಪೆರ್ನ ದುಶ್ಯಾಸನ ಒಂಜಿ ಕಾಲೊಡು ಪುದರ್ ಪೋತಿನ ವೇಸೊಲು.

ಸಮ್ಮಾನೊ ಬುಕ್ಕ ಬೊಮ್ಮನ

ಯಕ್ಷಗಾನ ಕ್ಷೇತ್ರೊಗು ಕೊರಗಪ್ಪೆರ್ ಸಂದಾಯಿನ ಬೆಲೆ ಕಟ್ಟರಾವಂದಿನ ಸೇವೆನ್ ತೂದು ಕರ್ನಾಟಕ ಸರ್ಕಾರ, ಒಡಿಯೂರು, ಪೇಜಾವರ, ಎಡನೀರು ಮಠೊಕ್ಲು, ರೋಟರಿ, ಲಯನ್ಸ್ ಸಂಸ್ಥೆದಕ್ಲು ಕೊರಗಪ್ಪೆರೆಗ್ ಬೊಮ್ಮನ ಕೊರ್ದು ಸಮ್ಮಾನ ಮಲ್ತ್‌ದೆರ್. ಕರ್ನಾಟಕ ಸರ್ಕಾರ ೨೦೦೧ನೇ ಇಸವಿಡ್ ರಾಜ್ಯೋತ್ಸವ ಪ್ರಶಸ್ತಿ ಕೊರ್ದು ಸಮ್ಮನ ಮಲ್ತ್ಂಡ್. ಪೇಜಾವರ ಮಠತ್ತ ರಾಮವಿಠಲ ಪ್ರಶಸ್ತಿ, ಉಡುಪಿ ಯಕ್ಷಗಾನ ಕಲಾರಂಗೊದ ಬಿ. ಬಿ. ಶೆಟ್ಟಿ ಪ್ರಶಸ್ತಿ, ಜಾನಪದಶ್ರೀ ಪ್ರಶಸ್ತಿ ಅತ್ತಂದೆ ಬೇತೆ ಬೇತೆ ಸಂಘೊ ಸಂಸ್ಥೆಲು ಕೊರಗಪ್ಪೆರೆಗ್ ಪ್ರಶಸ್ತಿಲೆನ್ ಕೊರ್ದ್ ಸಮ್ಮಾನ ಮಲ್ತ್‌ದೆರ್.