ಅಲೆಕ್ಸಾಂಡರ್ ದುಬ್ವಾ

ಅಲೆಕ್ಸಾಂಡರ್ ದುಬ್ವಾ

ಅಲೆಕ್ಸಾಂಡರ್ ದುಬ್ವಾ ಮೇರ್ ಕುಲಶೇಖರೊಡ್ ಪ್ರಾರ್ಥನೆ ಮಲ್ತೊಂದಿತ್ತಿ ಜಾಗೆ

ಅಲೆಕ್ಸಾಂಡರ್ ದುಬ್ವಾ ಮೆರೆನ ಸಮಾಧಿ

ಅಲೆಕ್ಸಾಂಡರ್ ದುಬ್ವಾ ಮಿಲಾಗ್ರಿಸ್ ಇಂಗ್ರೇಜಿದ ಪ್ರಧಾನ ಯಾಜಕೆರ್ ಆದಿತ್ತಿನಾರ್. ಆರ್ ಜನಕುಲೆನ ಸೀಕ್ ನ್ ಗುಣ ಮಣ್ಪುನ ಪವಾಡ ಪುರು‌‍‍‍ಶೆ ಪಂಣ್ದ್ ಪುದರ್ ಪೋತಿನಾರ್. “ಕುಲ್ಯಾರ್ದ ಅಜ್ಜೆರ್” ಪಂಣ್ದ್ ಜನ ಅರೆನ್ ಲೆತ್ತೊಂದಿತ್ತೆರ್.

ಪುಟ್ಟು

ಮಾರ್ಚ್ 19ನೇ ತಾರೀಕ್ 1809ಡ್ ಫಾ| ಅಲೆಕ್ಸಾಂಡರ್ ದುಬ್ವಾ ಮೆರೆನ ಜನನ, ಫ್ರಾನ್ಸ್ ದ ರೂಆಂ ನಗರೊಡು ಆಂಡ್. ಮೇರ್ 1865ನೇ ಇಸವಿಡ್ ಮಿಲಾಗ್ರಿಸ್ ಇಂಗ್ರೆಜಿದ ಪ್ರಧಾನ ಯಾಜಕೆರ್ ಆದ್ ನೇಮಕ ಮಲ್ತಿ ಬೊಕ್ಕ ಆರ್ ಕುಲಶೇಖರೊಕ್ ಬರೊಂದಿತ್ತೆರ್. 14ನೇ ಸೆಪ್ಟೆಂಬರ್ 1873ಟ್ ಕುಲಶೇಖರ ಇಂಗ್ರೆಜಿಗ್ ಅಡಿಪಾಯೊ ಕಲ್ಲ್ ದೀಯೆರ್. ಕುಲಶೇಖರ ಜನತ ಮಿತ್ತ್ ಅರೆಗ್ ಒಲವು ಜಾಸ್ತಿ ಇತ್ತಿನೆರ್ದಾವರ ಫಾ| ಅಲೆಕ್ಸಾಂಡರ್ ದುಬ್ವಾ ಕುಲಶೇಖರೊಡೆ ಮಸ್ತ್ ಇಪ್ಪೆರೆ ಶುರು ಮಲ್ತೆರ್. ಮಾತಾ ಧರ್ಮೊದ ಜನ ಮೆರೆನಡೆ ಬರೊಂದಿತ್ತೆರ್ ಆಂಚಾದ್ ಜನಕುಲ್ ಅರೆನ್ ಮೋಕೆಡ್ “ಕುಲ್ಯಾರ್ದ ಅಜ್ಜೆರ್” ಪಂಣ್ದ್ ಲೆಪ್ಪೆರೆ ಶುರು ಮಲ್ತೆರ್.

ಜೀವನ

ಫ್ರಾನ್ಸ್ ದ ರೂಆಂ ನಗರೊಡು ಪುಟ್ಟಿನ ಫಾ| ಅಲೆಕ್ಸಾಂಡರ್ ದುಬ್ವಾ ಕುಡ್ಲನ್ ತನ್ನ ಸುವಾರ್ತೆನ್ ಪ್ರಚಾರ ಮಲ್ಲುನ ಕೇಂದ್ರವಾದ್ ಆಯ್ಕೆ ಮಲ್ಪುವೆರ್. ಅಂಚನೇ 1869ನೇ ಇಸವಿಡ್ ಆರ್ ತನ್ನ ಸೇವೆನ್ ಮಿಲಾಗ್ರಿಸ್ ಇಂಗ್ರೇಜಿಡ್ ಆರಂಭ ಮಲ್ತೊನುವೆರ್. ಸರಿಸುಮಾರ್ 12 ವರ್ಷ ಮೂಲು ತನ್ನ ಸೇವೆನ್ ಕೊರ್ಪೆರ್. ಮಿಲಾಗ್ರಿಸ್ ಇಂಗ್ರೆಜಿಡ್ ಕಾಂಡೆರ್ದ್ ಉಪವಾಸೊ ಅಂಚನೇ ದೇವೆರೆಡ ನಟ್ಟೊನ್ ನ ಸುಮಾರ್ ಜನ ತೂತಿನ ಉಂಡು. ಇಂಗ್ರೆಜಿದ ಓವೆ ಬೇಲೆಗ್ ಅತ್ತ್ ಡ, ಜನ ಅಸೌಕ್ಯೊಡ್ ಇತ್ತ್ ದ್ ಲೆತ್ತ್ಂಡ ಆರ್ ತನ್ನ ಕಾರ್ ಗ್ ಮುಟ್ಟು ಪಾಡಂದೆ, ನಡತ್ತೊಂದೆ ಪೋವೊಂದಿತ್ತೆರ್.

ಜೋಕುಲೆಡ ಅರೆಗ್ ಭಾರೀ ಮೋಕೆ. ಮಿಲಾಗ್ರಿಸ್ ಇಂಗ್ರೆಜಿ ದುಂಬು ಪೂರ್ವ ದಿಕ್ಕ್ ಅಂಚನೇ ಉತ್ತರ ದಿಕ್ಕ್ ಗ್ 8-10 ಮೈಲ್ ದೂರೊಗ್ ಒಂಜೇ ಇಂಗ್ರೇಜಿಯಾದಿತ್ತ್ಂಡ್. ಇಂದೆಟ್ ಕುಲಶೇಖರ, ಬೊಂದೆಲ್, ವಾಲೆನ್ಸಿಯಾ, ಶಕ್ತಿನಗರೊಲ ಇತ್ತ್ಂಡ್. ಈ ಜಾಗೆಲೆಗ್ ಪೋದ್ ಅಸೌಕ್ಯೊಡ್ ಇತ್ತಿನಕ್ಲೆನ ಸೌಕ್ಯೊಗ್ ಪ್ರಾರ್ಥನೆ ಮಲ್ಪೆರೆ, ಕಷ್ಟೊಡ್ ಇತ್ತಿನಕ್ಲೆಗ್ ಕೈಟಾಪುನ ಸಹಾಯೊ ಮಲ್ಪೆರೆ ಫಾ| ಅಲೆಕ್ಸಾಂಡರ್ ದುಬ್ವಾ ರಾತ್ರೆ-ಪಗೆಲ್, ಬರ್ಸೊ-ದೊಂಬು ತೂವಂದೆ ನಡತ್ತೊಂದೆ ಪೋವೊಂದಿತ್ತೆರ್. ಇಚ್ಚಾದ್ ಉಪ್ಪುನಗ ಕುಲಶೇಖರ ಪ್ರದೇಶೊ ಅರೆಗ್ ಮೋಕೆದ ಊರಾಂಡ್.

1873 ಸಪ್ಟೆಂಬರ್ 14 ತಾರೀಕುಗ್ ಪವಿತ್ರ ಶಿಲುಬೆದ ಪರ್ಬೊದ ದಿನ ಕುಲಶೇಖರ ಇಂಗ್ರೇಜಿದ ಅಡಿಪಾಯ ಕಲ್ಲ್ ನ್ ದೀಯೆರ್. ಕುಲ್ಲ್ಯಾರ್ದ ಅಜ್ಜೆರ್ ಅರೆನ ಮರಣೊರ್ದ್ ಬೊಕ್ಕ ಶಾಶ್ವತವಾದ್ ಈ ಇಂಗ್ರೇಜಿಡ್ ಒರಿಯೊನೆರೆ ಆಸೆ ಇತ್ತ್ಂಡ್. ಖಾಲಿ ನಾಲೇ ವರ್ಷೊಡ್ ಪಂಡ 1877 ಡಿಸೆಂಬರ್ 11 ತಾರೀಕುಡ್ ಆರ್ ದೇವೆರೆ ಪಾದೊ ಸೇರಿಯೆರ್. ಅರೆನ ಆಸೆದ ಲೆಕ್ಕನೇ ಅರೆನ್ ಕುಲಶೇಖರ ಇಂಗ್ರೇಜಿಡ್ 12 ತಾರೀಕ್ ಗ್ ಸಮಾದಿ ಮಲ್ತೆರ್. ಆನಿರ್ದ್ ಇಡೆ ಮುಟ್ಟಲಾ ಮಾತಾ ಜನಕ್ಲು ಬತ್ತ್ ದ್ ಅರೆನ ಸಮಾದಿದ ಎದುರು ಪ್ರಾರ್ಥನೆನ್ ಸಲ್ಲಿಸಾವೊಂದುಲ್ಲೆರ್.

1904ಡ್ ಇಂಗ್ರೇಜಿದ ಸ್ಥಾಪನೆ ಆನಗ ಕುಲ್ಲ್ಯಾರ್ದ ಅಜ್ಜೆರ್ ಇಹ ಲೋಕೊಗ್ ಪೋದ್ 27 ವರ್ಷ ಕರಿಂಡ್. ಕುಲ್ಲ್ಯಾರ್ದ ಅಜ್ಜೆರ್ ನ್ ಸಮಾದಿ ಮಲ್ತಿ ಬೊಕ್ಕ ಅರೆನ ಸಮಾದಿದ ಕೈತಲ್ ಜನಕ್ಲೆನ ಸಮೂಹ ಜಾಸ್ತಿ ಆಯೆರೆ ಶುರು ಆಂಡ್, ಇಂದೆನ್ ತೂದ್ ಪೊಸ ಇಂಗ್ರೇಜಿ ಕಟ್ಟ್ ನಗ ಅರೆನ ಸಮಾದಿ ಇಂಗ್ರೇಜಿದ ಪಿದಯಿ ಬರ್ಪಿಲೆಕ್ಕ ಕಟ್ಟಿಯೆರ್. ಕುಲಶೇಖರೊಡ್ ಕುಲ್ಲ್ಯಾರ್ದ ಅಜ್ಜೆರೆನ ಮಿತ್ತ್ ಭಕ್ತಿದ ಭಾವನೆನ್ ಗಟ್ಟಿ ಮಲ್ತಿನ ಕೀರ್ತಿ ಮಾನ್ಯ ಲಿಗೊರಿ ಸೋಜೆರೆಗ್ ಸಲ್ಲುಂಡ್. ಕುಲ್ಲ್ಯಾರ್ದ್ ಅಜ್ಜೆರೆನ ನೆನಪುಗ್ ಅರೆನ ಸಮಾದಿದ ಪಿರವುಡ್ ಯೇಸು ದೇವೆರೆನ ಕಷ್ಟೊದ ದಿನದ ಕ್ಷಣೊನ್ ಉಂಡು ಮಲ್ತೆರ್. ಕುಲ್ಲ್ಯಾರ್ದ ಅಜ್ಜೆರ್ ಒಂಜಿ ಸಂತ ಯಾಜಕೆರ್. ಆರ್ ಜೀವೊಡ್ ಉಪ್ಪುನಗ ಮಸ್ತ್ ಕಾರ್ನಿಕೊಲು ಆವೊಂದಿತ್ತ್ಂಡ್. ಪ್ರತ್ಯೇಕವಾದ್ ಅರೆನ ಪ್ರಾರ್ಥನೆದ ಪ್ರಭಾವ ಯೇತ್ ಇತ್ತ್ಂಡ್ ಪಂಡ ಹಾಳಾದ್ ಪೋಪುನಂಜಿನ ಪೈರ್ ಜೀವ ಗೆತೊಂದ್ ಎಡ್ಡೆ ಫಲ ಕೊರೊಂದಿತ್ತ್ಂಡ್. ಯಾನ್ ಉಶಾರಿಜ್ಜನ್ನಕ್ಲೆಗ್ ಮರ್ದ್ ಕೊರ್ಪುನ ವೈದ್ಯೆ ಅತ್ತ್, ಮರ್ದ್ ದ ಬಗ್ಗೆ ತೆರಿದಿಪ್ಪುನಾಯೆಲಾ ಅತ್ತ್ ಅಂದ್ ಪಣೊಂದಿತ್ತೆರ್. ಆಂಡ, ಓವೆ ರೋಗೊಗು ಅರ್ ನೀರ್ ಡ್ ಒಂಜಿ ಚಿಟಕೆ ಮಣ್ಣ್ ಕಲದಾಡ್ ಕೊರ್ಂಡಾಲಾ ಆವು ಶಮನ ಆವೊಂದಿತ್ತ್ಂಡ್. ದಾಕ್ಟರೆಡಾ ಶಮನ ಮಲ್ಪೆರೆ ಆವಂದಿನ ನಾನಾ ರೀತಿದ ಸೀಕ್ ನ್ ಆರ್ ಗುಣ ಮಲ್ತೆರ್. ಒಂಜಿ ಸರಿ ವಾಹನ ಇಜ್ಜಂದಿನ ಕಾಲೊಡು, ಬಟ್ವಾಳದ ಬಾಣಂತಿ ಬೇನೆ ಜಾಸ್ತಿಯಾಯಿನ ಪೊಂಜೊವೆನ್ ಕುಡ್ಲದ ಆಸ್ಪತ್ರೆಗ್ ಬೈಲ್ ದ ಗಾಡಿದ್ ಕನವೊಂದಿತ್ತೆರ್.ಕುಲಶೇಖರೊಗ್ ಬನ್ನಗ, ಆರ್ ಯೆನನ್ “ಕುಲ್ಲ್ಯಾರ್ದ ಅಜ್ಜೆರೆ”ನ ಸಮಾದಿದಲ್ಪ ಕೊನೊಲೆ ಪಣ್ದ್ ತನ್ನ ಆಸೆನ್ ಪಂಡೆರ್. ಅಂಚನೆ ಅರೆನ್ ಸಮಾದಿದ ಕೈತಲ್ ಅಕುಲ್ ಎತ್ತ್ ದ್ ನಟ್ಟೆರೆ ಶುರು ಮಲ್ತೆರ್, ದಾಲಾ ಅವಘಡ ಆವಂದೆ ಆ ಪೊಂಜೊವ್ ಅವ್ಲೆ ಪೆದ್ದಿಯೆರ್. ಇರ್ವೆರ್ ಲಾ ಸೌಕ್ಯೊಡ್ ಇತ್ತೆರ್. ಈ ಕಾರ್ನಿಕೊ ಆಯಿ ಬೊಕ್ಕ ಆ ಪೊಂಜೊವ್ ಅಪಗ- ಅಪಗ ಬತ್ತ್ ದ್ ಸಮಾದಿದಲದ್ಪ ದೀಪ ಪೊತ್ತಾಂವೊದಿತ್ತೆರ್.

ಇಂಚಿತ್ತಿನ ಕಾರ್ನಿಕೊಲು ಮೂಲು ಸುಮಾರ್ ಆವೊಂದ್ ಬೈದ್ಂಡ್. ಕುಲ್ಲ್ಯಾರ್ದ ಅಜ್ಜೆರ್ ಸೈತಿಜೆರ್, ನನಲಾ ಜೀವಂತವಾದ್ ಕುಲಶೇಖರದ ಇಂಗ್ರೇಜಿಡ್ ಉಲ್ಲೆರ್ ಪಣ್ಪಿ ಜನಕ್ಲೆನ ನಂಬಿಕೆ. ಇಂಚನೇ ನನಾತ್ ಜನಕ್ಲೆಗ್ ಎಡ್ಡೆ ಆವಡ್, ಕುಲ್ಲ್ಯಾರ್ದ ಅಜ್ಜೆರ್ ನ ಆಶೀರ್ವಾದೊಡ್ ಇಂಚಿತ್ತಿನ ಕಾರ್ನಿಕೊಲು ನನಲಾ ಆವಡ್.