ಅಲೆಕ್ಸಾಂಡರ್ ಫ್ಲೆಮಿಂಗ್

ವಿಕಿಪೀಡಿಯರ್ದ್
Jump to navigation Jump to search
ಅಲೆಕ್ಸಾಂಡರ್ ಅರೆನ ಪ್ರಯೋಗಾಲಯೊಡು

ಅಲೆಕ್ಸಾಂಡರ್ ಫ್ಲೆಮಿಂಗ್, ಸ್ಕಾಟ್ಲೆಂಡ್‌ಡ್ ಪುಟ್ಟಿನ ಒರಿ ಜೀವಶಾಸ್ತ್ರಜ್ಞೆ ಬೊಕ್ಕ ಔಷಧ ವಿಜ್ಞಾನಿ. ಪೆನ್ಸಿಲಿಯಮ್ ನೊಟಾಟಮ್ ಶಿಲೀಂಧ್ರೊಡ್ದು ಪೆನ್ಸಿಲಿನ್ ಪುದರ್‌ದ ಪ್ರತಿಜೀವಕೊನ್ ಸಂಶೋಧನೆ ಮಲ್ತ್‌ದ್, ಮನುಕುಲೊಕ್ಕು ಮಾಮಲ್ಲ ಉಪಕಾರ ಮಲ್ತಿನ ಪುಣ್ಯಾತ್ಮೆ. ಸದ್ಯೊಗು, ಬ್ಯಾಕ್ಟೀರಿಯಾದ ಸೋಂಕುಲೆಡ್‌ದ್ ಬರ್ಪಿನ ಬಹುತೇಕ ಸೀಕ್‌ಲೆಗ್ ಈ ಮರ್ದ್‌ನ್ ಡಾಕ್ಟ್ರೆನಕುಲು ಕೊರ್ಪೆರ್. ಮನುಕುಲೊತ್ತ ಮಸ್ತ್ ಪರಾತ್ ಸೀಕ್ ಆಯಿನ ಗ್ಯಾಂಗ್ರಿನ್, ಸಿಫಿಲಿಸ್, ಕ್ಷಯ ಸೀಕ್‌ಲೆನ್ ಗುಣ ಮಲ್ಪರಲಾ ಈ ಪೆನ್ಸಿಲಿನ್ ಮರ್ದ್ ಕೊರ್ಪೆರ್.

೧೯೯೯ನೇ ಇಸವಿದ ಟೈಮ್ ಮ್ಯಾಗಜಿನ್‌ದಕುಲು, ೨೦ನೇ ಶತಮಾನೊದ ಮಸ್ತ್ ಮುಖ್ಯವಾಯಿನ ನರಮಾನಿ ಪಂಡ್‌ದ್ ಅಲೆಕ್ಸಾಂಡರ್ ಫ್ಲೆಮಿಂಗೆರೆನ್ ಗುರ್ತ ಮಲ್ತ್‌ದೆರ್.

ಪುಟ್ಟು ಬುಕ್ಕ ಕಲ್ಪಾಟಿಗೆ[ಸಂಪೊಲಿಪುಲೆ]

ಅಲೆಕ್ಸಾಂಡರ್ ಫ್ಲೆಮಿಂಗ್ ಸ್ಕಾಟ್ಲೆಂಡ್ ದೇಸೊದ, ಐರ್ಶೈರ್ ಪುದರ್‌ದ ಊರುದ ಕೈತಲ್ ಇಪ್ಪುನ ಡಾರ್ವೆಲ್ ಪುದರ್‌ದ ಪೇಂಟೆದ ಕೈತಲ್‌ದ ತೋಟೊದ ಇಲ್ಲಡ್ ಪುಟ್ಟಿಯೆರ್. ಅಮ್ಮೆರೆನ ಪುದರ್ ಹಘ್ ಫ್ಲೆಮಿಂಗ್, ಅಪ್ಪೆ ಗ್ರೇಸ್ ಸ್ಟರ್ಲಿಂಗ್ ಮಾರ್ಟನ್. ಅಲೆಕ್ಸಾಂಡರ್ ಫ್ಲೆಮಿಂಗ್, ಹಘ್ ಫ್ಲೆಮಿಂಗೆರೆನ ರಡ್ಡನೇ ಬುಡೆದಿ(ಗ್ರೇಸ್ ಸ್ಟರ್ಲಿಂಗ್ ಮಾರ್ಟನ್)ಡ್ ಪುಟ್ಟಿನ ಮೂಜಿನೇ ಮಗೆ. ಉಂದೆಕ್ ದುಂಬು, ಹಘ್ ಫ್ಲೆಮಿಂಗೆರೆಗ್ ಸುರುತ ಬುಡೆದಿಡ ನಾಲ್ ಜೋಕುಲು ಇತ್ತೆರ್(ಒಟ್ಟು ೮ ಜನ ಜೋಕುಲು). ಅಲೆಕ್ಸಾಂಡರ್ ೭ನೇ ಪ್ರಾಯೊಡ್ ಇಪ್ಪುನಗ ಅಮ್ಮೆರ್ ತೀರಿಯೆರ್.

ಶಾಲೆ ಕಲ್ಪರಗಾದ್ ಅಲೆಕ್ಸಾಂಡರ್, ಲೌಡೊನ್ ಬೊಕ್ಕ ಡಾರ್ವೆಲ್‌ಡ್ ಇಪ್ಪುನ ಶಾಲೆನ್ ಸೇರಿಯೆರ್. ಶಾಲೆ ಕಲ್ತಿಬೊಕ್ಕ ಸಿಕ್ಕಿನ ರಡ್ಡ್ ವರ್ಸೊದ ವಿದ್ಯಾರ್ಥಿವೇತನದ ಸಾಯಡ್‌ದ್, ೧೯೦೦ನೇ ಇಸವಿಡ್ ಕಿಲ್ಮರ್ನೊಕ್ ಅಕಾಡೆಮಿ ಸೇರಿಯೆರ್[೧][೨]. ಅಲ್ಪ ತನ್ನ ಪ್ರಾಥಮಿಕ ಕಲ್ಪಾಟಿಗೆನ್ ಮುಗಿತ್ತಿನ ಅಲೆಕ್ಸಾಂಡರ್, ತನ್ನ ೧೬ನೇ ಪ್ರಾಯೊಡು ಸಾಮಾನ್ ಸಾಗಾಣಿಕೆದ ಆಫೀಸ್‌ಡ್ ಬೇಲೆಗೆ ಸೇರಿಯೆರ್. ೪ ವರ್ಷ ಬೇಲೆ ಮಲ್ತಿನ ಅಲೆಕ್ಸಾಂಡರ್ರೆಗ್ ೨೦ನೇ ಪ್ರಾಯೊಡು ತನ್ನ ಸಿದ್ದಿಅಮ್ಮೆ ಜಾನ್ ಫ್ಲೆಮಿಂಗ್‌ರೆನ ಕೈಡ್‌ದ್ ಒಂತೆ ಕಾಸ್ ಸಿಕ್ಕಿಂಡ್. ಅಲೆಕ್ಸಾಂಡರ್ರೆನ ಅಣ್ಣೆ ಡಾಕ್ಟರ್ ಆದಿತ್ತಿನ ಟಾಮ್ ಸಲಹೆ ಕೊರಿಲೆಕ, ಅಲೆಕ್ಸಾಂಡರ್ ಸಿದ್ದಿಅಮ್ಮೆರೆಡ ಸಿಕ್ಕಿನ ಕಾಸ್‌ದ ಸಾಯಡ್ದಾತ್ರ, ೧೯೦೧ನೇ ಇಸವಿಡ್ ಲಂಡನ್‌ದ ಪ್ಯಾಡಿಂಗ್‌ಟನ್‌ಡ್ ಇಪ್ಪುನ ಸಂತ ಮೇರಿ ವೈದ್ಯಕೀಯ ಕಾಲೇಜ್‍ಡ್ ವಿದ್ಯಾರ್ಥಿಯಾದ್ ಸೇರಿಯೆರ್, ೧೯೦೬ನೇ ಇಸವಿಡ್ ವೈದ್ಯಕೀಯ ಪದವಿನ್ ಬಂಗಾರದ ಪದಕದೊಟ್ಟೂಗು ಪಡೆಯೆರ್.[೩]

ಬೇಲೆ[ಸಂಪೊಲಿಪುಲೆ]

ಸಂತ ಮೇರಿ ವೈದ್ಯಕೀಯ ಕಾಲೇಜ್‍ಡ್ ಇಪ್ಪುನಗ, ೧೯೧೪ನೇ ಇಸವಿ ಮುಟ್ಟ ಸ್ಕಾಟಿಷ್ ರೆಜಿಮೆಂಟ್ ಆಫ್ ವಾಲಂಟೀರ್ ಫೋರ್ಸ್‌ಡ್ ಆಫೀಸರ್ ಆದಿತ್ತಿನ ಅಲೆಕ್ಸಾಂಡರ್, ಅಲ್ಪದ ರೈಫಲ್ ಕ್ಲಬ್ಬುದ ಸದಸ್ಯೆರಾದಿತ್ತೆರ್[೪]. ಕ್ಲಬ್ಬುದ ಕ್ಯಾಪ್ಟನ್, ತನ್ನ ಕ್ಲಬ್ಬುಡು ಒರಿಪಾವೊನರಗಾದ್, ಅಲೆಕ್ಸಾಂಡರ್ರೆನ್ ಸಂತ ಮೇರಿ ವೈದ್ಯಕೀಯ ಕಾಲೇಜ್‍‌ದ ಸಂಶೋಧನಾ ವಿಭಾಗೊಡು ಸೇರರ ಸಲಹೆ ಕೊರಿಯೆರ್. ಔಲು, ರೋಗನಿರೋಧಶಾಸ್ತ್ರೊಡು ಮಾಮಲ್ಲ ಸಾಧನೆ ಮಲ್ತಿತ್ತಿನ ಆಲ್ಮ್ರೋತ್ ರೈಟ್ ಮೆರೆನೊಟ್ಟಿಗೆ ಸಹಾಯಕ ಬ್ಯಾಕ್ಟೀರಿಯಾಲಜಿಸ್ಟ್ ಆದ್ ಬೇಲೆ ಮಲ್ಪರ ಸುರು ಮಲ್ತೆರ್. ತನ್ನ ವೃತ್ತಿಬದ್‌ಕ್‌ಡ್ ಶಸ್ತ್ರಚಿಕಿತ್ಸಕೆ ಆದ್ ಬೇಲೆ ಮಲ್ಪೊಡು ಪಂಡ್‍ದ್ ಅಲೆಕ್ಸಾಂಡರ್ ಎನ್ನಿದಿತ್ತೆರ್. ಆಂಡ, ಸಂತ ಮೇರಿ ವೈದ್ಯಕೀಯ ಕಾಲೇಜ್‍ಡ್ ಇತ್ತಿನ ರೋಗನಿರೋಧಶಾಸ್ತ್ರೊಡು ಮಾಮಲ್ಲ ಸಾಧನೆ ಮಲ್ತಿತ್ತಿನ ಆಲ್ಮ್ರೋತ್ ರೈಟ್ ಮೆರೆನೊಟ್ಟಿಗೆ ಸಹಾಯಕ ಬ್ಯಾಕ್ಟೀರಿಯಾಲಜಿ ಆದ್ ಬೇಲೆ ಮಲ್ಪುನ ಅವಕಾಶ ಆಕಸ್ಮಿಕವಾದ್ ಅಲೆಕ್ಸಾಂಡರ್ರೆಗ್ ಸಿಕ್ಕಿಂಡ್. ೧೯೦೮ನೇ ಇಸವಿಡ್ ಅಲೆಕ್ಸಾಂಡರ್, ಬ್ಯಾಕ್ಟೀರಿಯಾಲಜಿ ಇಸಯೊಡು ಬಿಎಸ್ಸಿ ಡಿಗ್ರಿನ್ ಬಂಗಾರದ ಪದಕದೊಟ್ಟುಗು ದೆತೊಂದೆರ್. ಬುಕ್ಕ ಅವೇ ಕಾಲೇಜಿಡ್ ಉಪನ್ಯಾಸಕೆ ಆದ್ ೧೯೧೪ನೇ ಇಸವಿ ಮುಟ್ಟ ಸೇವೆ ಸಂದಾಯೆರ್.

ವಿಶ್ವ ಯುದ್ಧೊದ ಪೊರ್ತುಡು[ಸಂಪೊಲಿಪುಲೆ]

೧೯೧೪ನೆ ಜೂನ್ ತಿಂಗೊಲುಡ್‌ದು ಬೊಕ್ಕ ಸುರುತ ವಿಶ್ವಯುದ್ಧ ಸುರು ಆಂಡ್. ರಾಯಲ್(ಬ್ರಿಟೀಶ್) ಆರ್ಮಿದ ಮೆಡಿಕಲ್ ವಿಭಾಗೊಡು ಲೆಫ್ಟಿನೆಂಟ್ ಆದ್ ಸೇನೆಗ್ ಸೇರಿನ ಅಲೆಕ್ಸಾಂಡರ್, ೧೯೧೭ನೇ ಇಸವಿಡ್ ಕ್ಯಾಪ್ಟನ್ ಆದ್ ಭಡ್ತಿ ಪಡೆಯೆರ್[೫]. ಆ ಪೊರ್ತುಗು ಸೈನ್ಯೊಡು, ಅವುಲಾ ಫ್ರೆಂಚ್ ಸೇನೆದ ಸೇನಾ ಕ್ಯಾಂಪುಡು ಎಚ್ಚ ಪೊರ್ತು ಸೇವೆ ಮಲ್ಪುನ ಅವಕಾಶ ಅಲೆಕ್ಸಾಂಡರ್ರೆಗ್ ಸಿಕ್ಕಿಂಡ್. ಸೈನ್ಯೊದ ವೈದ್ಯಕೀಯ ವಿಭಾಗೊಡು ಕ್ಯಾಪ್ಟನ್ ಆದ್ ಸೇರಿನ ಆರ್, ಆ ಕಾಲೊಡು ಸೀಕ್ ಗುಣಮಲ್ಪರ ಗಲಸೊಂದಿತ್ತಿನ ನಂಜಿನಾಶಕೊಲೆಗ್, ನಂಜಿ ಗುಣ ಮಲ್ಪುನ ಶಕ್ತಿ ಕಡಿಮೆ ಉಂಡು ಪಂಡ್‌ದ್ ತೆರಿಯೆರ್. ಈ ನಂಜಿನಾಶಕೊಲೆನ ಪ್ರಭಾವ ಜಾಸ್ತಿಮಲ್ಪುನ ದಿಸೆಟ್ ತನ್ನ ಬೇಲೆನ್ ದುಂಬರಿಪಾಯೆರ್.

೧೯೧೫ನೇ ಡಿಸೆಂಬರ್ ೨೩ನೇ ತಾರೀಕ್‌ದಾನಿ ಸಾರಾ ಮೆಕ್‌ಎಲ್ರಾಯ್ ಪುದರ್‌ದ ನರ್ಸ್‌ನೊಟ್ಟುಗು ಅಲೆಕ್ಸಾಂಡರ್ರೆನ ಮದ್ಮೆ ಆಂಡ್[೬].

ಸಂಶೋಧಕೆ ಆದ್[ಸಂಪೊಲಿಪುಲೆ]

ನವಂಬರ್ ೧೯೧೮ಡು ಸುರುತ ವಿಶ್ವಯುದ್ಧ ಮುಗಿಪೆಟ್ಟ್‌ಗ್, ಸಂತ ಮೇರಿ ವೈದ್ಯಕೀಯ ಕಾಲೇಜ್‍‌ಗ್ ಪಿರ ಬತ್ತಿನ ಅಲೆಕ್ಸಾಂಡರ್, ೧೯೨೮ನೇ ಇಸವಿಡ್ ಬ್ಯಾಕ್ಟೀರಿಯಾಲಜಿ ವಿಭಾಗೊದ ಪ್ರಾಧ್ಯಾಪಕೆ ಆಯೆರ್[೭]. ಸುರುತ ವಿಶ್ವಯುದ್ಧೊದ ಪೊರ್ತುಡು, ಸಂತ ಮೇರಿ ವೈದ್ಯಕೀಯ ಕಾಲೇಜ್‍‌‌ದ ಸೂಜಿಮರ್ದ್ ಕೊರ್ಪುನ ಇಡೀ ವಿಭಾಗೊನು ಉತ್ತರ ಫ್ರಾನ್ಸ್‌ದ ಕರಾವಳಿ ಪೇಂಟೆ ಬೌಲೋನ್ ಸರ್ ಮೆರ್‌(Boulogne-sur-Mer)ಗ್ ಸ್ಥಳಾಂತರ ಮಲ್ತೆರ್. ಅಲೆಕ್ಸಾಂಡರ್, ಲಿಯೋನಾರ್ಡ್ ಕೋಲ್‌ಬ್ರೂಕ್ ಬೊಕ್ಕ ಆಲ್ಮ್ರೋತ್ ರೈಟ್- ಈ ಮೂಜಿ ಜನೊಕುಲು ಆ ಶಿಬಿರೊಡು ಸೇವೆ ಸಂದಾವರ ಪೋಯೆರ್.

ಯುದ್ಧೊದ ಪೊರ್ತುಡು ಜಾಸ್ತಿ ಜನ ಸೈನಿಕೆರ್ ಗಾಯಡ್‌ದ್ ಆಯಿನ ನಂಜಿಡ್‍ದಾವರನೇ ಜೀವ ಬುಡೊಂದಿತ್ತೆರ್. ಗಾಯ ಆಯಿನ ಸಂದರ್ಭೊಡು ಕೊರೊಂದಿತ್ತಿನ ನಂಜಿನಾಶಕ ಮರ್ದ್, ಗಾಯದ ನಂಜಿನ್ ಮಾತ್ರ ಅತ್ತಂದೆ ನೆತ್ತೆರ್‌ದ ನಂಜಿನಾಶಕ ಕಣೊಕುಲೆನ್ಲಾ ನಾಶ ಮಲ್ತೊಂದಿತ್ಂಡ್. ಅಂಚಾದ್ ನಂಜಿನಾಶಕ ಮರ್ದ್ ನಂಜಿ ಗುಣ ಮಲ್ಪುನೆಡ್‌ದ್ ಜಾಸ್ತಿ, ಸೈನಿಕೆರೆನ ಜೀವೊಗು ಗಾತಿ ಮಲ್ತೊಂದಿತ್ಂಡ್. ಉಂದು ಅತ್ತಂದೆ, ಈ ಮರ್ದ್‌ಲೆನ್ ಸೂಜಿಮರ್ದ್‌ದ ಲೆಕ ಕೊರ್ರ ಆಪುಜಿತ್ಂಡ್. ಗಾಯ ಆಯಿನ ಸಂದರ್ಭೊಡು, ಈ ರೀತಿ ನಂಜಿನಾಶಕ ಕೊರ್ಪುನ ಬದ್ಲ್‌ಗ್, ನಮ ಮೈತ ಉಲಾಯಿಡೇ ಗಾಯ ಗುಣಮಲ್ಪುನ ಕಣೊಕುಲೆನ ಸಾಮರ್ಥ್ಯ ಜಾಸ್ತಿ ಮಲ್ಪುನ ವಸ್ತು ಅತ್‌ಡ ಕ್ರಮೊನು ನಾಡ್‌ದ್‌ಪತ್ತೊಡುಂದು ರೈಟ್, ಅಲೆಕ್ಸಾಂಡರ್, ಕೋಲ್‌ಬ್ರೂಕ್ ಪಣೊಂದಿತ್ತೆರ್.

ಆಂಡ, ಮೊಕಲ್ನ ಒಟ್ಟಿಗೆ ಬೇಲೆ ಮಲ್ತೊಂದಿತ್ತಿನ ಸಹ ವಿಜ್ಞಾನಿಲು ಈ ಇಸಯೊದ ಬಗ್ಗೆ, ತಮಾಷೆ ಮಲ್ಪರ ಸುರು ಮಲ್ತೆರ್!

ಲೈಸೋಝೈಮ್‌ದ ಸಂಶೋಧನೆ[ಸಂಪೊಲಿಪುಲೆ]

ಸುರುತ ವಿಶ್ವಯುದ್ಧೊ ಮುಗೀದ್ ವಾಪಾಸಾಯಿನ ಅಲೆಕ್ಸಾಂಡರ್, ಬ್ಯಾಕ್ಟೀರಿಯಾ ವಿರೋಧಿ ವಸ್ತುಲೆನ ದಿಸೆಟ್ ತನ್ನ ಸಂಶೋಧನೆನ್ ದುಂಬರಿಪಾದ್ ೧೯೨೨ನೇ ಇಸವಿಡ್ ಲೈಸೋಝೈಮ್‌ ಪನ್ಪಿನ ಕಿಣ್ವ(ಇಂಗ್ಲಿಷ್‌ಡ್ ಕಿಣ್ವಗ್ ಎನ್‌ಝೈಮ್-Enzyme ಪನ್ಪೆರ್) ಸಂಶೋಧಿಸಾಯೆರ್. ಸತ್ಯ ಪನೊಡಾಂಡ, ಲೈಸೋಝೈಮ್‌ನ್ ಸಂಶೋಧಿಸಾಯಿನೆನೇ ಒಂಜಿ ಆಕಸ್ಮಿಕ ಸನ್ನಿವೇಶೊಡು. ೧೯೨೧ನೇ ಇಸವಿದ ಕಡೆತ ಒಂಜಿ ದಿನ, ಫ್ಲೆಮಿಂಗ್‍ಗ್ ಸೀತ ಆದಿತ್ಂಡ್. ಪ್ರಯೋಗ ಮಲ್ಪರಗಾದ್ ಬುಳೆಪಾದಿನ ಬ್ಯಾಕ್ಟೀರಿಯಾ ಇತ್ತಿನ ಒಂಜಿ ಫಲಕೊನು ಪರೀಕ್ಷಿಸಾವೊಂದು ಇಪ್ಪುನಗ ಫ್ಲೆಮಿಂಗ್‌ನ ಮೂಕುಡ್‌ದು ಸೀತದ ಒಂಜಿ ಪನಿ ಆ ಫಲಕೊದ ಮಿತ್ ಬೂರಿಂಡ್[೮]. ಪನಿ ಬೂರಿನ ಆ ಫಲಕೊನು ಪರೀಕ್ಷಿಸಾನಗ, ಆಶ್ಚರ್ಯಕರವಾಯಿನ ಒಂಜಿ ಇಸಯ ತೆರಿದ್ ಬತ್ಂಡ್. ಸೀತದ ಪನಿ ಬೂರಿನ ಜಾಗೆದ ೧ ಸೆ.ಮೀ ಸುತ್ತಳತೆದ ಉಲಾಯಿ ಇತ್ತಿನ ಬ್ಯಾಕ್ಟೀರಿಯೊಲು ಸೈತ್ ಪೋದಿತ್ತ[೯]! ೧ ಸೆ.ಮೀ. ಸುತ್ತಳತೆದ ಪಿದಾಯಿ ಜಾಗೆಡ್ ಇತ್ತಿನ ಬ್ಯಾಕ್ಟೀರಿಯೊಲು ಸ್ವಾಭಾವಿಕವಾದ್ ಬುಳೆವೊಂದು ಇತ್ತ. ಉಂದೆನ್ ತೂಯಿನ ಅಲೆಕ್ಸಾಂಡರ್ರೆಗ್, ನರಮನಿನ ಮೂಂಕುದ ರಸೊಟ್ಟು, ಬ್ಯಾಕ್ಟೀರಿಯೊಲು ಸೈತ್ ಪೋಪುನ ಒವ್ವೋ ಒಂಜಿ ವಸ್ತು ಇಪ್ಪೊಡು ಪಂಡ್‌ದ್ ತೆರಿದ್ ಬತ್ಂಡ್. ತನ್ನ ಸಂಶೋಧನೆನ್ ದುಂಬರಿಪಾದ್, ಕಣನೀರ್, ಬಾಯಿದ ಜೊಲ್ಲು, ಬೆಗರ್, ತೆತ್ತಿದ ಲೋಳೆ- ಇಂಚ ಬೇತೆ ಬೇತೆ ವಸ್ತುಲೆನ್ ಪಾಡ್‌ದ್ ತೂನಗ ಸುರುಕು ಬತ್ತಿನ ಫಲಿತಾಂಶೊನೇ ಬತ್ಂಡ್.

ಬ್ಯಾಕ್ಟೀರಿಯೊಲೆಗ್ ಮಾರಕ ಆಪಿನ ವಸ್ತು ಸ್ವಾಭಾವಿಕವಾದ್ ನಮ ಮೈಟ್ ಇಪ್ಪುಂಡು ಪಂಡ್‌ದ್ ತೆರಿದ್ ಬತ್ಂಡ್[೧೦]. ಆಂಡ, ಕೆಲವೊಂಜಿ ಕಾರಣೊಲೆಡ್‌ದ್ ಈ ವಸ್ತು(ಲೈಸೋಝೈಮ್‌)ನ್ ಪ್ರತ್ಯೇಕ ಮಲ್ತ್‌ದ್, ಶುದ್ಧೀಕರಣ ಮಲ್ತ್‌ದ್ ಗಲಸುನ ಬೇಲೆನ್ ದುಂಬರಿಪರ ಆಯಿಜಿ. ಆಂಡ, ತಾನ್ ಕೈಕೊನಿನ ಸಂಶೋಧನೆ ಬುಕ್ಕ ಐಟ್ ಸಿಕ್ಕಿನ ಫಲಿತಾಂಶೊಲೆನ್ ಮಾತ ಒಟ್ಟು ಸೇರಾದ್, ೧೯೨೨ನೇ ಇಸವಿಡ್ ಒಂಜಿ ವೈದ್ಯಕೀಯ ಪತ್ರಿಕೆಡ್ ಪ್ರಕಟಿಸಾಯೆರ್. ಇಂಚ ಪತ್ರಿಕೆಡ್ ಬತ್ತಿಬೊಕ್ಕನೇ ವಿಜ್ಞಾನಿಲೆಗ್ ಈ ಲೈಸೋಜೈಮ್‌ ಕಿಣ್ವದ ಮಹತ್ವ ಎಂಚಿನ ಪಂಡ್‌ದ್ ತೆರೀಂಡ್[೧೧].

ಪೆನಿಸಿಲಿನ್‌ದ ಸಂಶೋಧನೆ[ಸಂಪೊಲಿಪುಲೆ]

೧೯೨೭ನೇ ಇಸವಿದ ಪೊರ್ತುಗು ಅಲೆಕ್ಸಾಂಡರ್, ಸಹೋದ್ಯೋಗಿಲೆನ ನಡುಟು ಮಸ್ತ್ ಬಾರಿ ಪುಗರ್ತೆದ ವಿಜ್ಞಾನಿಯಾದ್ ಪುದರ್ ಮಲ್ತಿತ್ತೆರ್. ಸ್ಟ್ಯಾಫಿಲೋಕಾಕ್ಸಿ ಬ್ಯಾಕ್ಟೀರಿಯಾದ ಮಿತ್ ಸಂಶೋಧನೆ ಮಲ್ಪರ ಸುರು ಮಲ್ತೆರ್. ಒಂಜಿ ಸರ್ತಿ, ಸ್ಟ್ಯಾಫಿಲೋಕಾಕ್ಸಿ ಬ್ಯಾಕ್ಟೀರಿಯಾ ಇತ್ತಿನ ದ್ರವನ್ ಪ್ರಯೋಗ ಫಲಕೊಲೆಡ್ ಪಾಡ್‌ದ್, ಪ್ರಯೋಗಾಲಯದ ಮೂಡ್ಯೆಡಿತ್ತಿನ ಬೆಂಚಿದ ಮಿತ್ ದೀದ್ ರಜೆತ್ತ ಮಿತ್ ಪೋಯೆರ್[೧೨]. ರಜೆ ಮುಗಿತ್ ಪಿರ ಬತ್ತಿನ ಅಲೆಕ್ಸಾಂಡರ್, ಪ್ರಯೋಗ ಫಲಕನ್ ಪರೀಕ್ಷೆ ಮಲ್ಪುನಗ, ಒಂಜಿ ಫಲಕೊಡು ಶಿಲೀಂಧ್ರ ಬುಳೆದಿತ್ಂಡ್. ಆ ಶಿಲೀಂಧ್ರ ಬುಳೆಯಿನ ಫಲಕಡ್ ಇತ್ತಿನ ಸ್ಟ್ಯಾಫಿಲೋಕಾಕ್ಸಿ ಬ್ಯಾಕ್ಟೀರಿಯಾ ನಾಶವಾದಿತ್ತ. ಶಿಲೀಂಧ್ರ ಇಜ್ಜಂದಿನ ಪ್ರಯೋಗ ಫಲಕಡ್ ಇತ್ತಿನ ಬ್ಯಾಕ್ಟೀರಿಯಾ ಸ್ವಾಭಾವಿಕವಾದ್ ಬೆಳವಣಿಗೆ ಆದಿತ್ತ್ಂಡ್. ನೆಕ್ ದುಂಬು ಲೈಸೋಝೈಮ್‌ದ ವಿಷಯೊಡು ಇಂಚನೇ ಆತಿನವು ಅಲೆಕ್ಸಾಂಡರ್‌ಗ್ ನೆನಪಾಂಡ್[೧೩]. ತನ್ನ ಪ್ರಯೋಗನ್ ದುಂಬರಿಪಾದ್ ಪರೀಕ್ಷಿಸಾನಗ, ಆ ಶಿಲೀಂಧ್ರ ಪೆನಿಸಿಲಿಯಂ ಜಾತಿದ ನೊಟೇಟಮ್ ಪ್ರಭೇದೊಗು ಸೇರ್ದಿನವು ಪಂಡ್‌ದ್ ಗೊತಾಂಡ್. ಸುರುಟು ಈ ಶಿಲೀಂಧ್ರ, ಬಹುಷಃ ಪೆನಿಸಿಲಿಯಮ್ ಕ್ರಿಸೊಜೆನಮ್ ಪಂಡ್‌ದ್ ಎನ್ನಿದಿತ್ತೆರ್, ಆಂಡ ಆರೆನ ಸಹೋದ್ಯೋಗಿ ಒರಿ, ಉಂದು ಪೆನಿಸಿಲಿಯಮ್ ರೂಬ್ರಮ್ ಪಂಡ್‌ದ್ ಗುರುತಿಸಾಯೆರ್.(ಒಂಜಿ ಸರ್ತಿ ಪೆನಿಸಿಲಿಯಮ್ ನೊಟಾಟಮ್ ಪಂಡ್‌ದ್ ತೋಜಿದ್ ಬತ್ಂಡ್, ನನೊರ ಪೆನಿಸಿಲಿಯಮ್ ಕ್ರೈಸೋಜೆನಮ್ ಪಂಡ್‌ದ್ ಗೊತಾಂಡ್. ಅಂತಿಮವಾದ್ ೨೦೧೧ನೆ ಇಸವಿಡ್, ಈ ಶಿಲೀಂಧ್ರದ ಪುದರ್ ಪೆನಿಸಿಲಿಯಮ್ ರುಬೆನ್ಸ್ ಪಂಡ್‌ದ್ ಗೊತ್ತು ಮಲ್ತೋಂಡೆರ್.[೧೪]) ತನ್ನ ಸಂಶೋಧನೆನ್ ದುಂಬರಿತೊಂದು ಪೋನಗ, ಆ ಶಿಲೀಂಧ್ರ, ನ್ಯುಮೋನಿಯಾ, ಸ್ಕಾರ್ಲೆಟ್ ಜ್ವರ, ಮೆನಿಂಜೈಟಿಸ್, ಗಂಟಲುಮಾರಿ ಸೀಕ್‌ಲೆನ್ ಗುಣಮಲ್ಪುಂಡು ಪಂಡ್‌ದ್ ತೆರೀದ್‌ಬತ್ಂಡ್.


೧೯೨೯ನೇ ಇಸವಿ, ಮಾರ್ಚ್ ೭ನೇ ತಾರೀಕ್‌ದಾನಿ ಅಲೆಕ್ಸಾಂಡರ್‌ ಈ ಶಿಲೀಂಧ್ರೊಡ್ದು ಉತ್ಪಾದನೆ ಆತಿನ ದ್ರವ ಪದಾರ್ಥೊಗು ಪೆನಿಸಿಲಿನ್ ಪಂಡ್‌ದ್ ಪುದರ್ ದೀಯೆರ್.

ಲೈಸೋಝೈಮ್‌ದ ಇಸಯೊಡು ಆಯಿಲೆಕಾನೆ, ಪೆನಿಸಿಲಿನ್‍ಲಾ ಶುದ್ಧರೂಪೊಡು ತಯಾರ್ ಮಲ್ತ್, ಗಲಸುನ ಬೇಲೆನ್ ದುಂಬರಿಪರ ಆಯಿಜಿ. ಅಂಚಾದ್ ಆ ಶಿಲೀಂಧ್ರನ್ ಬುಳೆಪಾವರ ಗಲಸ್‌ದಿನ ಮಾಧ್ಯಮ ವಸ್ತು ಎಂಚಿನ ಇತ್ಂಡ್, ಅವೆನೇ ಬ್ಯಾಕ್ಟೀರಿಯಾ ವಿರೋಧಿ ಆದ್ ಗಲಸೊಲಿ ಪಂಡ್ ಅಲೆಕ್ಸಾಂಡರ್ ಪಂಡೆರ್.

ಶುದ್ಧರೂಪೊಡು ಉತ್ಪಾದನೆ[ಸಂಪೊಲಿಪುಲೆ]

ಸುಮಾರ್ ೧೯೪೦ನೇ ಇಸವಿದ ಪೊರ್ತು. ಆಕ್ಸ್‌ಫರ್ಡ್ ವಿಶ್ವವಿದ್ಯಾನಿಲಯ(ಇಂಗ್ಲೆಂಡ್)ಡ್ ಇತ್ತಿನ ಆರ್ನೆಸ್ಟ್ ಬೋರಿಸ್ ಚೈನ್ ಬೊಕ್ಕ ಎಡ್ವರ್ಡ್ ಅಬ್ರಾಹಮ್ ಪುದರ್‌ದ ಇರುವೆರ್ ವಿಜ್ಞಾನಿಲು ಬೇತೆ ಬೇತೆ ಪ್ರತಿಜೀವಕದ ಅಣುರಚನೆನ್ ಅಭ್ಯಾಸ ಮಲ್ತೊಂದಿತ್ತೆರ್. ಅಕುಲು ಲೈಸೋಝೈಮ್‌ದ ಅಣು ರಚನೆನ್ ತೋಜಾದ್ ಕೊರಿಯೆರ್. ಉಂದು ಆದ್, ಪೆನಿಸಿಲಿನ್‍ದ ಅಣುರಚನೆನ್ಲಾ ಅಭ್ಯಾಸ ಮಲ್ಪರ ಸುರು ಮಲ್ತೆರ್. ಅಬ್ರಾಹಮ್ ಪೆನಿಸಿಲಿನ್ ಪ್ರತಿಜೀವಕದ ಸರಿಯಾಯಿನ ಅಣುರಚನೆ‌ನ್ ನಾಡ್‌ದ್ ಪತ್ತಿನ ಸುರುತ ವಿಜ್ಞಾನಿ[೧೫]. ಪೆನಿಸಿಲಿನ್ ಪ್ರತಿಜೀವಕದ ಅಣುರಚನೆದ ಬಗ್ಗೆ ಫಲಿತಾಂಶ, ೧೯೪೦ನೇ ಇಸವಿಡ್ ಒಂಜಿ ಪತ್ರಿಕೆಡ್ ಪ್ರಕಟ ಆಂಡ್. ಉಂದೇನ್ ತೆರಿಯಿನ ಅಲೆಕ್ಸಾಂಡರ್, ಚೈನ್ ಬೊಕ್ಕ ಅಬ್ರಾಹಮ್ ತಂಡದ ಮುಖ್ಯಸ್ಥೆರಾಯಿನ ಹೋವಾರ್ಡ್ ಫ್ಲೋರಿಗ್ಗ್ ಫೋನ್ ಮಲ್ತ್‌ದ್ ಭೇಟಿ ಆಯೆರ್[೧೬]. ಮಸ್ತ್ ಸಂಶೋಧನೆ ಮಲ್ತಿಬೊಕ್ಕ, ಪೆನಿಸಿಲಿನ್ ಪ್ರತಿಜೀವಕೊನು ಶುದ್ಧರೂಪೊಡು ಉತ್ಪಾದನೆ ಮಲ್ಪರ ಸಾಧ್ಯ ಆಂಡ್. ಅಂಚನೆ, ೧೯೪೨ನೆ ಇಸವಿದ ನಡುಟು, ಪೆನಿಸಿಲಿನ್‌ನ್ ಮಂಜೊಲ್ ಬಣ್ಣೊದ ಪೊಡಿತ್ತ ರೂಪೊಡು ಉತ್ಪಾದಿಸಯೆರ್. ಈ ಪೆನಿಸಿಲಿನ್ ಪ್ರತಿಜೀವಕನ್ ನರಮಾನಿಗ್ ಕೊರ್ರ ದುಂಬು ಪರೀಕ್ಷೆ ಮಲ್ಪೊಡಿತ್ಂಡ್. ಪ್ರಾಣಿಲೆಗ್ ಕೊರ್ದು, ಪರೀಕ್ಷೆ ಮಲ್ಪರ ಸುರು ಮಲ್ತೆರ್. ಪ್ರತಿಜೀವಕೊದ ಶುದ್ಧರೂಪೊದ ಉತ್ಪಾದನೆ, ಪ್ರಾಣಿಲೆನ ಮಿತ್ ಕ್ಲಿನಿಕಲ್ ಟೆಸ್ಟಿಂಗ್, ಬುಕ್ಕ ಸಾಮೂಹಿಕ ಉತ್ಪಾದನೆ- ಈ ಮಾತಾ ಬೇಲೆಗಾದ್ ಆಕ್ಸ್‌ಫರ್ಡ್ ವಿ.ವಿ.ದ, ರೋಗ ಪತ್ತೆ ವಿಜ್ಞಾನ ವಿಭಾಗದ ಮಾತಾ ಸದಸ್ಯೆರ್‌ಲಾ ಒಟ್ಟಾದ್ ಬೇಲೆ ಮಲ್ಪರ ಸುರು ಮಲ್ತೆರ್.

ಪೆನಿಸಿಲಿನ್‌ದ ವೈದ್ಯಕೀಯ ಪ್ರಯೋಗ[ಸಂಪೊಲಿಪುಲೆ]

ಒಂಜಿ ಸರ್ತಿ ಅಲೆಕ್ಸಾಂಡರ್‌ರೆನ ಅಡಿಟ್ ಕಲ್ಪರ ಬತ್ತಿನ ಸಂಶೋಧನಾ ವಿದ್ಯಾರ್ಥಿ ಆಯಿನ ಸ್ಟುವರ್ಟ್ ಕ್ರೆಡಾಕ್‌ಗ್ ಸೈನುಸೈಟಿಸ್ ಆದಿತ್ಂಡ್. ಅಪಗ, ಅಲೆಕ್ಸಾಂಡರ್ ಪೆನಿಸಿಲಿನ್ ಮರ್ದ್‌ನ್ ಈ ವಿದ್ಯಾರ್ಥಿಗ್ ಕೊರಿಯೆರ್. ಉಂದು ವೈದ್ಯಕೀಯ ಚಿಕಿತ್ಸೆಗ್ ಪೆನಿಸಿಲಿನ್ ಗಲಸ್‌ದಿನ ಸುರುತ ಸಂದರ್ಭ ಪನೊಲಿ. ಆಂಡ ಐಟ್ ಒವ್ವೇ ಬಗೆತ್ತ ಫಲಿತಾಂಶ ಬತ್ತಿಜಿ[೧೭]. ದಾಯೆಗ್ ಪಂಡ, ಸೈನುಸೈಟಿಸ್‌ಗ್ ಕಾರಣವಾಯಿನ ಬ್ಯಾಕ್ಟೀರಿಯಾದ ಮಿತ್ ಪೆನಿಸಿಲಿನ್ ಕೆಲಸ ಮಲ್ಪುಜಿತ್ಂಡ್. ನೆಡ್‌ದ್ ಬುಕ್ಕ ಅಲೆಕ್ಸಾಂಡರ್ ತನ್ನ ಮೂಲ ಪೆನಿಸಿಲಿನ್ ಮಾದರಿನ್ ತನ್ನ ಸಹೋದ್ಯೋಗಿ ಆಯಿನ ಶಸ್ತ್ರಚಿಕಿತ್ಸಕೆ ಅರ್ಥರ್ ಡಿಕ್ಸನ್‌ ರೈಟ್‌ಗ್ ವೈದ್ಯಕೀಯ ಪ್ರಯೋಗ ಮಲ್ಪರ ಕೊರಿಯೆರ್[೧೮].

ಇಂಗ್ಲೆಂಡ್‌ದ ಶೆಫೀಲ್ಡ್‌ದ ರಾಯಲ್ ಇನ್ಫಾರ್ಮರಿ ಆಸ್ಪತ್ರೆಡ್ ಇತ್ತಿನ ರೋಗಪತ್ತೆ ವಿಜ್ಞಾನಿ ಅಲೆಕ್ಸಾಂಡರ್‌ನ ಶಿಶ್ಯೆ, ಸೆಸಿಲ್ ಜಾರ್ಜ್ ಪೈನ್, ವೈದ್ಯಕೀಯ ಚಿಕಿತ್ಸೆಗ್ ಪೆನಿಸಿಲಿನ್ ಗಲಸ್‌ದ್ ಯಶಸ್ವಿ ಆಯಿನ ಸುರುತ ವ್ಯಕ್ತಿ ಪನೊಲಿ. ಜಾರ್ಜ್ ಪೈನ್, ೧೯೩೦ನೇ ಇಸವಿ ನವಂಬರ್ ೨೫ನೇ ತಾರೀಖ್‌ದಾನಿ ೩ ಬಾಲೆ ಬೊಕ್ಕ ಒರಿ ಆಣಗ್ ಬತ್ತಿತಿನ ಕಣ್ಣ್‌ದ ಕಾಯಿಲೆ(ಕಂಜಕ್ಟಿವೈಟಿಸ್)ಗ್ ಪೆನಿಸಿಲಿನ್ ಕೊರ್ದು ಗುಣ ಮಲ್ತೆರ್[೧೯].

ಅಗೋಸ್ತು ೧೯೪೨ನೇ ಇಸವಿಡ್ ಅಲೆಕ್ಸಾಂಡರ್ರೆನ ಮೆಗ್ಯೆ ರಾಬರ್ಟ್‌ನ ಒಟ್ಟಿಗೆ ಬೇಲೆ ಮಲ್ತೊಂದಿತ್ತಿನ ಹ್ಯಾರಿ ಲಾಂಬರ್ಟ್‌ಗ್ ಮೆನೆಂಜೈಟಿಸ್ (ನೀಸ್ಸೆರಿಯ ಮೆನಿಂಜೈಟಿಡಿಸ್ ಬ್ಯಾಕ್ಟೀರಿಯಾ‌ಡ್ದ್ ಬರ್ಪುನ ಒಂಜಿ ಸೀಕ್) ಸೀಕ್ ಬತ್‌ದ್ ಸಂತ ಮೇರಿ ಆಸ್ಪತ್ರೆಗ್ ಸೇರಿಯೆರ್. ಅಲೆಕ್ಸಾಂಡರ್ ಹ್ಯಾರಿಗ್ ಬೇತೆ ಮರ್ದ್ ಕೊರ್ದು ತೂಯೆರ್ ಆಂಡ, ರೋಗಿನ ಪರಿಸ್ಥಿತಿ ಸುಧಾರಿಜಿ. ಅಲೆಕ್ಸಾಂಡರ್‌ ಆಕ್ಸ್‌ಫರ್ಡ್ ವಿಶ್ವವಿದ್ಯಾನಿಲಯದ ಹೋವಾರ್ಡ್ ಫ್ಲೋರಿಗ್ ಫೋನ್ ಮಲ್ತ್‌ದ್ ಪೆನಿಸಿಲಿನ್ ಕಡಪುಡ್ರ ಪಂಡೆರ್. ತನ್ನ ಪ್ರಯೋಗಾಲಯೊಡು ಇತ್ತಿನ ಅರ್ಧಂಬರ್ಧ ಶುದ್ಧ ಮಲ್ತಿನ ಪೆನಿಸಿಲಿನ್‌ನ್ ಫ್ಲೋರಿ ಕಡಪುಡಿಯೆರ್. ಕಡಪುಡ್ರ ದುಂಬು, ಏನ್ ಪಣಂದೆ ರೋಗಿಗ್ ಈ ಮರ್ದ್ ಕೊರೊಡ್ಚಿ, ಉಂದೆನ್ ಪರೀಕ್ಷಿಸಾದ್ ತೂದು, ಬೊಕ್ಕ ಪನ್ಪೆ ಪಂಡೆರ್. ಆಂಡ ಅಲೆಕ್ಸಾಂಡರ್, ಫ್ಲೋರಿ ಪಣರ ದುಂಬೇ ಆ ದಿನ ಬಯ್ಯಗ್ ಹ್ಯಾರಿನ ಬೆರಿತ್ತ ಎಲುಕ್ಕು ಕೊರಿಯೆರ್. ಮನದಾನಿ, ಹ್ಯಾರಿನ ಆರೋಗ್ಯಡ್ ಭಾರೀ ಸುಧಾರಣೆ ತೋಜಿದ್ ಬತ್ಂಡ್, ಒಂಜಿ ವಾರೊಡು ಹ್ಯಾರಿನ ಖಾಯಿಲೆ ಸಂಪೂರ್ಣವಾದ್ ಗುಣ ಆಂಡ್[೨೦].

ಅಲೆಕ್ಸಾಂಡರ್‌ಗ್ ಪೆನಿಸಿಲಿನ್ ಕಡಪುಡಿನ ದಿನ ಬಯ್ಯೊಗು ಫ್ಲೋರಿ, ಪೆನಿಸಿಲಿನ್‌ನ್ ಒಂಜಿ ಪುಚ್ಚೆಗ್ ಕೊರ್ದು ತೂಯೆರ್. ಆಂಡ, ಆ ಪುಚ್ಚೆ ಮನದಾನಿ ಸೈತ್ ಪೋಂಡು![೨೧]

ಪೆನಿಸಿಲಿನ್‌ದ ವೈದ್ಯಕೀಯ ಪರೀಕ್ಷೆದ ವರದಿನ್ ಅಲೆಕ್ಸಾಂಡರ್ ದ ಲಾನ್ಸೆಟ್ ಪತ್ರಿಕೆಡ್ ಪ್ರಕಟಿಸಾಯೆರ್.[೨೨] ಈ ಪೊರ್ತುಗು ವೈದ್ಯಕೀಯ ರಂಗದ ಮಲ್ಲ ಜನಕುಲೆಗ್ ಅಲೆಕ್ಸಾಂಡರ್ರೆನ ಪೆನಿಸಿಲಿನ್‌ದ ಮಹತ್ವ ಅರ್ಥ ಆಂಡ್. ಅಲೆಕ್ಸಾಂಡರ್ರೆನ ಸಂಶೋಧನಾ ವಿದ್ಯಾರ್ಥಿ ಆದಿತ್ತಿನ ವಿ ಡಿ ಅಲಿಸನ್, ಬ್ರಿಟೀಶ್ ಆರೋಗ್ಯ ಸಚಿವಾಲಯೊಗು ಪೆನಿಸಿಲಿನ್‌ದ ಮಹತ್ವ ಬುಕ್ಕ ಐತ್ತ ಸಾಮೂಹಿಕ ಉತ್ಪಾದನೆದ ಅಗತ್ಯೊನು ತೆರಿಪಾಯೆರ್. ಸೆಪ್ಟೆಂಬರ್ ೨೮, ೧೯೪೨ನೇ ಇಸವಿದಾನಿ ಉಪಕರಣ ವಿಭಾಗ ಮುಖ್ಯಸ್ತೆರಾಯಿನ ಸೆಸಿಲ್ ವ್ಹೀರ್ ಒಂಜಿ ಮೀಟಿಂಗ್ ಆಯೋಜನೆ ಮಲ್ತ್‌ದ್ ಪೆನಿಸಿಲಿನ್‌ದ ಕಾರ್ಯವಿಧಾನೊನು ಕ್ಯಾಬಿನೆಟ್‌ಗ್ ತೆರಿಪಾಯೆರ್. ಎಪ್ರಿಲ್ ೫, ೧೯೪೩ನೇ ಇಸವಿದಾನಿ ಪೆನಿಸಿಲಿನ್ ಸಮಿತಿ ರಚನೆ ಆಂಡ್. ಸೆಸಿಲ್ ವ್ಹೀರ್, ಅಲೆಕ್ಸಾಂಡರ್, ಫ್ಲೋರಿ, ಅಲಿಸನ್ ಬೊಕ್ಕ ಮರ್ದ್ ತಯಾರ್ ಮಲ್ಪುನ ಮಲ್ಲ ಕಂಪೆನಿದ ಪ್ರತಿನಿಧಿಕುಲು ಈ ಸಮಿತಿಡ್ ಪಾಲ್ ದೆತೊಂದಿತ್ತೆರ್. ಈ ಪೊರ್ತುಗು ರಡ್ಡನೇ ವಿಶ್ವಯುದ್ಧ(೧೯೩೯-೧೯೪೫) ಸುರು ಆದಿತ್ಂಡ್. ಗಾತಿ ಆತಿನ ಸೈನಿಕೆರೆಗ್ ಪೆನಿಸಿಲಿನ್‌ನ್ ಸಾಮೂಹಿಕವಾದ್ ಉತ್ಪಾದನೆ ಮಲ್ಪರ, ಮಲ್ಲ ಮಟ್ಟ್‌ಗ್ ಜನೊಕುಲು, ಜಾಗ, ಕಾಸ್ ಬುಕ್ಕ ತಾಂತ್ರಿಕ ವ್ಯವಸ್ಥೆ ಬೋಡಿತ್ಂಡ್. ಅಂಚಾದ್, ಅಮೇರಿಕಾದ ಕಂಪೆನಿಲೆನ ಸಾಯ ದೆತೊಂದು, ಮಿತ್ರರಾಷ್ಟ್ರೊಲೆನ ಗಾತಿ ಆಯಿನ ಸೈನಿಕೆರೆಗ್ ಪೂರೈಸಾವರ ಸುರು ಮಲ್ತೆರ್[೨೩][೨೪].

ಪಡೆಯಿನ ಮಾನಾದಿಗೆಲು[ಸಂಪೊಲಿಪುಲೆ]

  • ೧೯೪೫ನೇ ಇಸವಿಡ್ ಅಲೆಕ್ಸಾಂಡರ್ ಫ್ಲೆಮಿಂಗ್, ಹೊವಾರ್ಡ್ ಫ್ಲೋರಿ ಬುಕ್ಕ ಅರ್ನೆಸ್ಟ್ ಚೈನ್- ಈ ಮೂಜಿ ಜನಕ್ ಒಟ್ಟಾದ್, ಪೆನಿಸಿಲಿನ್‌ದ ಸಂಶೋಧನೆ ಬುಕ್ಕ ಸಾಂಕ್ರಾಮಿಕ ಸೀಕ್‌ದ ಮಿತ್ತ್ ಐತ ರೋಗನಿರೋಧಕ ಪರಿಣಾಮಗಾದ್, ಶರೀರಶಾಸ್ತ್ರ/ಔಷದ ವಿಭಾಗೊದ ನೋಬೆಲ್ ಪುರಸ್ಕಾರೊನು ಕೊರಿಯೆರ್[೨೫].
  • ೧೮೮೧ನೇ ಆಗಸ್ಟ್ ೬ಡ್ದ್ ೧೯೫೫ನೇ ಮಾರ್ಚ್ ೧೧ ಮುಟ್ಟ ಪಾಂಟಿಫಿಕಲ್ ಅಕಾಡೆಮಿ ಆಫ್ ಸೈನ್ಸ್‌ದ ಸದಸ್ಯೆ ಆದ್ ಆಯ್ಕೆ[೨೬].
  • ೧೯೪೩ನೇ ಇಸವಿಡ್ ರಾಯಲ್ ಸೊಸೈಟಿದ ಫೆಲೋ ಆದ್ ಆಯ್ಕೆ
  • ರಾಯಲ್ ಕಾಲೇಜ್ ಆಫ್ ಸರ್ಜನ್ಸ್(ಇಂಗ್ಲೆಂಡ್)ದ ಹಂಟೇರಿಯನ್ ಉಪನ್ಯಾಸ ಮಲ್ಪುನ ಅವಕಾಶ
  • ೧೯೪೪ನೇ ಇಸವಿಡ್ ನೈಟ್‌ಹುಡ್ ಪದವಿ[೨೭]
  • ಅಮೇರಿಕ ಸಂಯುಕ್ತ ಸಂಸ್ಥಾನದ ಮೆಡಲ್ ಆಫ್ ಮೆರಿಟ್[೨೮]
  • ೨೦೦೨ನೇ ಇಸವಿಡ್ ಬಿಬಿಸಿದಕುಲು ಮಲ್ತಿನ ರಾಷ್ಟ್ರವ್ಯಾಪೀ ಸಮೀಕ್ಷೆಡ್ ೧೦೦ ಶ್ರೇಷ್ಟ ಬ್ರಿಟೀಶೆರ್ ಪಟ್ಟಿಡ್ ಅಲೆಕ್ಸಾಂಡರ್‌ಲಾ ಇತ್ತೆರ್[೨೯].
  • ೨೦೦೯ನೇ ಇಸವಿಡ್ ಕ್ಲೈಡೆಸ್‌ಡೇಲ್ ಬ್ಯಾಂಕ್(ಸ್ಕಾಟ್ಲೆಂಡ್)ದಕುಲು ಅಲೆಕ್ಸಾಂಡರ್‌‌ನ ಚಿತ್ರ ಇತ್ತಿನ ೫ ಪೌಂಡುದ ಪೊಸ ನೋಟುನು ಬುಡ್ಕಡೆ ಮಲ್ತೆರ್[೩೦].
  • ಒಂಜಿ ಕ್ಷುದ್ರಗ್ರಹೊಕ್ಕು ೯೧೦೦೬ ಫ್ಲೆಮಿಂಗ್ ಪಂಡ್‌ದ್ ಪುದರ್ ದೀತೆರ್
  • ಚಂದ್ರನ ಮಿತ್ ಇಪ್ಪುನ ಒಂಜಿ ಗುರಿ(ಉಂದು ಚಂದ್ರನ ನನೊಂಜಿ ಬರಿಟ್ ಉಂಡು. ಭೂಮಿಡ್ ಇಪ್ಪುನಕಲೆಗ್ ಚಂದ್ರನ ಈ ನನೊಂಜಿ ಬರಿ ತೋಜುಜಿ)ಕ್ಕ್ ಫ್ಲೆಮಿಂಗ್ ಕ್ರೇಟರ್ ಪಂಡ್‌ದ್ ಪುದರ್ ದೀತೆರ್[೩೧].

ವೈಯಕ್ತಿಕ ಬದ್ಕ್[ಸಂಪೊಲಿಪುಲೆ]

೧೯೧೫ನೇ ಡಿಸೆಂಬರ್ ೨೩ನೇ ತಾರೀಕ್‌ದಾನಿ ಸಾರಾ ಮೆಕ್‌ಎಲ್ರಾಯ್ ಪುದರ್‌ದ ನರ್ಸ್‌ನೊಟ್ಟುಗು ಅಲೆಕ್ಸಾಂಡರ್ರೆನ ಮದ್ಮೆ ಆಂಡ್[೩೨]. ಮೊಕಲೆನ ಒರಿಯೇ ಮಗೆ ರಾಬರ್ಟ್ ಫ್ಲೆಮಿಂಗ್(೧೯೨೪-೨೦೧೫) ಸುರುತ ಬುಡೆದಿ ೧೯೪೯ನೇ ಇಸವಿಡ್ ತೀರಿಬೊಕ್ಕ, ಅಲೆಕ್ಸಾಂಡರ್ ಅಮೆಲಿಯಾ ಕೌಟ್‌ಸೌರಿ ವೌರೆಖಸ್ ಪುದರ್‌ದ, ಗ್ರೀಕ್ ದೇಸೊದ ಶರೀರತಜ್ಞೆನ್ ಮದ್ಮೆ ಆಯೆರ್[೩೩].

ತೀರಿನಿ[ಸಂಪೊಲಿಪುಲೆ]

೧೯೫೫ನೇ ಇಸವಿ ಮಾರ್ಚ್ ೧೧ನೇ ತಾರೀಕ್‌ದಾನಿ ಲಂಡನ್‌ದ ತನ್ನ ಇಲ್ಲಡ್ ಹೃದಯಾಘಾತಡ್‌ದಾವರ ತೀರಿಯೆರ್. ಆರೆನ ಚಿತಾಭಸ್ಮೊನು ಸೇಂಟ್ ಪಾಲ್ಸ್ ಚರ್ಚ್‌ಡ್ ಸಮಾಧಿ ಮಲ್ತೆರ್.

ಉಲ್ಲೇಖೊಲು[ಸಂಪೊಲಿಪುಲೆ]

  1. https://www.nndb.com/people/696/000091423/
  2. https://www.undiscoveredscotland.co.uk/usbiography/f/alexanderfleming.html
  3. https://www.undiscoveredscotland.co.uk/usbiography/f/alexanderfleming.html
  4. https://www.nobelprize.org/prizes/medicine/1945/fleming/biographical/
  5. https://www.nobelprize.org/prizes/medicine/1945/fleming/biographical/
  6. https://www.nobelprize.org/prizes/medicine/1945/fleming/biographical/
  7. https://science.sciencemag.org/content/225/4667/1140.1
  8. https://royalsocietypublishing.org/doi/10.1098/rspb.1922.0023
  9. https://www.ncbi.nlm.nih.gov/pmc/articles/PMC2385475/
  10. https://www.ncbi.nlm.nih.gov/pmc/articles/PMC2385475/
  11. https://www.ncbi.nlm.nih.gov/pmc/articles/PMC2385475/
  12. https://www.sciencevision.org/storage/journal-articles/June2020/8Z8EkQYx4R0eKmiBJanG.pdf
  13. https://academic.oup.com/jac/article/56/2/444/837333
  14. https://www.ncbi.nlm.nih.gov/pmc/articles/PMC3317369/
  15. https://www.independent.co.uk/arts-entertainment/obituary-sir-edward-abraham-1093226.html
  16. https://www.bbvaopenmind.com/en/science/bioscience/fleming-and-the-difficult-beginnings-of-penicillin-myth-and-reality/
  17. https://www.cambridge.org/core/journals/medical-history/article/new-light-on-the-history-of-penicillin/0D89459BCC187AF0637134F6A7074F0C
  18. https://www.ncbi.nlm.nih.gov/pmc/articles/PMC1036002/pdf/medhist00056-0083.pdf
  19. https://www.ncbi.nlm.nih.gov/pmc/articles/PMC1139580/pdf/medhist00072-0046.pdf
  20. https://www.ncbi.nlm.nih.gov/pmc/articles/PMC2385475/pdf/ulstermedj00117-0006.pdf
  21. https://www.ncbi.nlm.nih.gov/pmc/articles/PMC2385475/pdf/ulstermedj00117-0006.pdf
  22. https://www.thelancet.com/journals/lancet/article/PIIS0140-6736(00)87452-8/fulltext
  23. https://www.ncbi.nlm.nih.gov/pmc/articles/PMC2385475/pdf/ulstermedj00117-0006.pdf
  24. https://www.acs.org/content/acs/en/education/whatischemistry/landmarks/flemingpenicillin.html
  25. https://www.nobelprize.org/prizes/medicine/1945/summary/
  26. https://www.nndb.com/org/212/000165714/
  27. https://www.nndb.com/honors/853/000052697/
  28. https://www.nature.com/articles/161800a0.pdf
  29. https://web.archive.org/web/20021204214727/http://www.bbc.co.uk/history/programmes/greatbritons/list.shtml/
  30. https://www.scotbanks.org.uk/banknotes/clydesdale-bank/world-heritage-series-withdrawn/clydesdale-bank-5-world-heritage-series.html#:~:text=Hold%20the%20note%20up%20to,depiction%20of%20a%20molecular%20pattern.&text=This%20feature%20also%20serves%20to,the%20corners%20of%20the%20note.
  31. https://planetarynames.wr.usgs.gov/Feature/1979
  32. https://www.nobelprize.org/prizes/medicine/1945/fleming/biographical/
  33. https://www.royalsoced.org.uk/cms/files/fellows/biographical_index/fells_indexp1.pdf