ಕದ್ರು ಬೊಕ್ಕ ವಿನತೆ

ಕದ್ರು ಬೊಕ್ಕ ವಿನತೆ

ಕದ್ರು ಬೊಕ್ಕ ವಿನತೆ, ದೇವೊಯುಗಟ್ ಇತ್ತಿನ ಬ್ರಹ್ಮಪುತ್ರಿನಕುಲು. ಸ್ಫುರದ್ರೂಪಿ ಆಯಿನ ಮೊಕುಲು ಕಶ್ಯಪ ಬ್ರಹ್ಮನ ಬೊಡೆದಿನಕುಲು. ಮೊಕಲ್ನ ವೃತ್ತಾಂತೊ ಮಹಾಭಾರತೊದ ಆದಿಪರ್ವೊಡು ಬರ್ಪುಂಡು.

ವೃತ್ತಾಂತೊ

ಕಶ್ಯಪ ಬ್ರಹ್ಮೆರ್ ಒರ ತನ್ನ ರಡ್ಡ್ ಬೊಡೆದಿನಕಲೆಗ್ ಉತ್ತಮವಾಯಿನ ವರೊಲೆನ್ ಕೊರ್ಪೆ ಪಂದ್ ಪ್ರಕಟ ಮನ್ಪುನಗ ಸಂತುಷ್ಟ ಅಂತಃಕರಣೆಯಾಯಿನ ರಡ್ಡ್ ಜನ ಬೊಡೆದಿನಕಲು ಲಾ ಅಕಲೆಗ್ ಬೋಡು ಇತ್ತಿನ ಅಕಲೆಗ್ ಪ್ರಿಯವಾಯಿನ ವರಕುಲೆನು ಬೇಡಿಯೆರ್. ಅಕ್ಕ ಕದ್ರು ಸಮಾನ ತೇಜಸ್ವಿ ಉಪ್ಪುನಂಚಿನ ಒಂಜಿ ಸಾವಿರ ನಾಗಲೆನ್ (ಸರ್ಪ) ಪುತ್ರರಾದ್ ಪಡೆಯುನ ಇಚ್ಛೆನ್ ವ್ಯಕ್ತ ಪಡಿಸಯೆರ್.

ಅಕ್ಕ ಕದ್ರುಗ್, ಒಂಜಿ ಸಾವಿರ ತೆತ್ತಿಲೂ ತಂಗಡಿ ವಿನತೆಗ್ ರಡ್ಡ್ ತೆತ್ತಿ ಪ್ರಧಾನ

ತಂಗಡಿ ವಿನತೆ, ಅಕ್ಕ ಕದ್ರುನ ಜೋಕುಲುಡ್ದು ಅಧಿಕವಾಯಿನ ಬಲಸಂಪತ್ತು ಡ್ ಕೂಡುದಿನ ರಡ್ಡ್ ಜೋಕುಲೆನ್ ಮಾತ್ರ ಬೇಡಿಯೋಳ್. ಅಕಲ್ನ ಅಕಲ್ನ ಆಸೆದ ಲೆಕ್ಕೋನೇ ಕಶ್ಯಪ ಬ್ರಹ್ಮೆರ್ ಅಕಲೆಗ್ ಅಕುಲು ಕೇಂಡಿನಾತ್ ಪಂಡಾ ಕದ್ರುಗ್ ಒಂಜಿ ಸಾವಿರ ತೆತ್ತಿಲೆನ್ ಬೊಕ್ಕ ವಿನತೆಗ್ ರಡ್ಡ್ ತೆತ್ತಿಲೆನ್ ಕೊರ್ದು ಉಂದೆನ್ ಜಾಗ್ರತೆಡ್ ಜೋಪಾನ ಮಂತುದು ತಾಂಕುಲೆ. ಕಾಲ ಕೂಡುದು ಬನ್ನಗ ತೆತ್ತಿ ಪುಡದ್ ನಿಕಲೆಗ್ ಸಂತಾನ ಆಪುಂಡು ಪನ್ಪಿನ ವರ ಕೊರ್ದು ಕಶ್ಯಪ ಬ್ರಹ್ಮೆರ್ ತಪಸ್ಸಿಗ್ ಕಾಡ್ ಗ್ ಪೋಯೇರ್.

ಸರ್ಪ ಸಂತತಿದ ಉಗಮ

ಬಹುಕಾಲ ಕಳೆದ್ ಪೋಂಡು, ಒಂಜಿ ಸಾವಿರ ತೆತ್ತಿಲೆನ್ ಕದ್ರುನ ಪರಿಚಾರಿಕೆನಕುಲು ಸ್ನೇಹಪಮಯ ಪೂರ್ಣ ಕುಂಡಡ್ ದೀದ್ ಐನೂದು ವರ್ಷದ ತನಕ ರಕ್ಷಣೆ ಮಂತೊಂದು ಉಪ್ಪುನಗ ಕದ್ರುನ ಪುತ್ರೆರಾಯಿನ ಸರ್ಪ ಸಂತತಿ ಲೋಕ ಐದುಒಂಜಿ ತೆತ್ತಿ ಪುಡದ್ ಪಿದಾಯಿ ಬತ್ತೆರ್.

ಅರುಣೊ ನಾ ಜನನ

ಒಲ್ಪ ತೂಂಡಾಲ ಪರಪುನ ಸರ್ಪಾಲಾಯಿನ ಕದ್ರು ಪುತ್ರೆರೇ ವಿನತೆಗ್ ತೋಜೊಂದು ಇತ್ತೆರ್. ಚಿಕ್ಕಮ್ಮ ಚಿಕ್ಕಮ್ಮ ಪಂದ್ ವಿನತೆನಡೆ ಸರ್ಪೊಲು ಬನ್ನಗ, ವಿನತೆಗ್, ಅಲೆಗ್ ಕೊರ್ತಿನ ತೆತ್ತಿಲು ಪುಡದ್ ವಿನತಾಪುತ್ರೆರ್ ದಾನಿ ಪಿದಾಯಿ ಬೈದುಜೆರ್ ಪಂದ್ ಹೊಟ್ಟೆ ಕಿಚ್ಚ್ ನ್ ತಡೆವರೆ ತೀರಂದೆ, ಕಶ್ಯಪ ಬ್ರಹ್ಮೆರ್ ಕೊರ್ತಿನ ರಡ್ಡ್ ತೆತ್ತಿಡ್ ಒಂಜೆನ್ ಪುಡತ್ ಬುಡ್ಪಲ್. ತೆತ್ತಿ ಪುಡದ್ ತೂನಗ ಸೊಂಟದಡೆ ಮುಟ್ಟ ಬೆಳವಣಿಗೆ ಆತಿನ ಬಾಲೆ ಅರುಣೆ ತೋಜುದು ಬರ್ಪುಂಡು, ಅರುಣನ್ ತೂದು ವಿನತೆಗ್ ಮಸ್ತ್ ಬೇಜಾರು ಆಪುಂಡು. ಆಂಡಾ, ಅವು ಬಾಲೆ ಪಾತೆರರೆ ಸುರು ಮನ್ಪುಂಡು. ಇಂಚ ಅಂಗವಿಕಲತೆನ್ ಎಂಕ್ ಉಂಟು ಮಂತುದು ಯಾನ್ ಎನ್ನ ವೈಯಕ್ತಿಕವಾಯಿನ ಕೆಲಸೊಗಲೆಕ್ ಲಾ ಬೇತೆ ಅಕಲೇನ್ ಅವಲಂಬನೆ ಆಪಿ ಲೆಕ್ಕ ಮಂತಿನೇನ್, ಈರ್ ಲಾ ಐನೂದು ವರ್ಷೊದ ಕಾಲ ಬೇತೆಕಲೆನ ಚಾಕರಿ ಮನ್ಪನ ದಾಸಿ ಆಲೇ ಪಂದ್ ಶಾಪ ಕೊರ್ದು, ತನ್ನ ಅಪ್ಪ ಉಪ್ಪುನ ಋಷಿ ಮಂಡಲಗ್ ರಾವೊಂದು ಪೋಯೇರ್. ತಾನು ಮಂತಿನ ತಪ್ಪುಗ್ ಸರಿಯಾಯಿನ ಶಿಕ್ಷೆ ಆಂಡ್ ಪಂದ್ ಎನ್ನುದು ವಿನತೆ ನನ ಒಂಜಿ ತೆತ್ತಿನ್ ಜೋಪಾನವಾದ್ ತಾಕೊಂದು ಬತ್ತೆರ್.

ದೇವೇಂದ್ರೊನ ಉಚ್ಚೈಶ್ರವಸ್ಸುದ ಬೀಲದ ಬಣ್ಣ

ಅರುಣನ ಶಾಪ ಮುಂದುವರಿದ್ ಒರ ಕದ್ರುಡ ಒಂಜಿ ಬಗೆದ ಬುದ್ಧಿ ವಿಕಾರ ಉಂಟಾಂಡ್. ಒಂಜಿ ದಿನ ಆಕಾಶೊ ಮಾರ್ಗಡ್ ದೇವೇಂದ್ರೆ ಅರೆನ ಪರಿವಾರದೊಟ್ಟು ಉಚ್ಚೈಶ್ರವಸ್ಸುನು ಏರೋಂದು ಪೋವೊಂದು ಉಪ್ಪುವೇರ್. ಅವೆನ್ ತೂದು ಕದ್ರು ವಿನತೆಗಯಡ ತೋಜೋಪಾದ್ ಉಚ್ಚೈಶ್ರವಸ್ಸದ ಬೀಲದ ಬಣ್ಣ‌ ಓವು ಪಂದ್ ಕೇಂಡಳ್. ಇಂದ್ರನ ಪಟ್ಟೊದ ಕುದುರೆಯಾಯಿನ ಉಚ್ಚೈಶ್ರವಸ್ಸಿದ ಬಣ್ಣ ಪೂರ್ತಿ ಬೊಳ್ದು ಪನ್ಪಿನ ವಿಷಯೊ ಸರ್ವವಿದಿತ ಅಂಚೆನೆ ಬೀಲದ ಬಣ್ಣ ಬೊಳ್ದು ಪಂದ್ ಉತ್ತರ ಕೊರ್ಯಳ್ ವಿನತೆ. ಅವೆನ್ ಕೇಂಡುದು ಕದ್ರು ಪನ್ಪಲ್, ಉಚ್ಚೈಶ್ರವಸ್ಸುದ ಪೂರ್ತಿ ಬಣ್ಣ ಬೊಳ್ದು ಆಂಡಾ ಬೀಲ ಮಾತ್ರ ಕಪ್ಪು ಪಂದ್ ಪನ್ಪಲ್. ರಡ್ಡ್ ಜನಕುಲೆಗ್ಲ ಚರ್ಚೆ ಆಪುಂಡು. ಚರ್ಚೆ ಪಂಥ ಮುಟ್ಟ ಪೋಪುಂಡು. ರಡ್ಡ್ ಜನೊಲ ಪೋದು ಕುದುರೆದ ಬೀಲದ ಬಣ್ಣನ್ ಪರೀಕ್ಷೆ ಮನ್ಪುಗ, ಏರ್ನ ಹೇಳಿಕೆ ಸತ್ಯ ಆಪುಂಡಾ ಅಕಲೆಗ್ ಸೋತಿನಕುಲು ದಾಸಿ ಆವೋಡು ಪಂದ್ ಪಂಥ ಪಾಡುವೆರ್.

ದೇವೇಂದ್ರೊನ ಉಚ್ಚೈಶ್ರವಸ್ಸುದ ಬೀಲದ ಬಣ್ಣ ಕಪ್ಪು

ಇಂದ್ರನ ಪಟ್ಟೊದ ಕುದುರೆಯಾಯಿನ ಉಚ್ಚೈಶ್ರವಸ್ಸಿದ ಬಣ್ಣ ಪೂರ್ತಿ ಬೊಳ್ದು ಪನ್ಪಿನ ವಿಷಯೊ ಸರ್ವವಿದಿತ ಆಂಡಾ ವಿನತೆನ್ ಎನ್ನ ದಾಸಿ ಮನ್ಪೊಡು ಪಂದ್ ಎಂಚಾಂಡಲಾ ಇಂದ್ರನ ಪಟ್ಟದ ಕುದುರೆ ದ ಬೀಲನ್ ಕಪ್ಪು ಮನ್ಪೊಡು ಪಂದ್ ಎನ್ನುದು ಒಂಜಿ ಉಪಾಯ ನಾಡುವಲ್. ತನ್ನ ಸರ್ಪ ಸಂತತಿದ ಜೋಕುಲೆನ್ ಲೆತ್ತುದು ಕುದುರೆದ ಬೀಲನ್ ಅಂಟ್ದ್ ಅವೆನ್ ಕಪ್ಪು ತೋಜುಲೆಕ್ಕ ಮನ್ಪೊಡು ಪಂದ್ ಕದ್ರು ಜೋಕುಲೆಡ ಪನ್ಪಲ್. ಸುರು ಸುರು ಗ್ ಜೋಕುಲು ಉಂದೆನ್ ಮನ್ಪರೆ ಒಪ್ಪುಜೆರ್. ಬೊಕ್ಕ ಕದ್ರು ಶಾಪ ಕೊರ್ಪೆ ಪಂದ್ ಪನ್ನಗ ಪೋಡಿನ ಜೋಕುಲುಲು ಅಮ್ಮ ಪನಿಲೆಕ ಮನ್ಪರೆ ಒಪ್ಪಿಯೆರ್.

ಬೀಲದ ಬಣ್ಣದ ಪರೀಕ್ಷೆ

ಕದ್ರು ಬೊಕ್ಕ ವಿನತೆ ದೇವೇಂದ್ರೊನ ಉಚ್ಚೈಶ್ರವಸ್ಸುದ ಬೀಲದ ಬಣ್ಣದ ಪರೀಕ್ಷೆ ಮನ್ಪರೆ ಒಟ್ಟುಗು ಪೋಯೆರ್ ಪೋದು ತೂನಗ, ಕುದುರೆದ ಪೆರ್ ದ ಲೆಕ್ಕ ಬೊಳ್ದು ತೋಜಿಂಡಲಾ, ಬೀಲ ಮಾತ್ರ ಹಾಲಾಹಲ ಪಂಡ ವಿಷದ ಲೆಕ್ಕ ಕಪ್ಪಾದ್ ತೋಜಿಂಡ್. ಪಂಥನ್ ಕದ್ರು ಗೆಂದಿಯಲ್. ಪಂಥೊದ ಲೆಕ್ಕನೇ ವಿನತೆ ಕದ್ರುನ ದಾಸಿ ಆಯಳ್, ಅಪ್ಪೆ ಗ್ ಕೊರ್ತಿನ ಅರುಣನ ಶಾಪಲ ಫಲಿಸುಂಡು.

ಗರೋಡಧ್ಭವ

ಕಾಲ ಕರಿಯೊಂದು ಪೋಯಿಲೆಕ್ಕನೇ, ಜೋಪಾನವಾದ್ ತಾಂಕೊಂದು ಬೈದಿನ ತೆತ್ತಿ ಪುಡದ್ ಗರುಡನ ಉದ್ಭವ ಆದ್ ಅಪ್ಪೆ ವಿನತೆನ ದಾಸ್ಯದ ಸೆರೆಡ್ದ್ ಬುಡ್ಪಾವೆರ್.