ಕರಿಮಣಿ

ಕರಿಮಣಿ ಪಂಡ ಮದಿಮೆಡ್ ಮದಿಮಯೆ ಮದಿಮಾಲೆಗ್ ಕಟ್ಟುನ ಪವಿತ್ರವಾಯಿನ ಸರ. ವೈವಾಹಿಕ ಸ್ಥಿತಿತ ಸಂಕೇತವಾದ್ ಕರಿಮಣಿನ್ ಪಾಡುವೆರ್. ಈ ಪದ್ಧತಿ, ಆಚರಣೆ ಪುಟ್ಟಿನಿ ಭಾರತೊದ ದಕ್ಷಿಣ ಭಾಗೋಡು. ಕರಿಮಣಿನ್ ಮಂಗಳ ಸೂತ್ರ ಪಂಡ್ ಲೆಪ್ಪುವೆರ್. ಮಂಗಳ ಸೂತ್ರ (ಸಂಸ್ಕೃತೊಡು ಮಂಗಳ ಪಂಡ 'ಪವಿತ್ರ, ಶುಭ', ಬೊಕ್ಕ ಸೂತ್ರ ಪಂಡ 'ದಾರ') ಪನ್ಪುನ ಅರ್ತೊ ಉಂಡು. ಉಂದೆತ ಮೂಲ ಕ್ರಿ.ಶ ೬ ನೇ ಶತಮಾನ ಪಿರವುದ. ದಾಯೇ ಪಂಡ ಬೇತೆ ಅಂಜೊವು ಬೊಕ್ಕ ದುಷ್ಟಶಕ್ತಿಡ್ದ್ ಕಾಪೆರೆಗಾದ್ ಮದಿಮಾಲೆನ ಸುತ್ತ ಒಂಜೇ ಮಂಜೊಲ್ ನೂಲುನು ಕಟ್ಟುವೆರ್. ಕರಿಮಣಿನ್ ಪಾಡುನ ಕ್ರಮೊ ಭಾರತ, ಶ್ರೀಲಂಕಾ ಬೊಕ್ಕ ನೇಪಾಲೊಡು ಒಂಜಿ ಅಭ್ಯಾಸ, ಪದ್ದತಿ ಆತುಂಡು. ಈ ಅಭ್ಯಾಸ ಮದಿಮೆ ಸಮಾರಂಬೊದ ಮಲ್ಲ ಆಚರಣೆ.

ಬೇತೆ ಪುದರ್‌ಲ್

ಕರಿಮಣಿ
ತಾಳಿ
ಮಾಂಗಲ್ಯ
ಮಂಗಳಸೂತ್ರ

ಮಹತ್ವ

ಕರಿಮಣಿತ ಮಹತ್ವನ್ ಆದಿಶಂಕರಾಚಾರ್ಯೆರ್ ಅರ್ನ ಪ್ರಸಿದ್ಧ ಪುಸ್ತಕೊಡ್ ಸೌಂದರ್ಯ ಲಹರಿಡ್ ಕುಡ ಪುನರಾವರ್ತನೆ ಮಲ್ದೆರ್. ಹಿಂದೂ ಸಂಪ್ರದಾಯೋದ ಪ್ರಕಾರ, ಕಂಡನೆನೆ ದೀರ್ಘಾ ಆಯಸ್ಸುಗ್ ಬೋಡಾದ್ ಕರಿಮಣಿನ್ ಪಾಡುವೆರ್. ಧಾರ್ಮಿಕ ಪದ್ಧತಿಲು ಬೊಕ್ಕ ಸಾಮಾಜಿಕ ನಿರೀಕ್ಷೆದ ಪ್ರಕಾರ ಪನ್ಪಿನಾಂಡ, ಮದಿಮೆ ಆಯಿನ ಪೊಣ್ಣು ತನ್ನ ಜೀವನೊದ ಕಡೇ ಮುಟ್ಟಲ ಕರಿಮಣಿನ್ ಪಾಡೊಡು. ದಾಯೇ ಪಂಡ ಈ ಅಭ್ಯಾಸ ಕಂಡನೆನ ಆಯಸ್ಸುನ್ ಜಾಸ್ತಿ ಮಲ್ಪುಂಡು ಪನ್ಪಿನ ನಂಬಿಕೆ ಉಂಡು.

ವಿನ್ಯಾಸೊಲು

ಕರಿಮಣಿನ್ ಬೇತೆ ಬೇತೆ ಬಗೆತ ವಿನ್ಯಾಸೋಡು ತಯಾರ್ ಮಲ್ಪುವೆರ್. ಸಾಮಾನ್ಯವಾದ್ ತೂವೆರೆ ಸಿಕ್ಕುನು ಲಕ್ಷ್ಮಿ ತಾಳಿ, ತೆಲುಗೆರ್ ಪಾಡುನ ಪುಸ್ತೇಲು, ಮಲಯಾಳಿ ದಕುಲ್ ಪಾಡುನ ಎಲಾ ತಾಳಿ ಬೊಕ್ಕ ಮಿನ್ನು ಬೊಕ್ಕ ಕ್ಷತ್ರಿಯ ಜಾತಿದ ತಮಿಳೆರ್ ಪಾಡುನ ಕುಂಭ ತಾಳಿ. ವಿನ್ಯಾಸೋನು ಮದಿಮಾಯೆನ ಕಡೆತಕುಲು ಅಕನ ಪದ್ಧತಿದ ಪ್ರಕಾರ ಆಯ್ಕೆ ಮಲ್ಪುವೆರ್. ಗುಜರಾತಿದಕುಲ್ ಬೊಕ್ಕ ಮಾರ್ವಾಡಿ ನಗುಲು ಸಾಮಾನ್ಯವಾದ್ ಬಂಗಾರ್ದ್ದ್ ಸರೋಟ್ ವಜ್ರದ ಪೆಂಡೆಂಟ್ ನ್ ಪಾಡುವೆರ್. ಉಂದು ಅಲಂಕಾರೊಗ್ ಮಾತ್ರ ಮತ್ತು ಸಾಂಪ್ರದಾಯೋಗ್ ಅರ್ಥಗ್ ಬದಲಿ ಅತ್ತ್. ಮಹಾರಾಷ್ಟ್ರದಕುಲು ರಡ್ದ್ ಪೆಂಡೆಂಟ್ ಪಾಡುವೆರ್. ಕನ್ನಡಿಗೆರ್ನ ಮಾಂಗಲ್ಯ, ತಾಳಿ, ಮಂಗಳ ಸೂತ್ರ ಬೊಕ್ಕ ಕರಿಮಣಿ ಮಹಾರಾಷ್ಟ್ರದಕಲೆ ಹೋಲುಂಡು. ಐಟ್ ಸಾಮಾನ್ಯವಾದ್ ರಡ್ಡ್ ವಾಟಿ ಉಪ್ಪುಂಡ್. ಆಂಡ ಇತ್ತೆ ಫ್ಯಾಷನ್ ಬರ್ರೆ ಪೋದ್ ಜನಕುಲ್ ಒಂಜೇ ವಾಟಿದ ಕರಿಮಣಿ ಅತ್ತುಂಡ ಬೇತೆ ಬೇತೆ ನಮುನಿದ ವಿನ್ಯಾಸದ ಕರಿಮಣಿ ಪಾಡುವೆರ್.