ವಿಷಯಕ್ಕೆ ಹೋಗು

ಕಾಟ್ ಬಸಲೆ(ಕಾಡ ಬಸಲೆ)

ವಿಕಿಪೀಡಿಯರ್ದ್
ಮಣ್ಣ್‌ದ ಕುಂಡೊಡು ನಡ್ತಿನ ಕಾಡ್ ಬಸಲೆದ ದಯಿ
ಮಣ್ಣ್‌ದ ಕುಂಡೊಡು ನಡ್ತಿನ ಕಾಡ್ ಬಸಲೆದ ದಯಿ

ಕಾಟ್ ಬಸಲೆ (ಕಾಡ್ ಬಸಲೆ) ಸಾದಿ ಬರಿಟ್ ಬುಳೆಪುನ ಒಂಜಿ ದೈಯಿ. ಇರೆತ್ತ ಬರಿಟ್ ಇಪ್ಪುನ ಗಚ್ಚಿದ ನಡೂಡ್‌ದು ಪೊಸ ದೈ ಪುಟ್ಟುದು ಬರ್ಪುನ ಈ ದಯಿತ್ತ ಇಸೇಸ. ಶಾಲೆಗ್ ಪೋಪುನ ಜೋಕುಲು ಈ ದಯಿತ್ತ ಇರೆನ್ ಬೂಕುದ ಉಲಾಯಿ ದೀದ್ ಕಿನ್ನಿ(ಪೊಸ ದಯಿ) ದೀಪುಂಡು ಪಂಡ್‌ದ್ ನಂಬುವೆರ್. ನೀರ್‌ದ ಪಸೆ ಎಚ್ಚ ಇಪ್ಪುನ ಕಡೆಟ್ ಧಾರಾಳವಾದ್ ಬುಲೆಪುಂಡು. ಕ್ರಾಸ್ಸುಲೇಸಿಯೆ(Crassulaceae) ಕುಟುಮೊದ ಉಲಾಯಿ ಬರ್ಪುನ ಈ ದಯಿತ್ತ ಸಸ್ಯಶಾಸ್ತ್ರೀಯ ಪುದರ್ ಬ್ರಿಯೋಫಿಲ್ಲಮ್ ಪಿನ್ನಾಟಮ್(Briyophyllum Pinnatum)[೧].

ಬೇತೆ ಬಾಸೆಲೆಡ್ ಪುದರ್[ಸಂಪೊಲಿಪುಲೆ]

ಕಾಡ್ ಬಸಲೆದ ಇರೆ
ಕಾಡ್ ಬಸಲೆದ ಇರೆ
ಕಾಡ್ ಬಸಲೆದ ಪೂ
ಕಾಡ್ ಬಸಲೆದ ಪೂ
  • ಕನ್ನಡ-ಪತ್ರಜೀವ, ಎಲೆಚಿಗರಿ, ಪಟ್‌ಪಟೆ ಎಲೆ, ಕಾಡುಬಸಳೆ, ದಡಬಡಕಿ
  • ಸಂಸ್ಕೃತ-ಅಸ್ಥಿಭಕ್ಷ, ಪತ್ರಬೀಜ
  • ಹಿಂದಿ-ಘಾಯಮಾರಿ, ಪಥರ್‌ಚಟಾ
  • ಇಂಗ್ಲಿಷ್- ಮಿರಾಕಲ್ ಪ್ಲಾಂಟ್, ಕ್ಯಾಥಿಡ್ರಿಲ್ ಬೆಲ್
  • ಮಲಯಾಳಮ್-ಎಲಮೊಳಚ್ಚಿ

ಮೂಲ[ಸಂಪೊಲಿಪುಲೆ]

ಈ ದಯಿತ್ತ ಮೂಲ ಮಡಗಾಸ್ಕರ್ ದ್ವೀಪ ಆಂಡಲಾ, ಭಾರತ, ಆಸ್ಟ್ರೇಲಿಯಾ ನ್ಯೂಜಿಲೆಂಡ್, ವೆಸ್ಟ್ ಇಂಡಿಸ್, ಫಿಲಿಪೈನ್ಸ್ ಈ ದೇಸೊಲೆಡ್‌ಲಾ ತೂವರ ತಿಕ್ಕುಂಡು[೨].

ತೂವರ[ಸಂಪೊಲಿಪುಲೆ]

ಸುಮಾರ್ ೧ ಮೀಟರ್‌ದಾತ್ ಎತ್ತರ ಬುಳೆವುನ ಈ ದೈಯಿತ ಇರೆ ದೀರ್ಘ ಅಂಡಾಕಾರಡ್(ಪಕ್ಕಿದ ತೆತಿದಲೆಕ) ದಪ್ಪ ಇಪ್ಪುಂಡು. ಇರೆ ಸುಮಾರ್ ೩೦ಸೆಮೀ. ಉದ್ದ. ಮುದೆಲ್ಡ್ ಎದುರುಬದುರಾದ್ ೪-೫ ಇರೆಕ್ಕುಲು ಇಪ್ಪುವಾ. ದಯಿತ್ತ ಮುದೆಲ್‌ ದಪ್ಪ ಆದ್ ತಿರ್ಲ್ ದಿಂಜಿದ್ ಇಪ್ಪುಂಡು. ಇರೆತ್ತ ಪಿದಯಿದ ಕೊಡಿ ಸಾಲ್‌ಡ್ ೫-೭ ಗಚ್ಚಿ ಇಪ್ಪುಂಡು. ಈ ಗಚ್ಚಿದ ನಡುಡ್ದು ಪೊಸ ದಯಿ ಪುಟ್ಟುನಿ ಕಾಡ್ ಬಸಲೆದ ಇಸೇಸ. ಇರೆ ಪರ್ಂದ್ ಆದ್ ನಿಲಕ್ ಬೂರಿಬೊಕ್ಕ ಗಚ್ಚಿಡ್ ಬತ್ತಿನ ತಿರಿ ಮಲ್ಲೆ ಆದ್ ಪೊಸ ದಯಿ ಪುಟ್ಟುಂಡು.

ಈ ದಯಿತ್ತ ಪೂ ತೂವರ ಕಂಕಣೆ ಪಾಡ್ದಿನ ತುತ್ತೂರಿದ ಲೆಕ ತೋಜುಂಡು. ಪೂ ಸುಮಾರ್ ೫ ಸೆಮೀ ಉದ್ದ ಮುದೆಲ್ಡ್ ಹದ ಗುಲಾಬಿ ಬಣ್ಣೊಡು ಇಪ್ಪುಂಡು.

ಗಲಸುನಿ[ಸಂಪೊಲಿಪುಲೆ]

ಪಿರಾಕ್‌ಡ್ ಅತ್ತಂದೆ ಹಳ್ಳಿಲೆಡ್ ಈ ದಯಿತ್ತ ಇರೆನ್ ಮರ್ದ್‌ಗ್ ಗಲಸುವೆರ್. ಮೂತ್ರಪಿಂಡೊಡು ಕಲ್ಲ್ ಇತ್ತಿನಕುಲೆಗ್ ಕಲ್ಲ್ ಕರಾದ್ ಪೋವರ, ಕಾಟ್ ಬಸಲೆದ ಇರೆ ತಿನರ ಪನ್ಪೆರ್. ಕಫ ಅಸ್ತಮಾ ಇತ್ತಿನಕುಲು ಈ ದಯಿತ್ತ ಇರೆನ್ ಕಲ್ಲ್‌ಸಕ್ಕರೆದೊಟ್ಟುಗು ದೆತೊಂಡ ಗುಣ ಆಪುಂಡು. ಅತ್ತಂದೆ ಈ ದಯಿನ್ ಅಧಿಕ ರಕ್ತ ಒತ್ತಡ, ಜ್ವರ, ಮಲಬದ್ಧತೆ ಸೀಕ್‍ಲೆನ್ ಗುಣ ಮಲ್ಪರ ಗಲಸುವೆರ್[೩].

ಉಲ್ಲೇಕೊಲು[ಸಂಪೊಲಿಪುಲೆ]

  1. ಔಷಧೀಯ ಸಸ್ಯ ಸಂಪತ್ತು (ಪಿ ಎಸ್ ವೆಂಕಟರಾಮ ದೈತೋಟ). ವಿವೇಕಾನಂದ ಸಂಶೋಧನಾ ಕೇಂದ್ರ, ಪುತ್ತೂರು. 3 August 2022.
  2. "Bryophyllum pinnatum (Lam.) Oken". keyserver.lucidcentral.org. Weeds Of Australia. Retrieved 3 August 2022.
  3. "Bryophyllum pinnatum (Ayurvedic plant) uses and pics". homeremediess.com. Mason Muller. Archived from the original on 3 August 2022. Retrieved 3 August 2022. {{cite web}}: Unknown parameter |dead-url= ignored (help)